1, 2. (a) Soborera ekikaleka eribatizibwa ikyabya ini kiika eky’eritsuka erilengekaniako kutsibu. (b) Ni byahi ebya mundu atholere iniatsuka erilebya ndeke athe abatizibwa?

MBWINO wuli mulere oyunemulengekania okw’ibatizibwa? Kyamabya ikwakiri kithya, ekya wukanza erikolha ekyo ni lhusunzo lhunene kutsibu. Aliwe ngoku kyana kanganibawa omwa mwatsi owahwere, ekyo ni kiika eky’eritsuka erilengekaniako kutsibu. Wukabya iwamakangania eriyihayo lyawu​—erilhagha Yehova ngoku wukendi mukolera kera na kera omw’ihira erisonda liwe ly’embere omwa ngebe yawu. Neryo ni ky’amenge eribatizibwa wamabya iwangana thoka eriyithwiramu ndeke okw’ekyo, kundi litholere iryabya in’ithwamu lyawu ng’omundu, kandi iwunasi ekya wukakolha.

² Kandi ibbwa wamayowa nga siwuli wahika eribatizibwa? Kutse iwe iwanza eribatizibwa, aliwe ababuthi ibabugha bathi wulinde hake, wutsuke eriminya ndeke emisingyi y’Ekikristayo? Ekyo kyamabya, isiwahwa amani. Aliwe kolesaya obuthuku obu erikulha-kulhana, kandi omwa buthuku obuthe bwa haali, iwukendi tholera eribatizibwa. Eribatizibwa kyamabya ininakilhubirirwa  kyawu, ambi iwayibulya nga w’imene wuthi oku bino: (1) ebya wikirirye, (2) ebya wukakolha, na (3) erisima lyawu.

3, 4. Abalere bak’ighaki okwa ky’erileberyako kya Timoteo?

³ Wanga subirya wuthiki okwa bibulyo bino: Ni kyahi ekikaleka inaligha ngoku Nyamuhanga aneho? Ni kyahi ekikaleka inaligha ngoku e Biblia ni Kinywe kya Nyamuhanga? Ni kyahi ekikaleka inikirirya indi erighendera okwa bihano bya Nyamuhanga kilengire erikwama eby’ekihugho? Ebibulyo ebyo sibiriho busana n’erikuletha mw’erithika-thika. Aliwe ibyangana kuwathikya erighendera okw’ihabulha ly’omukwenda Paulo lino: “Muyirebaye nga munalighire ndeke erisonda lya Nyamuhanga eryuwene, eryangaliwa kandi erihikene.” (Abar. 12:2, NW) Busana naki wutholere iwakolha ekyo?

⁴ Eky’erileberyako ekiri omwa Biblia kya kino: Timoteo abya inianasi Amasako wa ndeke. Mama wiwe na mukaka wiwe babya ibabirimukangirirya “eritsuka omwa bwana.” Nomukyanabya kithya, Paulo mwabwira Timoteo athi: ‘Wukwamirire omo myatsi eyo wakangiriribawa n’eyo w’ikiriraya ndeke.’ (2 Tim. 3:14, 15) Timoteo abya iniabiriyira ekwenene mwa yiwe. Alighayo isibugha ambu kundi mama wiwe na mukaka wiwe bamubwira ambu akikole, aliwe kundi iyuwene-wene mwaghanirya kuyo neryo am’ikirirya ndeke.

5, 6. Busana naki ni kikulhu erigha erilebya ndeke emyatsi iwukine mulere?

⁵ Kandi ibbwa iwe? Obundi wanamabirighunza buthuku waliminyire ekwenene ye Biblia. Kyamabya ikwakiri kithya, busana naki iwuthakolha mwakilhubirirwa kyawu erilebya ndeke esyonzumwa esilekire iwaligha ebya wikirirye? Ekyo ikikendi leka iwasikira okwa bya wikirirye, isiwanga thasyaghendera okwa byuka by’ab’olhulengo lhwawu, amathebo w’ekihugho, kutse nibya n’eriyowa lyawu.

