1-3. (a) Ebiri omwa Esyonyimbo 147 byangabya ibyahandikawa mughulhu wahi? (b) Ebiri omwa Esyonyimbo 147 bikathweghesayaki?

MUGHULHU mungyi thukahalhamba omundu thwamatsemera eby’akabugha n’ebyakakolha. Ibbwa Yehova, iyo kwesi thwanga muhalhamba bungahi! Thukamuhalhamba busana n’amaaka mangyi w’obuthoki bwiwe, aw’akalhangirika omwa bikaswekaya ebyo abirihangika, kandi thukamuhalhamba busana n’olhwanzo olhw’athuwithire ng’erithuha ekihongwa ky’embanulho ya Mughalha wiwe.

² Thukabya thukasoma Esyonyimbo 147, kikalhangirika ndeke-ndeke ngoku oyuwahandika esura eyi abya anzire kutsibu erihalhamba Yehova. Kandi mwahira n’omwa bandi mw’omuhwa w’erimuyiyungako omw’ipipa Nyamuhanga.​—Soma Esyonyimbo 147:1, 7, 12.

³ Sithwasi nga nindi oyuwahandika Esyonyimbo 147. Aliwe oyuwahandikasyo angabya iniabyaho omwa buthuku Abaisraeli basuba e Yerusalemu Yehova abiribalhusya omwa bunyewa mwe Babeli. (Esyonyimbo 147:2) Omuhandiki oyu mwapipa Yehova kundi kandi abandu mubatsuka eripipira Yehova omwa kihugho ky’ewabu.  Omuhandiki oyu neryo mwathasya bugha esindi nzumwa esikaleka Yehova iniapipwa. Syabya ini syahi? Kandi ni nzumwa syahi esyanga leka iwabugha n’omuhwa wuthi, ‘Omwami Mukulhu apipawe!’?​—Esyonyimbo 147:1.

4. Omwami Kiro erilhwika Abaisraeli, kyangabya imukyabahambako kithi, kandi busana naki?

⁴ Thalengekania Abaisraeli nga babya bakayowa bathi ibane omwa bunyewa mwe Babeli. Ababathwalha omwa bunyewa ibakababwira omwa kasekereryo, bathi: “Muthwimbire olhwimbo lhwe Sioni.” Aliwe Abayuda sibabya n’omuhwa w’eriimba, kundi omuyi we Yerusalemu, ekindu ekyabya kikabaha etseme, abya iniabiriheribwa. (Esyonyimbo 137:1-3, 6) Babya babbunikire omwa muthima, ibakayithagha erihumulikanibwa. Aliwe ngoku kyanabya ikyabirilhaghulhwa omwa Biblia, Yehova mwawathikya abandu biwe abo. Mwakikolha athi? Omwami Kiro owe Persia oyuwakinda e Babeli, mwabugha bino oku Yehova: “Abirinyilhaghira erimuhimbira enyumba e Yerusalemu.” Omwami Kiro kandi mwabwira n’Abaisraeli athi: “Neryo omundu ndi oyuli omo kathi-kathi kenyu, inywe bandu biwe bosi, Omwami Mukulhu Nyamuhanga wawu abye nayu, neryo ahethukireyo.” (2 Emyatsi y’Emigulu 36:23) Eki kyangabya imukyahumulikania kutsibu Abaisraeli ababya e Babeli!

5. Omuhandiki w’Esyonyimbo mwabugha athiki okwa maaka wa Yehova w’erilhamya?

⁵ Yehova mwahumulikania ekihanda kye Israeli, kuthya n’obuli Muisraeli okwa liwe. Ekyo Yehova akakikolha n’okw’ithwe munabwire. Omuhandiki w’esyonyimbo mwabugha athi Nyamuhanga “akalhamaya ababbunikire omwa muthima, akasenga-senga ebironda byabo.” (Esyonyimbo 147:3) Omughulhu thulhwere kutse eribbunika omwa muthima, thutholere ithwayikethera ngoku Yehova athutsomene. Yehova anzire kutsibu erithuhumulikania n’erilhamya ebironda by’omuthima wethu. (Esyonyimbo 34:18; Isaya 57:15) Akathuha amenge n’akaghalha nuku thwanga thoka erighumira ebitsibu byosi-byosi.​—Yakobo 1:5.

