Emyambalire n’Emiyipambire Ibyabikanyithwikalhaya

BYABUGHAWA NA EILEEN BRUMBAUGH

NABUTHIRAWA omo dini eya Old Order German Baptist Brethren, eyisosene n’edini y’Amis na Mennonite. Edini ye Brethren eyi yatsuka e Germany omwa 1708 ng’ekitsweka ky’eribukya abandu bunyakirimu ekikahulhawamo Pietism. E Encyclopedia of Religion yikabugha yithi Pietism yabya yikaminyikalha “omwa kiyithawa ky’abandu eriowa enjiri ya Kristo.” Eki mukyaleka edini eyi iyathoka eritsukisya erithererera ly’abamisyonare omwa bihugho bingyi.

Omwa 1719 egurupu nyike eyabya yikasondolhwa na Alexander Mack muyahika omo mwanya agho lino ni Pennsylvania, e United States. Neryo eritsuka-tsukana naho, esindi gurupu syabiritsuka n’eriyighabulha oko sindi. Obuli gurupu iyikaghendera okwa syongangirirya sya Alexander Mack erikwamana ngoku yamayitheghereryasyo. Ekanisa yethu yabyamo abandu nga 50. Erisoma e Biblia n’eriamakirira erithwamu ly’abakulhu b’ekanisa ky’ekyabya kikahirwako omuwatho.

Hakuhi esyondengo isathu, efamile yethu muyahambirira erikirirya eri n’erilighenderako omwa ngebe. Muningira omwa kanisa eyi kandi namabatizibwa inganawithe myaka 13. Munakulibwa n’erikangiriribwa ambu ni kibi erikolesya kutse eribya n’ematoka, etrakita, kutse nibya eredio kutse ekindi kindu kyosi-kyosi ekikakolesaya amasenyerezi. Abakali isibaly’ambalha esyongyimba esipambire, kandi isibali ghemba esyonzwiri kandi ibakaswika omuthwe wabu. Abalhume ibakabyako esyonderu. Oko bulengekania bwethu, erithendibya w’ekihugho imwamuli erithendiambalha esyongyimba esiri okwa mulembe, eriyipamba, kutse eriambalha ebikwangyi, emiseghe, amaningita, ebindu ebyo thwabya thukalengekania thuthi n’ikangania emiyiheko.

Muthwakangiriribwa erisikya e Biblia ya kutsibu, eya thwabya thukalhangira ng’ebyalya byethu by’obunyakirimu. Obuli ngyakya thuthe thwalya eky’engyakya, ithukahindana omwa diro n’erihulikirira Thatha wethu akasoma esura omwa Biblia neryo ithwasubirya okwa by’amasoma. Neryo ithwe bosi ithukakukama Thatha akasaba. Enyuma waho, Mama iniakasuba omwa Omusabe wa Thatha wethu. Mughulhu wosi iningalindirira eriramya ly’engyakya, ithwe ng’efamile ithune haghuma, ithunemughanirya oko myatsi y’obunyakirimu.

Thwabya thwikere okwa famu hakuhi ne Delphi, Indiana, eyo thwabya thukalima ebyalya muthina-muthina. Ithukabyandaghaliraya omwa tawuni okwa kamatoka kake akakakurawa n’esyosabayiri, neryo ithwabighulya okwa syonzira kutse nyumba okwa nyumba. Ithukalengekanaya thuthi erikolha kutsibu ni kighuma ky’okwa mibiiri eya thukakolera Nyamuhanga. Neryo ithukahiraho akaghalha kwihaho Kyasande, isithuli kolha mubiiri wosi-wosi. Aliwe okwa bundi buthuku, efamile yethu iyikasangira kutsibu omwa mibiiri y’okwa famu neryo ikyathukalira erikwama eby’obunyakirimu.

