1, 2. (a) Busana naki erilebya ndeke eky’erileberyako kya Noa, Danieli, na Yobu kikathuhimba? (b) Habya mibereki Ezekieli akahandika ebinywe ebiri omu Ezekieli 14:14?

MBWINO wune omwa mibere eyikalire busana n’obulhwere, obunakwa, kutse eriendereribwa? Mbwino hakanayira ikyakukalira erikolera Yehova iwunatsemire? Wamabya iwukayowa wuthya, eky’erileberyako kya Noa, Danieli, na Yobu kyangana kuwathikya. Abalhume aba sibabya bahikene kandi babya bawithe ebitsibu ebiri ng’ebya thuwithe munabwire. Muhanayira esyongebe syabu syamabya omwa kabi. Aliwe mubasighalha inina bathaleghulha oku Yehova, kandi mwabalhangira ini ky’erileberyako kibuya eky’eribya n’erikirirya n’obwowa.​—Soma Ezekieli 14:12-14.

² Ezekieli ahandikira ebinywe by’erisako erihirikirire omwatsi ono e Babeli omo mwaka owa 612 Kristo isyalyasa. * (Lebaya  omwatsi ahikwa.) (Ezekieli 1:1; 8:1) Myaka mike enyuma waho e Yerusalemu muyathoghothibwa omwa 607. Abandu bake buyira omwa Yerusalemu bo babya bathaleghulha kandi bowa nga Noa, Danieli, na Yobu, kandi mubalhama. (Ezekieli 9:1-5) Yeremia, Baruku, Ebedi-meleki, n’Abarekabu babya baghuma b’okw’ibo.

3. Omo mwatsi ono thukendi kania okuki?

³ Namunabwire, abandu abo Yehova akalhangira mo bathunganene abali nga Noa, Danieli, na Yobu babakendi syasabuka ekihugho kibi kino kikathoghothibwa. (Eribisulirwa 7:9, 14) Neryo thulebaye ekyaleka Yehova iniakolesya abalhume basathu aba ng’eky’erileberyako ky’abandu abakolha ebyuwene embere siwe. Thukendi kania okwa (1) ebitsibu ebya buli mughuma w’okw’ibo abana na (2) ngoku thwanga gherererya erikirirya n’obwowa bwabu.

4, 5. Ni bitsibu nga byahi ebya Noa aby’awithe, kandi ni kyahi ekikaswekaya okw’iyo?

⁴ Ni bitsibu nga byahi ebya Noa aby’awithe? Omwa biro bya thathakulhu wa Noa iya Enoka, abandu babya ibabiribya babi kutsibu. Ibakabugha “emyatsi . . . eyikalire” oku Yehova. (Yuda 14, 15) Neryo ekihugho mukyayongera eritsanda. Erihika omwa biro bya Noa, “ekihugho mukyusulha n’omwagha.” Abamalaika babi mubasa okwa kihugho, bamambalha emibiri y’abandu, n’erithahya abakali. Abaana babu babya batsurumi kandi batsindi. (Enzuko 6:2-4, 11, 12) Aliwe obuli mundu iniakalhangira Noa ini w’embaghane. E Biblia yithi “Noa mwabana erisimwa omo meso w’Omwami Mukulhu.” Erithendibya ng’abandu abosi ab’omwa buthuku obo, iyo iniakakolha ebihikire. “Noa abya akalendera haghuma na Nyamuhanga.”​—Enzuko 6:8, 9.

⁵ Ebinywe ebi bikathweghesayaki oku Noa? Eky’erimbere, thalengekania okwa buthuku obwa Noa aghunza inianemukolera Yehova buthaleghulha omwa kihugho kibi Eribogha ly’Amaghetse lithe lyabya. Siyabya myaka 70 kutse 80 misa aliwe hakuhi myaka 600! (Enzuko 7:11) Ekyakabiri, ibuka ngoku Noa syabya awithe ekithunga ekyanga muwathikya n’erimuhimba ng’ithwe munabwire. Kilhangirikire ngoku baghalha babu n’abali babu mubathamusighika. *​—Lebaya omwatsi ahikwa.