⁶ Erigha erilebya ndeke emyatsi iwukine mulere kikendi kuwathikya erisubirya ndeke bamakubulya ebibulyo nga bino: ‘Wukaminya wuthi kwenene ngoku Nyamuhanga aneho? Busana naki Nyamuhanga w’olhwanzo akalekerera h’obubi? Nyamuhanga angabya athi isyawithe enzuko?’ Wamabya iwunayitheghekire, ebibulyo ng’ebyo isibyendi tsekya erikirirya lyawu, aliwe ibikendi leka iwanza erithasya y’eghesya ndeke e Biblia.

7-9. Soborera emyatsi eya, “E Biblia Kwenene Yikakangirirayaki?” eyikabya okwa Intaneti nga yanga kuwathikya yithi erighumya ebya wikirirye.

⁷ Eriyeghesya ndeke e Biblia ikikendi kuwathikya erisubirya ebibulyo ebya wukabulibawa, eriyighunza mw’erithika-thika, n’erighumya ebya w’ikirirye. (Emib. 17:11) Thwabirihebwa bingyi eby’erikolesya ebyanga kuwathikya erikolha ekyo. Abangyi babirighasirwa omw’isoma ebitabu byethu ebikakanaya okwa Muhangiki wethu n’ebihangikwa biwe. Eryongera okw’ekyo, eyindi minyethu yabirighasirwa omw’ikolesya omwatsi “E Biblia Kwenene Yikakangirirayaki?” owali okwa Intaneti. Emyatsi eyi yikabya iyinemwasira okwa muthahulha wethu owe jw.org. Ghenda omwa BIBLE TEACHINGS/TEENAGERS. Ebikabyamu bikolirwe busana n’erikuwathikya erighumya ebya wikirirye okwa myatsi ye Biblia.

⁸ Busana n’ebya wamabirithaminya omwa Biblia, kyangana kwolhobera erisubirya ebighuma by’okwa bibulyo ebiri okwa muthahulha oyo owe Intaneti. Aliwe wukaminya wuthi ngoku erisubirya lyawu lihikire? Omwa ndegheka eyi wukanabya n’akaghisa k’erighanirya okwa Masako n’erihandika amalengekania awawuwithe kugho. Ekyo ikyangana kuwathikya eriyithegheka ngoku wanga soborera abandi okwa bya wikirirye.  Endegheka y’okwa Intaneti eyi eya “E Biblia Kwenene Yikakangirirayaki?” yinemuwathikya abalere bangyi erighumya ebya bikirirye. Wamabya iwangana banayo, busana naki iwuthahira y’omwa ndegheka yawu y’eriyeghesya e Biblia?

⁹ Erighumya wuthya ebya wikirirye, wukabya iwamakolha ekindu ekyanga kuhikya okw’ibatizibwa. Mwali wethu omulere mwabugha athi: “Nabere indenabatizibwa, munatsuka erigha e Biblia neryo namayiminyira ngoku eyi y’edini y’okwenene. Kandi ekyo ngabya ikungane mukighumya omwa muthima waghe obuli kiro.”

10. Busana naki ebya Mukristayo oyubatizibirwe akakolha bitholere ibyakangania erikirirya liwe?

¹⁰ E Biblia yithi: “Erikirirya lyamabya iryolyene, butsira mibiiri, iriholire.” (Yak. 2:17) Wamabya iwunalighire ndeke-ndeke ekindu, ikikendilhua ikyalhangirika omwa bya wukakolha. Nga byahi? E Biblia yikakanaya okwa ‘mighendere yibuyirire n’erikenga Nyamuhanga.’​—Soma 2 Petero 3:11.

11. Kikamanyisayaki eribya ‘n’emighendere yibuyirire.’

¹¹ Eribya “w’emighendere yibuyirire,” wutholere iwabya iw’erire omwa by’esyongeso. Iwe, w’imene wuthi okw’ekyo? Ng’eky’erileberyako, thalengekania okwa bya wakolha omwa mezi mukagha awahwere. Muwana yikangania ng’omundu oyuwabiriminya erighabulha ekibuya ky’okwa kibi? (Ebr. 5:14) Wangan’ibuka kiro kirebe wukarwanisya erirengwako lirebe kutse akahathikano? Mbwino emibere yawu okwa sukuru yikana leka erikirirya lyawu iryakanibwako ndeke? Wukanaminyikalhaya erikirirya lyawu omwakanya k’eriyilingirirania omwa bandi wukasagha akasekereryo? (1 Pet. 4:3, 4) Ni kwenene, sihali oyuhikene. Nibya n’abamabirighunza buthuku ibanemukolera Yehova, ihangana yira nabu ibasagha eriminyikalya erikirirya lyabu omwa bandu bangyi. Aliwe, omundu oyuwabiriyihayo oku Yehova akayisyethera eryahulhwa omwa lina lya Nyamuhanga, kandi eki akakikanganaya omwa by’akakolha.

