Habw’esyongumi sy’emyaka, habya isihali oyuwasi eky’erisubirya okwa kibulyo ekyo. N’ebihunzo n’amalhwere mubyitha abandu bangyi. Endambi muyahika, abanya sayansi bamabana eky’erisubirya. Mubalhangira amalhwere iniakalethawa n’obuhuka obuthelhangirawa n’ameso, ng’esyobbakteria n’esyovairasi. Eriminya ekyo mukyawathikya abandu erikakirya n’erithamba amalhwere mangyi, ekyabirileka amaghalha w’abandu iniuwana n’erithasyongera okwa ngebe y’omundu.

Kandi ibbwa ebindi bibulyo bikulhu-bikulhu? Wukalengekanaya eriminya ekwenene eyihambire oko bibulyo bino lyanga kuhambako lithi?

• Nyamuhanga nindi?

• Yesu Kristo nindi?

• Obwami bwa Nyamuhanga niki?

• Ni byahi ebiri omwa buthuku bw’embere?

Esyomiliyoni sy’abandu babiribana eby’erisubirya okwa bibulyo ebi kandi kyabiryuwania esyongebe syabu. Nawu eby’erisubirya byangana kughasira.

Iwangana yibulya, ‘Kyangathokekana kithi eriminya ekwenene okwa kyosi-kyosi?’ Nibya ibbwa kandi, kinemwongera erikalha eriminya ekwenene eyihambire oko bindu bingyi. Busana naki?

Abandu bangyi sibali yikethera esyogavumente, abasuburi, kutse eby’amakuru. Kikabakalira eriminya oyukababwira ng’anemubabwira okwenene, kutse nga ni malengekania wiwe, ng’amasigha ebindi, kutse nibya nga ni mabehi masa-masa. Abandu eribya isibakiyiketherene n’emyatsi mingyi eribya iyikabya ini mabehi, abandu hathya bakaghanaya n’ebihikire nibya n’eribulya nga bibahambireko bithi.

Nomwabine, kithokekene eribana eby’erisubirya ebihikire oko bibulyo bikulhu omwa ngebe. Wuthi? Omw’ikolesya amenge agho wukanakolesaya eriminya okwenene okwa yindi myatsi.

Obuli kiro, wukabya iwabirisondya okwenene okwa lhulengo lhulebe. Eky’erileberyako ni Jessica. Akabugha athi: “Mwali waghe akwire enzoka eyikalire eyikamuthanga erirya ebinyobwa, kundi nibya n’erilyatsa okwa binyobwa lyangana mwitha.” Jessica akalhangira athi ebyalya ebyo akaghulha bikabya isibyanga kolha mwali wiwe ya nabi. “Ekya ngatsuka erikolha ly’erisoma ndeke okwa byalya nga bikolire omuki. Neryo nga thasyasekulhaya nibya n’erikania n’ababikolha erikakasya nga simwathalhabira n’akatahu k’ekinyobwa. Ngathasyasekulhaya erisondya omwatsi owakendileka ingayikethera emibere ekambuni y’ebyalya yikakokotherayamu ebyalya ebyo.”

Ebya wukasondayako okwenene obuli kiro byanganabya isibikalire ng’ebya Jessica, aliwe nawu nga Jessica, wangana kolha ebiri ahikwa hano eribana eby’erisubirya okwa bibulyo byawu:

• Bana okwenene okuhambire okwa kindu.

• Thasyasekulhaya.

• Lhangira wuthi aho wulyiha omwatsi ni h’eriyikethera.

Ebi by’ebyangana kuwathikya eribana eby’erisubirya oko bibulyo bikulhu-bikulhu omwa ngebe. Bithi?

Jessica abere akasondekania ekwenene ye Biblia, mwakolesya emibere mighumerere eyakakolesaya akanza eriminya okwa nzoka eyo mwali wiwe akwire. Akabugha athi, “Erisoma ndeke n’erisekulya ndeke mubyaleka ingabana ekwenene ye Biblia.” Nga Jessica, esyomiliyoni sy’abandu babiriminya ekya Biblia yikabugha okwa bibulyo bino:

• Ekighendererwa ky’engebe niki?

• Omundu amaholha akabya omwa mibereki?

• Busana naki hali eriaghalhwa?

• Ni kyahi ekya Nyamuhanga anemukolha erighunzaho eriaghalhwa?

• Eka yangabya yithi mw’etseme?

Wanganabana eby’erisubirya ebihikire okwa bibulyo ebi n’ebindi omw’isoma e Biblia n’erithasyasekulya okwa muthahulha we Intaneti owe www.pr418.com.