Obutheke n’Efamile

Omwa 1963, ingane w’emyaka 17, James mwanyiherukya, nayu ini w’omwa Old Brethren. Enzuko yiwe omwa dini eya Old Brethren yabya yitsukire okwa bathatha-kulhu wiwe. Ingye nayu ithwanzire erikolera Nyamuhanga kandi ithw’ikirirye thuthi edini yethu y’ey’ekwenene.

Aho omwaka wa 1975 ahikira thwabya ithwamabiributha abaana mukagha, kandi omwa 1983 muthwabutha omwana wethu ow’omusanju kandi ow’erighunzerera. Rebecca, omwana wethu owakabiri, yuwabya mwana w’obukali musa. Muthwakolha kutsibu kandi isithuli kolesaya sente nene kandi muthwabya omwa ngebe nyolho. Muthwalengaho erikangirirya abaana bethu b’emisingyi ye Biblia eyo ababuthi bethu n’abandi omwa dini ye Old Brethren bathukangiriraya.

Edini eya Old Brethren iyitsomene kutsibu emisosere y’omundu ey’eyihya. Ithukayowa thuthi kundi sihali oyuwanga minya ebiri omwa muthima, emyambalire y’omundu yikabisulha ebiri omwakathi. Neryo omundu w’edini iniam’uwania esyonzwiri siwe sya kutsibu, ithukakilhangira ng’emiyiheko. Amapambu-mapambu w’omwa lhukimba lhwethu nawu iniamabya manene-manene, nakyo ini kindi kindu ekikakanganaya emiyiheko. Okwa bundi buthuku, emyatsi eyi iyikanakubathiraya n’Amasako iwuwene-wene.

Ekyalholirweko eky’Omwa Ngomo

Okw’ihwererera ly’emyaka eya 1960, mughalha wobu mwira waghe, ya Jesse nayu oyuwakulira omwa dini eya Old Brethren, mwahirwa omwa ngomo busana n’erighana eringira omwa mahe. Iniane eyo mwabanangana n’Abema ba Yehova, nabu abakayowa bathi erisangira omwa mahe kikathwa emisingyi ye Biblia. (Isaya 2:4; Matayo 26:52) Jesse mwathunga erikanirania linene erye Biblia n’Abema kandi mwayilhangirira emibere yabu. Enyuma w’erigha bingyi omwa Biblia, mwabatizibwa ng’Omwema wa Yehova—ekindu ekyathuponesaya kutsibu.

Jesse mwabwira mwira waghe okwa ebyo abir’igha omwa Biblia. Kandi mwalhangira athi mughulhu wosi James akabya inianemuhebwa esyogazeti sye Watchtower ne Awake! Erisomasyo mukyaleka James iniongera erianza e Biblia. Kundi James mughulhu wosi inianzire erikolera Nyamuhanga aliwe ihakanayira iniayowa ngali haali oku Nyamuhanga, neryo inianzire ekyosi-kyosi ekyanga muwathikya eriyithunda hakuhi na Nyamuhanga.

Abasyakulhu ab’ekanisa yethu ibakathuhiramo omuhwa w’erisoma esyogazeti sy’edini eya Amis, e Mennonite, n’esindi syonyikirirya sye Old Brethren, nomwakine indi ithukathwalha amadini ayo nga w’ekihugho. Aliwe thatha waghe iniawithe akasolholho kanene oko Bema. Iniakabugha athi sithutholere thukasoma e Watchtower na Awake! Neryo munayiponera ingalhangira James akasomasyo. Munasagha indi akendi kwama esyongangirirya sy’amabehi.

Nomwabine, eritsuka kera James abya iniabirithika-thikira esyonyikirirya ndebe esye Old Brethren esyo abya akayowa athi sisirihambangana ne Biblia—kwilhabirirya engangirirya eyikabugha yithi ni kibi erikolha omubiiri wosi-wosi Kyasande. Ng’eky’erileberyako, e Old Brethren, iyikakangiriraya yithi kikalighirawa eriha ebisoro byawu by’amaghetse Kyasande aliwe yithi isiwakulha n’ekithi. Abasyakulhu b’edini eyo isibali bathamuha enzumwa eyiseghemere okwa Masako eyikasighika ekilhaghiro ekyo. Lyolho-lyolho naghe munatsuka erithika-thikira esyongangirirya ng’esyo.

