Ni Hayi Aho Wangabana Amaha w’Okwenene?

THUTHABUGHA thuthi esaha yawu yabirikwa. Wamanza erisubyayo, wuwithe erithwamu nga nindi oyukendi subyayo. Ni bangyi abakathererera bathi banasi erisubya esyosaha, kandi abosi bakabugha bathi basi ndeke erikolha omubiiri oyu, aliwe abandi b’okw’ibo ibabugha ebithehambangana. Neryo ibbwa wamaminya ngoku omutaka wawu y’omulhume w’amenge oyo wakolha esaha eyo emyaka mingyi enyuma? N’ekindi, iwakiminya ngoku anayitheghekire erikuwathikya ahathe erithuha. Aho kikalhua ikyalhangirika nga nindi oyukendi subyayo, kwabithe?

Neryo thalinganisya esaha eyo n’amaaka wawu aw’eribya n’amaha. Wamalhangira amaha wawu iniali mughenda akakeha​—ngoku kiri okwa bandu bangyi omwa buthuku bw’ebitsibu buno—​ni hayi aho wukendi sonderya obuwathikya? Abandu bangyi bakabugha bathi bangana thoka erighunzaho ebitsibu, aliwe ebingyi ebya bakabugha sibiriyitheghereribawa kandi sibirihambangana. Neryo busana naki iwuthaghenda eyiri Oyo wakolha omundu n’erimuha amaaka aw’eribya n’amaha? E Biblia yikabugha yithi “Nyamuhanga syali haali okw’ithwe oko buli mundu” kandi yithi anayitheghekire kutsibu eriwathikya.​—Emibiri 17:27; 1 Petero 5:7.

Erisoborera Buuli Amaha

E Biblia yikasoborera buuli amaha nga niki kwilhaba abadokita, abanya sayansi n’abasomire obulengekania n’emibere y’abandu. Omwa mibughe eyo e Biblia yatsuka erihandikwamu, ekinywe ekyahindulhawamo “amaha” kikamanyisaya erilindirira n’omuhwa n’erilinda ebyuwene. Erithwalira haghuma, amaha muli bindu bibiri. Muli eriyisunza ekindu kirebe ekyuwene haghuma n’ekikaleka iwikirirya ngoku wukendi bana ekibuya ekyo. Amaha awali omwa Biblia sibilhotho buyira. Aseghemere oko myatsi y’ekwenene n’obwema obulhangirikire.

Busana n’ekyo, amaha asosene n’erikirirya, awatholere iniaseghemera oko bwema obulhangirikire​—butsira erikwama kya yowa iwutholere eriligha. (Abaebrania 11:1) Aliwe, e Biblia yikahiraho embaghane ahakathi-kathi k’erikirirya n’amaha.—​1 Abanya Korinto 13:13.

Ng’eky’erileberyako: Wamasaba munywani wawu omuyiketherwa wuthi akuwathikaye, iwanganabya n’amaha wuthi akendi kuwathikya. Amaha wawu aya anawithe ekyo aseghemereko kundi wuyikethere munywani wawu​—wumwasi ndeke, kandi wabirimulhangira akakangania abandi b’olhukeri kandi ni mwenge. Erikirirya n’amaha ebyo wuwithe bihambene ndeke, aliwe ni by’embaghane. Wangabya wuthi n’amaha ng’aya omu Nyamuhanga?

Ekikaleka Ithwabya n’Amaha

Nyamuhanga y’enzuko y’amaha w’okwenene. Omwa buthuku bwe Biblia Yehova mwahulhwamo “maha we Israeli.” (Yeremia 14:8) Amaha wosi-wosi aw’eriyikethera agho abandu biwe babya nagho abya akalhua okw’iyo; busana n’ekyo, n’iyo wabya maha wabo. Amaha ng’aya syabya bilhotho buyira. Nyamuhanga mwabaha ekya banga seghemeryako amaha wabu. Omo myaka mingyi ey’aghunza inianemukolangana nabo, mwaberererya ebyosi ebyo abalhagha. Omusondoli wabu ya Yosua mwabwira Abaisraeli athi: “Nenyu munasi . . . ngoku hathe kinywe n’ekighuma ekikehire okwa binywe byosi byuwene ebyo Mwami Mukulhu Nyamuhanga wenyu abugha busana nenyu.”​—Yosua 23:14.

