Munaligha Amalengekania wa Nyamuhanga oko Musasi

Omunya Sayansi Akabugha Ebimuhambireko

NABYA ingane omwa kisenge okwa sipatara inganemusoborera egurupu y’abadokita ekir’itha omulhwere. Omulhwere oyo abya awithe ekiturughunyu, neryo munabugha nyithi, “Thwangana ghunzerera thuthi ekir’itha omulhwere ly’eritsandibwa ly’esyo red blood cell n’erilemererwa linene ery’embiko eryasa busana n’erihiribwako kutsibu omusasi.”

Omuprofesa mughuma mwahangana n’ekinigha kinene amapura athi, “Wukanza eribugha wuthi muthwamuhirako omusasi owathatholere?” Munasubirya nyithi, “Ekyo sikyo ngalyamanyisaya.” Omw’ibakangania ebisasani by’embiko y’omulhwere, munongerako nyithi, “Thwangana lhangira eritsanda ly’esyo red cell omwa mbiko eyi neryo ithwaghunzerera thuthi eki mukyalekire embiko iyalemwa erikolha.” a Abadokita mubapona, naghe namabulha eky’erithasyabugha. Nomwakine indi nabya dokita mulere nayu abya profesa, munayowa isinangahuna.

Eki kyabya isindi nabya Mwema wa Yehova. Nabuthawa 1943 e Sendai, e tawuni eyiri omwa kitsweka ky’eyighulhu e Japan. Kundi thatha waghe abya dokita oyuwasi ebihambire okwa malhwere kandi oyukathambira amalhwere w’obwongo, naghe munathwamu erisomera eby’emibatsi. Omo mwaka waghe wakabiri ow’erisomera eby’emibatsi, omwa 1970, munathahya omukali oyukahulhawamo Masuko.

Ingatsuka Obudokita Obuhambire Okwa Malhwere

Masuko iniakakolha erithusighika nganemughunzerera eby’esukuru yaghe. Erisomera eby’emibatsi mukyanyitsemesya kutsibu. Munasweka ingalhangira emikwikire eyuwene kutsibu ey’omubiri w’omundu! Nomwabine, sinabya ingalengekania indi hane Omuhangiki. Iningalengekanaya indi eby’erisekulya okwa by’emibatsi bikendi nyiha engebe eyiwithe ekighendererwa. Neryo nabere nabiribya dokita, munathwamo erilholha embere erisomera eby’emibatsi omw’igha okwa mibere y’amalhwere, ebikalethagho, n’ebikalhwiririramo.

Nabere nganemulebya ebikaleka abakwire ekansa ibaholha, munatsuka erithika-thikira eky’erihiribwako omusasi. Abalhwere b’ekansa eyikalire banganahwamo omusasi busana n’erilhuamo musasi munene. Kundi emibatsi y’ekansa yanganaleka omulhwere iniahwamo omusasi, mughulhu mungyi abadokita bakabugha bathi ahiraweko omusasi. Aliwe, munatsuka erilengekania indi erihirwako omusasi kyanganaleka ekansa iyayongera. Munabwire, abadokita banasi ngoku erihirwako omusasi likatsekaya amaaka w’omubiri w’erirwanisya amalhwere, ikyaleka omulhwere iniathasyalhwalha neryo ikyaleka iniathalhama. b

Omwa 1975, munabana ekyalholirweko ekikanibweko okw’itsuka ly’omwatsi ono. Omuprofesa abya iniabirisomerera ndeke eby’erithambira amalhwere awahambire oko musasi kandi yuwaleka omulhwere iniaholha. Neryo mukithaswekya akahithana akowa ingabugha indi erihirwako omusasi ky’ekiryaleka omulhwere iniaholha! Aliwe munalholha embere eribugha, neryo lyolho-lyolho mwathekana.

Sihendisyabya Amalhwere Kutse Olhuholho

Bwabya ibw’obuthuku obo omukekulhu Omwema wa Yehova abungira mukali waghe. Mwakolesya ekinywe “Yehova” akakania nayu, neryo mukali waghe mwamubulya ekinywe ekyo nga kikamanyisayaki. Omwema mwasubirya athi, “Yehova ni rina lya Nyamuhanga ow’okwenene.” Masuko iniakasoma e Biblia eritsuka bulere, aliwe e Biblia eyabya akakolesya iyabirisubya ahali erina lya Nyamuhanga mw’ekinywe “MUKAMA.” Neryo mwaminya ngoku Nyamuhanga anawithe erina!

Aho n’aho Masuko mwatsuka erigha e Biblia n’omukekulhu Omwema oyo. Nabere ingahika eka ingalhua okwa sipatara saha nga 7:00 sy’ekiro, mukali waghe inianatsemire mwambwira athi, “E Biblia yikabugha yithi amalhwere n’olhuholho bikayahwaho!” Munamusubirya indi, “Ekyo ikikendibya kibuya!” Mwalholha embere athi, “Kundi ekihugho kihya-kihya kiri hakuhi singanzire wukatsandya obuthuku bwawu.” Munalengekania indi akamanyisaya athi ngaleke omubiiri w’obudokita, neryo munahithana n’obutheke bwethu bwamabya mw’ebitsibu.

