Sondaya Obuwathikya

“Neryo omundu mughuma amathoka erikinda oyuliho iyuwene, abandu babiri basyamuthoka.”—Omugambuli 4:12.

ABANDI bamathusighika ithukendi thoka ndeke erisingura enzighu, mbulha nindi kutse kitsibuki. Busana n’ekyo, wamabya wanzire erisingura omutse w’erinywa ethaba, ikikendibya kibuya erisaba ab’eka yenyu n’abanywani bw’obuwathikya, kutse omundu wosi-wosi oyukendibya inianayitheghekire erikuwathikya n’erikughumisirizya.

Iwangana saba obuwathikya erilhua okw’ababirileka omutse ow’erinywa ethaba, bakabya ibanasi ndeke emibere eyawukalhabamu kandi bakabya ibanayitheghekire erikuwathikya. Mughalha wethu Torben owe Denmark akabugha athi, “Obuwathikya obo abandi banyiha mubwangwathikya kutsibu.” Na Abraham oyuwikere e India, akabugha athi: “Olhwanzo olhukalhua okwa muthima olho ab’eka yaghe n’Abakristayo balikyethu banyikanganaya, mulhwangwathikya eritsira ethaba.” Aliwe okwa bundi buthuku nibya n’obuwathikya obukalhua okw’ab’eka yethu n’abanywani sibulighunza.

Omulhume oyukahulhawamo Bhagwandas akabugha athi: “Munanywa ethaba ahabw’emyaka 27, aliwe nabere ing’igha ekya e Biblia yikabugha okwa mitse mibi, munathwamu eritsirayo. Munaghenda ingakehya okwa minwe y’ethaba eyo nabya inganywa. Munahindulha abanywani baghe. Kandi munaghenda n’okw’abahabuli eringwathikya eritsira omutse oyo. Ebyosi ebi mubithangwathikya. Aliwe, kiro kighuma, omwa musabe munabwira Yehova Nyamuhanga ebyosi ebiri okwa muthima waghe n’erimulemba-lemba indi angwathikaye eritsira omutse oyo. Neryo, erighunzerera, munasingura!”

Ekindi kindu kikulhu eky’erikolha ly’eriyitheghekera ebyanga kulemesya wukalengaho eriyithwa okwa mutse w’erinywa ethaba. Ni bitsibu nga byahi? Omwatsi owakakwamako akabikanayako.

[Akasanduko 5]

MBWINO WUNAKOLESAYE OMUBATSI?

Abandu bangyi bakakolesaya kutsibu emibatsi eyikawathikaya abandu erileka omutse ow’erinywa ethaba. Aliwe wuthe wathwamu erikolesya emibatsi eyi, tsuka erilengekania okwa bibulyo bino:

Ni mighaso yahi eyirimu? Kikabughawa indi omubatsi mungyi okwa mibatsi eyo, akakehaya okwa bitsibu ebikasa busana n’erileka erinywa ethaba. Aliwe abandi bakabulha, kwenene omubatsi oyu nga akanawathikaya ndeke.

Mukalhwiririra bitsibuki? Eyindi mibatsi okwa mibatsi eyi yikahamba nabi okwa omundu, ng’erileka omundu iniasalha, eribya n’ebitunturo, n’eryasa mw’amalengekania w’erianza eriyitha. Kandi ni kikulhu eribya ithun’ibukire ngoku omubatsi owabakabugha bathi akawathikaya omundu eritsira erinywa ethaba, nagho ali omwa kiika ky’ebibatsi ebikathamiraya kandi anganabya w’akabi omwa mubiri. Busana n’ekyo, omundu oyukakolesaya emibatsi eyo, yikabya iyangana musondolha.

Ni kindi kyahi ekyanga wathikya? Omw’isekulya lighuma eryakolhawa likakanganaya ngoku epasente 88 ey’abandu abathoka eritsira ethaba, mubalekayo kitsumbukirania isibathakolesya emibatsi.