Wangana Rwanisya Erithendibya n’Amaha

WUKALHANGIRA wuthi ebitsibu ebya wukabana? Munabwire abasekulhaya bangyi bikirirye bathi eky’erisubirya kyawu okwa kibulyo eki kikakanganaya nga wunawithe amaha kutse eyihi. Ithwe abosi thukabana ebitsibu ebikalire muthina-muthina omwa ngebe, abandi ithwabana binene kwilhaba abandi. Neryo ibbwa, busana naki abandi bakathoka erisuba-subana lhuba enyuma w’erilhaba omwa bitsibu ebikalire kandi ibathasyalholha embere n’engebe, aliwe abandi ibabikyako bakabana nibya n’ehitsibu hike-hike?

Ng’eky’erileberyako, thathera akasasani iwunemusondya omubiiri. Iwaghenda bakayakulebya ng’awangana tholera erihebwagho neryo ibaghana erikuhagho. Eki ikikendi kuhambako kithi enyuma waho? Iwangana yowa nga bamakughana iwe ng’omundu kandi iwakilhangira ng’ebitsibu ekithendi syahwa, omw’ibugha wuthi, ‘Sihali oyuwangaha omundu oyuli ng’ingye y’omubiiri. Singendi syabana mubiiri.’ Kutse, ekyakabi, iwangana lighira ekyamabya ngendo nguma eki ikyahamba okwa mibere wukalhangiriramo obuli kindu omwa ngebe yawu, omw’ilengekania wuthi, ‘Ingye ngali bbule. Singwithe mughaso.’ Amalengekania ng’aya akakanganaya ngoku siwukiwithe maha.

Erirwanisya Erithendibya n’Amaha

Wangarwanisya wuthi amalengekania aw’erithendibya n’amaha? Eky’erimbere, ni kikulhu eriminya nga wunawithe amalengekania ng’aya. Ekyakabiri, ly’erirwanisyagho. Lengaho eriminya esindi nzumwa esyangabya isy’esiryaleka ibaghana erikuha omubiiri. Ng’eky’erileberyako, nina kwenene indi mubakaghana erikuha omubiiri kundi sihali mundu wosi-wosi oyuwanga kuha omubiiri? Kutse sikyangabya indi omwinye mubiiri alhue akasondya omundu oyuwithe ebindi bindu ebikayithaghisibawa erithoka erihebwa omubiiri ebya wuthawithe?

Wamahwerya amalengekania w’okwa ebyawasi erikolha ndeke, iwukendi kilhangira ngoku wabirilhabirirania omw’ibya n’amalengekania aw’erithendibya n’amaha aya. Mbwino erighanwa engendo nguma kikamanyisaya kithi sihali ekya wanga yithokera? Iwangana lengekania okwa bindi ebyuwene ebya wabirithoka omwa ngebe yawu​—ng’ebilhubirirwa byawu by’obunyakirimu, obughuma obwa wuwithe n’ab’omw’eka yawu, kutse abanywani. Igha erighana erilengekania wuthi ebikendi syakubyako omwa buthuku bw’embere ni bibi bisa-bisa. Nibya kandi, wukaminya wuthi kwenene ku siwendi syabana owundi mubiiri? Hane ebindi bingyi ebya wanga kolha erithoka erirwanisya amalengekania awathahikire.

Ibya n’Amalengekania Awuwene, n’Eribya n’Ebilhubirirwa

Omo myaka ya lino-lino abakasekulhaya babirisoborera amaha omwa nzira eyikaswekaya. Bakabugha bathi amaha mwamuli erikirirya ngoku wukendi syahika okwa bilhubirirwa byawu. Ngoku omwatsi owakakwamako akendi soborera, amaha syali subulira okw’ihika okwa bilhubirirwa lisa. Aliwe erisoborera eri ni ly’omughaso omwa nzira nyingyi. Eribya n’amaha omwa nzira ng’eyi kyangana thuwathikya eribya n’amalengekania awuwene, n’eribya ithune n’ebilhubirirwa.

Thwamabya b’erikirirya thuthi thukendi syahika okwa bilhubirirwa byethu eby’obuthuku obukasa, thutholere ithwabya abakahiraho ebilhubirirwa n’eriberereryabyo. Wamabya isiwulibera eriyihiriraho ebilhubirirwa, ikyanganabya kibuya erilengekania kutsibu okwa bilhubirirwa ebya wukayihiriraho. Wunawithe ekilhubirirwa kyosi-kyosi? Kyolhobire eriyisanga ithunemukolha ebindu bighumerere omwa ngebe ithwalemwa eriminya ekyonyine-nyine ekya thwanzire omwa ngebe yethu, ni bugha ambu ekyo thukalhangira mwa ky’omughaso. Bikahika okw’iyihiriraho ebilhubirirwa ebilhangirikire, e Biblia yikabugha yithi: “Minya ndeke ebikulhu kutsibu.”​—Abanya Filipi 1:10, NWT.

