1, 2. (a) Thukaminya thuthi ngoku kithokekene ithwe erithoka eryambalha omundu muhya-muhya? (b) Ni mibere yahi ey’omundu muhya-muhya eyiri omwa Abanya Kolosai 3:10-14?

OMWA Biblia, mune ebinywe, “omundu muhya-muhya.” (Abanya Efeso 4:24; Abanya Kolosai 3:10) Omundu muhya-muhya, y’emibere ‘eyahangikawa omo kisosekanio kya Nyamuhanga’ kutse erihambana n’erisonda liwe. Mbwino kinathokekene eryambalha omundu muhya-muhya oyu? Ee. Kundi Yehova mwahangika abandu omwa kisosekanio kiwe, sikikalire erigherererya emibere yiwe mibuya.​—Enzuko 1:26, 27; Abanya Efeso 5:1.

² Ni kwenene, kundi muthwasighalya obuthahikana, ithwe bosi hakanayira ithwabya n’eriyisunza libi. Kandi n’abathuthimbireko bakana thuhambako nabi. Aliwe busana n’obuwathikya bwa Yehova, ithukendi thoka eribya ngoku anzire ithwabya. Erithoka eribya n’omuhwa w’erikolha eki, muyire thukanaye okwa  mibere eyikasa busana n’eryambalha omundu muhya-muhya. (Soma Abanya Kolosai 3:10-14.) Neryo thwana lebya ngoku thwanga kolesya emibere eyi omw’ithulira.

3. Ni mubere wahi ow’akalhua omwambalha omundu muhya-muhya?

³ Paulo mwasoborera athi erithend’ibya n’akasolholho ni mubere mukulhu ow’akalhua omwambalha omundu muhya-muhya. Mwabugha athi: “Sihali kandi omundu w’ebihanda n’Omuyuda, kutse oyubwene n’oyuthabwene kutse omuyira, kutse omundu w’omoli, kutse omukobe, kutse ow’obwiranda.” Omwa kithunga, sihatholere hakabya oyukayowa ng’alengire abandi busana n’erangyi yiwe, ey’alhuire, kutse ekitsumbi eky’awithe omwa bulhambu. Busana naki? Kundi ng’abakwamire Kristo, ithwe bosi thuli “mughuma.”​—Abanya Kolosai 3:11; Abanya Galatia 3:28.

4. (a) Abaghombe ba Yehova batholere ibathwalhana bathi? (b) Ni mibere yahi eyangalemesya obughuma bw’Abakristayo?

⁴ Thukabya thwamambalha omundu muhya-muhya, thukasikaya abandu b’emisindo yosi n’eribaha ekitsumbi. (Abanya Roma 2:11) Eki kikanakalira abandi omwa yindi myanya. Ng’eky’erileberyako kera omwa South Africa, egavumente muyahiraho emyanya eya bandu erikalhamu erikwamana n’erangyi yabu. Na munabwire abandu abaliyo, imwamune n’Abema ba Yehova, ban’ikere omwa myanya eyo. Akathunga Akakasondolha mukathwamu erihiraho endegheka y’eriwathikya balikyethu b’esyorangi muthina-muthina eriminyana. Neryo omwa Kwerikumi 2013, endegheka eyo muyatsuka.​—2 Abanya Korinto 6:13.

5, 6. (a) Ni ndegheka yahi eya wathikaya balikyethu e South Africa eryongera eribya bughuma? (Lebaya ekisasani ekiri okw’itsuka.) (b) Mwabirilhwiririraki?

