BIRO 26, Okwerikuminibiri, 2004, omusiki munene kutsibu mwalhaba okwa kizinga kye Simeulue, e Indonesia. Abosi ababya okwa musike mubalhangira ebisunda ebikabera eriyighusa okwa musike, lero ibyamasuba omwa ngetse mwa haali kutsibu. Neryo aho n’aho, obuli mundu mwatsukiraho erithibitha okwa hithwe, ibanemubirikira bathi, “Smong! Smong!” bakamanyisya etsunami. Omwa syodakika nga 30, ebisunda by’omutsundu munene mubyalhwayo n’erisyabirya amanyumba manene w’okwa mwalu n’ebyalu ebithimbireko.

Etsunami eyi yatsukira okwa kizinga kye Simeulue. Aliwe okwa bandu 78,000 ababyayu, 7 basa babya baholire. Ekyaleka ibaholha bake kutsibu niki? * Abikalhani b’okwa kizinga eki bawithe akasimu kano: ‘Hamalhaba omusiki n’ebisunda by’engetse bikasububulha kutsibu, ambi iwathibitha okwa hithwe, kundi engetse iyikayakubbukalira okwa musike.’ Abandu be Simeulue babya ibabirigha erilhangirira okwa mibere ye ngetse ngoku etsunami yinemwasa. Erighendera okw’ihabulha erikasangwa lyahebwa mulyalhamya esyongebe syabu.

E Biblia yikakanaya ngoku ekitsinduli kinene kinemwasa, ekitsinduli ‘eky’obulighe bunene obuthe bwathabya okw’itsuka ly’ekihugho, erihika na lino, kandi obuthendi syaswabya buthya na kera.’ (Matayo 24:21) Aliriryo eki sikiri manyisaya kithi ekithaka kikendihwaho busana n’emibiiri y’abandu abathatsomene kutse erihwaho omwa kitsinduli ekikalire​—kundi Nyamuhanga anzire ekihugho ikyabyaho kera na kera. (Omugambuli 1:4) Aliwe obulighe bunene ni kindu ekikendi kolhwa na Nyamuhanga “erithoghothya abandu abakatsandaya ekihugho.” Ni buthuku bw’erighunzaho obubi bwosi n’eriaghalhwa. (Eribisulirwa 11:18; Emisyo 2:22) Oyu k’akendisyabya mughisa munene!

Eryongera okw’ekyo, erithendibya ng’etsunami, emisiki, kutse ebithaka erihuta mw’omuliro, erithoghothya erikayasa siryendi syahamba okwa bandu abathe kw’olhubanza. E Biblia yithi: “Nyamuhanga ni lhwanzo,” kandi Nyamuhanga, oyukahulhawa mwa Yehova, akalhaghanisaya athi “abathunganene basyikalha omwa kihugho mwa buholho n’erisighalyakyo kera na kera.” (1 Yoane 4:8; Esyonyimbo 37:29) Aliwe ibbwa, wangalhama wuthi okwa bulighe bunene, wanasyabana emighisa eyabirilhawa? Eky’erikolha kya kino: Ghendera okw’ihabulha erikasangwa lyahebwa!

Sithwasi ekiro ekyonyine-nyine eky’erihwaho ly’obubi n’eriaghalhwa, kundi Yesu mwabugha athi: “Sihali mundu oyo wasi erihika ly’ekiro ekyo, kutse esaha eyo, nomubangabya bamalaika b’elhubulha, kutse Omughalha, nikwa Thatha yunasi iyowene.” Nomwabine, Yesu mwahabulha athi, “mutheghaye.” (Matayo 24:36; 25:13) Busana naki? E Biblia yikathubwira okwa mibere eyangabere omwa kihugho Nyamuhanga athali aletha enduli. Ngoku emibere y’engetse yanaleka abikalhani be Simeulue ibaminya ngoku  etsunami yinemwasa, ebinemubya omwa kihugho bikathukanganaya ngoku enduli yiri hakuhi. Akasanduku akali omwa mwatsi ono kakakanganaya ebighuma by’okwa syombinduka esikaswekaya esikakanibawako omwa Biblia.

