1, 2. (a) Naboti n’abaghalha biwe mubabana obuthe bulingirirania obuli buthi? (b) Ni mibere yahi ibiri eya thukendi kaniako omo mwatsi ono?

ABALHUME babiri ababi bakabugha bathi omulhume abirikolha ekibi ekikalire. Ebya bakabugha ni mabehi. Aliwe olhubanza lhukamuwira kandi obo ini w’erikwa. Thalengekania abandu abanzire obulingirirania nga mubayowa bathi bakalhangira omulhume oyuthe kw’olhubanza oyu n’abaghalha biwe bak’ithibwa omwa mabwe! Omwatsi oyu si lhughano buyira. Ekyo ky’ekyabya kyabere okwa mughombe wa Yehova omuthaleghulha oyukahulhawa mwa Naboti, oyuwabyaho omughulhu Omwami Ahabu abya akathabalha e Israeli.​—1 Abami 21:11-13; 2 Abami 9:26.

² Omo mwatsi ono, thukendi kania okwa kyabya kyabere oku Naboti. Thukendi kania n’okwa sobya eyikalire eyakolhawa n’omusyakulhu muthaleghulha ow’omwa kithunga kighuma eky’okwa by’erimbere-mbere. Eby’erileberyako bibiri ebi bikendi  thukangania ngoku eriyikehya n’erianza erighanyira abandi bikayithaghisibawa thwamabya thwanzire erigherererya emibere eya Yehova akakanganirayamu obulingirirania.

3, 4. Naboti abya mulhume oyuli athi, kandi ni kyahi ekyaleka iniaghana erighulya Omwami Ahabu y’eririma liwe?

³ Naboti abya muthaleghulha oku Yehova omughulhu Abaisraeli bangyi babya bakakwama eky’erileberyako kibi eky’Omwami Ahabu na mukali wiwe, omwami-kali mubi Yezebeli. Mubaramya Baali nyamuhanga w’amabehi kandi mubathasikya Yehova n’ebihano biwe. Aliwe Naboti mwalhangira obughuma bwiwe na Yehova mwa kindu ky’obughuli bunene kutsibu kwilhaba n’engebe yiwe.

⁴ Soma 1 Abami 21:1-3. Ahabu abere anza erighulha eririma lya Naboti ery’ebinyu kutse eririhingisya mw’erindi eryuwene, Naboti mwaghana. Busana naki? Omw’isikya mwasoborera athi: “Omwami Mukulhu aghanekyo busana naghe, erikuha omwandu w’abathatha-kulhu baghe.” Naboti mwaghana ekya Mwami Ahabu anza erikolha kundi kyabya ikikathwa emighambo ya Yehova eyabya yikathanga Abaisraeli erighulya omwandu w’ekihanda ahathe erisyasubulibirwagho. (Abalawi 25:23; Emiganzo 36:7) Kwesi, Naboti iniakaghondera Yehova.

5. Ni kyahi ekya Yezebeli akolha nuku imaye eririma lya Naboti?

⁵ Naboti abere abirighana erighulya eririma liwe ly’ebinyu, Omwami Ahabu na mukali wiwe mubakolha ekindu ekikalire. Nuku bimaye eririma eryo, Omwami-kali Yezebeli mwabwira abalhume babiri athi bahingike oku Naboti kw’olhubanza olhukalire olhw’athithakolha. Ekyo mukyaleka Naboti n’abaghalha biwe ibithibwa. Ni kyahi ekya Yehova akolha okwa buthe bulingirirania obw’akabi obu?

6, 7. Yehova mwakangania athi kw’anzire obulingirirania, kandi busana naki eki kyangabya imukyahumulikania ab’eka ya Naboti n’abanywani?

⁶ Aho n’aho Yehova mwathuma Eliya eyiri Ahabu. Eliya mwabwira Ahabu athi ni mwithi kandi athi ni mwibi. Yehova mwathwamu athi? Ahabu, mukali wiwe, n’abaghalha biwe babya b’erikwa, ngoku kyabya oku Naboti n’abaghalha biwe.​—1 Abami 21:17-25.

⁷ Ab’eka ya Naboti n’abanywani biwe mubabya omwa bulighe bunene busana n’ekindu kibi kutsibu ekya Ahabu akolha. Aliwe Yehova mwalhangira obuthe bulingirirania obo neryo amayira eky’akakolha omwa byalhuba. Ekyo kyangabya imukyabahumulikania. Nomwabine, eriyikehya lyabu n’eriyikethera lyabu omu Yehova lyangabya imulyalengwako omwa kindi ekyabya kyabere enyuma waho.