6. Thwanga ghasirwa thuthi omwa byahandikawa omwa Esyonyimbo 147:4? (Lebaya ekisasani ekiri okw’itsuka.)

⁶ Kandi omuhandiki w’esyonyimbo mwalhalhamira omo kyanya neryo amabugha athi Yehova anasi omughanzo w’esyongununu kandi athi “akabirikirasyo omo mena wasyo.” (Esyonyimbo 147:4) Omuhandiki w’esyonyimbo mwalhangira esyongununu, aliwe isyasi omughanzo wasyo. Munabwire, abanya sayansi banasi ngoku omwa galaksi eya thulimu muli esyobbiliyoni sy’esyongununu. Kandi hanganabya ihane esyotriliyoni sy’esyogalakisi esiri omwa kyanya! Sihali mundu oyuwanga bara esyongununu esyosi, aliwe Nyamuhanga akasibara. Erithwalira haghuma, anasi ndeke obuli ngununu, eribya inianahere obuli nguma y’erina. (1 Abanya Korinto 15:41) Nyamuhanga oyuwasi ahali obuli ngununu oyo, nawu anakwasi. Akabya inianasi ahonyi-nyine aho wuli, ngoku wukayowa, n’ebya wukayithagha!

7, 8. (a) Yehova akathuyitheghereraya athi? (b) Iha eky’erileberyako erikangania ngoku Yehova athutsomene.

 ⁷ Yehova akayitheghereraya ebitsibu ebya wukalhabamu, kandi anawithe amaaka w’erikuwathikya omwa bitsibu ebyo. (Soma Esyonyimbo 147:5.) Iwangana yowa wuthi emibere eya wulimu yikalire kutsibu, kandi iwayowa nga siwanga thoka erighumirayo. Nyamuhanga akayitheghereraya ngoku thunawithe aho amani wethu akasubulira, “ak’ibuka ngoku thuli lhuthuthu.” (Esyonyimbo 103:14) Kundi sithuhikene, ithwangana kolha ekisobyo kighumerere ngendo nyingyi, neryo ithwahwa amani. Thukayikubaya bwomo thuk’ibuka ekindu ekithuwene ekya thwabugha, amalengekania mabi agho thwathunga, kutse obuli nga buha obwa thwathunga okwa wundi! Ebiri ng’ebyo, Yehova iyo sibirimubyako, aliwe akayitheghereraya ndeke eriyowa lyethu.​—Isaya 40:28.

⁸ Kine kyathakubyako, iwayowa okuboko kwa Yehova okw’obuthoki ikwabirikulhusya omw’irengwako? (Isaya 41:10, 13) Ekyo mukyabya oku mwali wethu, omutemburi, oyuk’ahulhawa mwa Kyoko. Abere akabwirwa ngoku akendiyakolera omwa kindi kithunga, ekyo mukyamughunza amani. Aliwe Kyoko mwaminya athi ngoku kwesi Yehova mwayitheghererya ebitsibu biwe? Omwa kithunga eky’athumawamo, mumwabanika balikyethu bangyi abayitheghereraya eriyowa liwe eryo. Akabugha athi ekyo mukyaleka iniayowa Yehova ng’akabugha athi: “Ngakwanzire, butsira ambu kundi wuli mutemburi, aliwe kundi wuli mwali waghe oyuyihereyo okw’ingye. Nganzire iwabya iwunatsemire wukanyikolera ng’Omwema waghe!” Iwe nawu, Yehova abirikukangania athi ngoku “eriminya liwe siryanga lengwako”?

9, 10. Ni nzira yahi ngulhu eyo Yehova akathuwathikarayamu? Iha eky’erileberyako.

⁹ Ithwe bosi thukayithagha ebindu ng’ebyalya, esyongyimba, n’ah’erikalha. Obundi iwanganabya iwune omwa ngitsi wuthi endambi yikendi hika imwabulha n’eky’erirya eka. Aliwe ambi iw’ibuka ngoku Nyamuhanga ahangika ekihugho erihulhukya ebyalya okwa bosi, kandi nibya “akalisaya ehyana hy’ebikororo omughulhu hikabirikira.” (Soma Esyonyimbo 147:8, 9.) Yehova amabya iniangana lisya ebinyonyi, ambi ithwayikethera ngoku nethu akendi thuha ebya thukayithagha kinyamubiiri.​—Esyonyimbo 37:25.

