1. Embanulho yikaleka ebibuya byahi ibyathokekana?

EMBANULHO ya Yesu yikathukyungulira mighisa mingyi. Ng’eky’erileberyako, embanulho yikaleka ikyathokekana okwa baana bosi ba Adamu abanzire erithunganene erisyabya b’omw’ihiika lya Nyamuahanga. Oghundi mughisa wow’erisyabyaho kera na kera omwa tseme. Kandi ekikulhu kutsibu, embanulho yihambire okwa myatsi y’omughaso munene kutsibu okwa bosi abali elhubulha n’okwa kihugho.—Abaebrania 1:8, 9.

2. (a) Ni myatsi yahi ey’omughaso munene kutsibu ey’omwa lhubulha n’okwa kihugho eyo Yesu ahira omwa musabe wiwe? (Lebaya ekisasani ekiri okw’itsuka.) (b) Omo mwatsi ono thukendi kania okuki?

² Ihakine myaka ng’ibiri Yesu imwaholha, mweghesya abigha biwe erisaba bathi: ‘Thatha wethu oyuli elhubulha, erina lyawu libye libuyirire. Obwami bwawu bwase. Erisonda lyawu liyirawe omo kihugho ngoko liri omo lhubulha.’ (Matayo 6:9, 10) Thulebaye embanulho nga yikahamba yithi okw’iyira erina lya Yehova mwa libuyirire, okw’ithabalha ly’Obwami bwa Nyamuhanga, n’okw’ikolha erisonda lya Nyamuhanga.

3. Erina lya Yehova lik’imaniraki? Sitani mwatsandya athi erina lya Nyamuhanga?

³ Eky’erimbere, Yesu mwasaba athi erina lya Nyamuhanga libye libuyirire. Erina lya Yehova lik’imanira Yehova iyuwene-wene n’emibere yiwe, iyo nga nindi. Yuwithe obuthoki bwosi kandi abuyirire kutsibu. Yesu kandi mwamwahulha mwa ‘Thatha Oyubuyirire’. (Yoane 17:11) Kundi Yehova abuyirire, ebihano n’ebyosi ebyo akakolha bibuyirire. Aliwe omwa Edeni, Sitani mwahakanisya ehamuli ya Yehova ey’eribya iyuwanga hiriraho abandu b’eby’erighenderako. Mwabugha amabehi oku Yehova n’eritsandya erina lya Nyamuhanga.—Enzuko 3:1-5.

4. Yesu mwayira athi erina lya Nyamuhanga mwa libuyirire?

⁴ Aliwe Yesu iyo abya anzire erina lya Yehova, kandi mwakolha kutsibu eriliyira mwa libuyirire. (Yoane 17:25, 26) Athi? Erilhabira omwa mibere yiwe iniane okwa kihugho n’erikangirirya liwe, Yesu mwawathikya abandu eriminya ngoku emisingyi ya Yehova yihikire kandi ngoku yiriho busana n’erithughasira. (Soma Esyonyimbo 40:8-10.) Sitani nomwanamwaghalhaya omwa lhuholho olhukalire, Yesu iyo mwasighalha iniane muthaleghulha. Mwakangania ngoku kithokekene omundu oyuhikene erighondera Nyamuhanga ya ndeke-ndeke isyathalemwa.

5. Thwangayira thuthi erina lya Yehova mwa libuyirire?

⁵ Thwanga kangania thuthi ku thwanzire erina lya Yehova? Omwa mibere yethu. Yehova anzire ithwabya babuyirire. (Soma 1 Petero 1:15, 16.) Eki kikamanyisaya ithwe erimuramya iyo musa n’erimwowa n’omuthima wethu wosi. N’omughulhu thuk’endereribawa thukalengaho erighendera okwa bya Yehova akathukangiriraya. Thukabya thukaghendera okwa bihano bya Yehova, thukaletha olhukengerwa okwa lina liwe. (Matayo 5:14-16) Omw’ekyo thukakanganaya ngoku ebihano biwe byuwene kandi ngoku Sitani ni mubehi. Busana n’eribya isithuhikene, thukabya ithunemuhalya. Aliwe kikabya kyamabya, thukayisubamu n’erilengaho kutsibu erithendi kolha ekyanga tsandya erina lya Yehova.—Esyonyimbo 79:9.

