1, 2. Yesu abere abirighenda elhubulha, abakwenda bangabya ibabya ibanemuyibulya bathiki?

ABAKWENDA ba Yesu babya ibane okwa kithwe ky’Emizaituni bakalhangira mukama wabu, kandi munywani wabu, Yesu, akasumbirwa endatha omo kyanya mw’elhubulha n’eribulirana omwa bithu. (Emibiri 1:9, 10) Yesu abya iniamabirighunza emyaka ng’ibiri inianemubakangirirya, eribaghumya, n’eribasondolha. Lino y’oyu abya iniamabiri ghenda. Banga kolireki?

² Yesu abere athali aghenda elhubulha, mwabwira abigha biwe athi: “Mwasyabya bathuli b’omwatsi waghe e Yerusalema n’omo Yudea yosi ne Samaria, n’erihika oko nduli-nduli sy’ekihugho.” (Emibiri 1:8) Omubiiri oyo banga thokiregho bathi? Yesu abya iniabiribalhaghanisya ngoku omulimu abuyirire akendi syabawathikya. (Emibiri 1:5) Aliwe nindi oyuwangebere akabasondolha n’eritheghekania omubiiri w’erithulira omwa kihugho kyosi? Abakwenda babya ibanasi ngoku kera Yehova mwanakolesya abandu omw’isondolha ekithunga kya Israeli. Neryo babya ibanemuyibulya mbwino Yehova ng’akendi sombolha owundi musondoli.

3. (a) Yesu abere abirighenda elhubulha, n’ithwamu lyahi likulhu erya bakwenda bakolha? (b) Ni bibulyo byahi ebya thukendi suburya omo mwatsi ono?

 ³ Yesu imwanamabirighenda elhubulha, abakwenda biwe mubasekulya omwa Masako, bamasaba Nyamuhanga y’obuwathikya, neryo bamathoka erisombolha Matia erisuba omwa mwanya wa Yuda Iskariota. (Emibiri 1:15-26) Busana naki erisombolha eri abya mwatsi mukulhu kutsibu okwa bakwenda n’oku Yehova? Abakwenda mubaminya ngoku buthekwa-buthekwa batholere ibabya 12. * (Lebaya omwatsi ahikwa.) Yesu asombolha abakwenda biwe n’eribathendeka nuku banga thoka er’imanira olhukwamirwa lhukulhu omo kathi-kathi k’abandu ba Nyamuhanga. Lhwabya lhukwamirwaki olho, kandi Yehova na Yesu mubabathendeka bathi erimanira olhumimbi olhu? Ni mitheghekere yahi eyiri ng’eyo eyiriho na munabwire? N’ekindi, ‘thwang’ibuka thuthi abakathusondolha,’ na kutsibu-tsibu “omughombe oyutheleghulha n’ow’amenge”?—Abaebrania 13:7; Matayo 24:45.

4. Abakwenda n’abandi basyakulhu babya bawithe lhukwamirwaki e Yerusalemu?

⁴ Abakwenda mubatsuka erisondolha ekithunga eritsuka okwa Pentekote omwa mwaka wa 33. E Biblia yikabugha yithi “Petero mwahangana n’abandi bakwenda erikumi n’omughuma” amakangirirya endeko y’abandu bangyi ekwenene eyikalhamaya esyongebe. (Emibiri 2:14, 15) Abangyi b’okwa bandu abo mubabya Bakristayo. Enyuma w’aho, Abakristayo bahya-bahya abo mubalholha embere erigha “erikangirirya ly’abakwenda.” (Emibiri 2:42) Abakwenda babya n’olhukwamirwa lhw’eritheghekania esyosente sy’ekithunga. (Emibiri 4:34, 35) Kandi ibakakangiriraya abandu ba Nyamuhanga n’eribasabira, bathi: “Ithwe thwasyayihira okw’isaba n’omubiiri w’erikangirirya ekinywe.” (Emibiri 6:4) Kandi ibakathuma Abakristayo abasi ndeke erikangirirya eriyathulira omwa yindi myanya. (Emibiri 8:14, 15) Enyuma w’aho, abandi basyakulhu abahakabibwa mubawathikya abakwenda omwa mubiiri w’erisondolha ekithunga. Ibo ng’akathunga akakasondolha, ibakaha ebithunga by’obusondoli bw’erighenderako.—Emibiri 15:2.

