1, 2. Omwa 2018, ni mukonga wahi owakendi thuletha omwa bughuma bw’embaghane, kandi busana naki? (Lebaya ekisasani ekiri okw’itsuka.)

BIRO 31 Okwakasathu, 2018, esyomiliyoni sy’abandu erithimba omwa kihugho kyosi bakendi syahindana okwa mukonga owakabya murundi mughuma omo mwaka. Eryuba lyabirilenga, Abema ba Yehova n’abandi bangyi bakendi syahindana haghuma eryibuka eriyihayo erya Yesu akolha busana nethu. Obuli mwaka, Eryibuka olhuholho lhwa Kristo likaleka abandu ibabya bughuma omwa mibere eyikaswekaya, kwilhaba owundi mukonga wosi-wosi okwa kihugho.

² Yehova na Yesu batholere eribya ibakatsema kutsibu bakalhangira esyomiliyoni sy’abandu erithimba omwa kihugho kyosi bakaghenda okwa mukonga w’embaghane oyu. E Biblia yikakanaya okwa “ndeko nene, eyo mundu athe angathoka erighanza. Endeko eyi yalhua okwa buli kithunga, n’ebihanda byosi, n’abandu bosi, n’emibughe yosi,” iyine mubugha yithi: “Erilhama lyethu likalhua oku Nyamuhanga wethu, oyo wikere okwa kithumbi  ky’Obwami, kandi likalhua oko Kyana ky’Embuli.” (Eribisulirwa 7:9, 10) Kikatsemesaya kundi obuli mwaka okw’Ibuka, abandu bangyi bakaha Yehova na Yesu y’olhukengerwa busana n’ebindu ebikaswekaya ebyo babirikolha!

3. Omwatsi ono akendisubirya okwa bibulyo byahi?

³ Omo mwatsi ono, wukendi bana eby’erisubirya okwa bibulyo bbini bino: (1) Nangayitheghekera indi Eryibuka nuku ngasyaghasirawa ndeke? (2) Eryibuka likawathikaya abandu bosi ba Nyamuhanga eribya bughuma omo nzira syahi? (3) Nanga kolhaki erikulha-kulhania obughuma omwa bandu ba Nyamuhanga? (4) Mbwino hane mwendisyabya Eryibuka ly’erighunzerera? Lyamabya irineyo, mughulhu wahi?

4. Busana naki ni kikulhu ithwe eribya okw’Ibuka?

⁴ Busana naki ni kikulhu eribya okw’Ibuka? Enzumwa nguma yiri yithi erihindana okwa mihindano ni nzira y’eriramiryamo Yehova. Thwangana yikethera ngoku Yehova na Yesu bakalhangira obuli mundu oyukalengaho erihindana okwa muhindano mukulhu oyu ow’omwaka. Thwanzire Yehova na Yesu ibaminya ngoku sithwendi syabulha okw’Ibuka mbwino ihanalyabya ekindu ekikalire kutsibu ekyangathulemesya. Ebya thukakolha byamakangania ku thukalhangira emihindano yethu mwa y’omughaso, thukabya ithwamaha Yehova eyindi nzumwa ey’erileka erina lyethu omwa “kitabu ky’Eryibuka.” Ekitabu eki kikathasyahulhawamu “ekitabu ky’engebe.” Kiri mw’amena w’abosi abo Yehova anzire eriha engebe y’erikotha.​—Malaki 3:16; Eribisulirwa 20:15.

