Omukwenda Paulo akakanganaya ngoku Yehova * ni ‘Nyamuhanga w’erikirania lyosi, iyo yukathukiranaya omwa malighe wethu wosi.’ (2 Abanya Korinto 1:3, 4) Neryo kwesi e Biblia yikathukakasaya ngoku sihali mundu oyo Nyamuhanga athe angawathikya kandi ngoku sihali kitsibu ekya thwangabana Thatha wethu w’elhubulha akalemwa erithuhumulikania.

Ni kwenene hane ekya thutholere erikolha, thwamabya thwanzire Nyamuhanga athuhumulikanaye. Dokita angathoka athi erithuwathikya isithuthamughendera n’erimubwira ebitsibu byethu? Ky’ekikaleka Amasako iniathuhana athi: “Muyithunde hakuhi na Nyamuhanga, nayu akendi yithunda hakuhi nenyu.”—Yakobo 4:8.

Thwanga kakasya thuthi ngoku Nyamuhanga akendi yithunda hakuhi nethu? Eky’erimbere, kundi akabya ikwanemuthubwira athi anzire iniathuwathikya. (Lebaya  akasanduko akali omwa mwatsi ono.) N’ekyakabiri, kundi thunawithe eby’erileberyako by’abandu aba Nyamuhanga abirihumulikania—abandu ng’ithwe, ab’omwa buthuku bwethu buno n’abakera.

 Ng’abangyi munabwire abakasaba Nyamuhanga y’obuwathikya, Omwami Dawudi nayu mwahikwako ebitsibu. Mwanasaba Yehova athi: “Wunyowe omughulhu ngakulhakira busana n’eriwathikya.” Nyamuhanga mwanamuwathikya? Ee. Dawudi mwongerako athi: “Namawathikibwa, kandi omuthima waghe akatsema kutsibu.”—Esyonyimbo 28:2, 7.

Nyamuhanga mwaha Yesu y’olhukwamirwa lhw’erihumulikania abandu. Omwa mibiiri mingyi eya Nyamuhanga aby’amuhere, Yesu abya ‘w’erilhunga ababbunikire omo mithima’ haghuma ‘n’erikirania abosi abakalira.’ (Isaya 61:1, 2) Ngoku kyanalhaghulhawa, Yesu mwatsomana kutsibu abandu “abakanuba n’eriheka ebirithohire.”—Matayo 11:28-30.

Yesu mwahumulikania abandu omw’ibaha amahano awuwene, eribakangania olhukeri, nibya ihayira inialhamya esyondwalha syabo. Kiro kighuma omuhagha mwalemba Yesu athi: “Wamabya wunanzire, wangathoka erinyilhamya.” Yesu mwamukwira obulighe, amamubwira athi: “Nyinanzire, wulhamibawe!” (Mariko 1:40, 41) Neryo omuhagha mwalhama.

Nomwakine indi Yesu munabwire syakiri okwa kihugho, Thatha wiwe, Yehova, “Nyamuhanga w’erikirania lyosi,” anemulholha embere eriwathikya abali n’obwagha. (2 Abanya Korinto 1:3) Thalebya esyonzira ini ngulhu-ngulhu esya Nyamuhanga akakolesaya erihumulikania abandu.

• E Biblia. “Ebyosi ebya sakawa erimbere omwa Masako, byasakawa busana n’erithukangirirya. Neryo Amasako akathuha eriyitsingirira n’erihanda omuthima, ithwathoka eribya n’amaha.”—Abanya Roma 15:4.

• Omulimu Abuyirire wa Nyamuhanga. Isihali halhaba buthuku bunene Yesu aliholire, ekithunga kyosi ky’Ekikristayo mukyabya omwa buholho. Busana naki? ‘Mukyaghendera omw’ubaha lya Yehova n’omw’isibikibwa [erihumulikanibwa] ly’omulimu abuyirire.’ (Emibiri 9:31) Omulimu abuyirire, akaghalha ka Nyamuhanga akakakolha, awithe maaka manene. Nyamuhanga angana kolesyagho erihumulikania owosi-wosi oyuli omwa mibere yosi-yosi.

• Omusabe. Ekinywe kya Nyamuhanga kikathuhabulha kithya: “Simuhanga-hangaye emithima yenyu.” Kandi iyongerako yithi, “Nikwa omwa buli mwatsi mubwire Nyamuhanga obwagha bwenyu, imukamusaba n’erimuhathikana; N’obuholho bwa Nyamuhanga obulhabire amenge wosi aya bwasyatheya emithima yenyu n’amaghaniryo wenyu omw’isi syenyu.”—Abanya Filipi 4:6, 7.

• Abakristayo Balikyethu banganabya banywani b’okwenene abanga thuhumulikania omughulhu thuli omwa mibere eyikalire. Omukwenda Paulo mwakania okw’ababya haghuma nayu athi babya bakamuhumulikania omwa buthuku ‘bw’amalighe n’eriendereribwa.’—Abanya Kolosai 4:11; 1 Abanya Tesalonika 3:7.

Aliwe wanganabya iwune mubulha ebyosi ebi kwenene nga byangana kolha. Thuthalebya ndeke eby’erileberyako by’abandu ababana ebitsibu ebikanibweko omwa mwatsi owalyatsuka. Ng’ibo, nawu iwangana yilhangirira ngoku Nyamuhanga akinaberereraya omulhaghe ow’akatsemesaya ono: “Ng’oyukalembesanibawa na nyinya wiwe, ko nasyabalembesania nyithya, kandi mwasyakiranibwa.”—Isaya 66:13.