Kundi eritsuka kera ithwikirirye thuthi edini yethu y’edini ya Nyamuhanga kandi ithwabiriminya ekyanga thubyako thwamalekayo, neryo mukyathukalira erilhua omwa dini ya Old Brethren. Aliwe obunyamuthima-thima bwethu bwabya isibwanga thasyathulighira eribya omwa dini eyo thukayowa thuthi siyirighendera ndeke okwa Biblia. Neryo omwa 1983 muthwahandika ebaruha eyikasoborera esyonzumwa esyamaleka ithwalhua omwa dini eyo n’erisaba thuthi ambi yisomerawe omwa kanisa. Neryo muthwahighithwa omwa kanisa eyo.

Erisondya Edini y’Okwenene

Enyuma waho, muthwatsuka erisondya edini y’okwenene. Ithukasondaya edini eyo abalimo bakaghendera okwa ebya bakakangiriraya abandi. Eky’erimbere, ithwabirighana edini yosi-yosi eyikasangira omwa syonyuhi. Aliwe ithukinanzire esyodini esithayingiraya omwa bindu binene, ithukayowa thuthi eribya omwa ngebe nyolho n’eriambalha esyongyimba esipambire-pambire kikakanganaya ngoku edini eyo si y’ekihugho. Eritsuka 1983 erihika 1985, muthwahiraho obuthuku erithimba omw’ihanga lyethu, erighenda thukalebya obuli dini—e Mennonites, Quakers, n’awandi madini awatheyingiraya omo bindu binene.

Omwa buthuku obo Abema ba Yehova mubathuhikako okwa famu yethu, hakuhi ne Camden, Indiana. Ithukabahulikirira, eribasaba thuthi bakolesaye e Biblia eya King James nyisa. Ingasikirye emimanire y’Abema okwa syonyuhi. Aliwe mukyanyikalira eribahulikirira kundi munayibwira indi bamabya isibanga lhangira ekiyithawa ky’eriyighabulha okwa kihugho omw’ambalha esyongyimba esipambire-pambire, munayowa indi siyangabya ini dini y’okwenene. Iningayowa indi emiyiheko yikaleka abandu ibambalha mbaghane okw’ithwe. Ingikirirye indi ebindu bikaleka omundu iniayiheka.

James mwatsuka eribya akaghenda okwa Kingdom Hall y’Abema ba Yehova, kandi iniakaghenda n’abaghuma b’okwa balhwana bethu. Iningahithana kutsibu. Mwira waghe iniakanyibwira athi ngaghende nayu aliwe ingaghana. Aliwe kiro kighuma mwabugha athi, “Nomuwangabya isiwanzire erighenda-ghendania n’ebyosi ebya bakakangiriraya, iwe thakwama kyaghendayo wanayilhangirira ngoku bakakolongana.” Ekyo kyabya ikyabirimutsemesya.

Erighunzerera, munathwamu erighenda nayu aliwe inganayitheghirye. Muningira omwa Kingdom Hall inganambere ekiteteya kyaghe eky’erangyi nguma kandi inganambere n’esapeho. N’abaghuma b’okwa balhwana baghe isibambere esyongetha, n’esyongyimba syabu esy’erangyi nguma. Aliwe Abema mubasa aho thuli n’erithukangania olhwanzo. Munalengekania indi, “Ithwe thuli mbaghane, aliwe bamathwangirira ndeke.”

