Omo mwatsi w’ahanyuma, muthukakanaya okwa kiminyikalho ekyo Yesu aha. Ekiminyikalho ekyo kikakanganaya ngoku Obwami bwa Nyamuhanga bwabiritsuka erithabalha elhubulha na Yesu Kristo iya Mwami wabu.

E Biblia yikabugha yithi Yesu angabere akatsuka erithabalha omwa lhubulha angathibithire oku Sitani n’esyombinga siwe. Lino emibiiri yabu yiri okwa kihugho. Ky’ekyabirileka ebindu ibyatsanda eritsuka 1914.​—Eribisulirwa 12:7, 9.

Nomwakine indi emibere y’ekihugho yinemwongera eritsanda, Yesu, ng’Omwami w’Obwami bwa Nyamuhanga, anawithe ebyo abirikolha eriwathikya abandu omwa kihugho kyosi. Busana n’omubiiri ow’anemukolhwa omwa kihugho kyosi ow’erikangirirya abandu e Biblia ogho Yesu abugha, abangyi banemw’igha n’erighendera okwa misingyi ye Biblia omo ngebe syabu. (Isaya 2:2-4) Esyomiliyoni sy’abandu babirigha ngoku bangabya n’emibere eyuwene aho bakakolera, eryuwania engebe y’amaka wabu, n’eritsemera ebindu by’ekinyamubiri isibathabya bakobe babyo. Abandu aba banemweghesibwa ngoku banga ghasirwa lino kandi banemubya bandu abo Nyamuhanga anzire ibabya omo Bwami bwiwe.

Nomwakine indi Yesu anemuthabalha elhubulha, esyogavumente sy’abandu sikinathabalha oko kihugho. Aliwe, Nyamuhanga abiribwira Yesu athi: “Wuthabale oko nzighu syawu.” (Esyonyimbo 110:2) Yesu akisiya iniathoghothya abosi abakamuhakanisaya n’eriletha obuholho okw’abo abakaghondera Nyamuhanga.

Okwa buthuku obo, Obwami bwa Nyamuhanga bukendisyakolha bino

• Erighunzaho amadini w’amabehi. Amadini awabiribugha oku Nyamuhanga kw’amabehi omw’ikangirirya lyagho n’erinubya abandu akendi hwaho. E Biblia yikahulha amadini w’amabehi mwa mumalaya. Erithoghothibwa lyagho likendi syaswekya abangyi.​—Eribisulirwa 17:15, 16.

• Erighunzaho amathabali w’abandu. Obwami bwa Nyamuhanga bukendi syaghunzaho amathabali wosi w’abandu.​—Eribisulirwa 19:15, 17, 18.

• Erighunzaho abandu babi. Kandi ibbwa abakathwamu erikolha ebithuwene n’erighana eriowa Nyamuhanga? “Nikwa ababi basyithirwa ehaali erilhua omo kihugho.”​—Emisyo 2:22.

• Erighunzaho Sitani n’esyombinga. Sitani n’esyombinga siwe bakendi syabya isibanga thasyathoka ‘eritheba ebihanda kandi.’​—Eribisulirwa 20:3, 10.

Ebyosi ebi bikendi syahamba bithi okw’abo abakaligha Obwami bwa Nyamuhanga?

Yesu inianemuthabalha omo lhubulha ng’Omwami, akendisyakolha bingyi kwilhaba ebya mundu wosi-wosi omuthabali angakolha. Akendi syawathikibwa n’abandu 144000 abakathabalha nayu abakasombolhawa erilhua omwa kihugho. (Eribisulirwa 5:9, 10; 14:1, 3) Akendi syalhangira athi erisonda lya Nyamuhanga likakoleka hano okwa kihugho. Ni byahi ebya Bwami bwa Nyamuhanga bukendi syakolera abakendi syabya okwa kihugho?

• Erighunzaho amalhwere n’olhuholho. “Sihali ndulhani eyikendi syabugha yithi, Nyilhwere” kandi “olhuholho silhwendi syasabyaho.”​—Isaya 33:24; Eribisulirwa 21:4.

• Eriletha obuholho n’obwiranda bw’okwenene. “N’obuholho bw’abaghalha bawu bwasyabya bungyi,” kandi “obuli mundu asy’ikalha oko ndina y’omuliki wiwe w’ebinyu n’omo ndina y’omuthini wiwe; kandi sihali oyo wasyubahyabo.”​—Isaya 54:13; Mika 4:4.

• Eriha abandu b’omubiiri owakatsemesaya. “Abayisoghawa baghe basyatsemera omubiiri w’ebyalha byabu emighulhu miri. Sibendi syakolera busa.”​—Isaya 65:22, 23.

• Erisuba-subania ebithuthimbireko. “Embwarara n’olhukurutsu byasyatsema, n’embwarara yasyatsanga n’erihulhukya omusanga ng’erikanga.”​—Isaya 35:1.

• Erikangirirya abandu ebyo batholere erikolha nuku basyabyaho kera na kera. “Neryo eyi ni ngebe y’erikotha, abandu bakuminye, iwe Nyamuhanga mughuma w’okwenene, n’eriminya Yesu Kristo, oyo wathuma.”​—Yoane 17:3.

Nyamuhanga anzire iwabana emighisa eyo. (Isaya 48:18) Omwatsi owakakwamako akendi kania okwa bya wanga kolha lino nuku wanga syabana okwa bibuya ebiri embere.