1, 2. (a) Ni buholho bwahi obwa thwangabya nabu lino? (b) Busana naki si kithokekene eribya n’obuholho kundu lino? (Lebaya ekisasani ekiri okw’itsuka.)

ITHWE bosi thwanzire obuholho omwa ngebe yethu kandi sithwanzire amaghaniryo. Kikaleka ithwasima Yehova busana n’erithuha “obuholho bwa Nyamuhanga.” Obuholho obu ni buthekane obukathutheghaya okwa bikathuhithanaya omwa malengekania n’omw’iyowa. (Abanya Filipi 4:6, 7) Kandi kundi thwabiriyihayo oku Yehova, thuli ‘buholho na Nyamuhanga.’ Eki kikamanyisaya ngoku thuwithe engolangana mbuya nayu.​—Abanya Roma 5:1.

² Aliwe, obuthuku bwa Nyamuhanga bw’eriletha obuholho kundu okwa kihugho sibuli bwahika. Thuli omwa biro by’enyuma-nyuma, busana n’ekyo hali ebitsibu bingyi ebikathulethera amaghaniryo. Thuthimbirweko n’abandu b’omwagha. (2 Timoteo 3:1-4) Kandi thutholere ithwarwanisya Sitani n’esyongangirirya sy’amabehi esy’akakulha-kulhanaya.  (2 Abanya Korinto 10:4, 5) Aliwe ekyanga thulethera amaghaniryo manene kutsibu ly’erihakanisya erikalhua okwa bahughu abathekolera Yehova. Abandi bangana kuthya ebya thw’ikirirye kutse ibabugha bathi thukaletha erighabana omwa maka. Banganabugha bathi thwamaleka erikolera Yehova imuthukendibya b’okw’ibo. Neryo kwesi thutholere ithwalhangira thuthi erihakanisya erikalhua okwa bahughu bethu? Kandi thwangabya thuthi n’obuholho eki kikabya?

3, 4. (a) Erikangirirya lya Yesu likaletha ki? (b) Kutsibu-tsibu, erikwama Yesu lyanga kalire mughulhu wahi?

³ Yesu abya inianasi ngoku si bugha indi obuli mundu akendi syaligha erikangirirya liwe. Kandi abya iniasi ngoku abigha biwe bakayithagha obuthubaha kundi hangabanikire abakabahakanisaya. Erihakanisya eri lyanga hambire okwa buholho bw’amaka wabu. Yesu mwabugha athi: “Simughaniraye muthi nasa eriletha obuholho omo kihugho; mundasa eriletha obuholho, nikwa omuyali. Kusangwa nasa erikathisania omundu n’ise, n’omwali na nyinya wiwe, na mwaliana na nyinyi-byalha wiwe. N’esyonzighu sy’omundu basyabya iba n’ab’omwa kithunga kiwe.”​—Matayo 10:34-36.

⁴ Yesu amanyisayaki akabugha athi ‘Simughaniraye muthi nasa eriletha obuholho’? Anza abandu ibaminya ku hane ebikalhwiririra omw’imukwama. Aliwe, ekighendererwa kya Yesu lyabya iry’erikangirirya abandu ekwenene eyihambire oku Nyamuhanga, butsira erighabulha amaka. (Yoane 18:37) Aliriryo abigha babya batholere ibaminya ngoku mughulhu wosi sikyangabere kyolho erimukwama, kutsibu-tsibu banywani babu kutse abahughu babu bamaghana ekwenene.

5. Ni byahi ebyabiribya okwa bigha ba Yesu?

⁵ Yesu mwabugha athi erihakanisya erikalhua okwa bahughu ni kighuma ky’okwa by’abigha biwe batholere ibabya ibanayitheghekire erighumira. (Matayo 10:38) Erithoka eritsemesya Yesu, abigha biwe babiriyiyinia abahughu babu bakabasekererya kutse nibya n’eribaghana. Babiribana bingyi kwilhaba ebya babiriherya.​—Soma Mariko 10:29, 30.

6. Thutholere ithw’ibukaki ab’okwithwe bamathuhakanisya?

⁶ Abahughu bethu nomubanga thuhakanisya busana n’eriramya Yehova, thukabya ithunabanzire. Ambi ithwabya ithun’ibukire ngoku, thutholere ithwanza kutsibu Nyamuhanga na Kristo kwilhaba owundi wosi-wosi. (Matayo 10:37) Kandi thutholere ithwabya ithunasi ngoku Sitani angana kolesya olhwanzo olho thuwithire abahughu bethu erileka thuleghule oku Yehova. Thukanaye okwa emibere mirebe eyikalire kandi ngoku thwanga ghumirayo.