5, 6. (a) Omulimu abuyirire mwawathikya athi akathunga akakasondolha? (Lebaya ekisasani ekiri okw’itsuka.) (b) Abamalaika mubawathukya bathi akathunga akakasondolha? (c) Ekinywa kya Nyamuhanga mukyawathikya kithi akathunga akakasondolha?

⁵ Abakristayo b’omwa kighonye ky’erimbere babya ibanasi ngoku erilhabira omu Yesu, Yehova yukasondolha akathunga akakasondolha. Niki ekyaleka ibakakasya ekyo? Eky’erimbere, omulimu abuyirire w’abya akawathikya akathunga ako. (Yoane 16:13) Ni kwenene abahakabibwa abosi ibakathunga omulimu abuyirire, aliwe abakwenda basa b’omulimu  abya akaha obuthoki bw’erisondolha. Ng’eky’erileberyako, omo mwaka wa 49, omulimu abuyirire mwasondolha akathunga akakasondolha erithwamu oko mwatsi w’eribanibwa. Ebithunga mubyaghendera okw’ithwamu eryo. Erighunzerera, ekyo mukyaleka ‘ibabana amaaka omw’ikirirya, n’erighanza lyabo mulyakanya obuli kiro.’ (Emibiri 16:4, 5) Ebaruha eyo bahandikira ebithunga eyihambire okw’ibanibwa, yikaleka ithwalhangira ngoku akathunga akasondolha kabya kw’omulimu wa Nyamuhanga kandi ibawithe emibere ng’olhwanzo n’erikirirya.—Emibiri 15:11, 25-29; Abanya Galatia 5:22, 23.

⁶ Ekyakabiri, abamalaika ibakawathikaya akathunga akakasondolha. Ng’eky’erileberyako, omulaika mwabwira Kornelio erisondya omukwenda Petero. Petero abere abirithulira Kornelio n’abahughu biwe, mubathunga omulimu abuyirire, nomwakine indi sibabya babanibwe. Kornelio neryo mwabya munyabihanda w’erimbere eribya Mukristayo. Abakwenda n’abandi balikyethu babere bowa eki, mubaligha eki ku n’isonda lya Nyamuhanga, neryo bamathangirira abanya bihanda abathabanibirwe eringira omwa kithunga ky’Ekikristayo. (Emibiri 11:13-18) Eki kikaleka ithwalhangira abamalaika ku mubasighika ndeke omubiiri w’erithulira ow’abya akasondolhwa n’akathunga akakasondolha. (Emibiri 5:19, 20) Ekyakasathu, akathunga akakasondolha ikakaghendera okwa Kinywe kya Nyamuhanga. Abalhume abo ibakakolesaya Amasako bakathwamu okwa myatsi y’esyonyikirirya sy’Ekikristayo n’erisondolha ebithunga.—Emibiri 1:20-22; 15:15-20.