Thwamabiriminya eby’erihira embere omwa ngebe, kik’olhoba eriminya ebilhubirirwa ebikulhu-bikulhu omwa mibere muthina-muthina, ng’engebe yethu ey’obunyakirimu, ey’amaka, n’eya buli kiro. Aliwe, ni kikulhu erithendi yihiriraho ebilhubirirwa bingyi okw’inatsuka n’eriminya ngoku thwanga berererya obuli kilhubirirwa ekya thukayihiriraho. Kyamabya ikyangana kalha kutsibu eriberererya ekilhubirirwa kirebe, eki ikyangana thughunza amani, neryo ithwabikyako. Busana n’ekyo, mughulhu mungyi kyuwene eritsutsanga ebilhubirirwa ebinene-bine, eby’obuthuku buuli, mwa bike-bike, eby’eriberererya lhuba.

Bakanakasima bathi, “Wamabiriyisunza erikolha ekindu kikakoleka.” Kandi kwenene akasimu aka kakabya nga kahikire. Thwamabya ithunawithe ebilhubirirwa birebe omwa bulengekania bwethu, thukayithagha omuthima w’erianza erikolha, omuthima w’eriyisunza n’erithwamu erilengaho eriberereryabyo. Thwangana ghumya erithwamu eryo omw’ilengekania okwa mughaso w’ebilhubirirwa byethu ebyo kandi ngoku thwanga ghasirwa thwamabiberererya. Ni kwenene, ihanganabya ebikalemesaya, aliwe thutholere ithwabilhangira ng’ebitsibu ebya thwangana singura butsira ebikathulemesaya erilholha embere.

Aliwe kandi thutholere ithwalengekania okwa bya thwangakolha erithoka erihika okwa bilhubirirwa byethu. Omuhandiki w’ebitabu ya C. R. Snyder, oyuwabirisekulya kutsibu okwa mughaso w’eribya n’amaha, akabugha athi kyuwene erilengekania okwa syonzira nyingyi esy’eriberereryamu ekilhubirirwa kyosi-kyosi. Busana n’ekyo, enzira nguma yamathendi kolha, ithwangana kolesya eyakabiri, eyakasathu, kuthya-kuthya.

Snyder kandi akabugha athi kyuwene eriminya nga ni mughulhu wahi wanga hindulha ekilhubirirwa omw’isubya omwa mwanya wakyo mw’ekindi kilhubirirwa. Hamabya ekikathukakiraya eriberererya ekilhubirirwa kirebe, eribera eriyikubirania busana n’ekyo ikikendi thughunza amani. Okwa lhundi lhuhandi, erisubya omwa mwanya wakyo mw’ekindi kilhubirirwa ekya thwanga thoka eriberererya ikikendi leka ithwabya n’amaha.

Omwa Biblia muli eky’erileberyako ekyuwene ekihambire oko mwatsi oyu. Omwami Dawudi aby’anzire kutsibu erihimbira Nyamuhanga wiwe, Yehova y’ehekalu. Aliwe Nyamuhanga mwabwira Dawudi athi mughalha wiwe Solomono yukendi syabya n’olhusunzo olho. Omwakanya k’erihathikana athi akendi himba ehekalu kutse erihwa amani busana n’embinduka eyi, Dawudi mwahindulha ebilhubirirwa biwe. Mwahwerya akaghalha kiwe omw’isorokya esyosente n’ebindu ebyo mughalha wiwe anga yithaghire erithoka erighunza obuhimbe obo.​—1 Abami 8:17-19; 1 Emyatsi y’Emigulu 29:3-7.

Nomuthwanga thoka erirwanisya erithendibya n’amaha omw’ibya n’amalengekania awuwene n’erihiraho ebilhubirirwa, ithwangana yisanga amaha wethu isyaghumire ndeke. Busana naki? Kundi ebingyi ebikaleka ithuthabya n’amaha omwa kihugho kino sithwanga bikakirya. Thwanga sighalha thuthi ithune n’amaha nomwakine indi hane ebitsibu bingyi ebikaghalhaya abandu, ng’obunakwa, esyonyuhi, obuthe bulingirirania, n’eribya ithwangana lhwalha n’eriholha?

[Ekisasani]

Bamaghana erikuha omubiiri owa wulyanza, mbwino iwukendi lengekania wuthi siwendi syabana owundi mubiiri?

[Ekisasani]

Omwami Dawudi mwaghenda-ghendania n’emibere eyiriho bikahika okwa bilhubirirwa