Myaka mingyi enyuma, ababuthi ibabakatsuka erikania n’abaana babu okwa by’emyatsi y’engyingo. Kandi ekyo ibakaghenda bakakikolha lyolho-lyolho erikwamana n’emyaka y’omwana n’ekiyithawa.

Aliwe ebindu byabirihinduka. Ekitabu The Lolita Effect kikabugha kithi: “Abaana bakalebaya kutse eriowa ebindu eby’emyatsi y’engyingo ibakine balere kutsibu, kandi esyondegheka esy’abaana esikabya omw’amakuru mw’oswire ebindu eby’emyatsi y’engyingo.” Mbwino eki kine muwathikya abaana kutse kikabatsandaya?

Ebihambire okwa myatsi y’engyingo bikanyirire. Omwa kitabu kiwe ekikahulhawamo Talk to Me First, Deborah Roffman mwabugha athi, “eby’abandu bakakanayako, erithererera, esyofilimu, ebitabu, ebinywe ebikimbawa omwa syonyimbo, esyondegheka sye Tivi, emyatsi eyihandikire, emisathu, ebyapa ebikahanikawa, n’esyosimu n’esyokombyuta kw’oswire ebindu eby’emyatsi y’engyingo, n’eyindi myatsi eyihambire okwa myatsi y’engyingo eyithalhangirikire, kandi ekyo kyabirileka [abalengwa, abathe babya balengwa, nibya n’abaana abalere] omwa buthaminya ibaghunzerera bathi erikolha emyatsi y’engyingo . . . omo kwenene, ky’ekindu ky’omughaso munene.”

Abakathererera eby’erighulya nabu ni b’eritsweba. Abakathererera n’abakaghulhaya ebindu bakathererera n’erighulya esyongyimba esy’abaana esikakanganaya ebitsuko eby’esisoni, omwa nzira eyo bakabya ng’abakathendeka abaana erihira omuwatho okwa misosere yabu ey’eyihya eritsuka omwa bulere bwabu. Ekitabu So Sexy So Soon kikabugha kithi: “Abakathererera banasi ngoku abaana banzire kutsibu eribya ng’abandi baana, neryo bakanza abaana ibasa mw’omuthima w’erianza ebindu.”

Erithaminya ebihambire okwa by’emyatsi y’engyingo sikirighunza. Ngoku kine indi hali embaghane ahakathi-kathi k’eriminya ngoku ematoka yikakolha n’eribya mufuyi mubuya, hali embaghane ahakathi-kathi k’eriminya ebihambire okwa by’emyatsi y’engyingo n’erikolesya ebya wasi ebyo erikuwathikya erithwamu ndeke.

Ekya wutholere iwaminya: Munabwire, kwilhaba kera, wutholere iwawathikya abaana bawu erikangirirya “amaaka wabu aw’obulengekania” nuku bathoke “erighabulha ekibuya n’ekibi.”­—Abaebrania 5:14, NWT.

Minya ngoku ni lhukwamirwa lhwawu. Nomukyangabya nga kyangan’itha esisoni, erikania n’abaana bawu okwa by’emyatsi y’engyingo ni lhukwamirwa lhwawu. Lhukole.—Omusingyi we Biblia: Emisyo 22:6.

Ibya wukakanirania nabu habw’obuthuku buke. Omwakanya k’erikalya omwana ahabw’obuthuku buuli wukamubwira ebihambire okwa by’emyatsi y’engyingo, wangana kolesya akathuku akawukabya nayu mukayibungya-bungya kutse mukakolha mubiiri mulebe, erimubwira ebindu birebe ebihambire okwa mwatsi oyu. Erithoka eriwathikya omwana wawu erikubwira ebyosi ebiri okwa muthima, bulhaya ebibulyo ebyanga leka iwaminya amalengekania wiwe. Ng’eky’erileberyako, omwakanya k’eribulya omwana wawu wuthi, “Kikanakutsemesaya wukalhangira erithererera eriri mw’ebisasani ebikaleka abandu ibasa mw’engumbu y’eby’emyatsi y’engyingo?” iwangana mubulya wuthi, “Wukalengekanaya ni kyahi ekikaleka abakathererera bakakolesaya ebisasani eby’omulingo ng’oyo bakanza erighulya ebindu?” Omwana wawu akendibya abirisubirya, iwangana mubulya wuthi, “Eki kikaleka iwayowa wuthi?”—Omusingyi we Biblia: ­Eryibuka Ebihano 6:6, 7.

Bakaniraye okwa by’emyatsi y’engyingo erikwamana n’emyaka yabu. Abaana abakine balere kutsibu iwangana bakangirirya amena awonyine-nyine aw’ebitsuko by’esisoni, kandi ngoku banga yitheya okwa bakakolha eby’obuthundirya. Bakabya bakaghenda bakahulha, abaana bangana kangiriribwa emyatsi mirebe eyihambire okwa bitsuko by’olhubutho. Aho bakahikira omwa myaka y’obunyethu, batholere ibabya ibamabiriyitheghererya ndeke ebihambire okwa by’emyatsi y’engyingo n’enzira eyitholere eya batholere erikoleseryamu ekihembo ekyo.

Bakangiriraye emibere eyuwene. Eritsuka bulere kangiriraya abaana bawu ekikaleka ikyabya kikulhu eribya b’okwenene, bathaleghulha, n’eribya abakasikaya abandi. Neryo obuthuku bukabya bukahika obw’eribakangirirya okwa by’emyatsi y’engyingo, wukabya iwunawithe ah’eritsukira. Kandi, ni kikulhu eribabwira amalengekania agho wuwithe okwa myatsi y’engyingo. Ng’eky’erileberyako, wamabya iwukalhangira ini kibi erikolha emyatsi y’engyingo isiwuli wingira omwa butheke, babwirekyo. Kandi basoborere ekikaleka ikyabya isikitholere kandi ikyabya ini ky’akabi. Ekitabu ekikahulhawamo Beyond the Big Talk kikabugha kithi: “Abalengwa abakyasi ngoku ababuthi babu bakalhangira ini kibi omundu erikolha emyatsi y’engyingo isyal’ingira omwa butheke, mughulhu mungyi bakayitheghaya okw’ikolha emyatsi y’engyingo isibali bingira omwa butheke.”

Ibya eky’erileberyako ekyuwene. Ghendera okwa ebya wukakangiriraya abaana bawu. Ng’eky’erileberyako, mbwino wukanatsemera ebinywe by’esisoni? eryambalha omwa mibere y’olhusingiri-singiri? eriyanzirirya okwa bathe b’olhubutho ng’olhwawu? Erikolha ebindu ng’ebyo kyangana leka abaana ibathalhangira ebya wukabakangiriraya mwa bikulhu.—Omusingyi we Biblia: Abanya Roma 2:21.

Ibya n’amalengekania awatholere. Emyatsi y’engyingo ni kihembo erilhua oku Nyamuhanga, kandi kyamakolesibwa omwa nzira eyitholere, ni bugha ambu, omundu abir’ingira omwa butheke, kikaletha etseme nene. (Emisyo 5:18, 19) Bwira omwana wawu ngoku obuthuku obutholere bukendi syahika iniatsemera ekihembo ekyo isihali bulhumi kutse eriyilhalikirira ebyo abakakolha emyatsi y’engyingo bathe bingira omwa butheke bakabana.—1 Timoteo 1:18, 19.