8. Ahabu mwakolhaki akowa ekya Yehova akabugha, kandi mumwalhwiririraki?

⁸ Ahabu abere abiriowa ekya Yehova abirithwamu erimukolera, “mwasathangya esyongyimba siwe, mwambalha emisarandwe  oko mubiri wiwe, mwatsira akalyo, mwaghotsera n’emisarandwe, mwaghenda n’obulighe.” Ahabu mwayikehya! Mumwalhwiririraki? Yehova mwabwira Eliya athi: “Kusangwa akayikehaya embere syaghe, singendi syaletha ebibi ebyo omwa biro biwe; nikwa omo biro by’omughalha wiwe.” (1 Abami 21:27-29; 2 Abami 10:10, 11, 17) Yehova, ‘oyukalenga emithima,’ oyukalhangira ekiri omw’isi syethu, mwakangya Ahabu y’olhukogho.​—Emisyo 17:3.

9. Busana naki eriyikehya lyanga theghirye ab’eka ya Naboti n’abanywani?

⁹ Ab’eka ya Naboti n’abanywani babere bakowa ngoku ab’eka ya Ahabu sibendi suyirwa erihika aho Ahabu asyaholera, ekyo kyangabya imukyalenga okw’ikirirya lyabu omu Nyamuhanga. Aliwe eriyikehya lyanga bawathikirye eritheya erikirirya lyabu. Busana naki? Kundi eriyikehya lyangalekire ibalholha embere eriramya Yehova, ibanayikethere ngoku sikyanga thokekana Nyamuhanga erikangania obuthe bulingirirania. (Soma Eryibuka Ebihano 32:3, 4.) Obuthuku obukasa, ab’eka ya Naboti bakendi syathunga omughisa ow’erilhangira abanze babu bakalhubukibwa. Naboti n’abaghalha biwe bakendi syabana obulingirirania obuhikene. (Yobu 14:14, 15; Yoane 5: 28, 29) Omundu oyukayikehaya akaminya ngoku “Nyamuhanga asyaletha obuli mubiiri okw’itswerwa, haghuma n’obuli kindu kibisamire, kutse kyamabya kyowene, kutse kyamabya ikiri kibi.” (Omugambuli 12:14) Yehova akathungerera ebindi ebya thuthe thwangalhangira. Neryo eriyikehya likathutheghaya neryo ithuthaherya erikirirya lyethu omu Yehova.

10, 11. (a) Ni mibere yahi eyanga lenga okwa mibere eya thukalhangiriramu obulingirirania? (b) Eriyikehya lyanga thutheya omu nzira syahi?

¹⁰ Wanga kolhaki abasyakulhu bamakolha erithwamu erya wuthayitheghereraya kutse eririghirana nalyo? Ng’eky’erileberyako, iwukendi kolhaki iwe kutse munywani wawu amaherya olhusunzo olhw’awithe omwa mubiiri wa Yehova? Kandi omwanze wawu omwa butheke, kutse omwana wawu, kutse munywani wawu amahighithwa omwa kithunga isiwathalighirana n’erithwamu ly’abasyakulhu? Iwukendi kolhaki wamalhangira wuthi sikilhue kihikire abasyakulhu erikangania omukolha-nabi y’olhukogho? Emibere ng’eyi yanganalenga okw’ikirirya lyethu omu Yehova n’emibere ey’abirithondekaniryamu ekithunga kiwe munabwire. Eriyikehya likendi kutheya lithi emibere ng’eyi yamalenga okw’ikirirya lyawu? Thulebaye esyonzira ibiri.

¹¹ Ey’erimbere, thwamayikehya, ithukendi minya ngoku sithwasi ebyosi. Nomuthwanga lengekania thuthi thunasi ebyosi ebihambire oko mwatsi mulebe, Yehova musa yukaminya ebiri omwa muthima w’omundu. (1 Samweli 16:7) Thwamibuka eki, omw’iyikehya ithukendi minya ngoku thuwithe aha thukasubulira kandi ngoku thutholere ithwahindulha amalengekania wethu. Ekyakabiri, thwamabya ithwabirilhangira kutse erihikwako obuthe bulingirirania, eriyikehya irikendi thuwathikya eribya bowa n’erilindirira Yehova erihengulha emyatsi. E Biblia yithi: “Omwatsi asyuwana oku bakubaha Nyamuhanga.” E Biblia yikathasyongera yithi: “Nikwa omundu mubi syendisyuwana, kutse syendi syakanyia ebiro biwe.” (Omugambuli 8:12, 13) Thwamasighalha ithunayikehirye, ithukendi ghasirwa kuthya n’obuli mundu oyuhambirweko.​—Soma 1 Petero 5:5.