7. Thukaminya thuthi ngoku Yesu Kristo yuwabya akasondolha ekithunga ky’Ekikristayo?

⁷ Nomwakine indi akathunga akakasondolha kabya kawithe obuthoki omwa kithunga, balikyethu abo babya ibanasi ngoku Yesu Kristo ya Musondoli. Ekyo thukakiminya thuthi? Omukwenda Paulo mwabugha athi Kristo yuwasombolha abandi “eribya bakwenda.” Kandi mwabugha athi Kristo ya “muthwe,” kutse Omusondoli w’ekithunga. (Abanya Efeso 4:11, 15) Omwakanya k’eriyahulha omwa lina ly’omughuma w’okwa bakwenda, omulimu mwabasondolha eriyahulha mwa Bakristayo. (Emibiri 11:26) Paulo abya inianasi ngoku ni kikulhu erighendera okw’ikangirirya eriseghemere okwa Biblia ery’abakwenda n’abandi balhume ababya bakasondolha. Nomwabine, Paulo mwabugha athi: ‘Nyanzire imwaminya Kristo kw’ali mukulhu w’obuli mundu.’ Eribugha indi “obuli mundu,” mwabya imwamune n’abosi ababya okwa kathunga akakasondolha. Kandi Paulo mwongerako athi: “Kandi Nyamuhanga ni mukulhu wa Kristo.” (1 Abanya Korinto 11:2, 3) Mukyalhangirika ndeke ngoku Yehova abiriyira Mughalha wiwe, Yesu Kristo, mwa musondoli w’ekithunga.

8, 9. Mughalha wethu Russell abya na lhukwamirwaki lhukulhu?

⁸ Eritsuka omwa mwaka wa 1870, Charles Taze Russell n’abandu banywani biwe mubatsuka erilengaho eriramya Nyamuhanga omwa mibere eya Biblia yikaligha n’eriwathikya abandi erikolha ekyo. Eki mwabya imuli n’eriwathikya ab’emibughe muthina-muthuina. Busana n’ekyo, mubatsukisya buthongole e Zion’s Watch Tower Tract Society omwa 1884, na mughalha wethu Russell yuwabya abere prezidenti w’akathongle ako. * (Lebaya omwatsi ahikwa.) Mwayeghesya ndeke Amasako, kandi mwathasagha eribisulha amabehi awali omwa syongagirirya sy’amadini, ng’eribugha ambu Nyamuhanga ni busathu, n’eribugha ambu  omundu ali mw’akalimu akatheholha. Omwa Biblia, mwabana ngoku Kristo akendisyabya akasubulha, syendi syalhangirwa kinyamubiri. Kandi mwaminya ngoku “emighulhu y’ebihanda” yanga hwererere omwa 1914. (Luka 21:24) Mughalha wethu Russell mwakolesya obuthuku bwiwe, akaghalha kiwe, n’esyosente siwe erikangirirya abandi b’ekwenene eyo. Kilhangirikire ndeke-ndeke ngoku Yehova na Yesu mubakolesya mughalha wethu Russell erisondolha omwa buthuku obo.

⁹ Mughalha wethu Russell mwathanza erithwalhwa mw’ow’embaghane okwa bandi. Omwa 1896, mwahandika athi, iyo n’abandi balhume b’olhukwamirwa sibanzire erihebwa bitsumbi nahake. Sibabya banzire erihebwa amena w’ebitsumbi, kandi isibanzire egurupu yosi-yosi yikahulhwa omwa mena wabu. Enyuma w’aho mwabugha athi: “Oyu si mubiiri wa mundu.”

10. (a) Yesu ahiraho “omughombe oyutheleghulha n’ow’amenge” mughulhu wahi? (b) Soborera ngoku kyabya kyaminyikere ndeke ngoku Akathunga Akakasondolha kabya ka mbaghane okwa Watch Tower Bible and Tract Society.