6. Ni kyahi ekikaleka Yehova iniathuthwalha mw’abathunganene nomwakine indi sithuhikene?

⁶ Mbulha thuli bahakabibwa kutse ‘ab’esindi mbuli,’ Yehova akaghanyira ebibi byethu thwamabya ithunayikethere embanulho. Akalighira abakayihayo okw’iyo eribya baramya biwe. Akahulha Abakristayo abahakabibwa mwa baghalha biwe abathunganene ‘n’ab’esindi mbuli’ mwa banywani biwe abathunganene. (Yoane 10:16; Abanya Roma 5:1, 2; Yakobo 2:21-25) Neryo busana n’ekyo, na lino, embanulho yikaleka ikyathokekana eribya n’obunywani na Thatha wethu n’eriyira erina liwe mwa libuyirire.

7. Ni mighisa yahi eyikathokekana busana n’embanulho?

⁷ Omwa musabe ogho Yesu aha abigha biwe ng’eky’erileberyako, mwabugha athi: “Obwami bwawu bwase.” Embanulho yihambene yithi n’Obwami bwa Nyamuhanga? Obwami bwa Nyamuhanga ni buthabali obwimanirwe na Yesu n’abandu 144,000 abasombwerwe erilhua omwa bandu. Embanulho y’eyikaleka ikyathokekana okwa bahakabibwa aba erisyalhubukira elhubulha. (Eribisulirwa 5:9, 10; 14:1) Bakendi syabya bami kandi bahereri n’erisyathabalha ekihugho habw’emyaka rukumi. Omwa buthuku obo, Yehova akendi syakolesya Obwami erikolha ekihugho mwa paradiso n’eriwathikya abandu erihikana.  Erighunzerera, abaghombe ba Yehova abali elhubulha n’abali okwa kihugho abosi ibabya omw’ihiika lighuma. (Eribisulirwa 5:13; 20:6) Yesu akendi syaherya Sitani n’erilhusya h’ebitsibu byosi aby’abiriletha.—Enzuko 3:15.

8. (a) Yesu mwawathikya athi abigha biwe eriyitheghererya obukulhu bw’Obwami bwa Nyamuhanga? (b) Thukasighika thuthi Obwami bwa Nyamuhanga munabwire?

⁸ Yesu mwawathikya abigha biwe eriyitheghererya obukulhu bw’Obwami bwa Nyamuhanga. Ekyo mwakikolha athi? Yesu abere anabiribatizibwa, mwatsuka erithulha “engulhu yuwene y’Obwami bwa Nyamuhanga” ehosi ey’abya akaya. (Luka 4:43) Mwabwira n’abigha biwe athi bathule omwatsi wiwe “erihika okwa nduli-nduli sy’ekihugho.” (Emibiri 1:6-8) Na munabwire, erilhabira omwa mubiiri w’erithulhughania engulhu y’Obwami, abandu bawithe akaghisa ak’erigha okwa mbanulho n’eribya ndulhani sy’Obwami bwa Nyamuhanga. Thukakanganaya ku thukasighika Obwami omw’iwathikya abahakabibwa erithulha engulhu yuwene omwa kihugho kyosi.—Matayo 24:14; 25:40.

9. Busana naki ithwayikethera ngoku Yehova akendi syaberererya ekighendererwa kiwe busana n’abandu?

⁹ Yesu amanyisayaki akathasyabugha athi: “Erisonda lyawu liyirawe”? Yehova amabugha athi ekindu kibye, kikabya ikikendibya. (Isaya 55:11) Eriyisamambulha lya Sitani lyabya isiryanga lemesya Yehova. Yehova abya na kighendererwaki busana n’ekihugho? Abya anzire ekihugho ikyusulha mw’olhubutho lhw’abaana ba Adamu na Eva abahikene. (Enzuko 1:28) Adamu na Eva ku baholha isibathabutha, ekighendererwa kya Nyamuhanga eky’eryusulya ekihugho mwa baana babu sikyanga bererere. Neryo Yehova mwaleka batsuke erithunga abaana. Embanulho yikaleka abosi abawithe erikirirya ibabana akaghisa k’erisyahikana n’erisyabyaho kera na kera. Yehova anzire abandu kandi anzire ithwathunga engebe eyuwene eyo athusunzira.

