1, 2. Mughalha wethu mughuma mwayiminya kwaki, kandi mwakolhaki?

ROBERT mwabatizibwa iniakine mulengwa, aliwe mwathatsomana ndeke ekwenene. Akabugha athi: “Sihali ekibi kyosi-kyosi ekya nakolha, aliwe iningaghendera omwa bandi. Iningalhangirika ng’oyughumire bunyakirimu, isindibulha okwa mihindano n’eribya ingane mukolha obutemburi bw’obuwathikya habw’obuthuku bulebe omo mwaka. Aliwe habya ihane ekya ngabulirweko.”

² Robert mwathaminya eky’abulirweko erihika aho ingirira omwa butheke. Iyo na mukali wiwe ibakakolha akasathu k’eribulhania ebibulyo ebiseghemere okwa Biblia. Mukali wiwe aby’asi ndeke e Biblia kandi ikikamwolhobera erisubirya ebibulyo ebyo. Aliwe mughulhu mungyi Robert isyali bana eby’erisubirya neryo ikyaleka iniayowa nabi. Akabugha athi: “Iningabya ng’oyuthasiki. Munayibwira indi, ‘Namabya iningye ngendibya ingasondolha mukali waghe bunyakirimu, ngatholere ingayira ekyo ngakolha.’” Neryo mwakikolha. Akabugha athi: “Mun’igha e Biblia namighayo kandi namighayo ndeke, neryo emyatsi yamayithonda ndeke. Munayitheghereryayo ndeke, kandi ekikulhu kutsibu, munakulha-kulhania obughuma bwaghe na Yehova.”

3. (a) Omwatsi wa Robert akathweghesayaki? (b) Ni nzumwa syahi ngulhu esya thukendi kaniako?

 ³ Omwatsi wa Robert angana thweghesaya bingyi. Thwanganabya ithunasi e Biblia kandi isithuli bulha okwa mihindano n’omw’ithulira, aliwe eki sikirimanyisaya kithi thuli b’obunyakirimu. Kutse obundi thwanganabya ithwabirikolha kutsibu eribya b’obunyakirimu, aliwe thukayilebya, ithwabya ithunawithe aho thutholere eryuwania. (Abanya Filipi 3:16) Omo mwatsi ono, thukendi subirya ebibulyo bisathu eby’omughaso: (1) Ni kyahi ekikendi thuwathikya eriminya nga thunatsomene eby’obunyakirimu? (2) Thwanga ghumya thuthi obunyakirimu bwethu? (3) Obunyakirimu obughumire bwanga thuwathikya buthi omwa ngebe yethu eya buli kiro?

4. Erihabulha eriri omu Abanya Efeso 4:23, 24 likahamba oku bahi?

⁴ Thwabere thukatsuka erikolera Nyamuhanga, muthwakolha esyombinduka nyingyi esyahamba okwa ngebe yethu yosi. Eki mukithahwa thukabatizibwa. E Biblia yikathubwira yithi: “Mubye bahya-bahya . . . omwa malengekania wenyu.” (Abanya Efeso 4:23, 24) Omwa Kigiriki, ebinywe “mubye bahya-bahya” bikakanganaya ini kindu ekitholere erilholha embere. Neryo, thutholere ithwalholha embere eribya bahya-bahya omwa malengekania wethu. Kundi sithuhikene, thutholere ithwalholha embere erikolha esyombinduka. Nomuthwangabya ithwabirikolera Yehova habw’emyaka mingyi, thutholere ithwalholha embere erighumya obughuma bwethu nayu.​—Abanya Filipi 3:12, 13.

5. Ni bibulyo byahi ebyanga thuwathikya eriminya nga thunatsomene eby’obunyakirimu?

⁵ Mbulha thuli balere kutse thukulire, thutholere ithwayilebya ndeke. Thwangana yibulya: ‘Mbwino ngane mulhangira ku ngane muyongera eritsomana eby’obunyakirimu? Ngane mwongera eribya nga Kristo? Amalengekania waghe n’emibere yaghe okwa mihindano bikakanganayaki? Ebyanga kanaya bikakanganayaki okwa kyanganzire omwa ngebe? Emibere nga yegheserayamu, emyambalire n’emiyipambire, n’emibere ngathwaliramu erihabulha bikabisulhaki okw’ingye? Ngakolhaki namalengwako erikolha ekithuwene? Nanamabiribya Omukristayo oyukulire?’ (Abanya Efeso 4:13) Ebibulyo ebi byangana thuwathikya eriminya nga thwamabikulha bungahi bunyakirimu.

