Iwukendi bugha wuthiki balyakubulhaya bathi, “Wunanzire iwabyaho kera na kera?” Abangyi ibakendi bugha bathi bananzire aliwe bathi si ky’amenge erilengekania wuthya. Bakabugha bathi, omundu aliho ini w’erisyaholha.

Thuthabugha thuthi lero bamabulya bathi, “Wunanzire eriholha?” Abangyi ibakendi bugha bathi eyihi. Eki kikakanganayaki? Nomuthwangabana ebitsibu, ni kya buhangiranwa eryanza eribyaho. E Biblia yikakanganaya yithi Nyamuhanga mwahira omwa bandu mw’eryanza eribyaho. Yikabugha yithi “abirihira erikotha omwa muthima wabo.”​—Omugambuli 3:11.

Aliwe omwa kwenene, abandu sibalibyaho kera na kera. Ni kyahi ekyabya kyasobire? Kutse, Nyamuhanga anawithe eky’akolire eryuwania ekyasobire ekyo? Erisubirya eriri omwa Biblia likatsemesaya, lihambire okwa kyaleka Yesu iniaghalhwa n’eriholha.

Esyasura isathu esy’erimbere omwa Biblia sikathubwira ngoku Nyamuhanga mwaha ababuthi bethu b’erimbere, Adamu na Eva, b’akaghisa ak’eribyaho kera na kera n’eribabwira ekya batholere erikolha erithoka eribyaho. Kandi sikathasyasoborera ngoku balemawa eriowa Nyamuhanga n’eriherya akaghisa ako. Omwatsi eribya iniakanibwe omwa bikuhi n’erihikira okwa nzumwa kikanaleka abandi ibabugha bathi ni lhughano buyira. Aliwe, ng’ebitabu by’Enjiri, ekitabu ky’Enzuko nakyo kikakanganaya ngoku ebirimo ni by’okwenene. *

Adamu erithendiowa Nyamuhanga mwabirilhwiririraki? E Biblia yikasubamu yithi: “Ebibi mubyahika muna kihugho busana n’omundu mughuma [Adamu], n’olhuholho mulhwingira busana n’ekibi kiwe, neryo lithya olhuholho mulhwahika okwa bandu bosi, kusangwa abosi mubakolha ebibi.” (Abanya Roma 5:12) Omw’ithendiowa Nyamuhanga, Adamu mwakolha ekibi. Neryo mwaherya amaha w’eribya n’engebe y’erikotha, n’erighunzerera mwaholha. Thwabirisighalya ekibi kiwe kundi thulhuire omw’iyo. Busana n’ekyo thukalhwalha, ithwakulha, n’eriholha. Erisoborera eri likalighirana n’ebya seyansi yikabugha okwa mwana erisighalya emibere mirebe y’ababuthi biwe. Mbwino hane ekya Nyamuhanga abirikolha erithasyuwania emyatsi?

Nyamuhanga mwahiraho emitheghekere ey’erisubulya kutse erithasyaghulha ekya Adamu abya iniabiriherya okwa baana biwe, ni bugha ambu, amaha w’eribyaho kera na kera. Nyamuhanga mwakolha ekyo ky’athi?

Omwa Abanya Roma 6:23, e Biblia yithi: “Obuhingi bw’erikolha ebibi ni lhuholho.” Eki kikamanyisaya ngoku olhuholho lhwasa busana n’ekibi. Adamu mwasobya, kyaleka iniaholha. Nethu thukakolha ebibi neryo kandi ithwahikwako obuhingyi bw’ekibi, olhuholho. Aliwe sithwe thwakolha ekibi ekyo, thwabuthirawa mukyo. Busana n’olhwanzo, Nyamuhanga mwathuma Yesu, erithulihira ‘obuhingi bw’ekibi.’ Eki kikakolha kithi?

Kundi omulhume mughuma, oyuhikene, Adamu, mwathulethara ekibi n’olhuholho busana n’obuthowa, muhayithaghisya owundi oyuhikene, omwowa erihika n’okwa lhuholho, erithulhamya okwa bikalhwiririra omwa kibi. E Biblia yikasoborera eki yithi: “Busana n’erithendiowa ly’omundu mughuma, abandu bangyi mubayirwa mwa bakakolha nabi, neryo lithya busana n’eriowa ly’omundu mughuma, abangyi basyayirwa mwa bathunganene.” (Abanya Roma 5:19) “Omundu mughuma” oyo ni Yesu. Mwalhua elhubulha, amabya hano ng’omundu oyuhikene, * kandi amaholha omwa bwethu. Ekyo kyabirileka ikyathokekana okw’ithwe eribya bathunganene embere sya Nyamuhanga n’eribya n’amaha w’erisyabana engebe y’erikotha.

