Ngoku Nabana Ekyanga Ghunzaho Obuthe Bulingirirania

Byabughawa NA Ursula Menne

Eritsuka kera, ingayisunza erilhangira obuli mughuma akakolhwa ndeke kandi omwa bulingirirania. Eriyisunza eri mulyaleka ingahika n’okw’ihirwa omwa ngomo omwa buthabali bw’Ekikoministi obwe East Germany. Kandi ibbwa eyo, yanabanira eky’erisubirya okwa kibulyo kyaghe ekihambire okwa bulingirirania. Leka ngasoborere.

NGABUTHAWA omwa 1922 omwa tawuni ye Halle e German, etawuni eyiwithe ebya kera ebihandikirwe ebyamabirighunza emyaka eyilhabire omu 1,200. Etawuni ye Halle eyiri kilomita 200 ebwanga bw’eyighulhu bwe Berlin, ni nguma y’okwa syotawuni sy’erimbere-mbere esihambirire Ekipira. Mwali wethu ya Käthe, abuthawa 1923. Thatha iniakakolera omwa mahe. Mama iniak’imbira ahakabya emisathu.

Eriyisunza lyaghe ery’erianza eryuwania emyatsi nal’ighira oku Thatha. Thatha abere akaleka eby’amahe, mwaghulha estoha. Kundi abakastoma biwe ini banakwa, neryo omw’ibakwira obulighe iniakabathwirako. Aliwe omuthima w’erikwira abandi b’obulighe oyu mwaleka ebbizinesi yiwe iyawa. Eky’erileberyako kya Thatha kyangabere ikikanyikangiriraya ngoku erirwanisya obuthe bulingirirania si kindu kyolho ngoku omundu akalengakanaya. Aliwe kikalire eriyihamu eriyisunza ly’obunyethu ery’erianza erihindulha myatsi.

Munasighalya amaaka wa Mama waghe, neryo ingye na Käthe mwathwingirya omwa by’omuziki, eriimba, n’erihotholha. Ingali mwana oyutsemire kandi mukoli, kandi ingye na Käthe thwabya thuwithe engebe eyuwene​—erihika omwaka wa 1939.

Ebikitha Obuba Bikatsuka Eribya

Nabere nabirighunza epremare, munaya okwa sukuru y’erigha amahothole awakahulhawamo ballet, eyo n’ighira e Ausdruckstanz (amahothole w’erikangania eriyowa lyawu), n’omuthendeki wethu abya ini Mary Wigman. Iniasi ndeke erikangania eriyowa liwe ahathe eribisirira omw’ihotholha. Kandi munatsuka omubiiri w’erithera ebisasani omo byalha. Neryo, okw’itsuka, engebe yaghe y’obulengwa yabya mw’etseme kandi iyikatsemesaya kandi iyirimo erigha. Aliwe ibbwa omwaka wa 1939 mwahika n’Olhuhi lhw’Ekihugho Kyosi Olhwakabiri. Ekindi kindu ekikalire kyabya omwa 1941, Thatha waghe akaholha busana n’etibbi.

Olhuhi ni kindu ekikitha obuba. Nomwakine indi nabya w’emyaka 17 misa olhuhi lhukatsuka, munalengekania indi ekihugho kyabirighunga. Munalhangira abandu bangahu-ngahu abanalhue ibanawithe amenge bakasighika ebyughungu by’obuthabali bwe Nazi. Neryo muhabya obunakwa bunene, olhuholho, n’ebindu eritsandalikana. Ebbomu muyawa okwa nyumba yethu yamatsanda kutsibu, kandi olhuhi lhwabere lhunemulholha embere, abahughu baghe bangyi mub’ithibwa.

Olhuhi lhwabere lhwahwa omwa 1945, ingye, Mama waghe, na Käthe, thwabya ithukin’ikere e Halle. Aliwe okwa buthuku obu, nabya ingane n’omulhume kandi inabiributha omwana w’obukali, aliwe obutheke bwaghe bwabya buwithe ebitsibu. Muthwaghabulhana, kandi kundi nabya w’eriyitsomana ingyuwene n’omwana waghe, munatsuka erikolha omubiiri w’erithera ebisasani n’erihotholha.

Enyuma w’olhuhi, e Germany muyaghabwa mwa bitsweka bbini, n’etawuni yethu yabya omwa kitsweka ekiri ahisi sy’obuthabali bwe Soviet Union. Neryo ithwe bosi muthwabya b’eribeghera eribya ahisi sy’obuthabali bw’Ekikoministi. Omwa 1949, ekitsweka kyethu ekye Germany, mughulhu mungyi ekyabya kikahulhwamo East Germany, mukyabya German Democratic Republic (GDR).