12. Erikenga Nyamuhanga mwamuli erikolhaki?

¹² Kandi ibbwa erikenga Nyamuhanga mwa muli erikolha nga byahi? Mwamuli ebya wukakolha omwa kithunga, ng’erighenda okwa mihindano n’erighenda omw’ithulira. Kandi mwamune n’ebya wukakolha ebithelhangirawa n’abandi, ng’emisabe yawu iwune iwuwene n’eriyeghesya e Biblia. Oyuwabiriyihayo oku Yehova syalilhangira ebindu ebi nga ni muheke. Aliwe akabya n’amalengekania ng’aw’Omwami Dawudi ano: “Nyanzire erikolha erisonda lyawu, iwe Nyamuhanga waghe, inga, emighambo yawu yiri omo muthima waghe.”​—Esy. 40:8.

13, 14. Ni kyahi ekyanga wathikya omw’ikolha ebikakanganaya erikenga Nyamuhanga, kandi abandi abalere babirighasirwa bathi omwa ndegheka eyi?

¹³ Omwa kitabu Questions Young People Ask​—Answers That Work evolyumu 2 okwa lhupapura 308 n’olhwa 309, kune ebibulyo ebyanga kuwathikya erihira h’ebilhubirirwa. Hali ebibulyo ebikakuyithaghisaya erihandika eky’erisubirya kyawu, nga bino: “Wukanasaba Yehova ekyonyine-nyine ekya wukanza, kandi erisaba eryo likana kakanganaya ku wumwanzire?” “Omw’iyeghesya lyawu, wuk’igha okwa bindu ngaki?” “Wukanaghenda omw’ithulira ababuthi nomubangabya isibendi ghenda?” Hane n’omwanya w’erihandikamu ebilhubirirwa byawu erikwamana n’emisabe yawu, eriyeghesya, n’omubiiri w’erithulira.

¹⁴ Abalere bangyi babirighasirwa omw’ikolesya endegheka eyi, eyiri omwa kitabu eki. Mwali wethu omulere oyuk’ahulhawa mwa Tilda akabugha athi: “Munakolesya endegheka eyo omw’ihandika ebilhubirirwa byaghe. Munaghenda ingabiberererya kighuma okwa  kighuma, neryo enyuma w’omwaka mughuma namabatizibwa.” Na mughalha wethu omulere, ye Patrick nayu mwaghasirwa athya. Nayu athi, “Kwenene nabya inganasi ebilhubirirwa byaghe, aliwe eribihandika mulyaleka inakolha kutsibu eribiberererya.”

15. Busana naki eriyihayo litholere iryabya in’ithwamu ly’omundu ahabwiwe?

¹⁵ Ekighuma ky’okwa bibulyo ebiri okwa ndegheka eyo eky’erilengekaniako kutsibu kikabugha kithi: “Wangana kolera Yehova nomukyangabya indi ababuthi bawu kutse banywani bawu ibo bamaleka?” Wibuke ngoku iwe ng’Omukristayo oyuwabiriyihayo n’eribatizibwa, Yehova akendi syakutswera iwe ng’omundu. Neryo erimukolera siritholere likabya busana n’abandi​—nomubangabya babuthi bawu. Emighendere yawu eyibuyirire n’emibiiri eyikakenga Nyamuyanga bikakanganaya ngoku wabiriyira ekwenene mwa yawu kandi ngoku wunemughenda wukatholera eribatizibwa.

16, 17. (a) Ni kyahi ekitholere ikyaleka omundu iniabya Mukristayo? (b) Erikangania erisima busana n’embanulho lyanga linganisibwa naki?

