Ithwe bosi thuli ng’abali omwa nzira y’ekiyagha ekikatsandaya, ekyo Yesu ahulhamo “obulighe bunene.” (Matayo 24:21) Sihali aho thwanga bisama obulighe obo. Aliwe thwanganayira ekyo thukakolha eriyitheya. Ni kyahi?

Omw’ikangirirya liwe ly’okwa Kithwe, Yesu Kristo mwabugha athi: “Mutsuke erisonda Obwami bwa Nyamuhanga n’erithunganene riwe.” (Matayo 6:33) Ekyo thwanga kikolha thuthi?

Tsuka erisondya Obwami bwa Nyamuhanga. Eki kikamanyisaya kithi thutholere ithwalhangira Obwami bwa Nyamuhanga mwa kindu kikulhu kutsibu kwilhaba ebindi. (Matayo 6:25, 32, 33) Busana naki ithwabulhangira thuthya? Kundi abandu sibangathoka erighunzaho ebitsibu by’abandu. Obwami bwa Nyamuhanga busa bw’obwanga kolha ekyo.

Sondaya erithunganene liwe. Thutholere ithwalengaho erighendera okwa bihano bya Nyamuhanga ebithunganene n’emisingyi yiwe. Busana naki? Kundi thwamayithwiramo ekitholere eribya ikihikire kutse ekiwire imukendi lhwiririra ebitsibu. (Emisyo 16:25) Okwa lhundi lhuhandi, thwamaghendera okwa bihano bya Nyamuhanga, thukatsemesaya Nyamuhanga kandi ithwaghasirwa.​—Isaya 48:17, 18.

Lholha embere eritsuka erisondya Obwami bwa Nyamuhanga n’erithunganene liwe. Yesu mwabugha  athi abandi bangana lengemeribwa, ibalengekania bathi banganabya omwa buholho bamathunga esyosente nene. N’abandi bangana lighira amaghaniryo w’engebe eribalemesya erihika okw’ibya isibanga bana obuthuku bw’erisondekania Obwami bwa Nyamuhanga.​—Matayo 6:19-21, 25-32.

Aliwe, Yesu mwalhaghanisya athi abakasighika Obwami bwa Nyamuhanga bakendi thunga ebyo bakayithagha lino n’erisyabana emighisa ey’obuthuku obukasa kera na kera.​—Matayo 6:33.

Nomwakine indi abigha ba Yesu abakera babya bakasondekania Obwami bwa Nyamuhanga n’erithunganene liwe, obulhumi n’eriaghalhwa byabya ibineho. Aliwe mubabana obusaghiro. Bathi?

Mubaghendera okwa bihano bya Nyamuhanga ebithunganene kandi ekyo mukyabatheya okwa bitsibu ebyahika okwa abaghana erighendera okwa bya Nyamuhanga abugha. Eribya n’erikirirya ngoku Obwami bwa Nyamuhanga bukendisyasa mukyaleka ibaghumira ebitsibu ebikalire kutsibu. Kandi Nyamuhanga mwabaha “obuthoki bunene” nuku baghume.​—2 Abanya Korinto 4:7-9.

Abakristayo abakera mubaghendera okw’ihana lya Yesu ery’eritsuka erisondekania Obwami. Mubathulhughania engulhu yuwene y’Obwami ehosi eyo babya b’ikere. (Abanya Kolosai 1:23) Mbwino hane abanemukolha ekyo munabwire?

Ee! Abema ba Yehova basi ngoku endambi eyisighereyo Obwami bwa Nyamuhanga erighunzaho omughulhu mubi ono ni nyike. Neryo bakakolha ekyosi-kyosi erighendera okwa binywe bya Yesu bino: “Engulhu yuwene y’Obwami eyi yasyatsuka erithulhughanibwa omo kihugho kyosi busana n’eriminyisya ebihanda byosi, neryo enduli yasyahika.”​—Matayo 24:14.

Wune mwendi ligha engulhu yuwene? Thukakusaba thuthi wugherereraye Abakristayo abakera ab’omwa tawuni ye Beroya e Makedonia. Paulo abere ababwira engulhu yuwene, mubaligha omwatsi wiwe “n’omuhwa.” Neryo ‘mubasondya omo Masako’ erilebya ebyo babiriowa, kandi mubaghendera okwa bindu ebyo bigha.​—Emibiri 17:11, 12.

Nawu wangana kolha ekiri ng’ekyo. Wamatsuka erisondya Obwami bwa Nyamuhanga n’erithunganene liwe, iwukendi bana obutheya lino n’erisyabana obuholho n’obwiranda omwa buthuku obukasa.