⁵ Baghalha bethu mubahiraho endegheka ey’erilhangira bathi okwa syowikendi ndebe balikyethu ab’emibughe kutse esyorangi esithasosene erilhua omwa bithunga nga bibiri bakasiba haghuma. Balikyethu abo ibanganasiba haghuma omw’ithulira, erighenda haghuma okwa mihindano, n’eribungirana. Ebithunga bingyi mubyasangira omwa ndegheka eyi, n’ekyaghanda ky’omuthahulha mukyathunga esyoripoti nyingyi okwa byalhwiririramu. Mukyatsemesya n’abathabya Bema ba Yehova. Ng’eky’erileberyako, omunya dini mughuma mwabugha athi: “Ingye sindi Mwema wa Yehova, aliwe omw’ilhangira lyaghe muwithe obuyithondeke omwa mubiiri wenyu w’erithulira, kandi simuwithe kasolholho omwa rangyi.” Balikyethu mubayowa bathi busana n’endegheka eyi?

⁶ Mwali wethu mughuma oyukabugha omubughe we Xhosa oyukahulhawa mo Noma mwatsuka erisagha erikokya balikyethu b’omwa kithunga ky’Olhusungu ewiwe. Aliwe abere abirighenda omw’ithulira na bali bethu abasungu n’eribabungira ewabu, mwahwa mw’obuba. Mwabugha athi: “Nabu ni bandu ng’ithwe!” Neryo balikyethu b’omwa kithunga ky’Olhusungu babere basyathulira n’ab’omwa kye Xhosa, Noma mwakokya abandi b’ewiwe. Mukyamutsemesya akalhangira omughuma w’okwa bagheni, mughalha  wethu omusyakulhu w’ekithunga kandi omusungu akaligha erikalha okwa mukongotho w’ekureti. Endegheka eyi yabiriwathikya balikyethu bangyi erithunga abanywani kandi banemuminyana n’abalikyethu ab’ehandi.

7. Busana naki mughulhu wosi thutholere ithwakangania abandi b’olhukeri?

⁷ Omughulhu mubi wa Sitani ono athe ahwaho, abaghombe ba Yehova bakendibya ibanemubana ebitsibu. Ithwe bosi ithwangana hikwako eribulha ly’emibiiri, obulhwere obukalire, eriendereribwa, ebitsinduli, eriherya ebya wuwithe, n’ebindi bitsibu. Erithoka eriwathikania omwa mughulhu w’ebitsibu, thutholere ithwabya n’omubere w’erikwira abandi b’obulighe. Erikwira abandi b’obulighe kikaleka ithwanza eribakangania olhukeri. (Abanya Efeso 4:32) Eyo ni mibere y’okwa mundu muhya-muhya. Yikendi thuwathikya erigherererya Nyamuhanga n’eriwathikya abandi.​—2 Abanya Korinto 1:3, 4.

8. Ni bibuya byahi ebyanga lhwiririra omw’ikwira abosi abali omwa kithunga b’obulighe n’eribakangania olhukeri? Iha eky’erileberyako.

⁸ Thwang’ongera thuthi erikangania olhukeri okwa bakalhua ehandi kutse abawithe ebindi bitsibu abali omwa kithunga kyethu? Thutholere ithwabakokya, ithwabanywana, n’eribawathikya erilhangira ngoku ekithunga kinabanzire. (1 Abanya Korinto 12:22, 25) Ng’eky’erileberyako, Dannykarl mwasuba e Japani erilhua omwa Philippines. Abandi ahabya akakolera mubatha muthwalha ndeke kundi abya w’ehandi. Kiro kighuma mwaghenda okwa muhindano w’Abema ba Yehova. Dannykarl mwabugha athi: “Hakuhi abosi ababya omwa muhindano babya Bajapani, aliwe mubanyithangirira ndeke, ng’abanyasi erilhua kera.” Eritsomana lya balikyethu mulyalholha embere erimuwathikya eriyithunda hakuhi na Yehova. Endambi muyahika Dannykarl amabatizibwa, na lino abiribya musyakulhu w’ekithunga. Abasyakulhu b’omwa kithunga batsemire iyo na mukali wiwe Jennifer eribya omwa kithunga kyabu, kandi bakababughako bathi: “Ni batemburi ababiryolhobya engebe kandi bakahiraho eky’erileberyako ekyuwene ky’erihira Obwami bw’embere.”​—Luka 12:31.