Munatsemera omubere wabu w’olhwanzo, nomwakine indi nabya inabirithwamu eriyalebya buyira. Isinang’imana kutse nibya eriimba okwa syonyimbo syabu. Emihindano iyikabya yikahwamo inababulya ebibulyo binene, eribabulya okwa myatsi eyanga lengekanaya indi sibali kolha ndeke kutse amasako malebe ng’akamanyisayaki. Nomwakine indi sinabya ingakolesya amenge ingababulya, obuli mundu oyo nabulhaya mwakangania kw’anyitsomene. Kandi munatsema ingabulya abandu muthina-muthina b’ekibulyo kighumerere kandi ibasubirya ebisosene. Okwa bundi buthuku ibakanahandika eby’erisubirya, ekindu ekya ngwathikaya kundi iningendi thasyabisoma okwa yindi ndambi.

Omwa Kwomukagha 1985, ithwe ng’efamile yethu muthwaghenda okwa lhuhindano lhw’Abema ba Yehova e Memphis, Tennessee—erithayalebya buyira. James abya iniakineko esyonderu, kandi thwabya ithukinambalha esyongyimba esy’erangyi nguma. Oko buli ndambi y’erilhuhuka ihakabya ihana hakiri mundu mughuma oyuwabirithuhikako. Muthwatsemera olhwanzo, eritsomana, n’eryangirirwa erya thwakanganibawa. Kandi muthwatsemera obughuma kundi ehosi-hosi eyo thwabya thukahindanira, ibakakangiriraya ebisosene.

Busana n’eritsemera olhwanzo lhw’Abema, James mwaligha erigha e Biblia. Iniakayithendaya okwa buli kindu, erianza aminye kwenene ebyak’igha nga nina kwenene. (Emibiri 17:11; 1 Abanya Tesalonika 5:21) Endambi muyahika, James amayowa iniabiribana ekwenene. Aliwe munayowa nabi kutsibu. Inganzire erikolha ekihikire, aliwe isinganzire erighenda-ghendania n’omulembe n’eriaghanzwa ng’ow’ekihugho. Omurundi w’erimbere ingaligha erigha e Biblia, nabya ne Biblia eya King James okwa kihinga kighuma n’eya New World Translation okwa kindi. Iningalebaya obul’isako omwa syo Biblia esyo erilhangira indi singathathebibwa.

Ngoku Naligha

Thwabere thunemwigha e Biblia n’Abema, muthwaminya ngoku Thatha wethu w’elhubulha ni Nyamuhanga mughuma, butsira busathu omwa mughuma, kandi ngoku nethu thuli bihangikwa kandi ngoku sithuwithe akalimu akatheholha. (Enzuko 2:7; Eryibuka Ebihano 6:4; Ezekieli 18:4; 1 Abanya Korinto 8:5, 6) Kandi muthwigha ngoku omuliro wa kera na kera y’eyisinda butsira omuliro ow’enyine-nyine. (Yobu 14:13; Esyonyimbo 16:10; Omugambuli 9:5, 10; Emibiri 2:31) Erigha ekwenene eyihambire okwa muliro wa kera na kera kyabya kindu ekyo ngathendi syibirirwa kundi e Old Brethren isiyiri lighirana n’ekya kikamanyisaya.

Aliwe nabya ingakinabulha Abema nga nina dini y’okwenene, kundi omwa bulengekania bwaghe iningayowa indi bakine b’ekihugho. Isibali omwa ngebe nyolho, ekindu ekyo nabya ingalengekania indi kikayithaghisibawa. Aliwe kandi munaminya ngoku bakaberereraya ekihano kya Yesu eky’erithulha engulhu yuwene y’Obwami okwa bandu bosi. Neryo munabya omwa mingangyi!—Matayo 24:14; 28:19, 20.