6. Ni kindi kyahi ekyanga thuwathikya eriminya nga thunatsomene eby’obunyakirimu?

⁶ Okwa bundi buthuku thukayithagha abandi erithubwira nga thunatsomene eby’obunyakirimu. Omukwenda Paulo mwasoborera athi omundu w’omubiri, kutse oyutsomene eby’omubiri, syaliminya ngoku emibere y’engebe yiwe siyiritsemesaya Nyamuhanga. Aliwe oyutsomene eby’obunyakirimu akayitheghereraya ngoku Nyamuhanga akalhangira emyatsi. Anasi ngoku Yehova syalitsemera engebe y’ekihugho-hugho. (1 Abanya Korinto 2:14-16; 3:1-3) Abasyakulhu abawithe obulengekania bwa Kristo bakalhangira lhuba balikyethu bamasamu amalengekania w’ekinyamubiri,  neryo ibalengaho eribawathikya. Abasyakulhu bamalengaho erithuwathikya, ithunemwendi ligha obuwathikya bwabu n’erikolha esyombinduka? Thwamakolha ekyo, ithukendi kangania ngoku kwenene thwanzire erighuma bunyakirimu.​—Omugambuli 7:5, 9.

7. Thukaminya thuthi ngoku erithaminya e Biblia siry’eribya mundu w’obunyakirimu?

⁷ Erithaminya ebya Biblia yikabugha lisa sikyanga leka thukatsomana eby’obunyakirimu. Omwami Solomona abya asi bingyi ebihambire oku Yehova, nibya n’ebighuma by’okwa binywe bya Solomona eby’amenge mubyahandikwa omwa Biblia. Aliwe enyuma waho, engolongana yiwe na Yehova muyatseka, neryo amaleghulha. (1 Abami 4:29, 30; 11:4-6) Neryo, eryongera okw’iminya ebiri omwa Biblia, ni kindi kyahi ekya thukayithagha? Thutholere ithwalholha embere erighumya erikirirya lyethu. (Abanya Kolosai 2:6, 7) Eki thwanga kikolha thuthi?

8, 9. (a) Ni kyahi ekikendi thuwathikya erighumya erikirirya lyethu? (b) Thutholere ithwabya n’ekilhubirirwaki thuk’igha n’erighanirya? (Lebaya ekisasani ekiri okw’itsuka.)

⁸ Omwa kighonye ky’erimbere, Paulo mwahira omwa Bakristayo mw’omuhwa ‘w’erighenda embere omwa myatsi eyihikene.’ (Abaebrania 6:1) Thwanga ghendera thuthi okw’ihabulha eri munabwire? Enzira ngulhu ly’erigha ekitabu Ngoku Thwanga Sighalha omo Lhwanzo Lhwa Nyamuhanga. Eki kikendi kuwathikya eriminya ngoku wanga kolesya emisingyi ye Biblia omwa ngebe yawu. Wamabya iwabirigha ekitabu ekyo, hane ebindi bitabu ebya wang’igha erikuwathikya eribya n’erikirirya erighumire. (Abanya Kolosai 1:23) Kandi thutholere ithwaghanirya okwa bya thuk’igha n’erisaba Yehova athuwathikaye erilhangira ngoku thwanga bikolesya.

⁹ Thukabya thuk’igha n’erighanirya, ekilhubirirwa kyethu kitholere ikyabya iry’eryongera eryanza eritsemesya Yehova n’erimwowa. (Esyonyimbo 40:8; 119:97) Kandi thutholere ithwaghana ekindu kyosi-kyosi ekyangaleka ithuthakulha bunyakirimu.​—Tito 2:11, 12.

10. Abalere batholere ibakolhaki eribya n’erikirirya erighumire?

¹⁰ Wamabya iwuli mulere, wunawithe ebilhubirirwa by’obunyakirimu? Mughalha wethu mughuma oyukakolera okwa Beteli akabera  erikanirania n’abalere abakisiya ibabatizibwa okwa lhuhindano lhw’omuthimbo n’eribabulya nga bawithe bilhubirirwaki eby’obunyakirimu. Akalhangira abanene ibanawithe ekirengekanio eky’erisyakolera Yehova omwa buthuku bw’embere. Abandi batheghekire erikolera Yehova omwa mubiiri w’omughulhu wosi kutse erighenda ahali obuyithawa. Aliwe abandi abalere bakalemawa erisuba omwa kibulyo kiwe. Mbwino ekyo kikamanyisaya kithi bakayowa isibatholere eribya n’ebilhubirirwa by’obunyakirimu? Wamabya iwukine mulere, yibulhaye: ‘Ngaghenda okwa mihindano n’omw’ithulira kundi ababuthi baghe banzire ingakolha ekyo? Kutse ingye ahabwaghe, nganayiwithire obunywani na Nyamuhanga?’ Omo kwenene, ithwe bosi thutholere ithwabya n’ebilhubirirwa by’obunyakirimu, mbulha thuli balere kutse bakulhu. Ebilhubirirwa ebi bikendi thuwathikya eribya n’erikirirya erighumire.​—Omugambuli 12:1, 13.