6. Noa mwakangania athi obuthubaha bunene?

⁶ Noa mwathalengekania athi eribya mundu mubuya kikaghunza. Buthubaha mwabwira abandi b’okw’ikirirya liwe omu Yehova. E Biblia yikamwahulha mwa “muthuli w’erithunganene.” (2 Petero 2:5) Omukwenda Paulo mwakania oku Noa athi: “Busana n’erikirirya . . . mwahira olhubanza oko kihugho.” (Abaebrania 11:7) Ahathe erithika-thika abandu mubamusekererya n’eryanza erimukakirya. Obundi nibya mubanza erimukolha nabi. Aliwe Noa mwathasagha abandu. (Emisyo 29:25) Omwakanya k’ekyo, abya n’erikirirya, neryo Yehova mwamuha obuthubaha. Kandi namunabwire akaha abaghombe biwe abathaleghulha obuthubaha ng’obo.

7. Ni bitsibu byahi ebya Noa abana akahimba obwathu?

⁷ Noa abya iniabiribya muthaleghulha oku Yehova habw’emyaka eyilhabire omu 500 Yehova akamubwira athi ahimbe obwathu bunene. Bwanga kolesibirwe erilhamya abandu balebe n’ebisoro okw’Ibogha ly’Amaghetse.  (Enzuko 5:32; 6:14) Noa anganabya imwalhangira erihimba obwathu bunene ng’obu ini mubiiri ow’akalire. Kandi omo kwenene angabya iniabya inianasi ngoku abandu bakendi ongera erimusekererya n’erimukalirya engebe. Aliwe Noa aby’awithe erikirirya omu Yehova kandi ini mwowa. “Mwakolha” ekyo abwirawa indi akole.​—Enzuko 6:22.

8. Noa mwayikethera athi Yehova eribana ebiyithawa by’eka yiwe?

⁸ Noa abya inianawithe n’ekindi kitsibu. Abya w’eribana ebiyithawa bya mukali wiwe n’abaana biwe. Eribogha ly’Amaghetse lithe lyabya, abandu ibatholere erikolha kutsibu erihera ebyalya. Noa nayu mwakolha kutsibu. (Enzuko 5:28, 29) Aliwe, mwathalighira ebiyithawa by’eka yiwe bikamuhira omwa maghaniryo. Erikolera Yehova ikya kikabya embere omwa ngebe yiwe. Nomwakine indi Noa angabya imwaghunza myaka 40 kutse 50 inianemuhimba obwathu, mwabya inianahirire amalengekania wiwe oku Yehova. Kandi mwakolha ekyo habw’eyindi myaka 350 enyuma w’Eribogha ly’Amaghetse. (Enzuko 9:28) Noa mwahiraho eky’erileberyako ekyuwene omw’ikangania erikirirya n’obwowa!

9, 10. (a) Thwanga gherererya thuthi erikirirya lya Noa n’obwowa bwiwe? (b) Wamathwamu eriowa ebihano bya Nyamuhanga, iwukendibya n’eriyikethera lyahi?

⁹ Thwanga gherererya thuthi erikirirya lya Noa n’obwowa bwiwe? Thukakolha eki thukalhwira okwa malengekania wa Yehova w’ekihikire, erithendibya b’okwa kihugho kya Sitani, n’erihira Yehova y’embere. (Matayo 6:33; Yoane 15:19) Omo kwenene, ebyo bikaleka ekihugho ikyathupona. Ng’eky’erileberyako, busana n’eribya ithwanzire eriowa ebihano bya Yehova ebihambire oko myatsi y’engyingo n’obutheke, abandu bangana thubughako nabi omwa makuru. (Soma Malaki 3:17, 18.) Nethu nga Noa, sithuli sagha abandu. Thukubaha Yehova, ni bugha ambu, erimusikya kutsibu n’erithendi muponesya. Thunasi ngoku n’iyo musa oyuwanga thuha engebe y’erikotha.​—Luka 12:4, 5.

¹⁰ Thayibulya: ‘Nganemwendi lholha embere erikolha ebihikire embere sya Nyamuhanga, nibya n’abandi nomubanga nyisekererya kutse erinyibughako nabi? Ngana yikethere ngoku Yehova angana nyiha ebiyithawa by’eka yaghe, n’omughulhu engebe yikalire?’ Wamayikethera Yehova n’erimwowa nga Noa, iwangana kakasya ngoku Yehova akendi kutsomana.​—Abanya Filipi 4:6, 7.