Aliwe, busana naki mukyayithaghisya Yesu eriholha eriberererya eki? Nyamuhanga Omuthoki w’Ebyosi, mbwino syanga kwamir’ikyathwamu athi abaana ba Adamu babyeho kera na kera? Ni kwenene anawithe obuthoki bw’erikolha ekyo. Aliwe ekyo ikikendibya ikyamaghania ekilhaghiro ekyo ahiraho iyuwene-wene athi obuhingyi bw’ekibi ni lhuholho. Ekyo sikilhaghiro ky’erikwama kyalhusyaho kutse erihindulha wukanza. Ni kihano ky’obulingirirania.​—Esyonyimbo 37:28.

Nyamuhanga kwa kilhusyaho, abandu bangabulire ng’angana kangania obulingirirania n’omwa yindi myatsi. Ng’eky’erileberyako, bangabere bakabulha  ng’anemwendi syathwamu ndeke nga ni bahi omwa baana ba Adamu abatholere erisyabana engebe y’erikotha. Ibabulha ng’anemwendisya berererya n’emilhaghe yiwe. Nyamuhanga erithwamu erikolesya obulingirirania omw’iletha omulhamu wethu, kikaleka ithwayikethera ngoku mughulhu wosi akakolha ebihikire.

Busana na Yesu eriholha, Nyamuhanga mwabya iniamakyungulira abandu b’enzira y’erisyabyaho kera na kera omwa kihugho Paradiso. Th’owa ebinywe bya Yesu ebiri omu Yoane 3:16: “Nyamuhanga mwanza ekihugho ky’athya, kyaleka iniaha Mughalha wiwe, Ekyusa kiwe, neryo oyukamwikiriraya syahere, nikwa abye n’engebe y’erikotha.” Neryo kwesi olhuholho lhwa Yesu silhuli subulira okw’ikangania Nyamuhanga kw’ali w’obulingirirania, aliwe kutsibu-tsibu lhukakanganaya olhwanzo lhunene olhw’awithire abandu.

Aliwe ibbwa, mukyanayithaghisya Yesu eriaghalhwa n’eriholha omwa mibere y’erinuba athya, ngoku kikanibweko omwa bitabu by’Enjiri? Iyo eryingira omwa kirengesyo eky’obulhumi obukalire, kandi akasighalha iniane muthaleghulha, Yesu mwakangania amabehi awali omwa kya Sitani abugha athi abandu sibangabya batheleghulha oku Nyamuhanga bamabya omwa bitsibu. (Yobu 2:4, 5) Ebyo mubyabya nga ni kwenene omughulhu Sitani ingiraya Adamu oyuhikene y’omwa kibi. Aliwe Yesu​—oyuwabya ahikene nga Adamu​—iyo mwabya mwowa nomwanabana eriaghalhwa erikalire. (1 Abanya Korinto 15:45) Neryo aho, mwakangania ngoku Adamu nayu kw’anza, ang’owire Nyamuhanga. Omw’iyiyinia liwe, Yesu mwathusighira olhughobe lhw’erikwama. (1 Petero 2:21) Nyamuhanga mwahemba Mughalha wiwe busana n’obwowa bwiwe, omw’imuha engebe y’obuthaholha, elhubulha.

Yesu kwenene mwaholha. Ekyo kyabirikyungulira abandu b’akaghisa k’erisyabyaho kera na kera. Wunanzire iwasyabyaho kera na kera? Yesu mwakangania eky’erikolha akabugha athi: “Eyi ni ngebe y’erikotha, abandu bakuminye iwe Nyamuhanga mughuma w’okwenene, n’eriminya Yesu Kristo oyowathuma.”​—Yoane 17:3.

Abakahulhukaya egazeti eno bakakuhira mw’omuhwa w’erithasy’igha bingyi oku Yehova, Nyamuhanga w’okwenene, n’oku Mughalha wiwe Yesu Kristo. Abema ba Yehova abali omwa kitsweka kyawu ibakendi kuwathikya. Kandi iwangana bana n’ebindi ebyanga kuwathikya, okwa muthahulha wethu we Intaneti owa, www.pr418.com.