5. Mayenga malebe Eryibuka lithe lyabya, wangabya wuthi iwune muyilebya nga wun’imene ndeke omw’ikirirya?

⁵ Mayenga malebe Eryibuka lithe lyabya, thutholere ithwongera obuthuku bwethu bw’erisaba n’erilengekania ndeke obughuma bwethu na Yehova nga bughumire bungahi. (Soma 2 Abanya Korinto 13:5.) Omukwenda Paulo mwabwira Abakristayo athi: “Muyirengeko nga mukakwama omw’ikirirya.” Ekyo thwangakikolha thuthi? Ithwangana yibulya: ‘Ngan’ikirirye ngoku eki ky’ekithunga kisa ekya Yehova abirisombolha erikolha erisonda liwe? Ngane mulengaho ngoku nangathoka erithulira n’erikangirirya engulhu yuwene? Mbwino ebya ngakolha bikanakanganaya ndeke-ndeke ngoku ng’ikirirye ku thuli omwa biro by’enyuma-nyuma kandi ngoku enduli y’erithabalha lya Sitani yiri hakuhi? Mbwino eriyikethera lyaghe omu Yehova na Yesu likinaghumire ng’omughulhu natsuka erikolera Yehova?’ (Matayo 24:14; 2 Timoteo 3:1; Abaebrania 3:14) Erilengekania okwa by’erisubirya eby’ebibulyo ebi kikendi thuwathikya eribya ithune “muyitswera.”

6. (a) Ni nzira yahi nguma nyisa eya thwangabaniramu engebe y’erikotha? (b) Omusyakulhu mughuma akayitheghekera athi Eryibuka obuli mwaka, kandi nawu wangakolha wuthi ekiri ng’eki?

⁶ Enzira nguma eya wangayitheghekeramu Eryibuka ly’erisoma n’erilengekania okwa myatsi eyikasoborera ekikaleka omukonga oyu iniabya ini mukulhu kutsibu. (Soma Yoane 3:16; 17:3.) Enzira nguma nyisa ey’eribaniramu  engebe y’erikotha ly’eriminya Yehova n’eribya n’erikirirya omu Mughalha wiwe, Yesu. Eriyitheghekera Eryibuka, thwangana thwamu erigha emyatsi eyangana thuwathikya eriyithunda hakuhi nabu. Eki kya mughalha wethu oyuwamabirighunza buthuku bunene iniane musyakulhu akakolha. Ahabw’emyaka mingyi, abirisorokerya haghuma emyatsi eyikabera eryasira omwa Kaleberyo eyikakanaya okw’Ibuka n’olhwanzo olhwa Yehova na Yesu babirithukangania. Mayenga malebe Eryibuka lithe lyabya, akathasyasoma emyatsi eyi n’erilengekania kutsibu okwa kikaleka omukonga oyu iniabya mukulhu. Hakanayira iniongera okwa myatsi ey’abirisorokya kwa mughuma kutse ibiri. Kandi akasoma n’erilengekania buuli okwa busomi bwe Biblia obuhambire okw’Ibuka. Omusyakulhu oyu akabugha athi omw’ikolha ebyosi ebi, ak’igha bindu bihyaka obuli mwaka. Ekikulhu kutsibu, eriyeghesya liwe likaleka iniongera eryanza Yehova na Yesu. Wamayeghesya omwa mibere ng’eyi, nawu iwukendiongera erianza Yehova na Yesu. Kandi iwukendibya oyukasima ebya babirikolha, kandi iwaghasirwa ndeke okw’Ibuka.

7. (a) Ni kyahi ekya Yesu asaba omw’ithumbi ly’ekiro atsukisaya Ekihulho ky’Omukama ky’Erigholho? (b) Ni kyahi ekikakanganaya ngoku Yehova abirisubirya omusabe wa Yesu?

⁷ Omw’ithumbi ly’ekiro Yesu atsukisaya Ekihulho ky’Omukama ky’Erigholho, mwasaba omusabe w’embaghane. Mwasaba busana n’obughuma bw’obughuli obo awithe na Thatha wiwe. Kandi Yesu mwasaba athi n’abigha biwe bosi babye bughuma bathya. (Soma Yoane 17:20, 21) Ahathe erithika-thika, Yehova abirisubirya omusabe wa Mughalha wiwe mwanzwa. Mbaghane n’eyindi mihindano, Eryibuka likakanganaya ndeke-ndeke ngoku Abema ba Yehova bali bughuma. Okwa kiro ekyo, esyomiliyoni sy’abandu omwa bihugho bingyi muthina-muthina kandi ab’esyorangyi muthina-muthina bakahindana haghuma n’erikangania ku b’ikirirye ngoku Yehova mwathuma Mughalha wiwe. Omwa yindi myanya, si kya buli kiro abandu abathe b’erangyi nguma erihindana haghuma, kandi kyamabya, abandi bakayowa isikitholere. Aliwe Yehova na Yesu ibo sibaliyowa bathya. Okw’ibo, obughuma bwethu okwa kiro ky’Eribuka bukabatsemesaya.