Engebe Ahisi sy’Obuthabali bw’Ekikoministi

Omo myaka eyo, Mama waghe mwalhwalha kutsibu, kandi munabya w’erimuthwanira. Munakolha omubiiri omwa ofisi y’egavumente. Ebyo bine aho, munabanangana n’abanya sukuru abayisamambuli abanza eribisulha obuthe bulingirirania bulebe obwabya ibunemukolhwa. Ng’eky’erileberyako, omunyethu mughuma mwathalighirwa erighenda okwa yunivasite kundi thatha wiwe abya w’ekyama kye Nazi. Nabya inganasi omunya sukuru oyo ya ndeke kundi mughulhu mungyi ithukanakolha eby’omuziki byo haghuma. Munayibulya, ‘Busana naki iniaghalhwa busana n’ebya thatha wiwe akolha?’ Munayiyunga okwa bayisamambuli abo, kandi munathwamu erisangira omw’iyisamambulha. Buthuku bughuma nibya munahira esyompapura esihandikireko omwatsi w’eriyisamambulha okwa matembero w’enyumba y’ekoti kw’eyihya.

Mun’ongera eripona kutsibu obuthe bulingirirania obwa nayilhangirira omwa syobaruha ndebe esyonabya w’erihandika ingye ng’omuhandiki ow’Ekomiti Eyikakolha okw’Irethaho Obuholho. N’okwa bundi buthuku, busana n’esyonzumwa sy’ekipolitiki, ab’Ekomiti eyo mubathegheka erithumira omusyakulhu oyuwikere omwa West Germany y’omwatsi ow’alimu epoko-poko y’Ekikoministi nuku abandu bamuyikengemerere. Munayiponera kutsibu busana n’obuthe bulingirirania obwa banza erikolha okwa mulhume oyo indi munabisa esyobaruha esyo sy’omwa ofisi. Busana n’ekyo, musithathumwa.

“Omundu Mubi Kutsibu Omwa Kisenge” Mwamba Amaha

Omo Kwomukagha 1951, abalhume babiri mubasa omwa ofisi yaghe n’eribugha bathi: “Wamahambwa.” Mubanyithwalha omwa ngomo eyasibwe mwa Roter Ochse, kutse Red Ox. Enyuma w’omwaka mughuma munahirwa kw’omusango w’erianza erihindulha egavumente. Omunya sukuru abya iniabirinyighoberya okwa bapolisi, eribabwira ngoku ningye nahanika esyompapura esiriko eby’eriyisamambulha. Olhubanza lhwaghe mulhwabya nga ni lhw’olhutseghe-tseghe kundi sihabya n’oyukahulikirira ebya ngabugha ingayilhwirako. Mubanyitswera emyaka mukagha omwa ngomo. Okwa buthuku obo, munalhwalha neryo mubanyithwalha okwa sipatara y’abanya ngomo haghuma n’abandi bakali nga 40. Nabere nalhangira abandu bosi abo ku bathe n’etseme nahake, munatsuka erikwa obuba. Munathibitha ahali olhuyi n’eritsuka erilhuswirya esyongume.

Omutheya mwabulya athi: “Wukanzaki?”

Omwa mulenge muuli munabugha indi: “Ingye munyihe hanu. Kandi mwamabya b’erinyihira omwa ngomo eyikabyamo omundu iyuwene, munyihiremo, aliwe ingye munyilhusaye hano!” Wukalhuaho iwakilhangira, mwagheghena erisaba lyaghe. Buthuku buke enyuma waho, munalhangira omukali oyuli mbaghane okwa bandi. Okwa meso iniakakanganaya ngoku anawithe obuholho omwa muthima. Neryo mun’ikalha hakuhi nayu.

Munasweka kutsibu akambwira athi “Wam’ikalha hakuhi naghe, wutholere iwayitheya.” Neryo mw’ongerako athi, “Abandi bakalengekanaya bathi omwa kisenge ningye mundu mubi kutsibu kundi ngali Mwema wa Yehova.”

Okw’itsuka sinabya ngasi ngoku Abema ba Yehova bakalhangirawa ng’esyonzighu sy’obuthabali bw’Ekikoministi. Aliwe ekyanabya ngasi okw’ibo kyabya kithi Abigha be Biblia babiri (ku babya bakahulhwa bathya kera) ibakabungira Thatha waghe ya kutsibu ingakine mulere. Kundi nibya, ng’ibuka Thatha akabugha athi, “Abigha be Biblia bahikire!”

Munathoghongya emisoni y’obutseme ingabana omukali mubuya oyu, oyuwabya akahulhwamo Berta Brüggemeier. Munabugha indi “Mwanithu, nyibwire oku Yehova.” Eritsuka-tsukana naho, ithukaghunza buthuku bunene bwa haghuma kandi mughulhu wosi ithukabya ithunemukania okwa Biblia. Okwa bya n’igha, mun’igha ngoku Nyamuhanga w’ekwenene, Yehova, ni Nyamuhanga w’olhwanzo, ow’obulingirirania, n’obuholho. Kandi mun’igha ngoku akendi ghunzaho obubi bwosi obwa mathabali mabi w’abandu abiriletha. “Omo kandi kathambi, ababi basyabulirana . . . Nikwa abakayikehaya basyikalha ndeke omwa kihugho, basyayitsemera omwa buholho bunene,” Esyonyimbo 37:10, 11 hathya.

