Erina lya Nyamuhanga Yandi? Nyamuhanga iyuwene-wene akabugha athi: “N’ingye Yehova. Eryo ly’erina lyaghe.” (Isaya 42:8, NW) Erina lya Nyamuhanga likabanika mirundi nga 7,000 omwa Biblia. Aliwe esyombindulha nyingyi sye Biblia sikahira omo mwanya w’erina eryo mw’amena w’ebitsumbi nga “Mukama.” Nyamuhanga anzire iwabya munywani wiwe, neryo akabugha athi ‘wulhakire erina liwe.’​—1 Emyatsi y’Emigulu 16:8.

Ebitsumbi bya Yehova. E Biblia yikahulha Yehova omwa bitsumbi nga “Nyamuhanga,” “Muthoki w’Ebyosi,” “Muhangiki,” “Thatha,” “Mukama,” na “Omwami Mukulhu.” Emisabe mingyi yine omwa Biblia omo Yehova akahulhawa omwa kitsumbi kiwe.​—Danieli 9:4.

 Emisosere ya Nyamuhanga. Nyamuhanga ni mulimu owathelhangirawa. (Yoane 4:24) E Biblia yikakihamayako omw’ibugha yithi “sihali mundu wabirilhangira Nyamuhanga.” (Yoane 1:18) E Biblia yikabisulha eriyowa liwe. Abandu bangana muponesya, kutse ibamutsemesya.​—Emisyo 11:20; Esyonyimbo 78:40, 41.

Emibere ya Nyamuhanga Emibuyanga. Nyamuhanga syalisolholha mundu wosi-wosi. (Emibiri 10:34, 35) Kandi “oswire n’erighanyira n’ow’olhukogho, sianguhire okw’ihithana, oyuwoswire n’obwenge bw’olhwanzo n’omwatsi w’ekwenene.” (Eriluayo 34:6, 7) Aliwe, emibere ini okwa mibere ya Nyamuhanga yikatsemesaya kutsibu.

Obuthoki. Kundi iyo ni “Nyamuhanga Omuthoki w’Ebyosi,” awithe obuthoki obuthawithe busubuliro obw’eriberererya ebyosi ebyo akalhagha.​—Enzuko 17:1.

Amenge. Sihali oyuwithe amenge mangaha n’awa Nyamuhanga. Ekyo kye Biblia yikamanyisaya yikabugha yithi n’iyo “oyuwithe amenge iyuwene.”​—Abanya Roma 16:27.

Obulingirirania. Nyamuhanga akakolha ebihikire bisa-bisa. Ebyo akakolha ‘bihikene,’ kandi syalimo “omwatsi owathe w’eribanza lithunganene.”​—Eryibuka Ebihano 32:4.

Olhwanzo. E Biblia yikabugha yithi “Nyamuhanga ni lhwanzo.” (1 Yoane 4:8) Nyamuhanga syalisubulira okw’ikangania olhwanzo​—iyo ni lhwanzo lhusa-lhusa. Ebyosi ebyo akakolha biseghemere oko lhwanzo, kandi bikathughasira omu nzira nyingyi.

Obunywani bwa Nyamuhanga n’Abandu. Nyamuhanga ni Thatha wethu w’olhwanzo oyuli elhubulha. (Matayo 6:9) Thwamamw’ikirirya, ithwanganabya banywani biwe. (Esyonyimbo 25:14) Nibya ibbwa, Nyamuhanga akabugha athi wuyithunde hakuhi nayu omw’imusaba kandi athi ‘wumughusire erihangya-hangya lyawu lyosi, kundi akakutheghaya.’​—1 Petero 5:7; Yakobo 4:8.

Yesu na Nyamuhanga Si Mughuma. Yesu ni w’embaghane​—iyo musa yuwahangikawa na Nyamuhanga iyuwene-wene. Ky’ekikaleka e Biblia iyamwahulhamo Mughalha wa Nyamuhanga. (Yoane 1:14) Yehova abere abirihangika akambere kiwe Yesu, mwamukolesya “ng’omukoli mukulhu” erihangika obuli kindu n’obuli mundu.​—Emisyo 8:30, 31; Abanya Kolosai 1:15, 16.

 Yesu Kristo mwathabugha athi nayu ni Nyamuhanga. Aliwe mwabugha athi: “Nalhua ewiwe [ewa Nyamuhanga], nayu yuwanyithuma.” (Yoane 7:29) Yesu abere akakania n’omughuma w’okwa bigha biwe, mwahulha Yehova mwa “Thatha waghe, na Thatha wenyu” na “Nyamuhanga waghe, na Nyamuhanga wenyu.” (Yoane 20:17) Yesu abere abiriholha, Yehova mwamulhubukya n’erimuha engebe omwa lhubulha n’erimuha obuthoki bunene iniane okwa lhuhandi Lhwiwe lhw’amali.​—Matayo 28:18; Emibiri 2:32, 33.

Yesu Kristo Angana Kuwathikya Eriyithunda Hakuhi Na Nyamuhanga

Yesu asa okwa kihugho erithweghesya oku Thatha wiwe. Yehova iyuwene-wene mwabugha oku Yesu athi: “Oyu ni Mughalha waghe mwanze, mumwowe.” (Mariko 9:7) Sihali oyuwasi Nyamuhanga kwilhaba Yesu. Mwabugha athi: ‘Sihali oyuwasi ndeke Thatha nga nindi, nina Mughalha, n’omundu oyo Mughalha anzire akamubisulira.’​—Luka 10:22.

Yesu akakanganaya ndeke-ndeke emibere ya Thatha wiwe. Yesu mwagherererya ndeke-ndeke emibere ya Thatha wiwe kyamaleka iniabugha athi: “Oyuwamanyilhangira iniabirilhangira Thatha.” (Yoane 14:9) Yesu mwathunda abandu b’oku Thatha wiwe omw’igherererya olhwanzo lhwa Thatha wiwe omwa by’abugha n’erikolha. Mwabugha athi: “Ingye indi nzira, ingye indi mwatsi w’ekwenene, ingye indi ngebe; sihali mundu oyukahika oku Thatha athe okw’ingye.” (Yoane 14:6) Kandi mwabugha athi: “Abaramya b’ekwenene basyaramya Thatha omwa kirimu n’omwa kwenene, kusangwa Thatha akasondaya abandu abali bathya eribya baramya biwe.” (Yoane 4:23) Thalengekania okw’ekyo! Yehova akasondaya abandu abali ng’iwe abanzire eriminya ekwenene eyimuhambireko.