¹⁰ Ekikulhu kutsibu, Yehova akabya inianemuthuha ebyanga thuwathikya erighumya erikirirya lyethu, n’erithuha “obuholho bwa Nyamuhanga obulhabire amenge wosi.” (Abanya Filipi 4:6, 7) Mughalha wethu Mutsuo na mukali wiwe mubayilhangirira ngoku Yehova akabawathikaya. Etsunami yabere yalhaba e Japan omwa 2011, mubasambira okwa lhuthwe lhw’enyumba, bamabalira okwa kasali. Ekiro ekyo, mubaherya hakuhi obuli kindu ekyo babya bawithe. Mubwabakera okwa lhuthwe lhw’enyumba, omwa mwirima, kandi omwa mbehu. Bwabere bwakya, mubasondya ekikendi bahumulikania. Ekya babya babwene kisa yabya ini Yearbook eya 2006. Mutsuo abere anemusukulhayo, mwalhangira imune omwatsi ow’akabugha athi, “Etsunami Eyikalire Kutsibu Eyabiritay’iribyaho.” Omwatsi oyo abya akakania okwa musiki munene ow’alhaba e Sumatra omwa 2004 ow’aleka ihabya esyotsunami esyatsandaya ebindu binene kutsibu. Mutsuo na mukali wiwe mubaliriranako bakasoma ebyabya oku balikyabo. Mubayowa Yehova iniamabahumulikania. Yehova kandi  mwabatsomana n’omwa sindi nzira. Balikyabo omwa bindi bitsweka bye Japan mubabaha ebyalya n’esyongyimba. Aliwe ibbwa ekyabaghumaya kutsibu, b’abalikyethu ababya bakathumwa n’ekithunga erisyabahimba. Mutsuo akabugha athi: “Munayowa Yehova iniali hakuhi n’obuli mughuma w’okw’ithwe kandi inianemuthuwathikya. Ka mukyahumulikania!” Nyamuhanga akatsuka erithuha ebikendi ghumya erikirirya lyethu, neryo ibbwa iniakwamyako eby’ekinyamubiri.

11. Thutholere ithwakolhaki erithoka erighasirwa omwa buwathikya bwa Nyamuhanga?

¹¹ Yehova “akasumba abakayikehaya.” Athwanzire kandi akabya inianayitheghekire erithuwathikya. (Esyonyimbo 147:6a) Thwanga kolhaki erithoka erighasirwa omwa buwathikya bwiwe? Thutholere ithwakamathya obughuma bwethu nayu. Kandi erithoka  ekyo, thutholere ithwabya bandu abakayikehaya. (Zefania 2:3) Oyukayikehaya akayikethera Yehova ku yukendi ghunzaho ebitsibu ebyo akabana. Abali ng’abo Yehova akatsemera.

12, 13. (a) Ni kyahi ekya thutholere ithwayihighulhako thwamanza erighasirwa omwa buwathikya bwa Yehova,? (b) Ni bahi abo Yehova akatsemera?

¹² Okwa lhundi lhuhandi, Nyamuhanga “akahinolera ababi ahisi okwa kithaka.” (Esyonyimbo 147:6b) Ithwe sithwanzire ekyo kikathubyako! Thwanzire Nyamuhanga iniathukangania olhwanzo lhwiwe olhuthyusa. Busana n’ekyo thutholere ithwapona eby’akapona. (Esyonyimbo 97:10) Ng’eky’erileberyako, thutholere ithwapona eby’obusingiri. Eki mwamuli eriyihighulha okwa byangaleka ithwabukolha, ng’erisamalira eby’obutswatswa. (Esyonyimbo 119:37; Matayo 5:28) Sikyolho erisingura amalhwa aya, aliwe isiwalhuhirira kundi Yehova iniakendi kutsumulha.

¹³ Amalhwa aya sithwanga thokagho okwa lyethu. Thutholere ithwayikethera Yehova. Mbwino kyangana mutsemesya thwamayikethera ebya bandu bakalengekanaya bathi by’ebyanga bawathikya? Eyihi, Yehova ‘syalitsemera amaaka w’esyosabayiri.’ Kandi mbwino thunatholere ithwayikethera amaaka wethu kutse aw’abandi bandu? Yehova “syalitsemera abasirikali b’obulhume-lhume.” (Esyonyimbo 147:10) Ithwe thutholere ithwalholha embere erisaba Yehova y’obuwathikya n’erimusaba thuthi athuwathikaye omwa bulemwa bwethu. Yehova syendi syalhuha erihulikirira emisabe yethu eyi. “Omwami Mukulhu akatsemera abakam’ubaha, akatsemera abakayikethera olhwanzo lhwiwe olhuthyusa.” (Esyonyimbo 147:11) Kundi ni muthaleghulha kandi athwanzire, thukayikethera ngoku akendi lholha embere erithuwathikya erisingura esyongumbu syethu nyibi.