9, 10. Iha eby’erileberyako ebikakanganaya ebibuya ebikalhwiririra omw’ikangania olhukeri omw’ithulira.

⁹ Thunawithe akaghisa k’erikolha ebibuya okwa bosi omw’ibathulira engulhu yuwene y’Obwami. (Abanya Galatia 6:10) Abema ba Yehova bangyi bakakwira abakahumira omwa bihugho ebya balimu b’obulighe neryo ibalengaho n’erigha omubughe wabu. (1 Abanya Korinto 9:23) Ekya bakakolha ekyo kyabirilhwiririra mw’ebibuya. Ng’eky’erileberyako, mwali wethu omutemburi e Australia iya Tiffany mwigha Ekiswahili nuku athoke eriwathikya omwa kithunga ky’Eswahili omwa tawuni ye Brisbane. Nomwakine indi mukithamwolhobera erigha owundi mubughe, akayowa iniatsemire omwa engebe. Tiffany akabugha athi: “Wamabya wanzire eritsemera omubiiri w’erithulira, thalengesya erighenda omwa kithunga ky’owundi mubughe. Wukabya nga wabiribunga kandi nibya iwukine n’eka. Wukayilhangirira ndeke-ndeke olhughanda lhw’abalikyethu olhw’ekihugho kyosi n’obughuma obulengethukire obwa thuwithe.”

¹⁰ Eka nguma omwa Japani muyakolha ekindu ng’ekyo. Sakiko, omusika oyubuthirwe  omw’eka eyi akabugha athi: “Omw’ithulira, ithukabya ithunemubana abakahuma erilhua e Brazil. Ithukabya thukabakangya amasako omwa syo Biblia syabu omwa Lhuportugwizi, nga Eribisulirwa 21:3, 4 kutse Esyonyimbo 37:10, 11, 29, ibakahulikirira ndeke kutse n’erithoya emisonia.” Eka eyo muyakwira abandu aba b’obulighe, bamanza eribawathikya erigha ekwenene, neryo mubathwamu ng’eka eritsuka erigha Olhuportugwizi. Enyuma waho, eka eyo muyawathikya eritsukisya ekithunga ky’Olhuportugwizi. Bamabiriwathikya bandu bangyi abakahumira e Japan erigha ekwenene. Sakiko akabugha athi: “Kwenene muthwakolesya akaghalha kanene erigha Olhuportugwizi, aliwe akaghalha ako sikalihika okwa mighisa mingyi eyo thwabiribana. Thukasima Yehova ya kutsibu.”​—Soma Emibiri 10:34, 35.

11, 12. (a) Busana naki thutholere ithwabya n’amalengekania awuwene awakaleka ithwambalha omundu muhya-muhya? (b) Niki ekikendi thuwathikya eribya ithune bandu abayikehirye?

¹¹ Thutholere ithwambalha omundu muhya-muhya busana n’eryanza eriha Yehova y’olhukengerwa, butsira busana n’eryanza erihalhambwa n’abandi. Ambi ithw’ibuka ngoku, n’omulaika oyuhikene mwasa mw’emiyiheko, amakolha ekibi. (Ezekieli 28:17.) Ithwe sithuhikene, neryo ikyangana kalha eriyihighulha okwa mubere w’emiyiheko. Nomwakine kithya, ithwangan’ambalha omubere w’eriyikehya. Ni kyahi ekikendi thuwathikya erikolha ekyo?