¹⁰ Omwa 1919, myaka isathu Mughalha wethu Russell aliholire, Yesu mwasombolha “omughombe oyutheleghulha n’ow’amenge.” Athi angakolhaki? Busana n’eriha abigha biwe ‘b’akalyo oko mughulhu atholere.’ (Matayo 24:45) N’omwa myaka y’erimbere-mbere eyo, baghalha bethu abahakabibwa ababya okwa kyaghanda kikulhu kwe Brooklyn, omwa New York, ba babya bakaha abakwamire Yesu b’ebyalya by’obunyakirimu. Ebinywe “akathunga akakasondolha” mubyatsuka eribanika omwa bitabu byethu omo mwaka wa 1940. Omwa biro akathunga akakasondolha ikakabya nga kahambene ne Watch Tower Bible and Tract Society. Aliwe neryo omwa 1971, mukyasoborerwa ndeke ngoku Akathunga Akakasondolha iko kali mbaghane okwa Watch Tower Society, kundi iyo iyiriho erikolha oko myatsi y’ebilhaghiro ey’egavumente misa. Eritsuka-tsukana n’aho, baghalha bethu abahakabibwa mubabya okwa Kathunga Akakasondolha, aliwe is’ibo bakasondolha e Watch Tower Society. Lino-lino, baghalha bethu “ab’esindi mbuli” banemukolesibwa erimanira e Watch Tower Society n’emithahulha eyikakolesibawa n’ekithunga kya Yehova. Ekyo kikawathikaya Akathunga Akakasondolha erihwerya akaghalha k’okw’ikolesya Amasako omw’isondolha ekithunga. (Yoane 10:16; Emibiri 6:4) E Watchtower ey’Okwomusanju 15, 2013, muyasoborera ngoku “omughombe oyutheleghulha n’ow’amenge” b’abahakabibwa bake abali okwa Kathunga Akakasondolha.

11. Akathunga Akakasondolha kakakolha kathi?

¹¹ Abali okwa Kathunga Akakasondolha bakahindana haghuma obuli yenga erithwamu okwa myatsi y’erisondolha ekithunga. Erihindana haghuma eri likaleka ibabya ibanemukanirania n’eribya bughuma. (Emisyo 20:18) Okwa balikyethu ab’okwa Kathunga Akakasondolha, sikuli oyukathwalhawa mwa mukulhu, neryo obuli mwaka bakatsunangana erimanira emihindano yabu eyo. (1 Petero 5:1) Kwa bine bithya n’omwa hindi hithunga mukagha ehikawathikaya Akathunga Akakasondolha.  Balikyethu ab’okwa Kathunga Akakasondolha sibaliyowa bathi n’ibo bakulhu b’abalikyethu. Obuli mughuma okwa liwe nayu ni w’okwa b’enyumba ya Yehova ng’ithwe bosi, kandi nayu akalya okwa byalya by’obunyakirimu ebikatheghekawa n’omughombe n’erighendera okwa busondoli bwiwe.

12. Thukendi subirya okwa bibulyo byahi?

¹² Ab’okwa Kathunga Akakasondolha sibugha indi bakalhothesibawa n’omulimu abuyirire kutse indi bahikene. Ibo ng’akathunga akakasondolha ibangana bugha ekithahikire bakasoborera e Biblia n’erisondolha ekithunga. Ng’eky’erileberyako, omwa Watch Tower Publications Index mune omwatsi owa “Ebya Thwabirithunga kw’Eriyitheghererya Lihya-lihya.” Ahisi sy’omuthwe oyu hakabya emyatsi eya thwabirithunga kw’eriyitheghererya lihya-lihya eritsuka omwa 1870. Yesu mwathathubwira athi omughombe wiwe oyutheleghulha akendi syabya akathuha ebyalya by’obunyakirimu ebihikene. Neryo kwesi thwanga subirya thuthi okwa kya Yesu abulhaya athi: “Omughombe  oyutheleghulha n’ow’amenge nindi kwehi?” (Matayo 24:45) Thukaminya thuthi ngoku Akathunga Akakasondolha y’omughombe oyutheleghulha n’ow’amenge? Thukanaye okwa bindu bisathu ebya thunalyakanayako ebya wathikaya akathunga akabya kakasondolha omwa buthuku bw’abakwenda.