11. (a) Ni kyahi ekyanga thuthokesya eritsomana eby’obunyakirimu? (b) Ni ky’erileberyako kyahi omwa Biblia ekya thwanga gherererya?

¹¹ Thwamabirilhangira aha thwanguwania, thutholere ithwatsukiraho erikolha esyombinduka. Eki ni kikulhu kundi oyu ni mwatsi w’engebe n’olhuholho. (Abanya Roma 8:6-8) Yehova anasi ku sithuhikene, neryo akathuha omulimu wiwe abuyirire erithuwathikya. Aliwe kandi thutholere ithwakolha kutsibu habwethu. Mughalha wethu John Barr, oyuwakolha ng’omughuma w’okwa Kathunga Akakasondolha mwakania oku Luka 13:24 n’eribugha athi: “Abangyi bakalemawa kundi sibalihira h’omuhwa w’eribya n’amaaka.”  Thutholere ithwabya nga Yakobo, oyuwalhwa n’omulaika kandi mwathalhuhirira erihika aho amutsumulira. (Enzuko 32:26-28) Nomwakine indi eriyeghesya e Biblia kyangana tsemesya, isithwalengekanaya thuthi e Biblia yikendi thutsemesya ng’ekitabu ky’esyongano buyira. Thutholere ithwahira h’akaghalha eribana ekwenene ye Biblia eyikendi thuwathikya.

12, 13. (a) Ni kyahi ekyanga thuwathikya erighendera okwa Abanya Roma 15:5? (b) Eky’erileberyako kya Petero n’erihabulha liwe byanga thuwathikya bithi? (c) Wanga kolhaki erighumya obunyakirimu bwawu? (Lebaya akasanduku “ Ebya Wangakolha Erikulha Bunyakirimu.”)

¹² Thwamahira h’akaghalha erikulha bunyakirimu, omulimu abuyirire iniakendi thuwathikya erihindulha amalengekania wethu. Lyolho-lyolho, ithwangana tsuka erilengekania nga Kristo. (Abanya Roma 15:5) Omulimu abuyirire angana thuwathikya eriyilhusya mw’esyongumbu nyibi neryo ithwakulha-kulhania emibere eyikatsemesaya Nyamuhanga. (Abanya Galatia 5:16, 22, 23) Thwamayisanga ithulimuhwerya amalengekania wethu okwa bindu by’omubiri kutse eby’eriyitsemesya, sithutholere thukabikyako. Thutholere ithwalholha embere erisaba Yehova y’omulimu abuyirire erithuwathikya erihwerya amalengekania w’okwa bindu ebitholere. (Luka 11:13) W’ibuke omukwenda Petero. Mughulhu wosi isyali lengekanaya nga Kristo. (Matayo 16:22, 23; Luka 22:34, 54-62; Abanya Galatia 2:11-14) Aliwe mwathalhuhirira kandi Yehova mwamuwathikya. Lyolho-lyolho, Petero mwatsuka eribya akalengekania nga Kristo. Nethu thwangana kolha ekyo.

¹³ Enyuma waho Petero mwahulha emibere mirebe eyanga thuwathikya. (Soma 2 Petero 1:5-8.) Thutholere ithwakolha kutsibu erikulha-kulhania emibere ng’eriyikakirya, eriyiyinia, eryanza balikyethu, n’eyindi mibere eyuwene. Obuli kiro ithwangana yibulya, ‘Ni mubere wahi owa nangakolhako munabwire ow’akendi ngwathikya erighumya obunyakirimu bwaghe?’

14. Eritsomana eby’obunyakirimu kyanga hamba kithi okwa ngebe yethu?

¹⁴ Thwamabya n’amalengekania wa Kristo, ikikendi hamba okwa mibere yethu ey’aha thukakolera kutse okwa sukuru, emibughire yethu, kandi ngoku thukathwamu buli kiro. Erithwamu lyethu irikendi kangania ku thukalengaho erigherererya Kristo. Kundi thutsomene eby’obunyakirimu, sithwanzire ekyosi-kyosi kikatsandya obughuma bwethu na Yehova. Thwamalengwako erikolha ekindu kibi, obunyakirimu bwethu bukathuwathikaya erirwanisya erilengwako. Thuthe thwathwamu, ithukendi yibulya: ‘Ni misingyi yahi ye Biblia eyanga ngwathikya? Kristo angakolireki omwa mibere ng’eyi? Ni kyahi ekikendi tsemesya Yehova?’ Atholere iniabya mubere wethu erilengekania omwa nzira ng’eyi. Neryo ibbwa thuthakania okwa mibere mirebe. Omwa buli mughuma, thukendi lebya omusingyi we Biblia owanga thuwathikya erithwamu ndeke.