10. Embanulho yikaghasira yithi abandu ababiriholha?

¹⁰ Kandi ibbwa esyomiliyoni sy’abandu abaholha isibathathunga akaghisa k’eriminya Yehova? Yehova anzire abandu ibabyaho. Neryo akendi syalhubukya ababiriholha. Embanulho yikaleka ikyathokekana ibo erisyalhubuka. Neryo bakendi sy’eghesibwa oku Yehova n’eribyaho kera na kera. (Emibiri 24:15) Yehova ya Nzuko y’engebe. Yehova akabya amalhubukya ababiriholha, akabya Thatha wabu. (Esyonyimbo 36:9) Omwa musabe w’eky’erileberyako ogho Yesu akangiriraya abigha biwe, mwabugha athi Yehova ni ‘Thatha wethu oyuli elhubulha.’ (Matayo 6:9) Yehova abirihererya Yesu y’olhukwamirwa lhukulhu kutsibu olhw’erilhubukya ababiriholha. Yesu mwabugha athi: “Ingye indi lhubuka n’engebe.”—Yoane 6:40, 44; 11:25.

11. Nyamuhanga awithe kighendererwaki busana “n’endeko nene”?

¹¹ Na Yesu mwabugha athi: ‘Omundu oyukakolha erisonda lya Nyamuhanga ya mughalha wethu, na mwali wethu, na koyo.’ (Mariko 3:35) Yehova anzire abandu erilhua omwa bihanda byosi n’emibughe ibabya baramya biwe. Abandu aba b’abakakanibawako ‘ng’endeko nene, eyo mundu athe angathoka erighanza.’ B’abandu abikirirye embanulho kandi banzire erighondera Nyamuhanga. Bakamupipa n’eribugha bathi: “Erilhama lyethu likalhua oku Nyamuhanga wethu, oyuwikere oko kithumbi ky’obwami, kandi likalhua oko Kyana ky’Embuli.”—Eribisulirwa 7:9, 10.

12. Omwa musabe wa Yesu, thuk’ighaki okwa kighendererwa kya Nyamuhanga busana n’abandu?

 ¹² Erilhabira omwa musabe ogho Yesu akangiriraya abigha biwe, thwabiriminya bingyi oku Yehova n’ekighendererwa kiwe busana n’abandu. Ng’eky’erimbere, thutholere ithwakolha ekyosi-kyosi eriyira erina lya Yehova mwa libuyirire n’erimusikya. (Isaya 8:13) Embanulho ya Yesu eyikaleka omulhamu wethu iniathokekana, nayu yikaletha olhukengerwa okwa lina lya Nyamuhanga. Kandi kwenene, erina lya Yesu lisa-lisa likamanyisaya “Yehova Ni Mulhamu.” Ekyakabiri, Yehova akendi syakolesya Obwami bwiwe eriletha emighisa yosi y’embanulho okwa bandu ab’owa. N’ekyakasathu, thuyikethere ngoku sihali ekyangalemesya erisonda lya Yehova erikoleka.—Esyonyimbo 135:6; Isaya 46:9, 10.

13. Ekikaleka ithwabatizibwa niki?

¹³ Enzira ngulhu eyothukakanganiraya mw’erisima embanulho mw’omughulhu thukayihayo oku Yehova n’eribatizibwa. Thukabya ithwamakangania ku thuwithe erikirirya omwa mbanulho kandi ku thwamabya ba Yehova. (Abanya Roma 14:8) Thukabya thwamabatizibwa, thukasaba Yehova erithuha “obunyamuthima-thima obuwene.” (1 Petero 3:21) Neryo Yehova akasubiraya omw’ilhangira athi thukaghasirawa omwa mbanulho eyo. Kandi thuyikethere ngoku akendi syathuha ebyosi eby’abiriyilhagha.—Abanya Roma 8:32.