Habirilhaba emyaka mingyi, aliwe namunabwire, ekyo kwa kikine kithya. Omwa e Biblia muli emilhaghe ya Nyamuhanga mingyi kandi ngoku aghenda akaberereryayo. Emilhaghe yiwe yikayiketherawa kutsibu indi okwa bundi buthuku muyahandikwa ng’eyabiribererera nibya n’okwa buthuku yahebawa.

Ekyo ky’ekyanga leka ithwabugha thuthi e Biblia ni kitabu ky’amaha. Wukendibya wunemusoma okwa mibere Nyamuhanga akolonganiramu n’abandu, wukendiongera erighumya ekikaleka iwahira amaha w’okw’iyo. Omukwenda Paulo mwahandika athi: “Ebyosi ebyasakawa erimbere omo Masako byasakawa busana n’erithukangirirya. Neryo Amasako akathuha eriyitsingirira n’erihanda omuthima, ithwathoka eribya n’amaha.”​—Abanya Roma 15:4.

Ni Mahaki Agho Nyamuhanga Akathuha?

Ni mughulhu wahi thukayithagha amaha wa kutsibu? Mbwino si w’omughulhu thukaholerawa? Aliwe, okwa bangyi, omughulhu bakaholerawa, w’omughulhu bakabya nga sibakiwithe amaha. Aliwe , ni kindi kyahi ekyanga thughunza amaha kwilhaba olhuholho? Olhuholho lhukahika okwa buli mughuma w’okw’ithwe. Ithwangana yitheya kulho ahabw’obuthuku buke, aliwe lhwamabiryasa thukabya isithukiwithe eky’erikolha. Ky’ekikaleka e Biblia iyahulha olhuholho mwa “nzighu.”​—1 Abanya Korinto 15:26.

Neryo ibbwa, thwanga bana thuthi amaha thukaholerwa? Omulhondo owakahulha olhuholho mwa nzighu akathasyabugha athi enzighu eyi ‘yikendi syahwerekereribwa.’ Yehova Nyamuhanga awithe amaaka manene kwilhaba olhuholho. Eki abirikikangania mirundi mingyi. Athi? Omw’ilhubukya abaholi. E Biblia yikakanaya okwa ngendo mwenda muthina-muthina omughulhu Nyamuhanga akolesaya obuthoki bwiwe erilhubukya ababya ibabiriholha.

Omwa kighuma ekikaswekaya, Yehova mwaha Mughalha wiwe, Yesu y’obuthoki bw’erilhubukya munywani wiwe oyukahulhawamo Lazaro, oyuwabya iniamabirighunza biro bbini inianaholire. Yesu mwathakolha eki bubiso-biso, aliwe mwakikolha embere sy’abandu bangyi.​—Yoane 11:38-48, 53; 12:9, 10.

Aliwe ibbwa iwangana yibulya, ‘Busana naki abandu mubalhubukibwa? Mbwino mubathakekelhuha n’erithasyaholha kandi?’ Kwabine bithya. Nomwabine, busana n’emyatsi eyihambire okw’ilhubuka ng’owa Lazaro oyu, kikaleka ithuthabya n’eriyisunza buyira thuthi abanze bethu ababiriholha bakendi syalhubuka; thukabya n’enzumwa eyikaleka ithw’ikirirya ngoku bakendi syalhubuka. Ni bugha ambu, thuwithe amaha w’okwenene.

Yesu mwabugha athi: “Ingye indi erilhubuka, n’engebe.” (Yoane 11:25) Yehova akendi syamuha obuthoki obw’erilhubukya abandu omo kihugho kyosi. Yesu mwabugha athi: ‘Endambi yikasa, okwa mughulhu oyo, abosi abali omo masinda basyowa omulenge wiwe [Kristo]. Basyalhua omo masinda wabo.’ (Yoane 5:28, 29) Kwesi, abosi abali omwa masinda bawithe amaha aw’erisyalhubukira oko ngebe okwa kihugho paradiso.