Ingye Eriboholhwa n’Erighenda Ebulengera Lyuba Omwa Ndenge

Naboholhawa omwa 1956, inamabirighunza emyaka eyilhabire okw’ithano ingane omwa ngomo. Biro bithanu nalilhuire omwa ngomo, munalhua e GDR eriya e West Germany. Okwa buthuku obo nabya ngwithe abaana babiri ab’obukali, Hannelore na Sabine, abo naghenda nabu. Eyo, ingye na mwira waghe muthwathwa embeta kandi munabanangana n’Abema. Nabere nganemw’igha e Biblia, munaminya ngoku ngatholere ingakolha embinduka nene erithoka erihambania engebe yaghe n’amathegheko wa Yehova. Manakolha esyombinduka esyo n’eribatizibwa omwa 1958.

Enyuma waho, munathasyathahibwa, lero n’Omwema wa Yehova​—Klaus Menne. Ingye na Klaus muthwabya n’obutheke obuwene kandi muthwabutha abaana babiri, Benjamin na Tabia. Eky’obulighe, Klaus mwaholha omwa aksidenti kandi hamabirilhaba myaka nga 20, kandi eritsuka-tsukana n’aho ngabiribya ingane mukwakali. Amaha w’erilhubuka mwanyihumulikania, erithaminya ngoku abaholi bakendi syalhubukira okwa ngebe okwa kihugho Paradiso. (Luka 23:43; Emibiri 24:15) Kandi ngatsemire kutsibu kundi abaana baghe abosi bbani banemukolera Yehova.

Ngasima kutsibu busana n’erigha e Biblia, nabiriminya ngoku Yehova musa yuwangalethaho obulingirirania bw’okwenene. Mbaghane okwa bandu, anasi ebyosi ebihambire okwa mibere yethu, kuthya n’eyathulhuire​—emyatsi eyo mughulhu mungyi sihali oyuwanga minyayo. Eriminya eri lyabirinyilethera obuholho nibya na lino, kutsibu-tsibu ingakanganibwa kutse erilhangira obuthe bulingirirania. Omugambuli 5:8 hakabugha hathi: “Wamalhangira erinuba ly’abera n’erighana erihebwa obughabe n’obulingirirania omo kihugho, siwusweke busana n’omwatsi oyo; kundi obuli mukulhu anawithe oyuli mukulhu kw’iyo; kandi oyuli mukulhu kutsibu akathungerera abosi.” (The Revised English Bible) “Oyuli mukulhu kutsibu,” ahathe erithika-thika, yo Muhangiki wethu. “Ebyosi bisanzukere, kandi biminyikere omo meso wa Nyamuhanga. Kandi thwasyayikangya okw’iyo,” Abaebrania 4:13 hathya.

Erisubya Ameso w’Enyuma Myaka nga 90 Kera

Hakanayira abandu ibambulya engebe nga yabya yithi eribyaho omwa buthabali bwe Nazi n’obwe Kikoministi. Engebe eyo siyabya nyolho. Kandi emiringo yosi ibiri y’egavumente, ng’eyindi miringo yosi y’esyogavumente sy’abandu yikakanganaya ngoku abandu sibangayithabalhako. Ahathe eribisirira kandi omo kwenene e Biblia yikabugha yithi: “Omundu mughuma awithe obuthoki endatha okwa wundi erimuhuthalya.”​—Omugambuli 8:9.

Ingakine mulere kandi mukiru, iningalengekanaya indi obuthabali bw’abandu bwa bukendi syaletha obulingirirania. Lino ngabiriyitheghererya emyatsi ya ndeke. Omuhangiki wethu musa yuwangaletha omwa kihugho mw’obulingirirania obw’okwenene, kandi akendi syakolha ekyo omw’ihaho obubi bwosi n’erighunzaho amathabali w’ekihugho erilhabira omu Mughalha wiwe, Yesu Kristo, oyo mughulhu wosi akendi syahira erisonda ly’abandi ly’embere okwa liwe. Yikakania oku Yesu, e Biblia yikabugha yithi: “Wabirianza erithunganene, wukakwa ebibi y’obusu.” (Abaebrania 1:9) Ngasima Nyamuhanga ya kutsibu kundi mwanyiletha ahisi sy’Omwami mubuyanga kandi ow’obulingirirania, ahisi sy’obuthabali obwa ngawithe amaha w’erisyabyamo kera na kera!

[Ekisasani]

Ingane na bali baghe Hannelore na Sabine ithwamabirihika e West Germany

[Ekisasani]

Munabwire, ingane na mughalha waghe, Benjamin, na mukali wiwe, Sandra