Yesu mwabugha athi: “Ekihanda kyasyalhwa n’ekindi kihanda, n’obwami bwasyalhwa n’obundi bwami. Kandi hasyabya emisiki minene-minene, kandi hasyabya enzalha, n’esyondwalha ehosi.” (Luka 21:10, 11) Ebyosi ebi haghumerera ky’ekiminyikalho. Ebindu ebi eribera okwa buthuku bughumerera kyanga kangenie ngoku “Obwami bwa Nyamuhanga buli hakuhi n’erihika.” Ebindu ebi byanabiribera okwa buthuku bughumerera kandi omwa kihugho kyosi? Thulebaye obwema buno.

1. ESYONYUHI

Omwa 1914, muhabya olhuhi lhunene kutsibu okwa syonyuhi esyo bandu babya ibamathalhangira! Abasomire ebya kera, mughulhu mungyi bakabugha bathi emyatsi muyahinduka omwa 1914 kundi w’omughulhu olhuhi lhw’erimbere olhw’ekihugho kyosi lhwatsuka. Ebyuma by’amalhwa ng’esyombundu sy’ebifaru, n’esyondegge sy’amalhwa, esyombundu nene-nene, esyombundu sy’obutwa, n’ebindi by’amalhwa ebikalha-kalire byatsuka erikolesibwa omwa lhuhi olho. Mukwakwama olhuhi lhw’akabiri olhw’ekihugho kyosi, olhuhi olhwaleka ihabya esyombundu sye atomiki. Eritsuka 1914, habiribya ihanemubya esyonyuhi, kandi esyonyuhi esyo syabir’itha esyomiliyoni sy’abandu.

2. EMISIKI

Ekitabu Britannica Academic kikabugha kithi obuli mwaka hakabya emisiki eminene-minene nga 100 eyanga tsandya kutsibu. N’ekithongole ekya United States Geological Survey kikakanganaya kithi “erikwamana n’ebihandikire ebyakera (erilhua ng’omwa 1900), omo mwaka thukabya ithunalindirire emisiki eminene-minene kutsibu nga 16.” Nomwakine indi abandi bakabugha bathi yikabya nga yamongera busana n’eribya hathya ikyolhobire eriminyayo, okwenene kuli kuthi, emisiki eminene-minene omwa kihugho kyosi yinemunubya n’eritha abandu bangyi.

3. ENZALHA

Enzalha yikabya omwa kihugho kyosi busana n’olhuhi, obulibathangania, ekikagho, erithendi theghekania ndeke eby’obulime, kutse erithendi yitheghekera emibere y’obuthuku eyikalire. E World Food Programme omw’ihandika lyayu erya 2018 yikabugha yithi: “Omwa kihugho kyosi, abandu miliyoni 821 sibawithe ebyalya ebikaghunza, n’esyomiliyoni 124 sy’okwa bandu abo bali omo nzalha eyikalire.” Emirire mibi yik’itha abaana nga miliyoni 3.1 obuli mwaka. Hakuhi embindi y’abaana abaholha omo mwaka 2011, baholha busana n’ekyo.

4. ESYONDWALHA N’EBIHUNZO

Ekitabu eky’Ekithongole ky’Ekihugho Kyosi eky’Obuyitsotse kikabugha kithi: “Ekighana kya 21 kyasibwe ng’ekyabya mw’esyondwalha esikalha-kalire. Esyondwalha esyakera ng’ekolera, n’amatoli syabirisubulha, kandi habiribya n’esindi mbyaka nga SARS, ekihinzi ekikalire, MERS, Ebola na Zika.” Lino ekorona (COVID-19) yayiriho. Nomwakine indi abanya sayansi n’abadokita babirigha bingyi ebihambire okwa malhwere, sibali bathabana ebyanga lhamya amalhwere wosi.

5. OMUBIIRI W’ERITHULIRA OMWA KIHUGHO KYOSI

Yesu mwahulha ekindi kitsweka ky’okwa kiminyikalho akabugha athi: “Engulhu yuwene y’Obwami eyi yasyatsuka erithulhughanibwa omo kihugho kyosi busana n’eriminyisya ebihanda byosi, neryo enduli yasyahika.” (Matayo 24:14) Nomwakine indi ekihugho muli ebitsibu ebikalire, abandu abalhabire oku miliyoni munani erilhua omwa bihanda byosi banemuthulhughania engulhu yuwene y’Obwami bwa Nyamuhanga omwa bihugho 240 kandi banemukolesya emibughe eyilhabire omu 1,000. Eki sikirikyathabya kithya erilhua kera.

Ebindu by’ekiminyikalho ekyo Yesu abugha binemubya munabwire. Busana naki ithwanza eriminya omwatsi oyo? Kundi Yesu mwabugha athi: “Omughulhu mukalhangira emyatsi eyi yikahika muminye k’obwami bwa Nyamuhanga buli hakuhi n’erihika.”—Luka 21:31.

Ekiminyikalho ekya Yesu aha, n’endondekania y’ebiri omwa Biblia, bikaleka ithwaminya ngoku Nyamuhanga atsukisaya Obwami bwiwe omwa lhubulha omwa 1914. a Okwa buthuku obo, mwayira Mughalha wiwe, Yesu Kristo mo Mwami. (Esyonyimbo 2:2, 4, 6-9) Obwami bwa Nyamuhanga bukisiya ibwathabalha ekihugho n’erighunzaho amathabali wosi n’erikolha ekihugho mwa paradiso nuku abandu b’ikale kukyo kera na kera.

Ebinywe ebiri omwa musabe w’eky’erileberyako ogho Yesu akangiriraya bikisiya ibyabererera: “Obwami bwawu bwase. Erisonda lyawu liyirawe, omo kihugho ngoku liri omo lhubulha.” (Matayo 6:10) Neryo ni kyahi ekyo Bwami bunemukolha erilhua aha bukathatsukira erithabalha omwa 1914? Kandi ni byahi ebikendi syabya Obwami bukathabalira ighuma okwa bandu?