7. Wutholere iwabya n’amalengekaniaki omwanze wawu amabya isyaliramaya Yehova?

⁷ E Biblia yikathubwira yithi abak’ingira omwa butheke “basyabana amalighe,” kutse ebitsibu. (1 Abanya Korinto 7:28) Wamabya iwuli omwa butheke n’oyuthe kolera Yehova, eki kyangan’ongera ebitsibu n’erihangya-hangya omwa butheke bwawu. Aliriryo ni kikulhu erilhangira obutheke bwawu ngoku Yehova akabulhangira. Akabugha athi omwanze wethu amabya isy’alikolera Yehova sithutholere thukaghabulhana  kutse erimukomolha. (1 Abanya Korinto 7:12-16) Mwira wawu amabya isyali kolera Yehova kandi isyatsomene eriramya ly’okwenene, wutholere iwabya iwunamusikirye ng’omuthwe w’eka. Kandi mukali wawu amabya isyalikolera Yehova, nawu wutholere iwabya iwunamwanzire n’erimutsomana ndeke omwa lhwanzo.​—Abanya Efeso 5:22, 23, 28, 29.

8. Ni bibulyo byahi ebya wanga yibulya omwanze wawu amalengesya erikukakirya omw’iramya lyawu?

⁸ Wutholere iwakolhaki omwanze wawu amalengesya erikukakirya omw’iramya lyawu? Mwira wa mwali wethu mughuma mwamuhiriraho ebiro by’erighenda omw’ithulira. Nawu wamabya iwuli omwa mibere ng’eyi, yibulhaye: ‘Mbwino omwanze waghe akabugha athi ngalekere aho eriramya Yehova? Ekyo kyamabya isikyo, mbwino ngana kole ebyo akabugha?’ Wamakangania obuyitheghererya iwukendi thunga bitsibu bike omwa butheke bwawu.​—Abanya Filipi 4:5.

9. Abakristayo bangakangirirya bathi abaana babu erisikya omubuthi wabu oyuthe Mwema wa Yehova?

⁹ Kyangana kalha erikangirirya abaana bawu omwanze wawu amabya isyali kolera Yehova. Ng’eky’erileberyako, wutholere iwakangirirya abaana bawu erikenga ekihano kye Biblia kino: “Wusikaye thatha wawu na koyo wawu.” (Abanya Efeso 6:1-3) Aliwe wanga kolhaki omwanze wawu amabya isyali ghendera okwa bihano bye Biblia? Wangana hiriraho abaana bawu eky’erileberyako ekyuwene omw’isikya omwanze wawu. Lengekanaya okwa mibere yiwe mibuya, kandi mubwire wuthi wukamusima busana n’ebindu bibuya ebyo akakolha. Isiwamukanayako nabi embere sy’abaana bawu. Aliwe basoborere ngoku obuli mundu atholere iniayithwiramu ng’akendi kolera Yehova. Wamakangirirya abaana bawu erisikya omubuthi wabu oyuthe Mwema wa Yehova, eky’erileberyako kyabu kibuya ikyangana leka omwanze wawu inianza erigha oku Yehova.

10. Ababuthi Abakrisitayo bangakangirirya bathi abaana babu erianza Yehova?

 ¹⁰ Omwanze oyuthe Mwema wa Yehova angananza abaana biwe basangire omwa biro bikulhu kutse bighe esyongangirirya sy’amabehi. Abandi balhume bangana ghania bakali babu Abakrisitayo erikangirirya abaana babu Ekinywe kya Nyamuhanga e Biblia. Aliwe n’omwa mibere ng’eyo, omukali iniakendi lengaho ngoku angathoka erikangirirya abaana biwe ekwenene. (Emibiri 16:1; 2 Timoteo 3:14, 15) Ng’eky’erileberyako, omulhume oyuthe Mwema wa Yehova anganabya isyanzire mukali wiwe ak’igha n’abaana biwe e Biblia kutse erighenda nabu okwa mihindano. Nomwakine indi asikirye erithwamu lya mwira wiwe, angana kanirya abaana biwe okwa by’ikirirye akabana akaghisa. Omwa nzira eyo, ibangan’igha oku Yehova n’ebihano biwe ebihambire okwa kihikire n’ekithahikire. (Emibiri 4:19, 20) Erighunzerera, abaana ibangana thwamu nga bakendi kolera Yehova. * (Lebaya omwatsi ahikwa.)​—Eryibuka Ebihano 30:19, 20.

