Wangana Singura!

ENDAMBI yamabirihika iwe ‘erisikya omuthima [eribya muthubaha] n’erikolha.’ (1 Emyatsi y’Emigulu 28:10) Ni biika byahi eby’erighunzerera ebya wangathwa erithoka erihika okw’isingurira ighuma?

Hiraho ekiro. Ekithongole ekya U.S. Department of Health and Human Services kikabugha kithi wamabirithwamu eritsira ethaba, ekiro ky’erimbere ekya wamatsiriramo ethaba iwukendi tsuka erikibara habilhaba wiki ibiri. Omwa nzira eyo, erithwamu lyawu likendi sighalha irinaghumire. Ramba ekiro ekyo okwa kalenda yawu, kibwireko banywani bawu, kandi isiwahindulha ekiro ekyo emibere eyawulimo nomuyanga hinduka.

Kolha ekadi. Ikwanganahirwa ebinywe ng’ebiri ahikwa hano, n’ebindi ebyosi-byosi ebyangana ghumya erithwamu lyawu:

● Esyonzumwa esikaleka iwanza eritsira ethaba

● Esyongangirira esya bandu abawanga therera omughulhu wangakwa ekyaka ky’erianza erinywa ethaba

● Amenge awanga kuwathikya, obundi imwamune n’Amasako ng’erya Abanya Galatia 5:22, 23

Ibya iwune n’ekadi yawu ahosi-hosi aho wukaya, kandi ngendo nyingyi soma ebiriko, obuli kiro. Nibya n’enyuma w’eritsira ethaba, lholha embere eribya iwunemulhaba omwa biri okwa kadi wamakwa ekyaka.

Lengaho erileka ebindu ebihambangene n’omutse oyo ow’erinywa ethaba. Wuthe wahiraho ekiro ky’eritsiriramo ethaba, tsuka eriyihighulha okwa mibere yosi-yosi eyihambire okwa mutse ow’erinywa ethaba. Ng’eky’erileberyako, wamabya iwukanywa ethaba wukanabuka obuli ngyakya, leka halhabe esaha nguma kutse kwilhaba aho isiwuthanywayo. Wamabya iwukanywa ethaba wukalya ebyalya kutse wukanaghunza erirya, lhangira wuthi ekyo wukayikakiraya kukyo. Yihighule okw’ibya omo myanya eyo bakanywira mw’ethaba. Kandi yibegheresaye iwune iwuwene eribugha omwa mulenge owakowika ebinywe bino: “Eyihi. Nabiritsira erinywa ethaba.” Ebiika ng’ebi ibikendi kuwathikya eriyitheghekera ekiro ky’eritsiriramo ethaba. Kandi bikendi kuwathikya eryibuka ngoku omwa buthuku obuthe bwahali iwukendibya mundu oyuwabiritsira erinywa ethaba.

Yithegheke. Ekiro ekyo wukendi syatsiriramo ethaba kikendibya kikaseghera hakuhi, ghulha ehindu hy’eritakunya, ng’ekaroti, esyobbologamu, ebinyobwa, n’ebindi ng’ebyo. Ibukaya abanywani n’abahughu bawu okwa kiro kyawu eky’eritsukirako eritsira erinywa ethaba kandi n’emibere banga kusighikiramo. Ekiro ekyo kithe kyahika, ghusa ehindu ehyo wukahiramo eribu ly’ethaba, ebya wukakolesaya eryakya ethaba, n’ehihindi-hihindi hy’ethaba ehiri ewawu, omwa matoka yawu, omw’amasaho wawu, kutse aho wukakolera. Okwenene kuli kuthi, kyolhobire erinywa ethaba eyiri omwa kabada yawu, kwilhaba eribwira omunywani wuthi akuhe kutse akughulire ethaba! Kandi, lholha embere erisaba Nyamuhanga y’obuwathikya, kwilhabirirya eritsuka ekiro wukatsira erinywa ethaba.—Luka 11:13.

Abandu bangyi “babiriyithwa” oku oyuwabya munywani wabu ow’amabehi, omubi, ethaba. Nawu wanganayithwa okw’iyo. Wamayithwa okw’iyo, iwukendibya n’amaghalha awuwene kandi iwabya n’obwiranda busana n’erilhua omwa bukobe obw’erinywa ethaba.

[Ekisasani]

Ibya iwune n’ekadi yawu ahosi-hosi aho wukaya, kandi ngendo nyingyi soma ebiriko obuli kiro