Nomubyanabya bithya, mukali waghe mwathanyilhuhirirako. Omw’isaba mwasondekania amasako awatholere neryo amanyikanganiagho. Ebinywe ebiri omwa Omugambuli 2:22, 23 kutsibu-tsibu mubyanyihika okwa muthima: “Omundu akabanaki busana n’omubiiri wiwe wosi, n’oko nduhi yiwe y’omuthima, ebyo akakolha eyikwa muna-kihugho kwehi? . . . N’omo kiro nibya omuthima wiwe syalilhuhuka. Eki nibya ni busa.” Eki mukyahambana n’ebyo nabya ingakolha—eriyihwerya omwa by’obudokita bwaghe ekiro n’omusibo isindi bana etseme y’okwenene.

Engyakya nguma Kyasande Okwomusanju 1975, mukali waghe akaghenda okwa Kisenge ky’Obwami ekya Bema ba Yehova, kitsumbukirania munathwamu erimukwama. Mukali waghe mwasweka akanyilhangirayo, kandi Abema mubanyithangirira ndeke. Eritsuka naho, munabya ingahindana oko buli muhindano wa Kyasande. Kwezi nga kughuma enyuma waho, Omwema mwatsuka erigha naghe e Biblia. Mezi asathu Abema balitsukire erigha na mukali waghe, mwabatizibwa.

Eriligha Amalengekania wa Nyamuhanga oko Musasi

Biro bike-bike munigha ngoku e Biblia yikabwira Abakristayo yithi ‘baleke erirya omusasi.’ (Emibiri 15:28, 29; Enzuko 9:4) Kundi eritsuka kera iningathika-thikira eky’erihirwako omusasi, mukithanyikalira eriligha amalengekania wa Nyamuhanga oko musasi. Munabugha indi, ‘Hamabya ihane Omuhangiki kandi ekyo ikyakabugha, neryo kitholere eribya ikihikire.’

Kandi mun’igha ngoku ekikaletha amalhwere n’olhuholho ky’ekibi kya Adamu. (Abanya Roma 5:12) Okwa buthuku obo nabya ingasekulya okwa miki y’omubiri. Thukabya thukakulha, emiki yethu yikakalha-kalha kandi iyabya mike-mike, ikyaleka omundu inialhwalha amalhwere ng’ow’omuthima, omusasi erithendi ghenda ndeke omo bwongo, n’amalhwere w’esyombiko. Munayitheghererya ndeke ngoku ekyo ni busana n’obuthahikana obwathwabirisighalya. Enyuma waho, omuhwa waghe omwa w’eby’obudokita mwakeha. Yehova Nyamuhanga musa yuwanga lhusyaho amalhwere n’olhuholho!

Okwakasathu 1976, enyuma w’amezi musanju ingamabiritsuka erigha e Biblia, munaleka eby’esukuru okwa sipatara y’eyunivasite. Munasagha indi mbwino sinendi syasabana omubiiri w’obudokita, aliwe munabanagho okwa yindi sipatara. Munabatizibwa omwa Kwakathano 1976. Munathwamu indi enzira eyuwene ey’erikoleseryamo engebe yaghe ly’erikolha ng’omuthuliri w’omughulhu wosi, kutse obutemburi, neryo munabutsuka Okwomusanju 1977.

Erilhwira oko Malengekania wa Nyamuhanga oko Musasi

Okwerikuminakughuma 1979, ingye na Masuko muthwahumira omwa kithunga kye Chiba Prefecture eyabya obuyithawa bunene bw’abathuliri. Munabanayo esipatara eyo nangabya ingakolerako biro bike omo wiki. Oko kiro kyaghe ky’erimbere oko mubiiri, egurupu y’abadokita muyanyithimbako. Mubahathikana erinyibulya bathi, “Iwe ng’Omwema wa Yehova, iwukendi kolhaki hamabya omulhwere oyukayithagha erihirwako omusasi?”

Omw’isikya munabasoborera indi iningendi kwama ekya Nyamuhanga akabugha oko musasi. Munasoborera ngoku hane eyindi mithambirire eyithemo erikolesya omusasi kandi indi iningendi kolha ngoku nangathoka eriwathikya abalhwere. Ahabw’esaha nga nguma ithunemukania, omukulhu w’abadokita mwabugha athi, “Ngakuyitheghereraya. Aliwe hamabya omulhwere oyuhweremo omusasi kutsibu, in’ithwe thukendi yira eky’erikolha.” Omukulhu w’abadokita oyo iniasibwe ng’omundu oyukalire, aliwe thwabere thwaghunza omukania oyo mwabya munywani waghe, kandi mwabya akasikya ebyo ng’ikirirye.