11. Ni bitsibu byahi ebinene-binene ebya Danieli n’abanywani biwe babana e Babeli? (Lebaya ekisasani ekiri okw’itsuka.)

¹¹ Ni bitsibu nga byahi ebya Danieli aby’awithe? Danieli mwayisanga iniali omwa bunyewa mwe Babeli, omuyi owabya oswire mw’esyonyamuhanga sy’amabehi n’eby’obukumu. Abandu b’eyo ibaponire Abayuda kandi ibakabasekereraya na Nyamuhanga wabu Yehova. (Esyonyimbo 137:1, 3) Eki kyangabya imukyaponesya Danieli ya kutsibu n’abandi Bayuda ababya banzire Yehova! Kandi abandu bangyi babya bathungerere Danieli n’abanywani biwe basathu iya Hanania, Misaeli, na Azaria kundi babya ibakayathendekawa erikolera omwami we Babeli. Ibatholere erirya okwa byalya by’omwami, imune n’ebyo Yehova athabya anzire abandu biwe bakalya. Aliwe Danieli “mwathayitsandya omo bisi-bisi by’omwami.”​—Danieli 1:5-8, 14-17.

12. (a) Danieli abya mundu oyuli athi? (b) Yehova mwalhangira athi Danieli?

¹² Danieli anabya awithe n’ekindi kitsibu,  obundi ekithabya nga kikalire okw’itsuka. Aby’awithe amenge, neryo busana n’ekyo, omwami mwamuha esyonzunzo sy’embaghane. (Danieli 1:19, 20) Nomwabine, Danieli mwathayiheka kutse erilengekania athi ebiwe bikabya ibyabihikire. Mwasighalha inianayikehirye kandi mwolho. Iniakabugha athi Yehova yukamuthokesaya. (Danieli 2:30) Thakilengekaniako: Yehova mwahulha Danieli, Noa na Yobu ng’eky’erileberyako ekyuwene ekya thwanga kwama. Okwa buthuku obo, Noa na Yobu babya ibabirikolera Yehova kera buthaleghulha omwa ngebe yabu yosi, aliwe Danieli iyo abya iniakine mulhwana. Ahathe erithika-thika, Yehova abya ayikethere Danieli! Kandi abya asingene, kundi Danieli abya muthaleghulha kandi mwowa oku Yehova omwa ngebe yiwe yosi. Danieli iniane w’emyaka hakuhi 100, omulaika wa Nyamuhanga mwamubwira ebinywe ebyuwene bino: “Iwe Danieli, iwe mundu oyusimirwe kutsibu.”​—Danieli 10:11.

13. Ni nzumwa yahi eyaleka Yehova iniawathikya Danieli erithunga ekitsumbi kinene?

¹³ Busana n’obuwathikya bwa Yehova, Danieli mwahebwa ekitsumbi kinene, erimbere omwa buthabali bwe Babeli n’enyuma waho omwa bwe Medo-Persia. (Danieli 1:21; 6:1, 2) Obundi Yehova mwalhangira athi Danieli akahebawa ekitsumbi eki nuku angawathikya abandu biwe, nga Yozefu kwanakolha Emisiri na Esiteri na Mordekayi e Persia. * (Lebaya omwatsi ahikwa.) (Danieli 2:48) Wukalengekanaya Ezekieli n’abandi Bayuda mubayowa bathi bakalhangira Yehova akakolesya Danieli eribawathikya? Kyangabya imukyabaghumya kutsibu!

14, 15. (a) Emibere yethu yisosene yithi n’eya Danieli abyamu? (b) Munabwire ababuthi bang’ighaki okwa babuthi ba Danieli?