Omuminyereri Isaya mwakania okw’ilhubuka erikendisyabya athya: “Abaholi benyu basyabyaho. Ebinda byabo byasyalhubuka. Mubuke, mughoromoke inywe mughotsere omo lhuthuthu, kusangwa ekime kyawu kiri ng’ekime ky’omwitsange, n’ekithaka kyasyahulhukya ababiriholha.”​—Isaya 26:19, The New English Bible.

Mbwino eki sikirihumulikanaya? Abaholi batheghibirwe kutsibu, ngoku omwana oyuli omwanda ya mama wiwe atheghibirwe. Erithwalira haghuma, abali omo masinda, Nyamuhanga Omuthoki w’Ebyosi anabibukire ndeke-ndeke. (Luka 20:37, 38) Kandi bakisiya ibalhubukibwa, n’erithangirirwa omwa kihugho ekiri mw’obutseme ngoku olhumekeke lhukanathangirirawa n’abandu abalhulindirire! Busana n’ekyo, nomuthwangabya b’eriholha, thukabya ithune n’amaha.

Ngoku Eribya n’Amaha Kyanga Kughasira

Paulo akathukangiriraya bingyi okwa mughaso ow’eribya n’amaha. Mwakania okw’ibya n’amaha ng’ekindu kikulhu kutsibu eky’okwa kyambalho ky’amalhwa​—esapeho. (1 Abanya Tesalonika 5:8) Busana naki mwalinganisya amaha n’esapeho? Omwa buthuku bwakera, omusirikali iniakambalha esapeho y’ekyuma akaghenda omo malhwa, mughulhu mungyi iniakatsuka okwa muthwe kw’esapeho eyikolirwe omwa bweya bw’embuli kutse engobi. Esapeho eyo yabya yikatheya omuthwe wiwe okw’ihuthalha kutse erikwa. Ni nzumwa yahi eyo Paulo anza erithukangirirya? Ngoku esapeho yikanatheghaya omuthwe, kuthya amaha akatheghaya amaaka w’obulengekania. Wamabya n’amaha awaghumire erikwamana n’ebighendererwa bya Nyamuhanga, obuholho obwa wukabya nabu isibwangahwaho nomuwangabana ebitsibu ebikalire. Nindi okw’ithwe oyuthe wanganza eribya n’esapeho ng’eyo?

Paulo mwakolesya ekindi eky’erileberyako ekikakanganaya ngoku amaha ahambangene n’erisonda lya Nyamuhanga. Mwahandika athi: “Thuwithe amaha ng’enaanga ey’engebe, ni w’okwenene kandi asikire.” (Abaebrania 6:19, NWT) Kundi Paulo mwabalha okw’ikwira omo obwathu oko ngetse emirundi nga yan’eyo, abya inianasi omughaso w’enaanga. Ekiyagha kinene ikikabya kikahungya obwathu, abakabughendaya ibakathogheraya enaanga y’omo ngetse. Yamabiriwa okwa kithaka eyikwa omwa ngetse n’erihamba ndeke, obwathu ibukasighalha ibunasikire omo kiyagha kinene kandi ekiyagha ekyo ikithabuheka n’eribuswirya okwa lhukuka.

Kuthya, thwamalhangira emilhaghe ya Nyamuhanga ini maha ‘w’okwenene kandi awasikire,’ amaha ayo iniakendi thuwathikya erighumira ebitsibu ebya thukabana n’erisingurabyo. Yehova akalhagha athi obuthuku bukisiya ibwahika omughulhu abandu sibendi syaswaghalibwa omwa syonyuhi, obubi, obulighe, kutse nibya olhuholho. (Lebaya akasanduko okwa lhupapura 10.) Eryamakirira amaha ayo ikikendi thutheya, n’erithuwathikya erighendera okwa bihano bya Nyamuhanga omwa ngebe yethu neryo ithwayitheya okwa mibere mibi eyikanyirire omwa kihugho munabwire.