8. Ni mwatsi wahi owa Yehova aha Ezekieli?

⁸ Ithwe ng’abaghombe ba Yehova, sikirithuswekaya eribya ithuli bughuma thuthya. Yehova mwasangwa akania okwa bughuma obu omwa mwatsi ow’aha Ezekieli. Mwabwira Ezekieli athi imaye emithi ibiri, omuthi mughuma “busana na Yuda” n’owundi “busana na Yozefu,” n’erimathikaniayo haghuma nuku abye mughuma. (Soma Ezekieli 37:15-17.) Akatsweka, “Ebibulyo Erilhua Omwa Basomi” omwa Watchtower ey’Okwomusanju 2016 mukasoborera kathi: “Erilhabira omwa muminyereri wiwe Ezekieli, Yehova mwalhaghulha ngoku abandu biwe banga subire omwa Kihugho Ekyalhaghanisibawa n’erithasyabya bughuma ng’ekihanda kighuma. Kandi obuminyereri obo mubwathasyalhaghulha ngoku abakaramaya Nyamuhanga omwa biro by’enyuma-nyuma bangabere bughuma ndeke.”

9. Obuli mwaka okw’Ibuka, thukalhangira thuthi obughuma obwa lhaghulhawa omwa buminyereri bwa Ezekieli?

⁹ Eritsuka 1919, Yehova mwatsuka erithasyatheghekania lyolho-lyolho abahakabibwa n’erithasyabahira omwa bughuma. Babya  ng’omuthi “busana na Yuda.” Neryo, abangyi abawithe amaha w’erisyabya okwa kihugho kera na kera mubatsuka eriyiyunga okwa bahakabibwa. Abawithe amaha w’erisyabya okwa kihugho aba bali ng’omuthi “busana na Yozefu.” Yehova mwalhaghanisya erimathania emithi ibiri eyi yahaghuma neryo iniabya “muthi mughuma” omwa byalha biwe. (Ezekieli 37:19) Abahakabibwa “n’esindi mbuli” mwabayira mwa “kihangulho kighuma.” (Yoane 10:16; Zekaria 8:23) Munabwire, esyondeko syosi ibiri siri bughuma kandi sinemukolera Yehova ya haghuma. Kandi bawithe Mwami mughuma, Yesu Kristo, oyo omwa buminyereri bwa Ezekieli akahulhawa mwa “omughombe waghe Dawudi.” (Ezekieli 37:24, 25) Obuli mwaka okw’Ibuka, thukabya thukahindana haghuma eryibuka olhuholho lhwa Yesu, thukalhangira obughuma bw’esyondeko ibiri esi ngoku kyalhaghulhawa erilhabira omu Ezekieli. Aliwe obuli mughuma w’okw’ithwe anga kolhaki erikulha-kulhania obughuma bw’abandu ba Nyamuhanga?

10. Thwanga kulha-kulhania thuthi obughuma omwa bandu ba Nyamuhanga?

¹⁰ Ni nzira yahi ey’erimbere ey’erikulha-kulhaniryamu obughuma omwa bandu ba Nyamuhanga? Omw’ilengaho kutsibu eriyikehya. Omughulhu Yesu abya okwa kihugho, mwabwira abigha biwe athi batholere ibayikehya. (Matayo 23:12) Abandu omwa kihugho bakayowa nga balengire abandi. Aliwe thwamayikehya,  ithukendi sikya baghalha bethu abakasondolha omwa bithunga n’erighendera okwa busondoli bwabu. Neryo ikyaleka ekithunga ikyabya bughuma. Ekikulhu kutsibu, thwamayikehya ithukendi tsemesya Nyamuhanga, kundi “akalhwa n’abakayiheka, nikwa akakanyaya olhukogho okwa bakayikehaya.”​—1 Petero 5:5.