14. Ni kyahi ekikaleka Yehova inialhaghira athi thwanze abandi?

¹⁴ Ebyosi ebyo Yehova akakolha ni busana n’olhwanzo lhwiwe lhunene. Anzire abosi abali omw’ihiika ly’abaramya biwe ibamugherererya n’eryanzana. (1 Yoane 4:8-11) Thukabya thukakangania abandu b’olhwanzo, thukaleka ikyalhangirika ku thwanzire eribya “baghalha ba Thatha [wethu] oyuli elhubulha.” (Matayo 5:43-48) Eky’erimbere omwa bihano ebikulhu-bikulhu bibiri ly’eryanza Yehova, n’ekyakabiri eryanza abandi. (Matayo 22:37-40) Enguma y’okwa syonzira esya thukakanganiraya mw’abandu ngoku thubanzire ly’eribakangirirya engulhu yuwene y’Obwami bwa Nyamuhanga. Thwamaghendera okwa kihano kya Nyamuhanga eky’eryanza abandi, na kwilhabirirya balikyethu abali omwa kithunga, olhwanzo olhwa thumuwithire ‘ilhukendi hikana.’—1 Yoane 4:12, 20.

15. (a) Ni mighisa yahi eyo thukathunga erilhua oku Yehova lino? (b) Ni mighisa yahi eyo thukendi syathunga mwa buthuku bw’embere?

¹⁵ Yehova akathukakasaya ngoku thwamabya n’erikirirya omwa mbanulho, ebibi byethu bikasangulhawa. Akathughanyira amalholho wethu wosi. (Soma Emibiri 3:19-21.) Ngoku thwana biriminya, embanulho yikaleka ikyathokekana Yehova eriyira abandi bandu mo baghalha biwe elhubulha. Abandu aba b’abahakabibwa. (Abanya Roma 8:15-17) N’ab’esindi mbuli akabakokaya eribya omw’ihiika liwe ery’okwa kihugho. Bakendi syabya babirihikana, hakendi syabya erilengesibwa ly’erighunzerera. Bakendisyabya bamakangania obuthaleghulha oku Yehova, neryo nabu akendi syabayira mo baana biwe. (Abanya Roma 8:20, 21; Eribisulirwa 20:7-9) Yehova akendisyabya iniananzire abaana biwe mughulhu wosi. Embanulho yikendi syalholha embere eriletha mighisa erihika kera na kera. (Abaebrania 9:12) Yehova abirithuha ekihembo ky’obughuli eki, kandi sihali wangathoka erithulhusya kyoko.

16. Embanulho yikathuha yithi obwiranda?

¹⁶ Thwamayisubamu amalholho wethu, sihali ekya Sitani angakolha erithulemesya eringira omw’ihiika lya Yehova. Yesu mwaholha “ngendo nguma.” Embanulho yabirilihwa erihika kera na kera. (Abaebrania 9:24-26) Adamu mwathulethera olhuholho, aliwe ekihongwa kya Yesu kikendi syathulethera ngebe y’erikotha. Embanulho yangana thuyira bwiranda oko kihugho kya Sitani n’erisagha olhuholho.—Abaebrania 2:14, 15.

17. Olhwanzo lhwa Yehova lhukakukanganayaki?

¹⁷ Ebyosi ebya Yehova abiribugha sibyangabya bithethabererera. Ngoku ebilhaghiro by’obuhangwa ebyo Yehova abirikolha sibirihinduka, na Yehova syendi syahinduka. Sihali kiro akendi syathulhabirya ahisi. (Malaki 3:6) Yehova syalithuha ekihembo ky’engebe lisa. Akathuha n’olhwanzo lhwiwe. “Thwabiriminya kandi thwikirirye olhwanzo olho Nyamuhanga abithwanzamo. Nyamuhanga ni lhwanzo.” (1 Yoane 4:16) Emilhaghe yiwe yikabererera mughulhu wosi. Obuthuku obuthe bwa haali, ekihugho kikayuwana kutsibu eribya paradiso. Abandu abosi okwa mughulhu oyo bakendi syagherererya Yehova, ibanzana. Neryo abaghombe biwe abosi abali omwa lhubulha n’okwa kihugho bakendi syabugha bathi: “Omughisa n’olhukengerwa, n’amenge, n’ewasingya, n’erisikya, n’obuthoki, n’amaaka bibye oku Nyamuhanga wethu kera na kera! Amina!”—Eribisulirwa 7:12.