¹² Ekighuma okwa byanga thuwathikya eriyikehya, ly’erisoma Ekinywe kya Nyamuhanga obuli kiro n’erighanirya okwa bya thukasoma. (Eryibuka Ebihano 17:18-20) Kandi kwilhabirirya, thutholere ithwaghanirya okwa bya Yesu athukangiriraya n’erigherererya eky’erileberyako kiwe eky’eriyikehya. (Matayo 20:28) Yesu iniakayikehaya indi mwanabya n’ebisandu by’abigha biwe. (Yoane 13:12-17) N’ekindi, ly’erisaba Yehova erithuha omulimu wiwe. Omulimu wiwe iniakendi thuwathikya erirwanisya amalengekania w’eriyowa nga thulengire abandi.​—Abanya Galatia 6:3, 4; Abanya Filipi 2:3.

13. Eriyikehya mukalhwiririra mighisaki?

¹³ Soma Emisyo 22:4. Yehova akanza ithwayikehya. Omubere w’eriyikehya akaletha mighisa mingyi. Thwamabya n’omubere oyu, ekithunga ikikendibya mw’obuholho n’obughuma. Kandi na Yehova iniakendi  thukangania olhukogho lhwiwe. Omukwenda Petero mwabugha athi: “Inywe bosi muyikehaye embere sy’abalikyenyu kusangwa kisakire kithi, Nyamuhanga akalhwa n’abakayiheka, nikwa akakanyaya olhukogho okwa bakayikehaya.”​—1 Petero 5:5.

14. Nindi oyuli ky’erileberyako ekyuwene eky’eribya mwolho n’erighumisirizya?

¹⁴ Omwa kihugho kya munabwire, omundu amabya ini mwolho, kandi iniawithe omubere w’erighumisirizya, abandi bakabugha ambu akayolhobereraya. Aliwe ekyo si kwenene. Emibere eyuwene eyi yikalhua oku Yehova, oyuwithe obuthoki obwosi omwa buhangwa bwosi. Iyo ni ky’erileberyako ekyuwene eky’erikangania obwolho n’eribya n’omubere w’erilinda. (2 Petero 3:9) Ng’eky’erileberyako, thalengekania okw’ighumisirizya lya Yehova omughulhu asubiraya Abrahamu na Loti erilhabira omwa bamalaika biwe. (Enzuko 18:22-33; 19:18-21) Thalengekania Yehova nga mwaghumisirizya bungahi ekihanda kye Israeli ahabw’emyaka eyilhabire omu 1,500 ikine mukangya obuthowa.​—Ezekieli 33:11.

15. Yesu mwabya athi ky’erileberyako omw’ikangania obwolho n’erighumisirizya?

¹⁵ Yesu ni “mwolho-mwolho.” (Matayo 11:29) Mwaghumisirizya ebisobyo by’abigha biwe. Omughulhu Yesu abya okwa kihugho kwa hano, ibakabera erimutsweba-tsweba n’erimubugha kw’amabehi. Aliwe mwakangania obwolho erihika okwa lhuholho lhwiwe. Omughulhu Yesu abya omwa bulhumi bunene, iniane okwa muthi, mwasaba athi Thatha wiwe aghanyire abakayamwitha. Mwabugha athi: “Sibasi ekyo bakakolha.” (Luka 23:34) Nibya n’omughulhu Yesu abya akabana ebikamwaghalhaya, iniakasighalha iniane mwolho.​—Soma 1 Petero 2:21-23.

16. Thwanga kangania thuthi obwolho n’erighumisirizya?

¹⁶ Paulo mwakangania enzira nguma eya thwanga kanganiryamu obwolho n’erighumisirizya akahandika athi: “Mughanyirane, mubuyirane omughulhu owundi awithe omwatsi oko wundi. Ngoku Omukama ababuyira, nenyu ko mwangabuyira abandi ba muthya.” (Abanya Kolosai 3:13) Erithoka erighanyira abandi, thutholere ithwabya bolho kandi ithwa ghumisirizya. Eki ikikendi letha obughuma omwa kithunga.