12. Ni mwatsi wahi owathukayakanayako, kandi busana naki?

¹² Abakrisitayo ab’erimbere omwa Antiokia ye Suria, mubalhaba omwa mibere eyalenga okw’iyikehya lyabu kuthya n’erianza erighanyira. Thukubungule omwatsi oyo thwanakolesyagho eriyirebya nga thuwithe malengekaniaki okw’ighanyira. Angana thuwathikya eriyitheghererya ekyangaleka Yehova iniakolesya abandu abathahikene ahathe erihengemya emisingyi yiwe.

13, 14. Ni mubiiri wahi owahebawa omukwenda Petero, kandi mwakangania athi ngoku ni muthubaha?

¹³ Omukwenda Petero abya musyakulhu w’ekithunga oyuwabya asibwe ndeke n’Abakristayo ab’omwa kighonye ky’erimbere. Abya munywani wa Yehova kandi abya  iniabirimuha olhumimbi lhukulhu. (Matayo 16:19) Ng’eky’erileberyako, omo mwaka owa 36, Petero mwahebwa omubiiri ow’erithulira Kornelio n’abosi ab’enyumba yiwe. Busana naki eki kyabya kindu ky’embaghane? Kundi Kornelio syabya Muyuda; abya Munya Bihanda oyuthabanibwe. Kornelio n’ab’enyumba yiwe babere bakathunga omulimu abuyirire, Petero mwaminya ngoku bangana batizibwa ibabya Bakristayo. Mwabugha athi: “Abandu aba babiriangirira omulimu abuyirire ng’ithwe. Ko nindi angakaghabo eribatizibwa omwa maghetse?”​—Emibiri 10:47.

¹⁴ Omo mwaka owa 49, abakwenda n’abasyakulhu omwa Yerusalemu mubahindana haghuma erithwamu Abakrisitayo Abanya Bihanda nga banatholere eribanibwa. Omwa muhindano oyu, omwa buthubaha Petero mw’ibukya balikyabo athi iyo abiriyilhangirira Abanya Bihanda bakathunga omulimu abuyirire. Ebya Petero alholhako mubyawathikya akathunga akakasondolha erihika okwa kyabakathwamu. (Emibiri 15:6-11, 13, 14, 28, 29) Abakrisitayo Abayuda n’Abanya Bihanda abosi bangabya imubatsema bakalhangira obuthubaha bwa Petero akasoborera ndeke emyatsi. Kyangabya imukyabya kyolho Abakrisitayo ab’erimbere aba eriyikethera omulhume muthaleghulha oyukulire bunyakirimu oyu!​—Abaebrania 13:7.

15. Ni sobya yahi eya Petero akolha iniane omwa Antiokia, e Suria? (Lebaya ekisasani ekiri okw’itsuka.)

¹⁵ Buthuku buke balihindene e Yerusalemu, Petero mwabungira omwa Antiokia ye Suria. Abere an’eyo, mwabya iniane n’abalikyabo Abanya Bihanda. Wangana thera akasasani ngoku babya ibanemw’igha bingyi oku Petero busana n’ebyasi n’ebyabya iniabirilhabamu. Aliriryo, kitholere eribya imukyabaswekya n’eribahithania, Petero akaghana kitsumbukirania erithasyalya nabu. Ekya Petero akolha eki mukyaleka n’abandi Bakristayo Abayuda, imwamuli na Baranaba, nabu ibakolha ikyan’ekyo. Ni kyahi ekyaleka omusyakulhu Omukrisitayo oyukulire athya bunyakirimu iniakolha esobya nene ng’eyi, eyangaleka ekithunga ikyaghabulhana? Ekikulhu kutsibu, ni kyahi ekya thwang’ighira omwa sobya ya Petero ekyanga thuwathikya omusyakulhu amathuhithania omwa byalyabugha kutse erikolha?