¹⁴ Thwanga gherererya thuthi erikirirya lya Danieli n’obwowa bwiwe? Ekihugho ekyo thwikeremu kyoswire mw’obutswatswa n’eriramya ly’amabehi. Abandu babirikwama e Babeli Mukulhu, amadini w’amabehi w’ekihugho kyosi, agho e Biblia yikahulha mwa “obwikalho bw’esyombinga.” (Eribisulirwa 18:2) Aliwe ithwe thuli ng’ababunga omwa kihugho kino. Neryo, abandu bakalhangira ithuli mbaghane, ikyaleka ibathusekererya. (Mariko 13:13) Neryo, nga Danieli, thuyithunde hakuhi na Yehova Nyamuhanga  wethu. Thwamayikehya, thukayikethera Yehova, n’erimwowa, nethu iniakendi thulhangira mw’abandu b’obughuli.​—Hagai 2:7.

¹⁵ Ababuthi bangan’ighira okwa babuthi ba Danieli. Danieli iniakine mulere e Yuda, abandu abangyi eyo babya babi kutsibu. Aliwe mwanza Yehova. Ekyo mukyanakwama kyasa bwase? Eyihi. Ababuthi biwe bangabya imubamukangirirya oku Yehova. (Emisyo 22:6) Nibya n’erina Danieli, erikamanyisaya “Omutsweri Waghe Ni Nyamuhanga,” likakanganaya ngoku ababuthi biwe babya banzire Yehova. (Danieli 1:6) Neryo babuthi, ambi imwaghumisirizya mukakangirirya abaana benyu oku Yehova. Simulhuhirire. (Abanya Efeso 6:4) Musabe nabu. Mubahire omwa misabe. Mukole ekyosi-kyosi ekya mwanga thoka eribakangirirya erianza ebya Yehova akabugha athi bihikire, neryo Yehova akendi batsumulha ndeke.​—Esyonyimbo 37:5.

16, 17. Ni bitsibu byahi ebya Yobu abana omwa ngebe yiwe?

¹⁶ Ni bitsibu nga byahi ebya Yobu abana? Yobu mwabana esyombinduka nene-nene omwa ngebe yiwe. Erimbere, Yobu abya “mukulhu kwilhaba abandu bosi b’ekihugho ky’endatha.” (Yobu 1:3) Abya mughuda kutsibu, abya asibwe n’abandu bangyi kandi ibamusikirye. (Yobu 29:7-16) Omwa byosi ebi, Yobu mwathalengekania athi alengire abandi kutse eriyowa nga syali yithagha Nyamuhanga. Eki thukakiminya kundi Yehova mwabugha athi “omughombe waghe” n’erimukaniako athi: “Ni mundu oyuhikene n’oyuthunganene, oyukakenga Nyamuhanga, n’erihuthathira ebibi.”​—Yobu 1:8.

¹⁷ Aliwe kitsumbukirania, engebe ya Yobu muyahinduka. Mwaherya ebyosi, amabbunika omuthima amahika n’okw’iyisunza olhuholho. Munabwire, thunasi ngoku Sitani yuwalethera Yobu y’ebitsibu. Mwabugha athi Yobu akakolera Yehova busana n’eby’akamuha. (Soma Yobu 1:9, 10.) Yehova mwathagheghena amabehi aya. Yehova angakolireki erikangania ngoku Sitani ni mubehi tsutsutsu? Mwaha Yobu y’akaghisa k’erikangania obuthaleghulha bwiwe oku Nyamuhanga n’erikangania kw’akamukolera busana n’olhwanzo.

18. (a) Ni kyahi ekikakutsemesaya oku Yobu? (b) Thukighaki oku Yehova omwa mibere athwaliramu Yobu?

¹⁸ Sitani omwa butsurumi bunene mwalethera Yobu y’ebitsibu ekindi omwa kindi kandi mwaleka Yobu inialengekania athi bikalhua oku Nyamuhanga. (Yobu 1:13-21) Neryo n’abalhume basathu ababugha bathi ni banywani ba Yobu mubamubughako ebindu ebithuwene. Mubabugha bathi Yobu ni mubi neryo bathi Nyamuhanga akamusuyira. (Yobu 2:11; 22:1, 5-10) Nomubyanabya bithya, Yobu mwasighalha muthaleghulha oku Yehova. Ni kwenene, muhanayira Yobu amabugha eby’obukiru. (Yobu 6:1-3) Aliwe, Yehova mwaminya ngoku Yobu akolha eki kundi abya iniabiribbunika omuthima n’erihwa amani. Yehova mwalhangira ngoku Yobu syathamusighania, nomwakine indi Sitani mwamulengako n’erimukolha nabi ngendo nyingyi. Emibere eyikalire eyi yabere yikahwa, Yehova mwaha Yobu kabiri kwilhaba ebyo aby’awithe erimbere n’eyindi myaka 140. (Yakobo 5:11) Omwa buthuku obo, Yobu mwalholha embere erikolera Nyamuhanga n’omuthima wiwe wosi. Ekyo thukakiminya thuthi? Kundi Ezekieli 14:14, erisako erihirikirire omwatsi  wethu ono, lyahandikawa myaka mingyi Yobu iniabiriholha.