11. Erilengekania okwa muggati n’evini ebikakolesibawa okw’Ibuka lyanga thuwathikya lithi erikulha-kulhania obughuma?

¹¹ Ni nzira yahi eyakabiri eyathwanga kulha-kulhaniryamu obughuma? Omw’ilengekania ndeke okwa ekya muggati n’evini bik’imanira. Thutholere ithwakolha eki Eryibuka lithe lyahika kandi kutsibu-tsibu omw’igholho eryo. (1 Abanya Korinto 11:23-25) Omuggati owathe mw’ekihamya ak’imanira omubiri wa Yesu owahikene ogho ahayo ng’ekihongwa. Evini yik’imanira omusasi wiwe. Aliwe thutholere ithwakolha bingyi kwilhaba erikwama kyaminya ebi bisa. Thutholere ithw’ibuka ngoku embanulho y’ekihongwa kya Yesu mwabya ebindu bibiri ebikakanganaya olhwanzo lhunene kutsibu. Yehova mwathuha Mughalha wiwe. Na Yesu mwaligha erihayo engebe yiwe busana nethu. Thukabya thukalengekania okwa lhwanzo lhwabu, kikaleka ithwabanza. N’olhwanzo olhw’ithwe bosi thuwithire Yehova ilhukendi ghumya obughuma bwethu.

12. Omwa lhughano lhw’omwami n’abaghombe biwe, Yesu mwakangania athi ndeke-ndeke Yehova kw’anzire ithwaghanyira abandi?

¹² Ni nzira yahi eyakasathu eyathwanga kulha-kulhaniryamu obughuma? Omw’ighanyira abandi. Thwamakolha ekyo, thukakanganaya ku thukasima Yehova eribya iniangana ghanyira ebibi byethu busana n’ekihongwa kya Yesu. Erikangania ekikaleka erighanyira iryabya ly’omughaso, Yesu mwaha olhughano olhuhambire okwa mwami n’abaghombe biwe. Kisi soma Matayo 18:23-34 n’eriyibulya bino: ‘Nganawithe omuhwa w’erikolha ebya Yesu akangiriraya? Ngana ghumisirizaya balikyethu n’eribayitheghererya? Ngana yitheghekire erighanyira abakanyihithanaya?’ Ni kwenene ebindi bibi bikalire okwa bindi. Kandi ithwe bandu abathahikene kyangana thukalira erighanyira ebindi bibi. Aliwe olhughano lhwa Yesu lhukathukangiriraya ekya Yehova anzire ithwakolha. (Soma Matayo 18:35.) Yesu akakanganaya ndeke-ndeke ngoku Yehova syanga thughanyira thwamathendi ghanyira balikyethu bamabya ibabiriyisubamu ndeke. Ekyo ni kindu ekya thutholere ithwalengekaniako kutsibu. Eritheya obughuma bwethu bw’obughuli, thutholere ithwaghanyira abandi ngoku Yesu athukangiriraya.

13. Thukakulha-kulhanaya thuthi obughuma thukahiraho obuholho n’abandi?

¹³ Thwamaghanyira, thukabya buholho n’abalikyethu. Omukwenda Paulo mwabugha athi thutholere ithwahiraho akaghalha eribya ithune bughuma n’abandi n’eribya n’obuholho. (Abanya Efeso 4:3) Neryo omwa buthuku bw’Eryibuka, kutsibu-tsibu omw’igholho eryo, lengekanaya kutsibu okwa mibere wukatsomaniramu abandi. Yibulhaye: ‘Kinalhangirikire ndeke-ndeke ku sindibika ekinigha okwa bakanyihithanaya? Abandu bakanalhangira ku ngalengaho erihiraho obuholho n’erikulha-kulhania obughuma?’ Ebi ni bibulyo by’erilengekaniako kutsibu.

