Thathubwira okwa bulere bwawu.

Nabuthirawa e Italy omwa 1943. Munakulha haghuma n’abaghalha bethu n’abali bethu omwa kyalu kike eyo thatha waghe abya mulimi kandi murandi. Ababuthi bethu mubathukulya nuku thubye abahambirire Ekikatuliki.

Busana naki muwanza eribya mufaza?

Ng’omulhwana, inganzire erihulikirira abafaza omwa kelezia. Emirenge yabu iyikanyitsemesaya kuthya n’emikoro eyo babya bakakolha omwa kanisa. Neryo omwa muthima munanza eribya mufaza. Nabere ingahikya myaka 13, mama waghe mwanyithwalha okwa sukuru ey’ebbodingi eyikathendeka kutsibu abalhwana nuku basyabya bafaza.

Erithendekwa lyawu lyanabyamo erigha e Biblia?

Eyihi. Ingane w’emyaka 15, omughuma w’okwa basomesya mwamba ekopi y’ebitabu by’Enjiri​—emyatsi eyihambire okwa ngebe ya Yesu n’erithulira liwe​—kandi munasoma ekitabu ekyo mirundi mingyi. Ingane w’emyaka 18, munaya e Roma eriyasomera okwa syoyunivaste esiri ahisi sy’obusondoli bwa papa. Munasoma Olhulatini, Olhugiriki, ebya kera, eby’amenge w’abandu, eby’emibere y’abandu, n’eby’edini. Nomwakine indi thwanabya thukabugha amasako agho thwabirihambire amwa muthwe n’eriowa e Biblia yikasomwa omw’erisomesya erya Kyasande, omo kwenene isithul’igha e Biblia.

Muwimanira esukuru y’abafaza. Mbwino omubiiri oyo mwanabya erikangirirya?

Omubiiri waghe mukulhu abya w’obwimaniri. Aliwe okwa bundi buthuku iningasomesaya erisomo erihambire okwa mathegheko w’ekeleziya.

Ni kyahi ekyaleka iwatsuka erithika-thikira edini y’Ekikatuliki?

Hali bindu bisandu ebyabya bikanyilyambya. Ekeleziya iyik’ingira omwa by’ekipolitiki. Emitse mibi y’abafaza n’eyabikere okwa parishi isiyiritsomanawa. Kandi iningathika-thikira esyongangirirya ndebe sy’Ekikatuliki. Ng’eky’erileberyako, Nyamuhanga w’olhwanzo angasuyira athi abandu kera na kera enyuma w’olhuholho? N’ekindi, mbwino kwenene Nyamuhanga ananzire ithwabya thukasubirira omwa misabe mighumerere mirundi mingyi omw’ikolesya esapuli? *

Neryo muwakolhaki?

Emisoni iyinemuthoghonga, omwa musabe, munasaba obusondoli. Kandi munaghulha ekopi ye Biblia ey’Ekikatuliki eye Jerusalem Bible, eyabya imuyanamahulhukibwa omwa Lhuitale, neryo mungatsuka erisomayo. Neryo, Kyasande kighuma omwa ngyakya inganemuhanika esyokanzu ekisomo kikahwamo, abalhume babiri mubasa okwa siminare. Mubambwira ngoku ni Bema ba Yehova. Muthwakania okwa Biblia n’ebya yikabugha okwa bikaminyikalhaya edini y’okwenene, erighunza obuthuku obulhabire oku saha ithunemukania.

Ni kyahi ekya kutsemesaya okwa lhubungo olho?

Munanza emibere yabu ey’erikania ibanakakasirye kandi ku bakalhuaho ibabana amasako omwa mbindulha ye Biblia ey’Ekikatuliki. Enyuma waho, owundi Mwema oyukahulhawamo Mario, mwatsuka eribya akanyibungira. Iniakaghumisirizaya kandi ini muthaleghulha​—obuli Kyamukagha omwa ngyakya saha isathu iniakabya iniabirihika okwa siminare, yawire kutse siyathawa.

Abandi bafaza mubalengekaniaki okw’ibya wukabungirwa wuthya?

Munabakakyo okw’ikanirania lyethu eryo, aliwe muhathayira oyukatsomana erigha lye Biblia eryo. Aliwe ingye munalitsemera. Nabya ing’igha ebindu ebyuwene, ng’ekikaleka Nyamuhanga inialekereraho obubi n’eriaghalhwa​—ekindu ekyabya ikyabirinyilyambya habw’omughulhu muuli.

Abakulhu mubananza erikulemesya erigha e Biblia?

Omwa 1975, munahika e Roma mirundi mingyi erisoborera amalengekania waghe. Abakulhu mubalengaho erihindulha amalengekania waghe, aliwe sihali n’omughuma oyuwakolesaya e Biblia. Erighunzerera, biro 9 Okwokubanza 1976, munahandikira e Roma eribakangania ngoku singakiri Mukatuliki. Enyuma w’ebiro bibiri, munalhua okwa siminare n’erighenda omurundi w’erimbere okwa muhindano w’Abema ba Yehova omwa trayini, kwesi olhwabya ini lhuhindano olhukabyako ebithunga bingyi. Obuli kindu kyabya mbaghane okwa byanabya ngabeghere! Obuli Mwema abya iniane ne Biblia kandi iniane mukwama-kwamania n’esyombuyi sikakania oko myatsi muthina-muthina.

Ab’efamile yawu mubalengekania bathiki okwa byosi ebi?

Abangyi b’okw’ibo mubanyihakanisya kutsibu. Aliwe munaminya ngoku omughuma w’okwa baghalha bethu anemwigha n’Abema e Lombardy, omwa kitsweka ky’endatha ekye Italy. Munayamulebya, kandi Abema b’eyo mubangwathikya eribana omubiiri n’ah’erikalha. Enyuma waho, omwaka iwan’oyo, munabatizibwa ng’Omwema wa Yehova.

Wukana yikubayabwomo?

Eyihi na hake! Lino, ngayowa ingali bughuma ndeke na Nyamuhanga kundi ebyo ngamwasiko biseghemere okwa Biblia butsira okwa menge w’abandu kutse emirwa y’ekidini. Kandi nangana kangirirya abandi inganakakasirye kandi n’omuthima waghe wosi.