17. Busana naki obwolho n’erighumisirizya ni bikulhu?

¹⁷ Yehova akanza ithwakangania obwolho n’erighumisirizya abandi. Emibere eyi yikayithaghisibawa thwamabya ithwanzire erisyikalha omwa kihugho kiwe kihya-kihya. (Matayo 5:5; Yakobo 1:21) Thwamakangya obwolho n’erighumisirizya, kikaha Yehova y’olhukengerwa kandi thukawathikaya n’abandi nabu erikolha ekyo.​—Abanya Galatia 6:1; 2 Timoteo 2:24, 25.

18. Olhwanzo n’erithendibya n’akasolholho bihambene bithi?

¹⁸ Emibere eyo thwabirikaniako eyosi yiseghemere oko lhwanzo. Ng’eky’erileberyako,  omukwenda Yakobo mwakunga kutsibu balikyabo kundi babya ibabiritsuka erikolha ebibuya okwa baghuda ibasigha abera. Mwabugha athi kikathwa ekihano kya Nyamuhanga ekikabugha kithi “wanze mulikyenyu ngoku wuyanzire.” Neryo mwongerako athi: “Mwamayira ebithagha, mukakolha ebibi.” (Yakobo 2:8, 9) Thwamabya thuwithe olhwanzo, isithwendi solholha mundu wosi-wosi busana n’esukuru eyasomire, erangyi yiwe, kutse ekitsumbi eky’awithe omwa bulhambu bwiwe. Sithutholere thukayilingirirania nga sithuli mw’akasolholho. Ambi akasolholho isikathubanikamo.

19. Busana naki ni kikulhu ithwe erikangya olhwanzo?

¹⁹ Olhwanzo kandi lhuli mw’olhukeri n’erighumisirizya kandi “silhuli yiheka.” (1 Abanya Korinto 13:4) Thutholere ithwabya abakaghumisirizaya, ab’olhukeri, kandi abakayikehaya erithoka erithulira abandi. (Matayo 28:19) Kandi emibere eyi yikaleka ikyolhoba erilhabanganako ndeke n’abalikyethu abosi abali omwa kithunga. Ithwa bosi thwamabya n’olhwanzo ng’olho, ebithunga byethu imukendibya obughuma kandi ikyaha Yehova y’olhukengerwa. Abandi ibakendi lhangira obughuma obu neryo ibathuyiyungako. Neryo kwesi e Biblia yihikire eribugha okwa mundu muhya-muhya yithi: “Kandi kwilhaba ebyosi, muyire omuthima w’olhwanzo olhukahikanaya ebyosi haghuma omwa bughuma.”​—Abanya Kolosai 3:14.

20. (a) Ni bibulyo byahi ebya thutholere ithwayibulya? Busana naki? (b) Ni buthuku bwahi obuwene obwa thulindirire?

²⁰ Thutholere ithwayibulya, ‘Ni mbinduka syahi esya ngakinatholere erikolha erithoka erilhusya omundu wa kera n’eribya isinanga thasyamwambalha?’ Thutholere ithwasaba Yehova n’erimulemba-lemba thuthi athuwathikaye. Thutholere ithwahiraho akaghalha erihindulha amalengekania mabi kutse erileka obuthya-buthya erithoka ‘erisyabana omwanya omo Bwami bwa Nyamuhanga.’ (Abanya Galatia 5:19-21) Kandi thutholere ithwayibulya na kino, ‘Nganemulholha embere erihengulha amalengekania waghe nuku nanga tsemesya Yehova?’ (Abanya Efeso 4:23, 24) Sithuhikene, busana n’ekyo thutholere ithwalholha embere erihiraho akaghalha ak’eryambalha omundu muhya-muhya n’eribya isithwanga mulhusya. Eki ni ky’erikolha buthaleka. Engebe ka yikendi syatsemesya omughulhu obuli mundu oyuliho akendi syambalha omundu muhya-muhya n’erigherererya emibere mibuya ya Yehova omwa buswire!