Ekwenene Eyihambire Okwa Buthuku bw’Embere
Wune wathayibulya nga ni byahi ebiri omwa buthuku bw’embere? E Biblia yikathubwira ebindu bikulhu-bikulhu ebiri embere kandi ngoku abandu bosi abali okwa kihugho bakendi syahambwako.
Yesu mwakangania ekyanga thuwathikya eriminya ngoku “Obwami bwa Nyamuhanga buli hakuhi n’erihika.” (Luka 21:31) Mwalhaghulha athi, okwa bikendisyabya, mwamuli esyonyuhi nene-nene, emisiki minene-minene, esyonzalha, n’esyondwalha—ebindu ebyo thunemulhangira munabwire.—Luka 21:10-17.
E Biblia kandi yikathasyakanganaya ngoku “ebiro by’enyuma-nyuma” eby’obuthabali bw’abandu bikendi syalhangirika omwa mibere eya bandu bakayithwaliramu, ni bugha ambu eribya babi. Emibere yabu yine omu 2 Timoteo 3:1-5. Ahathe erithika-thika, wukabya wukalhangira emibere n’amalengekania aya munabwire, wukalhuaho iwaligha ngoku obuminyereri bwe Biblia obu bukakanaya okwa bikabya lino.
Eki kikamanyisayaki? Endambi y’Obwami bwa Nyamuhanga eriletha esyombinduka esikendisyuwania engebe okwa kihugho yiri hakuhi. (Luka 21:36) Omwa Biblia muli ebindu bibuya ebyo Nyamuhanga atheghekere ekihugho n’abandu abakendi syikalha kukyo. Eby’erileberyako bike bya bino.
OBUTHABALI OBUWENE
“Nayu [Yesu] mwahabwa erithabalha, n’olhukengerwa, n’obwami, abandu bosi n’ebihanda, n’emibughe bamukolere; erithabalha liwe n’ithabalha lya kera na kera, erithendisyahwaho, n’obwami bwiwe ni bwami obuthendisyaheribwa.”—DANIELI 7:14.
Ekya kikamanyisaya: Wangana tsemera engebe omw’isi sy’egavumente ey’ekihugho kyosi eyo Nyamuhanga abirihiraho Mughalha wiwe eribya Mwami muyo.
AMAGHALHA AWUWENE
“Sihali ndulhani eyikendisyabugha yithi, Nyilhwere.”—ISAYA 33:24.
Ekya kikamanyisaya: Wukendisyabya isiwangalhwalha kutse eribya mulema; wukendisyabyaho kera na kera.
OBUHOLHO KUNDU
“Akakubaya amalhwa omwa kihugho kyosi.”—ESYONYIMBO 46:9.
Ekya kikamanyisaya: Sihendisyabya eriubahya ly’olhuhi n’eriaghalhwa lyosi eryo lhukaletha.
EKIHUGHO MUKENDISYABYA ABANDU ABUWENE
“Ababi basyabulirana . . . Abakayikehaya basyikalha ndeke omwa kihugho.”—ESYONYIMBO 37:10, 11.
Ekya kikamanyisaya: Abandu babi bakendisyabya isibakiriho, abanzire eriowa Nyamuhanga basa babakendisyabyaho.
EKIHUGHO KYOSI KIKENDISYABYA PARADISO
“Basyahimba amanyumba n’er’ikalha mugho. Basyahera amalima w’ebinyu n’erirya ebighuma byagho.”—ISAYA 65:21, 22.
Ekya kikamanyisaya: Ekihugho kyosi kikendisyuwana. Nyamuhanga akendisyasubirya erisaba lyethu erikabugha lithi erisonda liwe “liyirawe omo kihugho.”—Matayo 6:10.
