Omuthima Wawu w’Eriyihayo Alethere Yehova y’Eripipwa!
‘Kundi Abandu Mubayihayo n’Omuhwa, Yehova Abane Eripipwa!”—ABATSWERI 5:2.
1, 2. (a) Elifasi na Bildadi mubabugha bathi Nyamuhanga akalhangira omubiiri wethu wathi? (b) Yehova mwabugha athiki oko mwatsi oyu?
MYAKA mingyi enyuma, abalhume basathu mubayakania n’omughombe wa Nyamuhanga omuthaleghulha iya Yobu. Omughuma w’okw’ibo, ni Elifasi Omutemani, oyuwabulhaya Yobu ye bibulyo bino: “Omundu anganabya w’omughaso embere sya Nyamuhanga? Omundu w’amenge anganabya w’endundi embere siwe? Mbwino omuthoki w’Ebyosi wuthi atsomene kundi wuli muthunganene, kutse akanaghasirawa kindu kyosi-kyosi kundi wukakwama enzira eyithunganene?’ (Yobu 22:1-3) Elifasi mwalengekania athi eky’erisubirya kyabya ini eyihi. Owundi mulhume abya ini, Bildadi Omusuhi, oyuwongerako athi sikyanga thokekana abandu eribya bathunganene embere sya Nyamuhanga.—Soma Yobu 25:4.
Omubere wosi-wosi owuwene kutse amaaka awathuwithe akalhua oku Nyamuhanga, kandi akalhangira ngoku thukakolesayagho
2 Elifasi na Bildadi mubalengaho erilhangira bathi Yobu ayowe athi akaghalha kiwe akakahiraho erikolera Yehova kakakwira busa. Abalhume aba babya banzire Yobu alighe athi Nyamuhanga akathulhangira ngoku akanalhangira akanyurughunzu, Yobu 4:19; 25:6) Mbwino babugha ebyo kundi babya bandu abayikehirye? (Yobu 22:29) Ni kwenene, Yehova ni w’endatha kutsibu kandi thuli kandu kake kutsibu embere siwe. Thwamimana okwa singiriri y’ekithwe kutse thwamaleberya omwa lidirisa ly’endege, thukalhua ithwakiminya ndeke kwenene ngoku thuli kathondi kake kandi ngoku thuli bbule. Aliwe mbwino Yehova kw’akalhangira athya akaghalha kethu akathukahiraho ak’erimukolera n’erikolha kutsibu busana n’Obwami? Eyihi! Yehova mwabwira Elifasi, Bildadi, n’omulhume w’akasathu, iya Zofari, athi bakabugha amabehi. Aliwe Nyamuhanga mwabugha athi atsemire busana na Yobu kandi mwamwahulha mwa “mughombe waghe.” (Yobu 42:7, 8) Neryo kwesi thwangana kakasya ngoku abandu abathahikene banganabya “b’omughaso embere sya Nyamuhanga.”
omunyole, kutse ekihuka. (“WUKAMUHAKI KWEHI?”
3. Ni byahi ebya Elihu abugha ebihambire okwa kaghalha akathukahiraho erikolera Yehova? Amanyisayaki?
3 Omulhwana oyukahulhawa mwa Elihu mwahulikirira erikanirania eryabya ahakathi-kathi ka Yobu n’abalhume basathu abo. Babere babighunza erikania, Elihu mwabulya Yobu ebihambire oku Yehova athi : “Wamabya iwuli muthunganene, wukamuhaki kwehi; ak’angiriraki omwa byalha byawu kwehi?” (Yobu 35:7) Mbwino na Elihu nayu abya iniakabugha athi akaghalha akathukahiraho erikolera Nyamuhanga kakakwira busa? Eyihi. Yehova mwathahengulha Elihu, ngoku ahengulha abandi. Elihu abya iniakakanaya okwa yindi nzumwa y’embaghane. Abya iniakabugha athi Yehova sikirimuyithaghisaya ithwe erimuramya. Sihali ekya Yehova abulire. Sihali ekya thwanga kolha ekyangaleka iniabya mughuda kutse w’amaaka manene. Erithwalira haghuma, omubere wosi-wosi owuwene kutse amaaka awathuwithe akalhua oku Nyamuhanga, kandi akalhangira ngoku thukakolesayagho.
