Busana Naki Thukayithagha Obwami bwa Nyamuhanga?
Eritsuka okw’ibyaho ly’abandu, Omuhangiki wethu musa, oyukahulhawamo Yehova, yuwabya Muthabali. Mwathabalha omo lhwanzo. Mwakokothya obwikalho obuwene—eririma lye Edeni—nuku abandu bikalemo. Kandi mwabahiriramo n’ebyalya bingyi. Eryongera okw’ekyo, mwaha abandu b’omubiiri mubuya w’erikolha. (Enzuko 1:28, 29; 2:8, 15) Abandu bangabere omwa buholho ku basighalha omwa buthabali bwa Nyamuhanga obw’olhwanzo.
Abandu b’erimbere mubaghana obuthabali bwa Nyamuhanga
E Biblia yikakanganaya ngoku omumalaika omuyisamambuli mwahakanisya ehamuli ya Nyamuhanga y’erithabalha. Neryo mwahulhwamo Sitani Diabolo. Mwabya ng’oyukabugha athi abandu ibakendi tsema kutsibu bamabya isibali omwa busondoli n’obuthabali bwa Nyamuhanga. Eky’obulighe, n’ababuthi bethu b’erimbere, Adamu na Eva, mubaghendera okwa bya Sitani neryo nabu bamayisamambulha oku Nyamuhanga.—Enzuko 3:1-6; Eribisulirwa 12:9.
Kundi Adamu na Eva mubaghana obuthabali bwa Nyamuhanga, mubathibithwako omo Paradiso n’eriherya amaha wabu w’eribyaho kera na kera ibanawithe amaghalha awuwene. (Enzuko 3:17-19) Erithwamu lyabu mulyahamba okwa baana abo bangabuthire. E Biblia yikabugha yithi busana n’erihalya lya Adamu, “ebibi mubyahika muna-kihugho . . . n’olhuholho busana n’ekibi.” (Abanya Roma 5:12) Ekibi mukyaletha ekindi kitsibu ekikalire: “Omundu mughuma awithe obuthoki endatha oko wundi erimuhuthalya.” (Omugambuli 8:9) Ni bugha ambu, abandu bakabya bamayithabalhako, hakabya ebitsibu.
OBUTHABALI BW’ABANDU BUKABANIKA
Nimurodi mwayisamambulha oku Yehova
Omwa Biblia, omundu w’erimbere eribya muthabali ni Nimurodi. Kandi mwayisamambulha okwa buthabali bwa Yehova. Eritsuka omwa biro bya Nimurodi, abandu abawithe obuthoki babiribukolesya nabi. Myaka nga 3,000 eyihwere, Omwami Solomono mwahandika athi: “Munalhangira emisonia y’abandu banubibawa, isibawithe omusibikya. N’obuthoki bwabya oko lhuhandi lhw’abandu abanubayabo.”—Omugambuli 4:1.
Namunabwire ku bikine bithya. Omwa 2009, ekitabu ky’Obughuma bw’Ebihanda (UN) mukyabugha kithi kinemughenda kikalhangirika ngoku obuthabali bubi bwa bukaleka ihabya “ebitsibu bingyi omwa kihugho.”
ENDAMBI Y’ERIYIRA EKY’ERIKOLHA!
Ekihugho kikayithagha abathabali abuwene n’egavumente eyuwene. Kandi ekyo kya Muhangiki wethu abirilhagha!
Nibya n’amathabali w’abandu awuwene kutsibu abirilemwa erighunzaho ebitsibu by’abandu
Nyamuhanga abirihiraho Obwami, kutse egavumente, eyikendi syasuba omo mwanya w’amathabali w’abandu, “nabo bwasyahangana kera na kera.” (Danieli 2:44) Obu bw’Obwami obo abangyi bakasaba. (Matayo 6:9, 10) Aliwe Nyamuhanga si yukendi syabya Muthabali w’egavumente eyi. Abirisombolha Omuthabali oyuwanabere mundu ng’ithwe. Nyamuhanga abirisombolha ndi?
You May Also Like
E BIBLIA ERISUBIRYA OKWA BIBULYO
Mbwino Obwami bwa Nyamuhanga Buli omo Muthima Wawu?
E Biblia yikamanyisayaki yikabugha yithi “Obwami bwa Nyamuhanga buli omw’iwe”?