14. Thwanga kangania thuthi ku ‘thukaghanyira balikyethu omo lhwanzo’?

¹⁴ Enzira eyakani eya thwanga kulha-kulhaniryamu obughuma y’eyahi? Ly’erigherererya Yehova omw’ikangania olhwanzo. (1 Yoane 4:8) Isithwanga bugha bino okwa baramya balikyethu thuthi, “Nanganabanza  aliwe sinanga bayihirako.” Thwamalengekania thuthya, isithuthakwama erihabulha lya Paulo ‘ery’erighanyirana omo lhwanzo.’ (Abanya Efeso 4:2) Lhangira ngoku Paulo mwathakwama kya bugha athi ‘thughanyirane’ aliwe mwabugha athi thutholere ithwaghanyirana omo “lhwanzo.” Hane embaghane. Omwa bithunga byethu muli abandu muthina-muthina, kandi Yehova abiriletha abosi okw’iyo. (Yoane 6:44) Neryo akabalhangira kw’ebibuya bingyi ebikaleka iniabanza. Nyamuhanga amabya inianzire balikyethu, thwanga thoka thuthi eribugha thuthi ithwe sithutholere eribanza? Thutholere ithwabya ithwanganabanza ngoku Yehova anzire ithwakolha.​—1 Yoane 4:20, 21.

15. Thukaminya thuthi ku hakendi syabya Eryibuka ly’erighunzerera?

¹⁵ Ekiro kikendi syahika ithwahindana okw’Ibuka omurundi w’erighunzerera. Thukakiminya thuthi? Paulo mwabwira Abakristayo abahakabibwa athi bakabya bak’ibuka olhuholho lhwa Yesu obuli mwaka, ‘bakakanganaya olhuholho lhw’Omukama, erihika aho asyasira.’ (1 Abanya Korinto 11:26) Omwa buminyereri bwiwe obuhambire okwa mughulhu w’enduli, Yesu kandi mwakania “n’okw’asa” liwe. Abere akakania okwa bulighe bunene obukayasa, mwabugha athi: ‘Ekiminyikalho ky’Omughalha w’Omundu kyasyahulhuka omo kyanya; neryo ebihanda byosi by’omo kihugho byasyasusumana, kandi byasyalhangira Omughalha w’omundu akasa oko bithu by’ekyanya n’obuthoki bunene n’olhukengerwa lhunene. Neryo Yesu asyathuma abamalaika biwe n’omulenge munene w’engubi, n’abo basyahindania abayisoghawa ba Nyamuhanga erilhua okwa bihandi bbini by’ekihugho, eritsuka oko nduli nguma y’ekyanya erihika oko yindi nduli y’ekyanya.’ (Matayo 24:29-31) Yesu “asyahindania abayisoghawa ba Nyamuhanga” akathwalha Abakristayo abosi abahakabibwa abakiri okwa kihugho b’elhubulha. Eki kikendi syabya obulighe bunene bwabiritsuka aliwe olhuhi lhwe Harmagedoni lhuthe lhwatsuka. Omwa lhuhi olho, Yesu, ne 144,000 abosi, bakendi syalhwa n’abami b’ekihugho kandi ibasinga. (Eribisulirwa 17:12-14) Eryibuka ly’erighunzerera erya thukendi syahindanako Yesu athali “asa” erisyahindania abahakabibwa ly’erikendi syabya ly’erighunzerera.

16. Busana naki iwathwamu erisyahindana okw’Ibuka ery’omwaka ono?

¹⁶ Ithwamu erisyahindana okw’Ibuka erikendi syabya biro 31 Okwakasathu, 2018. Kandi saba Yehova akuwathikaye erikolha ngoku wanga thoka nuku ithwe ng’abandu biwe thubye ithune bughuma. (Soma Esyonyimbo 133:1.) Kiro kighuma thukendisyahindana okw’Ibuka ly’erighunzerera. Thunalindirire ekiro eki, thukanganaye ngoku obughuma obukatsemesaya obwa thukabya nabu obuli mwaka okw’Ibuka ni bw’obughuli embere syethu.