14. Ni kyahi ekya muhandiki w’esyonyimbo abya ayikethere?

¹⁴ Yehova akathukakasaya athi iniakendi thuwathikya omughulhu thuwithe ebitsibu. Abaisraeli babere basuba e Yerusalemu, omuhandiki w’esyonyimbo mwaghanirya okwa mibere Yehova abawathikirayamu. Mwahandika athi: “Akatheghaya esyongyo syawu isyakalha, akatsumulha abandu  bawu. Akatheghaya emithano yawu yo buholho.” (Esyonyimbo 147:13, 14) Omuhandiki w’esyonyimbo abere aminya ngoku Yehova anganatheya esyongyo sy’omuyi, ekyo mukyaleka iniasika. Mukyamukakasya ngoku Yehova akenditheya abandu biwe.

15-17. (a) Okwa bundi buthuku, thwangana yowa thuthi okwa bitsibu byethu, aliwe Yehova akakolesaya athi Ekinywe kiwe erithuwathikya? (b) Iha eky’erileberyako ekikakanganaya ngoku ekinywe kya Nyamuhanga kik’anguha lhuba busana n’erithuwathikya.

¹⁵ Iwangana hangya-hangya busana n’ebitsibu byawu, aliwe Yehova angana kuha amenge aw’eribighumira. Omuhandiki w’esyonyimbo mwabugha athi Nyamuhanga “akahamulha ekinywe, ikyalhaba omwa kihugho mo lhuba.” Kandi omuhandiki w’esyonyimbo mwakania n’oko nzururu, eritsuku, n’amatsuku kutse amathwa n’eribugha athi: “Sihali mundu oyukathoka erisika omo litsuka akathuma.” Neryo kandi mwabugha athi Yehova “akahana n’erinyenyethya [eriyeya] eritsuku.” (Esyonyimbo 147:15-18) Nyamuhanga wethu, oyuwasi obuli kindu, kandi oyuwangana kolha ekyosi-kyosi, oyukasondolha amatsuku n’esyonzururu, ahathe erithika-thika iniakendi kuwathikya erisingura ekitsibu kyosi-kyosi.

¹⁶ Munabwire, Yehova akathusondolha omwa Kinywe kiwe, e Biblia. Omuhandiki w’esyonyimbo mwabugha athi ekya Yehova akabugha, kik’anguha lhuba busana n’erithuwathikya. Nyamuhanga akathusondolha omwa nzira eyitholere kandi okwa ndambi eyitholere. Thalengekania ngoku wukaghasirawa omwa Biblia, ebitabu “by’omughombe oyutheleghulha n’ow’amenge,” e JW tivi, omuthahulha we jw.org, abasyakulhu b’ekithunga, na balikyethu. (Matayo 24:45) Wune wathayilhangirirakyo omwa ngebe yawu ngoku Yehova akanguha erikusondolha?

¹⁷ Mwali wethu oyukahulhawa mwa Simone mwayilhangirira ngoku Ekinywe kya Nyamuhanga kyamuwathikaya. Mwayowa nga syakiwithe mughaso, kandi amayowa Yehova nga syakimutsemera. Aliwe nomwanahwa athya amani, abya inianemulemba-lemba Yehova athi amuwathikaye. Kandi mwalholha embere eribya inianemwigha e Biblia. Simone mwabugha athi: “Sindi nathabya omwa mibere eyo ngathe ngathathungiramu akaghalha ka Yehova n’obusondoli bwiwe.” Ekyo kyabirimuwathikya eriyithunga kw’amalengekania awuwene.

18. Ni kyahi ekikaleka iwayowa Yehova iniali hakuhi nawu, kandi ni byahi ebyanga leka iwamupipa?

¹⁸ Omuhandiki w’esyonyimbo abya inianasi ngoku omwa bihanda byosi by’okwa kihugho, Yehova mwasombolha ekihanda ky’Abaisraeli eribya bandu biwe. Ibo ky’ekyabya kihanda kisa ekyathunga “ekinywe” kya Nyamuhanga “n’ebihano biwe.” (Soma Esyonyimbo 147:19, 20.) Nethu munabwire, thuwithe lhusunzo lhunene olhw’eryahulhwa omwa lina lya Nyamuhanga. Thutsemire busana n’eribya ithwabirimuminya, iniabirithuha Ekinywe kiwe erithusondolha, n’eribya ithwangana thunga obughuma nayu. Ng’omuhandiki w’Esyonyimbo 147, ni bingyi ebyangaleka iwapipa Yehova! n’erihira omwa bandi mw’omuhwa w’erikolha ekyo.