11. Ni kyahi ekyanga letha ebitsibu ahakathi-kathi kethu n’abahughu bethu abathe kolera Yehova?

¹¹ Omughulhu thwatsuka erigha e Biblia n’Abema ba Yehova, thwangabya imuthuthabwira abahughu bethu. Aliwe erikirirya lyethu lyabere line muyongera, muthwakiminya ngoku thutholere ithwababwira ku thwanzire erikolera Yehova Nyamuhanga. (Mariko 8:38) Erithwamu lyawu erighondera Nyamuhanga lyangabya imulyaletha ebitsibu ahakathi-kathi kawu n’abahughu bawu. Thulebaye ebya wanga kolha ebyanga leka iwabya iwune n’obuholho kandi iwasighalha iwune muthaleghulha oku Yehova.

12. Ni kyahi ekyanga leka abahughu bethu ibathuhakanisya, aliwe thwanga kangania thuthi ku thunatsomene eriyowa lyabu?

¹² Lengaho eriyitheghererya eriyowa ly’abahughu bawu. Thutsemire kutsibu busana n’eriminya ekwenene ye Biblia. Aliwe, abahughu bethu bangana lengekania bathi thwabirithebwa kutse bathi thwabir’ingira omwa dini eyithasibwe. Bangana lengekania bathi sithukibanzire kundi si thuli sangira nabu omwa biro bikulhu. Bangana sagha bathi ekindu kibi kyangana syathubyako thukaholha. Thutholere ithwalengaho eriyitheghererya eriyowa lyabu n’eribahulikirira ndeke nuku thuminye ekikaleka ibahangya-hangya busana nethu. (Emisyo 20:5) Omukwenda Paulo mwalengaho eriyitheghererya “abandu bosi” nuku anga bakangirirya engulhu yuwene. Thwamalengaho eriyitheghererya abahughu bethu, eki ikikendi thuwathikya eriminya ngoku thwanga bakangirirya ekwenene.​—1 Abanya Korinto 9:19-23.

13. Thwanga kania thuthi n’abahughu bethu abathe baghombe ba Yehova?

 ¹³ Kanaya omwa bwolho. E Biblia yithi: “Erikania lyenyu libye omwa lhukogho.” (Abanya Kolosai 4:6) Aliwe si kyolho. Thwangana saba Yehova y’omulimu abuyirire erithuwathikya erikangania abahughu bethu b’obwolho n’olhukeri. Isithwanza erikuba nabu obuhaka okwa nyikirirya syabu syosi sy’amabehi. Bamabugha kutse erikolha ekyanga thuponesya, ambi ithwagherererya abakwenda. Paulo mwabugha athi: “Omughulhu thukatsumawa, thukatsumulha; omughulhu abandu bakathwendereraya, thukayiyinaya; omughulhu bakalegha, thukalenga erisangana nabu.”​—1 Abanya Korinto 4:12, 13.

14. Eribya n’emibere mibuya mukalhwiririraki?

¹⁴ Ibya n’emibere eyuwene. Busana naki ekyo ni kikulhu? Nomwakine indi erikania omo bwolho n’abahughu bethu kyangana thuwathikya eribya buholho nabu, emibere yethu mibuya yangana wathikya kwilhaba naho. (Soma 1 Petero 3:1, 2, 16.) Ambi abahughu bawu ibalhangirira okwa ky’erileberyako kyawu ngoku Abema ba Yehova bawithe amaka awatsemire, batsomene ndeke abaana babu, bakaghendera okwa misingyi ye Biblia, n’eribya n’engebe eyuwene. Abahughu nomubangaghana eriligha ekwenene, ithwe ekikulhu thukabya ithunasi ngoku emibere yethu mibuya yikatsemesaya Yehova.

15. Thwanga kolhaki nuku thuyihighule okw’ingira omwa buhaka n’abahughu bethu?

¹⁵ Sangwa wathegheka. Lengekanaya okwa mibere eyanga leka ihabya obuhaka. Neryo ithwamu ekya wanga kolha. (Emisyo 12:16, 23) Ekyo kya mwali wethu e Australia akolha. Subyalha wiwe iniakahakanisaya ekwenene n’erimuhithanako. Neryo ibakabya bathali bamutherera, iyo na mwira wiwe ibakatsuka erisaba Yehova eribawathikya erikania nayu omwa bwolho. Ibakatsuka erilengekania okwa myatsi eya banga kaniako eyanga mutsemesya. Erithoka eriyihighulha okw’ikania bingyi ebyangana lhwiririra mw’obuhaka okwa by’edini, ibakahira h’obuthuku obwa bakendi ghunza ibanemukania nayu.

