Thathubwira okwa kera yawu.

Nabuthawa 1979 omwa United States. Ingane w’emyaka isathu, ababuthi baghe mubakomolhana. Mama mwanyikulya erikwamana n’emirwa y’Ekiyuda kandi mwanyithwalha okwa syosukuru sy’Ekiyuda. Nabere nahikya myaka musanju, muthwaghenda e Israeli habw’omwaka mughuma, kandi munasomera okwa sukuru eyiriko emibiiri y’erikolera haghuma eyikahulhawamo kibbutz. Enyuma waho, ingye na mama muthwahumira e Mexico.

Nomuyanabya isiyiri esinagogi omwa bulhambu obo, munalholha embere n’emirwa yaghe y’Ekiyuda. Iningakaya esyokando okwa Sabato, erisoma e Torah, n’erisaba omw’ikolesya e siddur, kutse ekitabu ky’emisabe. Mughulhu mungyi, okwa sukuru iningabwira abangasoma nabu indi edini yaghe y’ey’erimbere-mbere. Nabya isindi nathasoma eyasibwe ng’Endaghano Mbyaka, eyikahira omuwatho okw’ithulira n’esyongangirirya sya Yesu Kristo. Erithwalira haghuma, mama mwanyikunga athi isinakolha ekyo, kundi iniakasagha athi esyongangirirya syayo sikendi nyitsandya.

Busana naki muwathwamu erisoma Endaghano Mbyaka?

Nabere ngahikya myaka 17, munasuba e United States eriyaghunzerera esukuru yaghe. Eyo, munywani waghe oyuwabugha athi ni Mukristayo mwambwira athi engebe yaghe iyikendibya iyinabulirweko ngathasi Yesu.

Munamusubirya indi, “Abandu abakikiriraya omu Yesu bathere.”

Mwambulya athi, “Wunewathasoma Endaghano Mbyaka?”

Munamusubirya indi, “Eyihi.”

Mwabugha athi, “Kyamabya iky’ekyo, siwendibya iwukayihira omo buthaminya, eriha amalengekania wawu okwa kindu ekya wuthasi?”

Ebinywe biwe mubyanyighunza amani, kundi mughulhu wosi iningayowa ini bukiru erikania okwa bya wuthasi. Omw’iyiswekera, munathwalha e Biblia yiwe y’eka n’eritsuka erisoma Endaghano Mbyaka.

Ebya wasoma mubyakuhambako bithi?

Ekya nyiswekaya, munaminya ngoku abahandiki b’Endaghano Mbyaka babya Bayuda. Eryongera okw’ekyo, nabere ing’ongera erisoma, mun’ongera erilhangira ngoku Yesu abya Muyuda ow’olhukeri, oyuyikehirye, oyuwabya anzire eriwathikya abandu, butsira eribabendekerya. Nibya iningaghenda omw’ibikiro ly’ebitabu n’eriyasabayo ebitabu ebimuhambireko. Aliwe okwa byosi ebi sihali ekyanyilighisaya ngoku yuwabya Masiya. Ebindi ibikamukanayako nga Nyamuhanga​—amalengakania agho nalemawa eriyitheghererya. Ibbwa nawu, Yesu iniakasaba ndi—​iniakayisaba? Eryongera okw’ekyo, Yesu mwaholha. Aliwe e Biblia yikabugha oku Nyamuhanga yithi: “Siwendi syaholha.” *

Muwakolha wuthi busana n’emyatsi eyo?

Ekwenene siyiriyighanaya, kandi nabya inabirithwamu erisondya ekwenene. Neryo munasaba Nyamuhanga erilhua okwa muthima kandi inganemuthoghongya emisoni​—omurundi w’erimbere isingali ne siddur yaghe. Nabere inganaghunza erisaba, omundu mwakongotha okwa lhuyi lhwaghe. Babya ini Bema ba Yehova babiri. Mubanyiha ekighuma ky’okwa bitabu byabu eby’erighiramo e Biblia. Ekitabu eki, haghuma n’erikanirania eryo nabya ingathunga n’Abema, mubyanyilighisya ngoku esyonyikirirya syabu siseghemere okwa Biblia. Ng’eky’erileberyako, Abema babya ibanasi Yesu ‘ng’Omughalha wa Nyamuhanga’ * kandi “nzuko y’erihangika lya Nyamuhanga,” * butsira ng’ekitsweka ky’okwa Busathu.

Buthuku buke enyuma waho, munasuba e Mexico, eyo nalholera embere erigha n’Abema okwa maminyereri awahambire oku Masiya. Munasweka ingaminya ngoku hali maminyereri mangyi! Nomwabine, munasighalha ingakine mw’erithika-thika. Munayibulya: ‘Mbwino amaminyereri aya mwabererera oku Yesu musa?’ kandi ibbwa ‘Amabya iniabya musathi oyuwasi ndeke nuku aberereraye amaminyereri ayo?’

Ni kyahi ekyakulighisaya?

Abema mubanyikangania amaminyereri ogho mundu wosi-wosi athe angaberererya. Ng’eky’erileberyako, emyaka eyilhabire omu 700 enyuma, omuminyereri Mika mwasangwa abugha athi Masiya angabuthirwe e Betelehemu, e Yudea. * Nindi oyuwanga thwamu ng’abuthirawe hayi? Isaya mwahandika athi Masiya ang’ithibirwe ng’omukolha-nabi, aliwe kandi omugaga iyuwamutsika. * Amaminyereri wosi aya mwabererera oku Yesu.

Obundi bwema obwa nahebawa bw’obuhambire okwa kihanda ekya Yesu alhuiremo. E Biblia muyabugha yithi Masiya angalhuire omwa kihanda ky’Omwami Dawudi. * Kundi Abayuda ibakabya ibanabikire endondekania eyihambire oko mundu, Yesu kw’athabya inialhuire omwa kihanda kya Dawudi, esyonzighu siwe syangalhalenie omwatsi oyo! Aliwe musithakolha ekyo, kundi sihali oyuwanga ghania Yesu ku mwasira omwa kihanda kya Dawudi. Abandu ibakamwahulhamo “Mughalha wa Dawudi.” *

Omo 70 E.K.​—myaka 37 Yesu aliholire—​amahe w’Abaroma mwathoghothya e Yerusalemu, kandi emyatsi y’endondekania eyo yangabya imuyathalha kutse imuyathoghothibwa. Busana n’ekyo, endondekania yiwe eriminywa, Masiya abya atholere iniabanika omwaka we 70 E.K. athali ahika.

Eriminya eki mukyakuhambako kithi?

Omwa Eryibuka Ebihano 18:18, 19, mukyalhaghulhwa ngoku Nyamuhanga angahangenie omuminyereri oyuli nga Musa omwa Israeli. Nyamuhanga mwabugha athi owosi-wosi “oyuthendi syahulikirira ebinywe byaghe ebyo asyabugha omwa rina lyaghe, nasyamuthuhulyabyo.” Ingye eriyeghesya e Biblia yosi ya buuli mukyanyilighisya ngoku Yesu owe Nazareti yuwabya muminyereri oyo.