Ekya Biblia Yikabugha

“Emisathu Eyikahira Engebe y’Omw’akabi” Wunayitsame?

“EBIRO BINO ABANGYI OMW’ITHWE BABIRIBYA BAKATSAMA ENGEBE YABO OMW’ITHOGHOKALHA OMO SYONDEGGE, OKWA BITHWE, OMWA BISALHALHA EBY’AMAGHETSE EBIKALIRE N’ERIZIHA HAGHUMA N’ESYONYANGUMI.”—THE WILLOW GLEN RESIDENT OLHUPAPURA LHW’AMAKURU.

EBINYWE ebi bikakanaya okwa mutse owakanyirire omwa by’amasatha. Emisathu eyithuwene yikanyirire munabwire. Egazeti eya Time yikabugha yithi, erikanyirira “ery’emisathu eyikahira engebe y’omwa kabi”—emisathu eyo abandu bakatsama esyongebe syabu—likakanganaya ngoku abandu banzire eriyilhusyamo obuba n’eryongera eriyitsemesya.

Kundi emisathu eyithuwene eyi yikongera erikanyirira kikaleka n’emisathu eya buli kiro iyakolhwa omwa nzira eyithuwene, abandu bangyi banemuhuthangalha. Omwa 1997, omwa United States, omughanzo w’abayithagha obubalya obwa lhuba-lhuba abahuthalha busana n’erisatha emisathu y’erighendera okwa hibbahu ehiriko ebiringo mwayongera erilhaba oko pasente 33, owa abakahighenderaya okwa syonzururu mwalhaba oko pasente 31, n’ow’abakasatha amasatha w’erihethukira okwa bithwe mwalhaba oko pasente 20. Awandi masatha, mukalhua ebitsibu ebikalire kutsibu, kandi kikalhangirika kundi abangyi abakaholha kikabya ini busana n’amasatha aw’erihira engebe y’omwa kabi. Abakasighika eby’amasatha ebyo banasi ebitsibu ebirimo. Omukali mughuma oyuwabya akasangira omwa musathu w’erighenda okwa syonzururu akabugha athi: “Iningabera erilengekania okwa lhuholho.” Omuprofesa mughuma ow’eby’emisathu eyi akabugha athi “wamathendi huthalha, obo isiwuli hiraho akaghalha kanene omo misathu eyo.”

Erikwamana n’amalengekania ayo, Omukristayo atholere inialhangira athi eky’erisangira omwa masatha ng’ayo? E Biblia yanga thuwathikya yithi bikahika okw’ithwamu nga thunasangire omwa masatha awakahira engebe y’omwa kabi? Erilengekania oku Nyamuhanga ng’akayowa athi okwa bubuyirire bw’engebe kikendi thuwathikya erisubirya okwa bibulyo ebi.

Amalengekania Agho Nyamuhanga Awithe oko Ngebe

E Biblia yikathubwira yithi Yehova ya “nzuko y’engebe.” (Esyonyimbo 36:9) Abere abirihangika abandu, mwakangania kw’athutsomene kutsibu omw’ithuha ebyo thukayithagha eritsemera engebe. (Esyonyimbo 139:14; Emibiri 14:16, 17; 17:24-28) Busana n’ekyo, ni ky’amenge erighunzerera thuthi anzire ithwatsomana ebyo abirithuha. Emighambo n’emisingyi eyo aha Abaisraeli yikathuwathikaya erisima ekyo.

Emighambo ya Musa iyikabugha yithi omundu atholere iniayira ekyo akakolha eritheya esyongebe sy’abandi. Iniamathendi kolha ekyo neryo omundu akaholha, oyulhue atholere eriyira eky’erikolha erikakirya ekitsibu iniakendibya kw’olhubanza lhw’omusasi. Ng’eky’erileberyako, omwinye nyumba iniakabwirawa indi ahimbe olhuhimbo lhukuhi kutse akaghuthu akakahulhawamo, ekikunda, erithimba okwa lhuthwe lhw’enyumba yiwe. Iniakabya amalemwa erikolha ekyo, iniakabya kw’olhubanza lhw’omusasi omundu amathogha okwa lhuthwe lhw’enyumba yiwe akaholha. (Eryibuka Ebihano 22:8) Ende iyamatsimitha omundu omw’ithendi kighenderera neryo akaholha, omwinyeyo isyalibyako olhubanza. Okwa lhundi lhuhandi, ende yamabya iyasibwe ko yitsurumire kandi mwinyeyo iniabirikungwa aliwe iniathatheyayo ndeke, neryo ende iyamatsimitha omundu, mwinyeyo iniakabya kw’olhubanza lhw’omusasi kandi iniakithibawa. (Eriluayo 21:28, 29) Kundi Yehova akalhangira engebe mwa y’obughuli, Emighambo yiwe iyikakanganaya kw’atsomene kutsibu eritheya engebe.