16. Petero mwahabulhwa athi, kandi hakabuthuka bibulyoki?

¹⁶ Soma Abanya Galatia 2:11-14. Petero mubaha abandu. (Emisyo 29:25) Petero abya inianasi Yehova ng’akayowa athi okwa b’Ebihanda. Nomwabine bithya, mwasagha athi Abakrisitayo Abayuda ababanibwe abakabunga erilhua e Yerusalemu bakendi mughaya busana n’eribya n’Abakrisitayo ab’Ebihanda. Omukwenda Paulo mwabwira Petero athi eryo n’iyithendererya. Busana naki? Kundi Paulo abya iniabirilhangira  Petero akalhwira Abanya Bihanda omo muhindano owabya e Yerusalemu omo mwaka owa 49. (Emibiri 15:12; Abanya Galatia 2:13) Abakrisitayo Abanya Bihanda abo Petero athwikalhaya bangakolireki? Mbwino bangakwamire kyayireka omwa mibere y’erithwikalha eyo? Mbwino Petero angaherirye olhusunzo lhwiwe busana n’esobya eyo?

17. Petero mwaghasirwa athi omw’ighanyira lya Yehova?

¹⁷ Petero iniayikehirye kandi mwaligha erihabulha lya Paulo. Amasako syalibugha athi Petero mwaherya olhusunzo lhwosi-lhwosi. Erithwalira haghuma, enyuma waho mwasondolibwa n’omulimu erihandika esyobaruha ibiri esya hiribawa omwa Biblia. Omo baruha yiwe eyakabiri, nibya akahulha Paulo mwa “mulikyethu mwanze.” (2 Petero 3:15) Esobya ya Petero yitholere eribya imuyahithania Abakrisitayo Abanya Bihanda. Aliriryo, Yesu, oyuli muthwe w’ekithunga, mwalholha embere erimukolesya. (Abanya Efeso 1:22) Baghalha bethu na bali bethu omwa kithunga mubathunga akaghisa ak’erigherererya Yesu na Thatha wiwe omw’ighanyira Petero. Ka thubye n’amaha thuthi, muhathabya oyukasighalha inianathwikere busana n’esobya oy’omulhume oyuthahikene oyu.

18. Ni mughulhu wahi thwanga yithagha erigherererya emibere eya Yehova akakanganirayamu obulingirirania?

¹⁸ Omwa kithunga ky’Ekikrisitayo eky’erimbere simwabya abasyakulhu abahikene, kuthya n’omwa kithunga ky’Ekikrisitayo ekya munabwire simuli abasyakulhu abahikene. E Biblia yikabugha yithi: “Ithwe bosi thukathalha omwa bingyi.” (Yakobo 3:2) Eki kyolhobire eriminya, aliwe iwukendi kolhaki mulikyethu amakusoberya? Ithune mwendi kangania obulingirirania nga Yehova? Ng’eky’erileberyako, iwukendi kolhaki omusyakulhu amabugha ekikabya nga kikakanganaya akasolholho? Iwunemwendi ligha wuthwikale omusyakulhu amabugha buthalengekania ekindu ekikakuponesaya kutse erikuhithania? Omwakanya k’erikwama kyalengekania lhuba-lhuba wuth ambi mughalha wethu isyalholha embere eribya musyakulhu, wunemwendi lindirira buthalhuha erithwamu lya Yesu, omuthwe w’ekithunga? Omwakanya k’erihanda omunwe okwa kisobyo, wunemwend’ibuka emyaka mingyi eya mughalha wethu amabirighunza inianemukolera Yehova buthaleghulha? Mulikyethu oyulyakusoberaya amalholha embere erikolha ng’omusyakulhu kutse akabana esindi nzunzo omwa kithunga, iwunemwendi tsema? Wamabya iwunayitheghekire erighanyira, iwukendibya iwukakanganaya ku wukagherereraya emibere eya Yehova akakanganirayamu obulingirirania.​—Soma Matayo 6:14, 15.

19. Thutholere ithwathwamu erikolhaki?

¹⁹ Kundi Yehova anzire obulingirirania, thulindirire kutsibu ekiro Yehova akendi syaghunziraho ighuma obuthe bulingirirania bwosi obukalethawa na Sitani n’ekihugho kiwe. (Isaya 65:17) Ekyo kithe kyabya, omughulhu thukahikawako obuthe bulingirirania, omw’iyikehya, thuminye ngoku thwanganabya isithwasi emyatsi yosi kandi ambi ithwaghanyira ndeke abakathusoberaya. Thwamakolha ekyo, ithukendibya ithukagherereraya emibere eya Yehova akakanganirayamu obulingirirania.