4. Yehova akayowa athi thwamakolera abandi b’ebibuya?
4 Thwamakangania abakaramaya Yehova b’olhwanzo olhuthyusa, akalhangira ebya thukakolha ebyo nga thulyamukolerabyo. Emisyo 19:17, hathi: ‘Oyukaghanya abera akabweka Omwami Mukulhu, akendi syamuthuha omubiiri wiwe owuwene.’ Yehova akabya inianalhangire omughulhu thukakanganaya abandi b’olhukeri. Kandi nomwakine indi yuwahangika ebindu byosi, Yehova akathwamu erilhangira ebibuya ebya thukakolera abandi nga thukamubwekabyo, neryo iniathuthuha omw’ithuha ebihembo bingyi ebyuwene. Yesu, Mughalha wa Nyamuhanga, mwakakasya ekyo.—Soma Luka 14:13, 14.
5. Ni bibulyo byahi ebya thukendi kaniako?
5 Kera, Yehova mwakokya omuminyereri Isaya erimw’imanira n’erimukolera omwa nzira y’embaghane. (Isaya 6:8-10) Isaya mwaligha n’eribugha athi: “Ingye yono hano. Wunyithume!” Namunabwire, Yehova akaha abandu abathaleghulha b’akaghisa ak’erisangira omwa mubiiri wiwe. Abaghombe ba Yehova esyongumi n’esyongumi bane mukangania ku bawithe omuthima owali ng’owa Isaya. Banayitheghekire eriligha emibiiri y’erikolera Yehova omwa nzira n’emyanya muthina-muthina n’erighumira ebitsibu n’emibere eyikalire. Aliwe ibbwa omundu iniangana bugha athi: ‘Nganasi ku ni kaghisa eriyihayo eriwathikya omwa mubiiri wa Yehova, aliwe ibbwa, mbwino ingye ekya nangakolha kyangana wathikya? Nomunangabya isindiho, mbwino Yehova syendilhangira athi omubiiri wiwe akakolhawa?’ Wune wathayowa wuthya? Thuthakania ebyabya omwa syongebe sy’abaghombe ba Yehova babiri ab’omwa buthuku bwakera, Debora na Baraka, nga byanga thuwathikya bithi erisubirya okwa ebibulyo ebi.
NYAMUHANGA AKAHINDULHA ERYUBUHA MWA BUTHUBAHA
6. Ni kyahi ekyaleka ikyabya nga kikendyolhobera amahe wa Yabini erisingura Abaisraeli?
6 Baraka abya mulhwi Omuisraeli, na Debora abya muminyereri w’obukali. Ahabw’emyaka 20, Yabini omwami we Kanana abya “iniabiriaghalya kutsibu” Abaisraeli. Amahe wa Yabini abya kalire kutsibu kandi ini batsindi, neryo mukyaleka n’Abaisraeli ababya omwa byalu ibubaha, nibya mubasighania n’amanyumba wabu bakasagha. Amahe Yabini aby’awithe esyogali sy’amalhwa 900 esiri kw’ebyuma, aliwe Abaisraeli sibabya bawithe ebyuma ebitholere eby’erirwanisya kutse ebyanga batheya.—Abatsweri 4:1-3, 13; 5:6-8. * (Lebaya omwatsi ahikwa.)
7, 8. (a) Ni busondoli bwahi obwa Yehova atsuka eriha Baraka? (b) Abaisraeli mubasingura bathi amahe wa Yabini? (Lebaya ekisasani ekiri okw’itsuka.)
7 Erilinganisya amahe wa Yabini n’Abaisraeli, Abaisraeli sibabya bawithe lhughendo. Aliwe Yehova mwalhaghira Baraka erilhabira omwa muminyereri w’obukali Debora athi: “Wughende wuseghere okwa kithwa kye Tabori, kandi wimaye haghuma nawu abandu 10,000 okwa baana ba Nafutali n’abaana ba Zebuluni. Naghe nasyakulethera Sisera, omukulhu w’emilhondo y’abasirikali ya Yabini okwa lhusi lhwa Kisoni, haghuma n’esyogali siwe n’endeko yiwe y’abasirikali, kandi nasyamuhire omwa byalha byawu.”—Abatsweri 4:4-7.