Munalengwako Busana n’Erisikya Omusasi

Omughulhu thwabya thukakolera e Chiba, ekyaghanda kihyaka eky’Abema ba Yehova e Japan kyabya ikinemuhimbwa e Ebina. Ingye na mukali waghe ithukayayo murundi mughuma omo wiki eriyatsomana amaghalha w’Abema abakayihayo eriwathikya okwa buhimbe bw’enyumba eyi, eyikahulhawamo Beteli. Habere halhaba mezi make, muthwakokibwa eriyakolera okwa Beteli e Ebina mughulhu wosi. Neryo omwa Kwakasathu 1981 muthwatsuka erikalha omo manyumba aw’obuthuku buke awabyamo abakoli abalhabire oku 500 abakayihayo eriwathikya oko buhimbe obo. Omo ngyakya, iningawathikaya okw’iyonza ebyoghero n’ehibina, n’omw’ithungyi ingakolha okw’ipima abalhwere.

Omughuma w’okwa balhwere abo nabya ingathambira ni Ilma Iszlaub, oyuwasa e Japan akalhua e Australia ng’omumisyonare omwa 1949. Abya alhwere e ekansa ey’omwa musasi kandi abadokita ibabirimubwira bathi hakisiya amezi make iniaholha. Ilma abya iniabirighana erihirwako omusasi kandi iniabiribugha athi akendi linda amezi awasighereyo ayo iniane okwa Beteli. Okwa buthuku obo emibatsi eyikawathikaya okw’iletha omwa mubiri mw’omusasi [red cells], ng’ow’akahulhawamo erythropoietin, yabya isiyiriyabanika. Neryo ihakanayira omusasi wiwe iniabya muke nga guramu 3 kutse 4! (Ogho omundu atholere iniabya nagho ni 12 erihika 15.) Aliwe munakolha ngoku nangathoka erimuthambira. Ilma mwalholha embere eribya n’erikirirya erighumire omwa Kinywe kya Nyamuhanga erihika aho aholera omwa Kwokubanza 1988—ihamabirilhaba myaka musanju!

Ahabw’emyaka, balikyethu bangyi ababya bakawathikya okwa buhimbe bw’ekyaghanda ky’Abema ba Yehova ekye Japan mubayithagha erisemezibwa. Thukasima, kundi abadokita ab’okwa syosipatara esyahakuhi babirikangania omuthima owuwene omw’isemezya ahathe erikolesya omusasi. Mughulhu mungyi iningakokibawa omwa sipatara bakasemezya nuku ngalebaye emithambirire, kandi okwa bundi buthuku ingawathikaya okw’isemezya. Ngasima abadokita abakasikaya emimanire y’Abema ba Yehova okwa musasi. Erikolha haghuma nabu kyabirinyiha ehighisa hinene ehy’eribabwira okwa ebyo ngikirirye. Lino-lino, omughuma w’okwa badokita mwabatizibirwe ng’Omwema wa Yehova.

Eky’obutseme, akaghalha ako abadokita bakahiraho erithambira Abema ba Yehova ahathe erikolesya omusasi kabirighasira n’abandi balhwere. Erisemezya ahathe erikolesya omusasi kyabirikangania emighaso eyikalhwiririra omw’ithendi hirwako omusasi. Erisekulya likakanganaya ngoku abalhwere abathehirawako omusasi bakasemezibwa bakalhama lhuba kandi ni bitsibu bike ebikalhwiriramo.

Erilholha Embere Erighira oku Dokita Mukulhu Kutsibu

Ngalengaho eriminya emithambirire eyiri okwa buthuku. Aliwe kandi ngalholha embere erighira oku Yehova, Omudokita mukulhu kutsibu. Syali subulira okw’isamalira emisosere y’omundu aliwe kandi akasamalira omundu wosi. (1 Samweli 16:7) Ingye nga dokita, ngalengaho eritsomana obuli mulhwere iyo ahabw’iwe, butsira erihwerya amalengekania oko bulhwere bwiwe busa. Eki kikaleka ingathoka erithambira ndeke omulhwere.

Ngakinakolera okwa Beteli, kandi nganemuwathikya abandi erigha oku Yehova—imwamune n’amalengekania wiwe oko musasi—ekyo ni kighuma ky’okwa bikinanyilethera etseme. Ngayikethere ngoku Omudokita Mukulhu kutsibu, Yehova Nyamuhanga, akisiya iniaghunzaho amalhwere wosi n’olhuholho.—Byabughawa na Yasushi Aizawa.

[Omwatsi ahikwa]

[Eblabbu]

“Munasoborera ngoku hane eyindi mithambirire eyithemo erikolesya omusasi kandi indi iningendi kolha ngoku nangathoka eriwathikya abalhwere”

[Eblabbu]

“Erisemezya ahathe erikolesya omusasi kyabirikangania emighaso eyikalhwiririra omw’ithendi hirwako omusasi”

[Eblabbu]

Ahighulhu: Akaha omukania owaseghemere oko Biblia

Oko mali: Ingane na mukali waghe, Masuko, munabwire