¹⁶ Omukangirirya w’emighambo mwabulya Yesu athi: “Ekihano kikulhu omo mighambo ni kyahi?” Neryo Yesu mwasubirya athi: “Wanze Omukama Nyamuhanga wawu n’omuthima wawu wosi, n’ekirimu kyawu kyosi n’obulengekania bwawu bwosi.” (Mt. 22:35-37) Aho, Yesu mwakangania ngoku eryanza Nyamuhanga n’omuthima wawu wosi, kya kitholere eribya iky’ekikaleka iwanza erimukolera, n’eribatizibwa. Ekyanga kuwathikya eryongera eryanza Yehova ly’erighanirya ndeke okwa kihembo kikulhu ekyo Yehova abirithuhererya​—nakyo iy’embanulho y’ekihongwa kya Mughalha wiwe. (Soma 2 Abanya Korinto 5:14, 15; 1 Yoane. 4:9, 19.) Erighanirya ngoku ekihongwa eki kyabiri kughasira irikendi leka iwanza erikangania erisima lyawu.

¹⁷ Iwe erisima embanulho lyanganabya ng’eky’erileberyako kino: Thuthabugha thuthi omundu amakusabulha wukasonda erisenda. Kwenene, iwunemwendi kwama kya yisangulha, iwaghenda, n’eryibirirwa ekya balya kukolera? Ekyo sikyangabya! Ahathe erithika-thika iwukendi yowa iwunawithe ekya wutholere iwakolera omundu oyo, kundi yulekire iwabya iwukineho! Yehova na Yesu ibonu kababirithukolera ekirengire aho. Ahathe embanulho, ithwe bosi thwangabere ng’ababirisendera omwa kibi n’olhuholho. Aliwe busana n’ekindu ekya kolhawa omo lhwanzo lhunene eki, thuli n’amaha awalengire aw’erisyabyaho kera na kera omwa Paradiso!

18, 19. (a) Busana naki siwutholere wukasagha eribya wa Yehova? (b) Erikolera Yehova likuwanaya lithi engebe yawu?

 ¹⁸ Wukanasima ekya Yehova abirikukolera? Erisubirya lyawu lyamabya ini ee, yiheyo oku Yehova n’eribatizibwa. Aliwe wibuke ngoku eriyihayo oku Yehova wukabya iwamamulhagha erikolha erisonda liwe kera na kera, nomuhangabyaki. Mbwino hane ekyanga leka iwasagha eriheka olhukwamirwa olho? Eyihi nahake! Ekya wutholere iwaminya, Yehova akutsomene kutsibu, kandi “akahemba abakamusonda-sonda.” (Ebr. 11:6) Wamayihayo oku Yehova n’eribatizibwa, iwukendi bana etseme n’eriyowa buholho omwa ngebe yawu. Mughalha wethu ow’emyaka 24 oyuwabatizibawa iniakine mulere, akabugha athi: “Obundi ku nalinda eritsuka erikulha nanga minyire bingyi okw’iyihayo, aliwe erithwamu lhuba mulyanyitheya okw’isangwa nayihwerya omwa by’ekihugho.”

¹⁹ Yehova ka ni wambaghane oku Sitani! Sitani iyo syali kusunzira kabuya. Abali okwa lhuhandi lhwiwe syangabaha kindu neryo bakasyabya nakyo kera na kera. Kandi kwenene, ekyo angakithoka n’athi? Iyo iyuwene-wene syawithe ekikamuhumulikanaya, syawithe maha. Angathoka athi erikuha eky’athawithe? Amaha w’erisyathoghothibwa gho Sitani angana kuha, kundi nayu ky’analindirire!​—Erib. 20:10.

20. Ni kyahi ekya mulere atholere iniakolha erithoka erikulha-kulhana erihika okw’iyihayo n’eribatizibwa? (Lebaya n’akasanduko, “Erikuwathikya Erikulha-kulhana Bunyakirimu.”)

²⁰ Neryo kwesi, eriyihayo oku Yehova ly’erithwamu eritholere. Wunayitheghekire erikolha ekyo? Kyamabya ikwakiri kithya, siwusaghirire. Kutse wamayowa iwukinayithagha obuthuku, ghendera okwa menge awamahebwa omo mwatsi ono wanalholya embere. Paulo mwahandikira Abanya Filipi athi: “Okwa lhulengo olho thwamabirihikako omw’ikulha-kulhana, thulhole embere omwa buyithondeke omwa nzira iyan’eyo.” (Fil. 3:16, NW) Wamaghendera okw’ihabulha eryo, endambi iyikendi hika iwanza eriyihayo n’eribatizibwa.