16. Wanga rwanisya wuthi eriyowa nabi busana n’eriponesya abahughu bawu?

¹⁶ Sihangabya hathethabya erithendi lighirana n’abahughu bawu abatheramaya Yehova. Neryo lyamabyaho, iwangana yowa nabi kundi wubanzire kandi wanzire eribatsemesya. Aliwe, w’ibuke ngoku obuthaleghulha bwawu oku Yehova butholere ibwalenga olhwanzo olhwa wuwithire abahughu bawu. Abahughu bawu erilhangira eki, ibangana minya ngoku ni kikulhu erikolera Yehova. Siwanga kaka omundu eriligha ekwenene. Aliwe abandi ibangana kulhangirirako ngoku erighendera okwa bihano bya Yehova kyabiri kuwathikya. Kandi kwenene, kuthya nabu ng’ithwe, Yehova akabaha akaghisa ak’erithwamu erimukolera.​—Isaya 48:17, 18.

17, 18. Ni kyahi ekyanga kuwathikya omuhughu wawu amasighania Yehova?

¹⁷ Omughulhu omuhughu wawu akahighithawa kutse eriyihighulha okwa kithunga, omuthima akalhuma. Kyangana lhuma, erihika n’okw’iyowa nga hali oyukakutsimithanga omwa muhamba. Wanga ghumira wuthi obulhumi obu?

¹⁸ Hweraya amalengekania okw’ikolera Yehova. Omughulhu wuli omwa bulhumi ng’obu, ambi iwaghumya erikirirya lyawu. Soma e Biblia buli kiro, thegheka emihindano n’erighenda kuyo, lholha embere erithulira, n’erisaba Yehova erikuthokesya eriyiyinia. (Yuda 20, 21) Ibbwa kyamabya indi wunemukolha ebyosi ebi kandi obulhumi ibwaghana erihwa? Isiwahwa amani! Hweraya amalengekania wawu okw’ikolera Yehova. Endambi yikendi hika, eki ikyakuwathikya erikakirya amalengekania n’eriyowa lyawu. Ekyo kyo kyanahika n’okwa muhandiki w’Esyonyimbo 73. Endambi muyanahika kyamamukalira erikakirya amalengekania n’eriyowa liwe. Aliwe eriramya Yehova mulyamuwathikya erithasyabya n’amalengekania awuwene. (Esyonyimbo 73:16, 17) Nawu ku kyanganabya kithya.

19. Thwanga kangania thuthi ku thusikirye emibere Yehova akahabuliramu abandu biwe?

¹⁹ Sikaya erihabulha lya Yehova. Nyamuhanga anasi ngoku erihabulha liwe likaghasira obuli mundu, nibya n’oyuwabirihighithwa omwa kithunga. Nomwakine indi kikalhuma kutsibu omundu oyothwanzire akahighithwa, aliwe kyangana muwathikya erisyasuba oku Yehova. (Soma Abaebrania 12:11.) Thutholere ithwaghendera okwa busondoli bwa Yehova obw’erithendi “thamba” kutse erikolongana n’omundu oyuwabirihighithwa erihika ah’akendi syasubira omwa kithunga. (1 Abanya Korinto 5:11-13) Aliwe sikyolho. Aliwe thutholere ithwayihighulha okw’ibya thukabatherera, eribathumira ehimeseji, esyobaruha, kutse n’erisatha nabu okwa Intaneti.

20. Thutholere ithwabya n’amahaki?

²⁰ Siwuhwe maha! Olhwanzo “lhukabya n’amaha,” neryo thuwithe amaha thuthi abanze bethu bakendi syasuba oku Yehova. (1 Abanya Korinto 13:7) Wamalhangira omuhughu wawu inialikuhindulha amalengekania wiwe, iwangana muhira omwa misabe wuthi athunge amaaka erilhua omwa Biblia kandi alighe erikokya lya Yehova lino: “Wunyisubeko.”​—Isaya 44:22.

21. Wutholere iwakolhaki abahughu bawu bamakuhakanisya busana n’erikwama Yesu?

²¹ Yesu mwabugha athi thutholere ithwamwanza kwilhaba mundu wosi-wosi. Kandi abya inianasi ndeke-ndeke ngoku abigha biwe bangabere n’obuthubaha obw’erisighalha bathaleghulha okw’iyo abahughu babu n’omubanga bahakanisirye. Neryo abahughu bawu bamakuhakanisya habw’erikwama Yesu, yikethere Yehova. Musabe akuwathikaye eriyiyinia. (Isaya 41:10, 13) Bana etseme y’eriminya ku Yehova na Yesu bakatsema busana nawu kandi ngoku bakendi syakuhemba busana n’obuthaleghulha bwawu.