Kandi amaha agho Yehova akaha nawu angana kuwathikya ahabwawu. Anzire iwabya omwa ngebe eyo atheghekera abandu eribyamo erimbere. Anzire “abandu abosi balhamibawe.” Bathi? Erimbere, obuli mundu atholere ‘iniaminya ndeke omwatsi w’ekwenene.’ (1 Timoteo 2:4) Abakahulhukaya egazeti eno bakakuhira mw’omuhwa ow’erigha eriminya ery’ekwenene erikakolhaya okwa ngebe erihambire oko kwenene eyiri omwa Kinywe kya Nyamuhanga. Amaha agho Nyamuhanga akendi kuha alengire kutsibu awandi maha wosi-wosi agho wangabana omwa kihugho kino.

Wamabya n’amaha agho Nyamuhanga akaha, isiwendihwa amani, kundi Nyamuhanga iniakendi kuha akaghalha akawukayithagha eriberererya ekilhubirirwa kyosi-kyosi ekya wangabya nakyo ekihambene n’erisonda liwe. (2 Abanya Korinto 4:7; Abanya Filipi 4:13) Mbwino ayo si w’amaha agho wukayithagha? Neryo wamabya iwukayithagha amaha, wamabya iwanabya wukasondekaniagho, isiwalhuhirira. Amaha aneho. Wangana banagho!

[Akasanduko/Ekisasani]

Esyonzumwa Esikaleka Ithwabya n’Amaha

Amasako awali ahikwa hano angana kuwathikya eryongera erighumya amaha wawu:

◼ Nyamuhanga akalhaghanisaya engebe eyuwene omwa buthuku obukasa.

Ekinywe kiwe kikabugha kithi ekihugho kikendisyabya paradiso eyirimo erihiika ly’abandu abatsemire, abali bughuma.​—Esyonyimbo 37:11, 29; Isaya 25:8; Eribisulirwa 21:3, 4.

◼ Nyamuhanga syangabiha.

Aponire emiringo yosi y’amabehi. Yehova abuyirire kutse erire, neryo syanga thoka nahake eribiha.​—Emisyo 6:16-19; Isaya 6:2, 3; Tito 1:2; Abaebrania 6:18.

◼ Nyamuhanga awithe obuthoki obuthawithe busubuliro.

Yehova musa y’Omuthoki w’Ebyosi. Sihali ekyanga mukakirya eriberererya emilhaghe yiwe.​—Eriluayo 15:11; Isaya 40:25, 26.

◼ Nyamuhanga anzire iwabyaho kera na kera.

​—Yoane 3:16; 1 Timoteo 2:3, 4.

◼ Nyamuhanga athuwithemo amaha.

Akathwamu erisamalira ebibuya ebya thukakolha n’emibere yethu mibuya butsira ebisobyo byethu n’aho thukalemererawa. (Esyonyimbo 103:12-14; 130:3; Abaebrania 6:10) Awithe amaha athi thukendi kolha ebihikire kandi akatsema thwamabikolha.​—Emisyo 27:11.

◼ Nyamuhanga akalhaghanisaya erithuwathikya eriberererya ebilhubirirwa byethu by’obunyakirimu.

Abaghombe biwe sibatholere bakahwa amani. Ahathe eriyikukumirira, Nyamuhanga akathuha omulimu wiwe abuyirire, akaghalha akalengethukireyo, erithuwathikya.​—Abanya Filipi 4:13.

◼ Eribya n’amaha omu Nyamuhanga siryangakwa busa.

Nyamuhanga ni muyiketherwa kandi muyisiwa, syanga kulhabirya ahisi.​—Esyonyimbo 25:3.

[Ekisasani]

Ngoku esapeho yikana theghaya omuthwe, kuthya amaha akatheghaya obulengekania

[Ekisasani]

Ng’enaanga, amaha awaghumire anganaleka ithwathekana

[Ahalhuire Ekisasani]

Courtesy René Seindal/Su concessione del Museo Archeologico Regionale A. Salinas di Palermo