Okwa buthuku obo, olhwanzo lhw’Abema mulhwathuwathikya erilholha embere erisondekania ekwenene. Ekithunga kyosi mukyathutsomana ng’efamile. Abema muthina-muthina ibakahika ewethu okwa bundi buthuku ibakathubungira erisyaghulha amathe n’amaya wethu, neryo muthwatsuka erilhangira ku ni bandu babuya. Eribya ithwabya ithunawithe omughuma w’okw’ibo oyo abya akathweghesya mukithaleka bakaghana eribya bakahika eka. Omwakanya k’ekyo, ab’omwa kithunga ibamabya ibane hakuhi n’eka wethu, ibakakyitha ibathuramukya. Ahathe erithika-thika muthwayithagha ehighisa ng’ehi nuku thuminye Abema, kandi muthwasima eritsomana lyabu n’olhwanzo.

Eritsomana eri si ryabya ly’Abema ba Yehova ab’omwa kithunga ekya hakuhi nethu basa. Nganemurwanisya amalengekania awahambire okwa myambalire n’emiyipambire, Kay Briggs, Omwema ow’omwa kithunga ekya hakuhi, nayu oyuwabya akambalha esyongyimba esithapambire n’erithwamu erithendi yipamba-pamba mwanyibungira. Munayowa buholho nayu kandi muthwakanirania ndeke. Neryo kiro kighuma Lewis Flora, nayu oyuwakulibawa omwa dini eyitsomene eky’erangyi nguma mwanyibungira. Mwalhangira eriyibulha-bulha eriri okwa busu bwaghe neryo mwanyithumira ebaruha ey’esyopeji ikumi, akanza erinyiwathikya. Eritsomana liwe mulyaleka ingathoghongya emisoni kandi munasoma e baruha eyo mirundi mingyi.

Munabulya omulebererya oyukabalhama, Mughalha Wethu O’Dell, indi anyisoborere Isaya 3:18-23 na 1 Petero 3:3, 4. Munamubulya indi, “Mbwino emilhondo eyi siyiri kanganaya indi eriambalha esyongyimba esy’erangyi nguma kikayithaghisibawa erithoka eritsemesya Nyamuhanga?” Mwabugha athi: “Mbwino nina kibi eriambalha ekisapeho ky’abakali? Nina kibi erilhuka esyonzwiri?” Omwa Old Brethren, ithukalhuka ehyana hilere, n’abakali abakulire ibambalha esyosapeho kutse esyo bonnets. Munalhangira ngoku sibithahambangana, kandi munatsemera erighumisirizya n’olhukeri ebyo omulebererya oyu akanganaya.

Lyolho-lyolho munongera eriligha aliwe habya ihakine omwatsi mughuma ow’abya akanyilyambya kutsibu—abakali ibakaghemba esyonzwiri. Abasyakulhu b’ekithunga mubanyisoborera ngoku esyonzwiri sy’abandi bakali sikanakulha isyahika okwa lhulengo lhulebe, n’esy’abandi isyabya siri. Ibbwa mbwino esyonzwiri sy’owundi mukali sirengire esy’owundi? Kandi mubanyiwathikya erilhangira olhukwamirwa lhw’obunyamuthima-thima bikahika okwa myambalire n’emiyipambire kandi mubanyiha omwatsi owanangayasoma.

Erighendera oko Byathw’igha

Thwabya thukasondekania ebighuma bibuya kandi muthwabibana. Yesu mwabugha athi: “Neryo mwamabya n’olhwanzo, omughuma busana n’owundi, abandu abosi basyaminya kwa muli bigha baghe.” (Yoane 13:35) Muthwaligha ngoku Abema ba Yehova ni bandu abakakanganaya olhwanzo lhw’okwenene. Nomubyanabya bithya, eki mukyatabura abaana baghe babiri abakulhu ya Nathan na Rebecca, kundi babya ibabiriligha edini eya Old Brethren n’eribatizibwa muyo. Erighunzerera mubanza ekwenene ye Biblia eyo thwabakangiriraya kuthya n’olhwanzo olho Abema ba Yehova bakanganaya.