19, 20. (a) Thwanga gherererya thuthi erikirirya lya Yobu n’obwowa bwiwe? (b) Thwanga kwira abandi b’obulighe thuthi nga Yehova?

¹⁹ Thwanga gherererya thuthi erikirirya lya Yobu n’obwowa bwiwe? Nomuthwangabya omwa mibere eyiri yithi, thwanzire erilhangira thuthi Yehova yukabya w’omughaso munene omwa ngebe yethu. Thwanzire ithwamuyikethera n’erimwowa n’omuthima wethu wosi. Kandi omo kwenene, ithwe thuwithe nzumwa nyingyi esy’erikolha ekyo kwilhaba Yobu. Thalengekania okwa byathwasi munabwire. Thwasi bingyi ebihambire oku Sitani n’ebithegho biwe. (2 Abanya Korinto 2:11) Erilhabira omwa Biblia, kandi kwilhabirirya omwa kitabu kya Yobu, thukaminya ekikaleka Nyamuhanga inialekereraho eriaghalhwa. Erikwamana n’obuminyereri bwa Danieli, thunasi ngoku Obwami bwa Nyamuhanga ni buthabali hene-hene obwa Yesu Kristo akathabalha. (Danieli 7:13, 14) Kandi thunasi ngoku Obwami obu bukisiya ibwathabalha ekihugho kyosi n’erighunzaho eriaghalhwa lyosi.

²⁰ Kandi ebya Yobu alhabamu bikathweghesaya ngoku thutholere ithwakwira balikyethu b’obulighe bakaghalhwa. Nga Yobu, nabu bangana bugha eby’obukiru. (Omugambuli 7:7) Aliwe sithutholere thukabalengekaniako nabi kutse eribatsweba thuthi babirikolha ebithuwene. Aliwe, thutholere ithwabya n’obuyitheghererya. Thwamakolha ekyo, neryo ithukendibya nga Thatha wethu Yehova, ow’olhwanzo kandi omughanyiri.​—Esyonyimbo 103:8.

21. Ebinywe ebiri omu 1 Petero 5:10 bikathwibukaya bithi ebya Noa, Danieli, na Yobu balhabamu?

²¹ Noa, Danieli, na Yobu si babyaho okwa buthuku bughumerera kandi babya omwa mibere muthina-muthina. Aliwe, abosi mubaghumira ebitsibu byabu. Ebya balhabamu bikathwibukaya ebya omukwenda Petero abugha bino: “Mwamabiaghalhwa akathambi, Nyamuhanga w’olhukogho lhwosi . . . asyabahikania, n’eribasikya, n’eribaha amaaka, n’eribahangania ndeke.”​—1 Petero 5:10.

22. Thukend’ighaki omo mwatsi owakakwamako?

²² Ebinywe ebiri omu 1 Petero 5:10 bikahamba n’okwa bandu ba Nyamuhanga munabwire. Yehova akathukakasaya ngoku akendiha abaghombe biwe b’amaaka n’eribaghumya. Ithwe bosi thwanzire Yehova iniathuha amaaka, thwanzire ithwalholha embere eribya ithunasikire n’eribya bathaleghulha okw’iyo. Ky’ekikaleka ithwanza erigherererya erikirirya n’obwowa bwa Noa, Danieli, na Yobu. Omo mwatsi owakakwamako, thukendi minya ngoku abalhume aba mubathoka erisighalha ibane bathaleghulha oku Yehova kundi babya bamwasi ndeke. Omo kwenene, mubathoka ‘eriminya emyatsi yosi’ eyo anza bakole. (Emisyo 28:5) Nethu thwangana kikolha.