13. Omulimu abuyirire abiriwathikya athi Akathunga Akakasondolha?

¹³ Omulimu abuyirire akawathikaya Akathunga Akakasondolha. Omulimu abuyirire abiriwathikya Akathunga Akakasondolha erithoka eriyitheghererya Ekwenene ye Biblia eyithabya yasibwe. Ng’eky’erileberyako, thalengekania okwa kyathulyabughako thuthi hane emyatsi eyathwabirithunga kw’eriyitheghererya lihya-lihya. Sihali mundu okwa liwe oyuwanga thokire erisoborera “emyatsi ya Nyamuhanga ey’omwakathi” eyo! (1 Abanaya Korinto 2:10, NW) Amalengekania agho Akathunga Akakasondolha kawithe wan’agho mukwenda Paulo abya awithe, omw’ibugha athi: “Ebinywe ebyo thukabugha, si binywe ebya kangiriribawa omo menge w’abandu, nikwa byakangiriribawa n’omulimu.” (1 Abanya Korinto 2:13) Enyuma w’emyaka mingyi abandu ibanemukangiriribwa amabehi, kandi isihali busondoli obutholere, busana naki habirithoka eribya eryongera eriyitheghererya ndeke e Biblia eritsuka 1919? Enzumwa lyan’eribya Nyamuhanga abiriwathikya omwa mulimu wiwe abuyirire!

14. Erikwamana n’ebiri omwa Eribisulirwa 14:6, 7, abamalaika bakawathikaya bathi Akathunga Akakasondolha n’abandu ba Yehova munabwire?

¹⁴ Abamalaika bakawathikaya Akathunga Akakasondolha. Akathunga Akakasondolha kawithe omubiiri munene ow’erisondolha abathuliri abalhabire omu miliyoni munani omwa mubiiri w’erithulira omwa kihugho kyosi. Ekilekire omubiiri oyu iniathokekana athya ndeke ni busana n’obuwathikya bw’abamalaika. (Soma Eribisulirwa 14:6, 7.) Mughulhu mungyi, abamalaika bakanasondolha omuthuliri n’erimuhikya okwa mundu oyulhue iniamabirisaba Yehova y’obuwathikya! * (Lebaya omwatsi ahikwa.) N’omwa bitsweka ebiri mw’erihakanisibwa lingyi, omubiiri w’erithulira akalholha embere erikulha-kulhana. Eki nakyo kikathokekana busana n’obuwathikya bw’abamalaika.

15. Akathunga Akakasondolha iko ni kambaghane kathi okwa bakulhu b’amadini w’ekikritendomu? Iha eky’erileberyako.

¹⁵ Akathunga Akakasondolha kakaghendera okwa Kinywe kya Nyamuhanga. (Soma Yoane 17:17.) Thalengekania okwa kyabya omwa 1973. E Watchtower ey’Okwomukagha 1 mwabya ekibulyo, “abandu abathe batsira erinywa ethaba nga banatholere erilighirwa eribatizibwa.” Muyasubirya okwa kibulyo ekyo yithi eyihi, kandi erisubirya eryo lyabya liseghemere okwa misingyi ye Biblia! E Watchtower muyakangania amasako mangyi n’erisoborera ndeke ekyangaleka oyuthe wangatsira ethaba iniahighithwa omwa kithunga. (1 Abanya Korinto 5:7; 2 Abanya Korinto 7:1) Muyakangania ngoku omusingyi oyu siw’abandu aliwe ngoku “akalhua oku Nyamuhanga, oyukakanaya n’abandu erilhabira omwa Kinywe kiwe.” Sihali yindi dini eyabirithwamu yithya erighendera okwa Kinywe kya Nyamuhanga n’omughulhu erikolha ekyo lyanga kalira abali muyo. Omwa Amerika, ekighuma okwa bitabu ebya lino-lino ekikakanaya okwa by’edini kikabugha kithi: “Abakulhu b’amadini w’Ekikristayo bakabya ikubanemuhindulha esyongangirirya syabu eryanza sihambane n’ebya bandu babu b’ikirirye n’ebyanzibirwe n’abangyi.” Akathunga Akakasondolha iko sikalighendera  okwa bya bangyi banzire. Omwakanya k’ekyo, abali okwa kathunga ako bakaghendera okwa biri omwa Kinywe kya Nyamuhanga. Ekyo kikakanganaya ndeke-ndeke ngoku Yehova yukasondolha abandu biwe munabwire.