Ng’eky’erileberyako, Rebecca mughulhu mungyi inianzire eribya n’obunywani obuwene na Nyamuhanga. Neryo mukyamwolhobera erimusaba omughulhu aminya ngoku Nyamuhanga syali sangwa athegheka ebibi ebikendi syahika oko mundu. Kandi mwongera eriyithunda hakuhi na Nyamuhanga omughulhu aminya ngoku Nyamuhanga si busathu aliwe ku ni mundu oyuliho oyo angagherererya. (Abanya Efeso 5:1) Kandi mwatsema akaminya ngoku syanga thasyakolesya esya “thee” na “thou” akakania na Nyamuhanga. Abere anemwigha okwa bya Nyamuhanga akayithagha ebihambire okwa musabe, kuthya n’ekighendererwa kikulhu ekya Nyamuhanga awithire abandu eky’erikalha kera na kera omwa kihugho paradiso, mwongera eriyithunda hakuhi n’Omuhangiki wiwe.—Esyonyimbo 37:29; Eribisulirwa 21:3, 4.

Esyonzunzo Esyo Ithwe Bosi Thuwithe

Ingye na James n’abaana baghe bathano abakulhu—Nathan, Rebecca, George, Daniel, na John—muthwabatizibwa ng’Abema ba Yehova omwa Kwomukagha 1987. Harley mwabatizibwa 1989, na Simon omwa 1994. Efamile yethu eyosi yabiriyihayo erikolha omubiiri ogho Yesu Kristo alhaghira abigha biwe erikolha, ni bugha ambu, erithulhughania engulhu yuwene y’Obwami bwa Nyamuhanga.

Abalhwana bethu bathano abakulhu—Nathan, George, Daniel, John, na Harley—kuthya n’omwana wethu w’obukali ya Rebecca—abosi babirikolera okwa kyaghanda ky’Abema ba Yehova e U.S. George akineyo kandi amabirighunzayo emyaka 14, na Simon, oyuwaghunza esukuru omwa 2001, nayu abya abiritsuka erikolera okwa kyaghanda ky’omuthahulha ekyo. Abalhwana bethu abosi ni basyakulhu b’ekithunga kutse abaghombe abawathikya omwa bithunga by’Abema ba Yehova. Mwira waghe akakolha ng’omusyakulhu omwa Kithunga kye Thayer, omwa Missouri, naghe nganemusangira n’omuhwa omw’ithulira.

Lino thuwithe abitsikulhu basathu—Jessica, Latisha, na Caleb—kandi batsemire erilhangira ababuthi babu bakabakangirirya erianza Yehova ibakine balere. Ng’efamile, thutsemire kundi Yehova mwathuletha okw’iyo n’erithuwathikya eriminyerera abandu abali omo lina liwe busana n’olhwanzo olho bakakanganaya.

Thwanzire abandi abawithe eriyisunza linene ery’erianza eritsemesya Nyamuhanga aliwe abo obunyamuthima-thima bwabu bwangabya ibwabirithendekwa omwa bibathimbireko omwakanya ke Biblia. Thuwithe amaha thuthi nabu bangana bana etseme eyo thuwithe lino omw’ighenda nyumba okwa nyumba, butsira omw’ighulya ebirimwa, aliwe omw’ithulhughania omwatsi owahambire okwa Bwami bwa Nyamuhanga n’ebindu bibuyanga ebyo bukendi syakolha. Ngathoghongaya emisoni y’erisima ingalengekania okw’ighumisirizya n’olhwanzo ebyo abandu abali omwa lina lya Yehova bathukanganaya!

[Ebisasani]

Ingane w’emyaka musanju n’enyuma waho ingamabirikulha

[Ebisasani]

James, George, Harley, na Simon, ithunambere esyongyimba esy’erangyi nguma

[Ebisasani]

Ekisasani kyaghe eki ingaletha ebyalya by’omwa kathali mukyahulhuka omwa makuru

[Ebisasani]

Journal na Courier, Lafayette, Indiana

[Ebisasani]

Ingane n’efamile yaghe munabwire