E Biblia—Muli Ekwenene ey’Eriyikethera
Eritsuka kera, abandu erilhua omwa mibere muthina-muthina babiriminya ngoku omwa Biblia muli ekwenene ey’eriyikethera. Abangyi munabwire banakwamire esyongangirirya syayo. Aliwe abandi bakabugha bathi sisiwithe omughaso kutse bathi ebirimu ni binyambwirwa. Iwe wukabugha wuthiki? Wanganabana ekwenene omwa Biblia?
EKYANGALEKA IWAYIKETHERA E BIBLIA
Wangaminya wuthi nga wunatholere iwayikethera e Biblia? Thalengekania okwa ky’erileberyako kino: Munywani wawu amabya iniakabera erikubwira ekwenene ahabw’emyaka mingyi, iwukendi muyikethera. Mbwino e Biblia, ng’omunywani muyiketherwa oyo, yanabiribugha ekwenene buthusa? Eby’erileberyako bya bino.
Abahandiki Abali mw’Okwenene
Abahandiki be Biblia babya mw’okwenene kutsibu, nibya ibakabisulha ebisobyo n’erilemererwa lyabu. Ng’eky’erileberyako, Yona mwahandika okw’ithendiowa liwe. (Yona 1:1-3) Erithwalira haghuma, mwaghunzerera ekitabu kiwe kye Biblia omw’ikangania ngoku Yehova amusuyira, aliwe kandi mwathanza eripipwa omw’ikania ngoku iyo abya ahindwire amalengekania wiwe. (Yona 4:1, 4, 10, 11) Abahandiki be Biblia abosi eribya mw’okwenene kikakanganaya ku babya banzire kutsibu ekwenene.
Ekwenene y’Erighenderako Omwa Ngebe
Mbwino omwa Biblia mune amahano awanga kuwathikya omwa ngebe ya buli kiro? Ndeke-ndeke. Ng’eky’erileberyako, thalebya ekya e Biblia yikabugha okw’ikolongana ndeke n’abandi: “Ebyosi ebyo mwanzire abandu ibabakolera, nenyu mukolerebo muthya.” (Matayo 7:12) “Erisubirya lyolho likahigha erihithana, nikwa ekinywe ekikalire kikasubaya erihithana.” (Emisyo 15:1) Omo kwenene, ekwenene ye Biblia yikawathikaya omwa ngebe ya buli kiro ngoku yanawathikaya kera.
Ekwenene Yikakania Okwa Byakera
Ebyakera bingyi ebikathakulhawa omwa kithaka bikakanganaya abandu, emyanya, n’emyatsi mingyi eyiri omwa Biblia ku ni kwenene. Ng’eky’erileberyako, thalebya omwatsi muke ono. E Biblia yikakanaya okwa bandu be Tiro (Abafoiniki erilhua e Tiro) “abaletha amahere, n’emisindo yosi y’ebindu by’erighulya” e Yerusalemu ibanikereyo omwa buthuku bwa Nehemia.”—Nehemia 13:16.
Hane obwema bwosi-bwosi obukasighika omulhondo we Biblia oyu? Buneho. Abakasekulhaya okwa by’omwa kithaka babiribana ebyo Abafoinike babya bakaghulya omwa Israeli, ekindu ekikakanganaya ngoku ebihanda byosi bibiri byabya bikakolha haghuma esuburu. Eryongera okw’ekyo, babiribana e Yerusalemu y’amahere w’Engetse ye Mediterane. Abakasekulhaya bakikiriraya bathi amahere aya alethawa n’abasuburi erilhua okwa musike w’engetse owali haali. Omusomi mughuma abere abirilebya ndeke obwema obo, mwabugha athi: “Omwatsi owali omu Neh[emia] 13:16 owakabugha athi abandu be Tiro mubaghulirya e Yerusalemu y’amahere akalhangirika ini kwenene.”
Okwenene Omwa by’Esayansi
Kutsibu-tsibu e Biblia ni kitabu ky’edini kandi ekiri mw’ebyakera. Aliwe yikabya yikabugha oko myatsi y’esayansi, yikalighirana n’esayansi eyihikire. Eky’erileberyako kya kino.
Myaka nga 3,500 enyuma, e Biblia muyabugha yithi ekihugho kihanikire “ahathe kindu.” (Yobu 26:7) Eki kyabya mbaghane kutsibu okwa binyambwirwa indi ekihugho kilelethire oko maghetse kutse kiri okwa kanyamugogota kanene. Muhalhaba myaka nga 1,100 ekitabu kya Yobu ikinahandikirwe aliwe abandu ibakin’ikirirye bathi ekihugho sikyangabya omwa kyanya ahatheki, bathi hatholere ihabya ihane ekyo kithekireko. Omwa 1687, imuhamathalhaba myaka bikumi bisathu bisa, Isaac Newton mwabya ahulhukirye erisekulya erihambire oko maaka w’eguravite n’erisoborera ngoku hali akaghalha akathelhangirawa akakahambirira ekihugho aho kiri. Erisekulya ly’esayansi eri mulyahamya okwa kya Biblia yabya iyabiribugha myaka eyilhabire oku 3,000 kera!
Okwenene Omwa by’Obuminyereri
Amaminyereri mangyi we Biblia ahikire okwa lhulengo lhungahi? Eky’erileberyako kya kino: Obuminyereri bwa Isaya obuhambire okw’ithera lye Babeli.
Obuminyereri: Omwa kighonye ky’omunani E.K.K., omuhandiki we Biblia ya Isaya mwabugha athi e Babeli—omuyi musa ogho endambi yahika amabya muyi mukulhu w’obuthabali bw’amaaka manene—akendisyakindwa kandi syendi syasyikalhwamo. (Isaya 13:17-20) Isaya nibya mwahulha oyukendi syaberererya eki—Kiro. Kandi mwabugha n’ebya Kiro akendi syakolha, ‘eryumya’ esyonyusi. Kandi mwabugha athi esyongyo sy’omuyi sisyendi syakingwa.—Isaya 44:27–45:1.
Eribererera: Ihamabirilhaba myaka nga 200 Isaya aliminyerere, omwami we Persia mwathahirira e Babeli. Abya inindi? Kiro. Kundi ikikalire eryingira e Babeli, Kiro mwathwamu erikolesya Olhusi Efurata, olhwabya lhulhabire omwa muyi n’erithimba kugho. Abandu biwe mubathakulha emighende buruka-ruka, erikithirya olhusi lh’omwa kisesa. Eki mukyakehya olhusi neryo kyamathokesya amahe wa Kiro erisoka amaghetse awahererenie n’esyombimbo sy’omuyi iniabirihika omwa bihinga. Kandi ibbwa, Abanya Babeli babya isibathakyinga esyongyo esisamalirene n’olhusi! Amahe wa Kiro mwingira bweghu-bweghu omo Babeli n’erikindayo.
Aliwe habya ihakinasighalire kindu kighuma: E Babeli muyanabya buth’ikalhwamo? Muhalhaba ebikumi by’emyaka abandu iban’ikereyo. Aliwe munabwire, ebisambukalirya bye Babeli—hakuhi ne Baghdad, e Iraq—bikakanganaya ngoku obuminyereri bwe Biblia mubwabererera. E Biblia ni y’eriyikethera nibya yikakania n’okwa myatsi y’obuthuku bw’embere.