8 Abakayihayo mubasabwa, neryo abalhume 10,000 mubahindana okwa Kithwe Tabori. Neryo Baraka n’abalhume biwe mubatsuka erilhwa n’amahe w’esyonzighu omwa kitsweka ekikahulhawa mwa Tanaki. (Soma Abatsweri 4:14-16.) Mbwino Yehova mwanawathikya Abaisraeli? Ee. Kitsumbukirania muhawa ekibulha kinene, neryo ahababya bakalhwira ihanumire mulhwabya lhondo lhusa-lhusa. Eki mukyawathikya Abaisraeli. Baraka mwakwama amahe wa Sisera ahabw’esyokilomita 24, erihika omwa mwanya awakahulhawa mwa Haroseti-Goyimu. Sisera abere anemuthibitha, ekiggali kiwe ky’amalhwa mukyahathira omwa byondo. Mwakima kukyo n’erithibitha e Zananimu, obundi hakuhi ne Kedesi. Sisera mwayabisama omwa hema y’omukali oyukahulhawa mo Yaeli. Sisera abya iniabirilhuha neryo mwalhuaho iniaghotsera. Inianaghotsere, omwa buthubaha Yaeli mwamwitha. (Abatsweri 4:17-21) Yehova abya iniamawathikya Abaisraeli erisingura esyonzighu syabu! * (Lebaya omwatsi ahikwa.)
AMALENGEKANIA AWAHUKENE AWAHAMBIRE OKW’IYIHAYO
9. Ni kyahi ekya thuk’igha omo mwatsi owali omwa Abatsweri 5:20, 21 owahambire okw’ilhwa na Sisera?
9 Ni bingyi ebya thuk’igha omo myatsi eyiri omwa Abatsweri sura 4 omw’isoma esura eyikakwamako. Abatsweri 5:20, 21 hakathubwira hathi: “Erilhua elhubulha esyongununu musyalhwa, musyalhwa na Sisera omwa nzira syasyo. Olhusi Kisoni mulhwathwalhabo.” Mbwino eki kikamanyisaya kithi abamalaika mubawathikya Abaisraeli omwa malhwa, kutse kikamanyisaya kithi muhathoghonga ebiri nga bibwe erilhua omo kyanya? E Biblia siyiri bugha. Aliwe kihikire eribugha thuthi Yehova mwalhamya abandu biwe omw’iwisya embulha nene omwa kitsweka ekyo okwa ndambi y’amalhwa nuku esyoggali 900 esy’amalhwa silemawe erighenda. Omwa Abatsweri 4:14, 15, Yehova akakanibawako ngendo isathu ku yuwathokesaya Abaisraeli erisingura. Okwa balhume 10,000 abayihayo sikuli n’omughuma oyuwangabya iyuwaleka Abaisraeli ibasingura.
10, 11. Merozi yabya iniki? Busana naki muyathakirwa?
10 Hathyanu thuthakania okwa kindu ekikaswekaya. Abaisraeli babere babirisingura, Debora na Baraka mubapipa Yehova omwa lhwimbo. Mubimba bathi: “Omumalaika w’Omwami Mukulhu athi, ‘Muthakire Merozi, muthakire erikalire esyondulhani syakyo, kusangwa mubathahika eriwathikya Omwami Mukulhu, eriwathikya Omwami Mukulhu eribambira abalhwi.’”—Abatsweri 5:23.
11 Merozi yabya iniki? Sithwasi ndeke-ndeke. Aliwe erithakira Merozi mulyakolha ndeke kundi ebihambire kuyo byabiribulirana. Obundi Merozi abya muyi omwabya abandu abathayihayo erisighika Baraka omwa malhwa. Kundi abandu 10,000 babya ibabiriyihayo eriyalhwa n’Abanya Kanana, abandu be Merozi bangabya imubowa okwa ngulhu y’eriyithagha abakayihayo. Kutse Merozi anganabya ini muyi owa Sisera alhabamu akalengesya erithibitha akasagha Baraka. Abandu be Merozi bangabya ibabya n’akaghisa k’erihamba Sisera aliwe bamaghana erikikolha. Thathera akasasani bakalhangira omulhwi mbangyi akalhaba omwa muyi wabu iniane muthibitha! Banganayirire ekyo bakakolha erisighika ekighendererwa kya Yehova. Ku bakolha ekyo, angabahembire. Aliwe babere bakabana akaghisa k’erisighika Yehova, mubathayira ekyo bakakolha. Abandu be Merozi bakabya nga babya bambaghane kutsibu oku Yaeli, oyuwakanganaya obuthubaha.—Abatsweri 5:24-27.
