Kera ithukalengekanaya thuthi kwabiri bithya busana n’ebiri omu Abaebrania 12:16. Hakabugha hathi Esau ‘mwathakenga Nyamuhanga’ neryo amaha Yakobo ‘omwandu wiwe w’obukulhu busana n’ekisa kighuma.’ Neryo muthwalengekania thuthi omughulhu Yakobo ahebawa “omwandu w’obukulhu,” mwahebwa n’olhusunzo lhw’eribya thatha-kulhu wa Masiya.—Matayo 1:2, 16; Luka 3:23, 34.

Aliwe, erisekulya ndeke eyindi myatsi ye Biblia likakanganaya ngoku sikyabya kikayithagha omulhume eribya mwana w’erimbere imwabya thatha-kulhu wa Masiya. Thulebaye emighuma y’okwa myatsi eyi:

Omwana w’erimbere wa Yakobo abya ini Rubeni oku mukali wiwe iya Lea. N’omwana wiwe w’erimbere oku Rakeli abya ini Yozefu. Omughulhu Rubeni asingira, mwaherya omwandu wiwe w’obukulhu, n’omwandu oyo mwahebwa Yozefu. (Enzuko 29:31-35; 30:22-25; 35:22-26; 49:22-26; 1 Emyatsi y’Emigulu 5:1, 2) Nomwabine, Masiya mwathasira omu Rubeni kutse Yozefu. Mwasira omu Yuda, omwana wakani wa Yakobo na Lea.—Enzuko 49:10.

Luka 3:32 hakathondogholha abandi bathatha-kulhu bathanu ba Masiya, kandi abosi bakabya nga babya baana b’erimbere. Ng’eky’erileberyako, Boazi abya thatha wa Obedi, na Obedi abya thatha wa Yese.—Ruta 4:17, 20-22; 1 Emyatsi y’Emigulu 2:10-12.

Mughalha wa Yese iya Dawudi syabya mwana w’erimbere. Abya w’erighunzerera omwa balhwana munani. Aliwe, Masiya mwasira omu Dawudi. (1 Samweli 16:10, 11; 17:12; Matayo 1:5, 6) Kuthya, owundi oyuwakwamako eribya thatha-kulhu wa Masiya abya ini  Solomona, nomwakine indi syabya mwana w’erimbere wa Dawudi.—2 Samweli 3:2-5.

Eki sikirimanyisaya kithi eribya mwana w’erimbere siriwithe mughaso. Omwana w’erimbere iniakathunga esyonzunzo esya bandi bathe banga thunga. Mughulhu mungyi, iniakabya iyukendi syabya mukulhu w’erihiika, kandi iniakathunga amaghabo abiri w’omwandu.—Enzuko 43:33; Eryibuka Ebihano 21:17; Yosua 17:1.

Aliwe omwandu w’obukulhu iniakanalhusibawa oku mwana mughuma w’obulhume iniahebwa owundi. Abrahamu abere abiribugha athi Isimaeli aghende, omwandu w’obukulhu bwiwe mwahebwa Isaka. (Enzuko 21:14-21; 22:2) Kandi ngoku thwanabirilhangira, omwandu w’obukulhu wa Rubeni mwahebwa Yozefu.

Neryo kwesi, ni nzumwa yahi eya mukwenda Paulo anza erikangania omu Abaebrania 12:16? Hathi: “Kandi sihabye mundu musingiri, kutse oyuthekenga Nyamuhanga nga Esau oyuwaghulhaya omwandu wiwe w’obukulhu busana n’ekisa kighuma.”

Hano, Paulo syabya akakania okwa bathatha-kulhu ba Masiya. Aliwe, abya iniakakunga Abakristayo. Mwababwira athi: “Mubye mukakwama enzira eyithunganene” nuku “sihabye mundu oyukabulha okwa lhukogho lhwa Nyamuhanga.” Eki ky’ekyanga babereko bamasingira. (Abaebrania 12:12-16) Neryo aho ibabya nga Esau, “oyuthakenga Nyamuhanga” aliwe mwanza eryughuthya esyongumbu siwe.

Erikwamana n’emibere y’okwa buthuku obo, Esau angabya iyuwabya akabya n’olhusunzo lhw’erihongera Yehova. (Enzuko 8:20, 21; 12:7, 8; Yobu 1:4, 5) Aliwe Esau mwatsomana esyongumbu siwe kyamaleka iniahithya omwandu wiwe w’eribya mukulhu busana n’ekibindi ky’ebitsali. Esau angabya imwanza eriyibalya okw’ighalhwa erya Yehova abya iniabiribugha athi olhubutho lhwa Abrahamu lhukendi syalhabamu. (Enzuko 15:13) Kandi mwakangania ku syatsomene ebindu ebibuyirire akathahya abakali abakafiri, ekindu ekyalethera ababuthi biwe b’obulighe. (Enzuko 26:34, 35) Abya mbaghane oku Yakobo, oyuwalhangira athi akathahaya omuramya wa Nyamuhanga w’ekwenene!—Enzuko 28:6, 7; 29:10-12, 18.

Emyatsi ye Biblia eyi yikathweghesayaki okwa bathatha-kulhu ba Masiya? Abandi b’okw’ibo babya baana b’erimbere, n’abandi eyihi. Abayuda babya ibanasi eki kandi ibakalighirana nakyo. Eki thukakiminya thuthi? Kundi mubaligha ngoku Kristo angabere mwitsikulhu wa Dawudi, omwana w’obulhume wa Yese ow’erighunzerera.—Matayo 22:42.