Ni kwenene, ebighuma by’okwa bindu ebiri omwa kasanduku byanabya bikabya murundi mughuma-mughuma kera. Aliwe Yesu mwabugha athi thukendi syabya thukalhangira ‘emyatsi eyi,’ thukendi syaminya enduli ngoku yiri hakuhi-kuhi. (Matayo 24:33) Yibulhaye, ‘Hane hathabya obuthuku ebikakanibawako ebyosi ebi ibyabya (1) omwa kihugho kyosi, (2) okwa buthuku bughumerera, na (3) eryongera eritsandira ighuma?’ Lero ibbwa buno bw’obuthuku obo.

Oyuwabya prezidenti owa Amerika mwabugha athi, “ebyuma ebikasangwa byabwira bandu okwa kabi akakayasa . . . bikanaleka abandu ibalhama.” Enyuma w’etsunami eya 2004, mubahira omwa kitsweka ekyahambawako kutsibu mw’ebyuma ebikasangwa byabwira abandu okwa kabi nuku abandu balek’isyakwa kandi ngoku bakwa. Kuthya, Nyamuhanga abirihira h’emitheghekere ey’erisangwa thwabwirwa enduli yithe yasa. E Biblia yithi: ‘Kandi Engulhu yuwene y’obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.’​—Matayo 24:14.

Omwaka owahwere musa, Abema ba Yehova mubaghunzire esyosaha esilhabire omu bbiliyoni nguma n’esyomiliyoni rwenda ibane muthulha engulhu yuwene omwa bihugho 240 omwa mibughe eyilhabire omwa 700. Ekikabya munabwire eki kikaghumaya ndeke-ndeke ngoku enduli yiri hakuhi. Busana n’erianza abaliranwa babu, Abema ba Yehova bakahira h’akaghalha kanene erisangwa babwira abandu ngoku ekiro kya Nyamuhanga ky’eritswera kiri hakuhi. (Matayo 22:39) Eribya iwanganaghasirwa omwa mwatsi oyu kikakanganaya ngoku Yehova akwanzire. Wibuke ngoku  Nyamuhanga ‘syanzire omundu n’omughuma akahera, nikwa anzire abandu bosi ibabindulha emithima yabu n’erileka ebibi.’ (2 Petero 3:9) Wunemwendi theya erihabulha eryo Nyamuhanga akasangwa athuha nuku wangaghasirwa omwa lhwanzo lhwiwe olhu?

Wibuke ngoku abikalhani be Simeulue mubathibitha okwa hithwe bakanalhangira ebisunda bikasuba omwa ngetse mwa haali; mubathalinda erihika aho bikendi subulira. Erithendi lindirirya mulyaleka ibalhama. Nawu erilhama okw’obulighe bunene obukasa, wutholere iwabya ng’abathibitha ahayisumbire, endambi yithe yahwayo. Wuthi? Omuminyereri Isaya mwasondolibwa erihandika okw’ikokibwa eririho omwa “biro by’enyuma,” nabo ibw’obuthuku obwa thulimu lino. Likabugha lithi: “Mwase thuhethukire okwa kithwe ky’Omwami Mukulhu . . . Nayu athoke erithukangirirya esyonzira siwe, nethu ithwathoka erilendera omwa syombalhu siwe.”​—Isaya 2:2, 3.

Erighenda okwa kithwe likakuthokesaya erilhangira ndeke ebiri haali kandi iwabya iwune ah’erilhamira. Kuthya, eriminya ebya Nyamuhanga anzire erilhabira omwa Biblia kinemuwathikya munabwire esyomiliyoni sy’abandu omwa kihugho kyosi erikolha esyombinduka esyuwene omwa ngebe syabu. (2 Timoteo 3:16, 17) Ekyo kyabirileka ibatsuka “erilendera omwa syombalhu” sya Nyamuhanga neryo iniabatheya ng’abandu biwe.

Wunemwendiligha erikokibwa eryo n’eryasa omwa butheya bwa Nyamuhanga obw’olhwanzo omwa biro ebikalire bino? Thukakuhira mw’omuhwa ow’erilebya ndeke ebya Masako akabugha okwa “biro by’enyuma-nyuma” ebikanganibwe omwa kasanduku akali omo mwatsi ono. Abema ba Yehova abali omwa bulhambu bwenyu ibakendi tsema erikuwathikya eriyitheghererya ndeke Amasako awabirihebwa kandi ngoku wangaghendera kugho. Kutse iwangana bana eby’erisubirya okwa bibulyo byaghu omw’ighenda okwa muthahulha wethu owe Intaneti www.pr418.com. Ghenda omwa BIBLE TEACHINGS > BIBLE QUESTIONS ANSWERED.