Thutholere ithwalebya ndeke amalengekania wethu okw’ikolera Nyamuhanga
12. Ni mbaghane yahi omwa bulengekania bw’abandu eyiri omwa Abatsweri 5:9, 10? Kandi eki kitholere ikyathuhambako kithi?
12 Omwa Abatsweri 5:9, 10, thukalhangira ngoku amalengekania w’abandu 10,000 abayihayo abya wa mbaghane kutsibu okwa w’abathayihayo. Debora na Baraka mubapipa “abathabali be Israeli, abayihayo omo lhwanzo omwa kathi-kathi k’abandu.” Babya bambaghane kutsibu okwa bakaghenda okwa “punda nyeru-nyeru,” abayowa omubiiri w’eriyihayo nga ni w’ahisi kutsibu. Abandu abo bakanibweko ng’abikere “okwa mikeka y’obughuli bunene” ‘n’abakalendera omwa nzira,’ ibane omwa tseme yabu. Mbaghane n’ekyo, abayihayo mubaghenda na Baraka eriyalhwira okwa hithwa hye Tabori n’omwa musya we Kisoni. Abathabya banzire eriwathikya mubabwirwa indi balengekanaye. Babya batholere ibaghanirya n’erilengekania okwa highisa ehyo baheraya omw’ithendi yihayo omwa mubiiri wa Yehova. Nethu munabwire, thutholere ithwalebya ndeke amalengekania wethu okw’ikolera Nyamuhanga.
13. Amalengekania w’ekihanda kya Rubeni, Dani, na Aseri abya athi wambaghane okwa w’ekihanda kya Zebuloni n’ekya Nafutali?
13 Abandu 10,000 abayihayo mubabya n’akaghisa k’eriyilhangirira ngoku Yehova ni Muthabali Mukulhu. Ekyo ibakakibwirako abandi bakakania okwa “mibiiri yithunganene y’Omwami Mukulhu.” (Abatsweri 5:11) Mbaghane n’ekyo, ab’ekihanda kya Rubeni, Dani, n’ekya Aseri mubatsomana kutsibu ebindu byabu by’obughuda, ng’ebihyo byabu by’esyombuli, amathu, ahakaghobera amathu, kwilhaba eritsomana omubiiri wa Yehova. (Abatsweri 5:15-17) Aliwe sibugha indi ebihanda byosi ku byabya bithya. Ab’ekihanda kya Zebuluni n’ekya Nafutali ‘mubatsama esyongebe syabu erihika okw’iholha’ erisighika Debora na Baraka. (Abatsweri 5:18) Amalengekania muthina-muthina awahambire okw’iyihayo eriwathikya angana thweghesya erisomo ly’omughaso.
“PIPA YEHOVA!”
14. Thukakanganaya thuthi munabwire ku thukasighika obuthabali bwa Yehova?
14 Munabwire, sithuli sighika obuthabali bwa Yehova omw’ilhwa. Aliwe, thukakanganaya erisighika lyethu thukathulira buthubaha kandi n’omuhwa. Abakayihayo bakayithaghisibawa omwa mubiiri wa Yehova, kwilhaba kera. Baghalha bethu, bali bethu, n’abalere bangyi kutsibu bane muyihayo omwa mibiiri muthina-muthina ey’omughulhu wosi. Ng’eky’erileberyako, abangyi ni batemburi, abandi bali okwa Beteli, abandi omwa buhimbe bw’Ebisenge by’Obwami, n’abandi ibayihayo erikolha okwa mihindano minene-minene. Abandi basyakulhu bakakolha kutsibu omwa Hithunga Ehikakolangana n’Amathambiriro n’eritheghekania emihindano eminene-minene. Thwasi ndeke-ndeke Abaebrania 6:10.