15, 16. Erilengekania nga Kristo lyanga thuwathikya lithi erithwamu ndeke okwa (a) erisombolha ow’eringira nayu omwa butheke? (b) erisombolha abanywani bethu?

¹⁵ Erisombolha ow’eringira nayu omwa butheke. Omusingyi we Biblia akabanika omu 2 Abanya Korinto 6:14, 15. (Soma.) Paulo mwakikangania ndeke-ndeke ngoku abandu b’obunyakirimu bawithe amalengekania w’embaghane oko w’abatsomene eby’ekinyamubiri. Omusingyi oyu angakuwathikya athi erisombolha ow’eringira nayu omwa butheke?

¹⁶ Erisombolha abanywani. Omusingyi we  Biblia akabanika omu 1 Abanya Korinto 15:33. (Soma.) Oyutsomene eby’obunyakirimu syalinywana abandu abanga tsekya erikirirya liwe. Lengekanaya ngoku wanga kolesya omusingyi oyu omwa mibere muthina-muthina. Ng’eky’erileberyako, angakuwathikya athi erithwamu oko banywani b’okwa Intaneti? Angakuwathikya athi erithwamu nga wunakolesaye e Intaneti erisatha emisathu y’okwa Intaneti n’abo wuthasi?

17-19. Eritsomana eby’obunyakirimu kyanga kuwathikya kithi (a) eriyihighulha okwa mibiiri eyithawithe mughaso? (b) eribya n’ebilhubirirwa ebyuwene? (c) erighunzaho erithendi yitheghererania?

¹⁷ Emibiiri eyikatsandaya obunyakirimu bwethu. Thukabana erikunga ly’omughaso omu Abaebrania 6:1. (Soma.) “Emibiiri y’obusa” eya thutholere ithwayihighulhako ye yahi? Eyi y’emibiiri eyithawithe mughaso eyithe yanga thuwathikya erighuma bunyakirimu. Erikunga erihambire okwa mibiiri eyiholire lyangana thuwathikya erisubirya okwa bibulyo nga bino: ‘Omubiiri ono anawithe mughaso kutse syawithe mughaso? Nganatholere ingasangira omwa suburu eyi? Busana naki singatholere ng’ingira omwa gurupu y’abandu abakanza erihindulha emibere y’ekihugho?’

¹⁸ Ebilhubirirwa by’obunyakirimu. Omw’Ikangirirya lya Yesu ly’okwa Kithwe, Yesu mwaha erihabulha eryuwene erihambire okw’ibya n’ebilhubirirwa. (Matayo 6:33) Oyutsomene eby’obunyakirimu akahira Obwami bw’embere omwa ngebe yiwe. Omusingyi oyu akendi thuwathikya erisubirya okwa bibulyo nga bino: ‘Nganatholere ingaghenda okwa yunivasite? Nganalighe omubiiri mulebe?’

¹⁹ Erithendi yitheghererania. Erihabulha erya Paulo aha Abakristayo be Roma lyangana thuwathikya hamabya erithendi yitheghererania n’abandi. (Abanya Roma 12:18) Thukagherereraya Kristo, neryo thukalengaho erihiraho “obuholho oko bandu bosi.” Thukakolhaki thwamathendi yitheghererania n’abandi? Mbwino kikana thukalira eriligha amalengekania w’owundi mundu? Kutse thunasibwe ng’abandu abakalengaho erihira h’obuholho?​—Yakobo 3:18.

20. Busana naki wanzire erilholha embere bunyakirimu?

²⁰ Eby’erileberyako ebi bikathukanganaya ngoku emisingyi ye Biblia yangana thuwathikya erithwamu ebikakanganaya ku thukasondolhawa n’omulimu wa Nyamuhanga. Thwamabya ithutsomene eby’obunyakirimu, ithukendibya n’etseme omwa ngebe yethu. Robert, oyo thulyakanayako okw’itsuka, akabugha athi: “Nabere nabirikulha-kulhania obughuma bw’okwenene na Yehova, munabya iba mubuya na thatha mubuya. Munayowa ndeke n’eribya n’etseme.” Thwamalengaho erilholha embere ng’abandu b’obunyakirimu, ithukendi ghasirwa kutsibu. Ithukendibya n’engebe eyuwene lino, n’omwa buthuku obukasa ithwabya “n’engebe eyiri ngebe kundu.”​—1 Timoteo 6:19.