Abaghombe ba Nyamuhanga abathaleghulha mubayithegherererya ngoku emisingyi eyi muli n’erithendi hira engebe y’omwa kabi. Omo mwatsi mughuma we Biblia, Dawudi mwakangania kw’anzire erinywa okwa “amaghetse w’ekithehero kye Betelehemu.” Oko buthuku obo e Betelehemu yabya omwa busondoli bw’Abafilisitini. Abasirikali basathu ba Dawudi babere babiriowa erisaba liwe, mubaghenda omo kilhaliriro ky’Abafilisitini, bamatheha amaghetse omo kithehero kye Betelehemu, neryo bamaletheragho Dawudi. Dawudi mwakolhaki? Mwathanywa amaghetse ayo aliwe muthagho oko kithaka. Mwabugha athi: “Nyamuhanga waghe anyighanayegho sinyikole eki; nasyapulya omusasi w’abandu aba ababirisonda erithisya engebe yabo kwehi? Kusangwa omw’ithisya engebe yabo babirilethagho.” (1 Emyatsi y’Emigulu 11:17-19) Oku Dawudi kyabya haali okw’iyo eritsama engebe yiwe busana n’eriyitsomana.

Yesu mwakolha ikyan’ekyo obundi omwa syonzoli, Diabolo akamulengako athi ayighuse ahisi erilhua okwa hekalu erilebya abamalaika nga banemwendi mutheya okw’ihuthalha. Yesu mwasubirya athi: “Siwusyalenga oko Mukama Nyamuhanga wawu.” (Matayo 4:5-7) Kwesi, Dawudi na Yesu mubaminya ngoku ni kibi embere sya Nyamuhanga eritsama esyongebe syethu omo nzira eyithatholere eyanga tsandya engebe y’omundu.

Thun’ibukire eby’erileberyako ebi, ithwangana yibulya, ‘Thwanga minya thuthi amasatha malebe ng’alhabirirenie kutse ng’akahira engebe y’omwa kabi? Neryo kundi n’eriyitsemesya erine lya buli kiro, erithe ly’akabi, lyangana hira engebe y’omwa kabi, thwanga thoka thuthi eriminya aho thwanga subulira?’

Mbwino Ebyanga Lhwiririramo Siki?

Eritsuka erilebya ndeke amasatha wosi-wosi awathwanzire erisangiramo kikendi thuwathikya erisubirya ekibulyo ekyo. Ng’eky’erileberyako, thwangana yibulya, ‘Amasatha ayo mwangalhua aksidenti eyiri yithi? Mbwino nganathendekirwe kutse ng’anawithe ebyanga nyitheya okw’ihuthalha ebikayithaghisibawa? Ni byahi ebyangabya namayithinira kutse eritesuka kutse eby’eriyitheyamo byaghe byamathendi kolha? Mbwino iningendi honoka buyira, kutse inangana huthulha kutsibu kutse ingakwa?’

Eritsama esyongebe syethu omo nzira eyithatholere habw’erianza eriyitsemesya kyangana hamba okwa bughuma bw’obughuli obo Omukristayo awithe na Yehova kuthya n’esyonzunzo siwe sy’embaghane omwa kithunga. (1 Timoteo 3:2, 8-10; 4:12; Tito 2:6-8) Kwesi, nibya n’omughulhu Omukristayo akasangira omw’iyitsemesya, akakolha ndeke akatsuka erilengekania okwa malengekania agho Omuhangiki awithe okwa bubuyirire bw’engebe.