ngoku Yehova akasima eriyihayo lyethu erimukolera omwa nzira yosi-yosi kandi ngoku syang’ibirirwa akaghalha kethu.—Wuthe wathwamu, lengekanaya nga kyanga hamba kithi okw’eka yawu n’ekithunga (Lebaya enungu 15)
15. Thwanga kolhaki erithend’ihwa mw’omuhwa w’erikolera Yehova?
15 Thutholere ithwalebya ndeke amalengekania agho thuwithe okw’iyihayo. Ithwangana yibulya: ‘Mbwino ngalekera abandi b’emibiiri mingyi? Mbwino ngahweraya akaghalha kaghe okw’isondya ebindu by’omubiri omwakanya k’erikolera Yehova? Kutse ngane mugherererya erikirirya n’obuthubaha bwa Baraka, Debora, Yaeli, n’abandu 10,000 abayihayo omw’ikolesya ebyosi-byosi ebya ngawithe erikolera Yehova? Mbwino ngane mulengekania erighenda omwa yindi tawuni kutse ekindi kihugho eriyakolha esyosente nuku nangabya omwa ngebe eyuwene? Byamabya ikwa biri bithya, ngane mubulya Yehova eki nga kikendi hamba kithi okw’eka yaghe n’ekithunga?’ * (Lebaya omwatsi ahikwa.)
16. Nomwakine indi Yehova awithe obuli kindu, ni kyahi ekya thwanga muha?
16 Yehova akathuha ekitsumbi kinene kutsibu omw’ithulighira erisighika obuthabali bwiwe. Erilhua okwa buthuku bwa Adamu na Eva, Sitani abiryanza abandu bamusighike omw’ihakanisya Yehova. Aliwe omughulhu thukasighika obuthabali bwa Yehova, thukakanganaya Sitani ya ndeke nga thuli okwa lhuhandi lhwandi. Erikirirya n’obuthaleghulha bwethu bikaleka ithwayihayo omwa mubiiri wa Yehova, kandi eki kikamutsemesaya kutsibu. (Emisyo 23:15, 16) Nyamuhanga wethu angana kolesya erimusighika lyethu omwa buthaleghulha n’obwowa bwethu erisubirya ebitsumi bya Sitani. (Emisyo 27:11) Obwowa bwethu ni kindu ky’obughuli ekya thwangaha Yehova kandi kikamutsemesaya kutsibu.
17. Abatsweri 5:31 hakathweghesayaki okwa kikendibya okwa buthuku obukasa?
17 Omwa buthuku obuthe bwa haali, obuli mundu wosi akendi yisunza eribya omwa buthabali bwa Yehova, kwilhaba obundi bwosi-bwosi. Ka thulindirire obuthuku obo n’amani manene! Thukayowa nga Debora na Baraka, ab’imba bathi: “Esyonzighu syawu syosi sihere sithya iwe Mwami Mukulhu, nikwa abakamwanza babye ng’eryuba erikahulhuka n’amaaka walyo.” (Abatsweri 5:31) Ekyo kikendi syabya Yehova akaghunzaho ekihugho kibi kya Sitani kino. Okwa lhuhe lhwe Harmagedoni, Yehova syendi syayithagha abandu abanga muwathikya erithoghothya esyonzighu. Aliwe, thukendi ‘syahangana’ ‘n’erilhangira erilhamya ly’Omwami Mukulhu.’ (2 Emyatsi y’Emigulu 20:17) Thunalindirire obuthuku obo, thuwithe nzira nyingyi esy’erisighika omwa buthubaha n’omuhwa obuthabali bwa Yehova.
18. Iwe eriyihayo kyanga ghasira kithi abandi?
18 Ebinywe by’erimbere-mbere ebiri omwa lhwimbo lhw’erisingura olhwa Debora na Baraka bikapipa Yehova, butsira abandu. Mubimba bathi: “Kusangwa abandu mubayihayo n’omuhwa, Omwami Mukulhu apipawe!” (Abatsweri 5:1, 2) Kuthya nethu, thukabya thukakolera Yehova omwa nzira yosi-yosi, kyangana leka n’abandi nabu ibanza “eripipa Yehova!”
^ enu. 6 Ebyuma ebyabya okwa syogali yanganabya iyabya miyali eyithwire, miri-miri, obundi n’eribya iyikathire ng’ekisara. Ebyuma ebi byangabya ibyabya bihangamire omwa misingyi y’ebiringo by’ebiggali. Ebiggali ebyo mubyabya byuma ebikathingithaya.
^ enu. 8 Wangana soma bingyi okwa mwatsi oyu omwa Watchtower eya Okwomunani 1, 2015, olhupapura 12-15.
^ enu. 15 Lebaya omwatsi “Amaghaniryo w’eby’Esyosente” omwa Kaleberyo ak’Okwomusanju 1, 2015.