16. Thwang’ibuka thuthi Akathunga Akakasondolha?

¹⁶ Soma Abaebrania 13:7. E Biblia yikabugha yithi ‘thwibuke abasondoli bethu.’ Enzira nguma y’erikolera mw’eki ly’erisabira Akathunga Akakasondolha. (Abanya Efeso 6:18) Bawithe bingyi by’erikolha, ng’erithuha ebyalya by’obunyakirimu, erisondolha omubiiri w’erithulira omwa kihugho kyosi, n’eritheya ebikahebawayo erisighika ekithunga. Busana n’ekyo kwenene thutholere ithwabasabira!

17, 18. (a) Thukakanganaya thuthi ku thukakwama obusondoli bw’Akathunga Akakasondolha? (b) Erithulira lyethu likasighika lithi Yesu n’Akathunga Akakasondolha?

¹⁷ Kandi thwangan’ibuka Akathunga Akakasondolha omw’ighendera okwa busondoli bwako. Akathunga Akakasondolha kakathuha obusondoli omwa bitabu byethu, emihindano y’ekithunga n’emihindano eminene-minene. Kandi abali okwa Kathunga Akakasondolha bakasombolha abalebererya b’omuthimbo, nabu ibasombolha abasyakulhu b’ebithunga. Abasyakulhu n’abalebererya b’emithimbo bakibuka Akathunga Akakasondolha omw’ilhangira bathi bakaghendera ndeke okwa busondoli obwa bakahebawa. Kandi nethu ithwe bosi thukakanganaya ku thusikirye Yesu, Omusondoli wethu, omwowa ab’akakolesaya munabwire.—Abaebrania 13:17.

¹⁸ Eyindi nzira eya thwang’ibukiramo Akathunga Akakasondolha ly’erikolha kutsibu omwa mubiiri w’erithulira. Abaebrania 13:7 hakahira omwa Bakristayo mw’omuhwa w’erigherererya erikirirya ly’abakasondolha. Akathunga Akasondolha kabirikangania erikirirya linene omw’ithulhughania engulhu yuwene n’omuhwa. Ibbwa nethu thune musighika baghalha bethu abo omwa mubiiri mukulhu oyu? Thwamabya ithunemukolha ekyo, ithukendi syatsema Yesu akathubwira athi: “Ngoko mwakolera omughuma w’oko baghalha bethu bake-bake aba, mumwakolhakyo okw’ingye.”—Matayo 25:34-40.

19. Ni kyahi ekyangaleka iwathwamu erikwama Omusondoli wethu, Yesu?

¹⁹ Yesu abere akasuba elhubulha, abya isyathasighania abigha biwe. (Matayo 28:20) Abya inianasi ngoku nayu omughulhu abya okwa kihugho mwawathikibwa n’omulimu abuyirire, abamalaika n’Ekinywe kya Nyamuhanga. Nyamuhanga kw’anemuwathikya athya munabwire omughombe. Ab’okwa Kathunga Akakasondolha aba “bakakwama Ekyana ky’Embuli,” Yesu, “ehosi kikaya.” (Eribisulirwa 14:4) Kwesi thukabya thukaghendera okwa busondoli bw’Akathunga Akasondolha, thukabya ithukakwama Omusondoli wethu, Yesu. Omwa buthuku obuthe bwa haali, akendi thukolya okwa ngebe y’erikotha. (Eribisulirwa 7:14-17) Sihali muthabali okwa kihugho oyuwanga lhaghanisya erikolera abandu b’ekyo!