• Nyamuhanga yuwanga musombwere. “Nabirisingya omwami waghe, . . . Naghe nasyakuha ebihanda eribya byawu, kandi nasyakuha emithano yosi y’ekihugho.”​—Esyonyimbo 2:6, 8.

• Angasigherye obwami bwa Dawudi. “Omwana asyabuthwa busana nethu, thwasyahabwa omughalha . . . Erikanya ly’erithabalha liwe ery’obuholho siryendisyayira nduli, oko kithumbi ky’obwami bwa Dawudi n’oko bwami bwiwe, n’erihanganiabo n’erisikyabo.”​—Isaya 9:6, 7.

• Angabuthirwe e Betelehemu. “Iwe Betelehemu-Efurata . . . , omw’iwe mwasyahulhuka omughuma busana naghe oyo wasyabya muthabali . . . Asyabya mukulhu erihika oko nduli sy’ekihugho.”​—Mika 5:2, 4.

• Abandu bangamughanire n’erimw’itha. “Mwaponwa, nethu muthuthamusima. . . . Mwahuthalibwa busana n’amalholho wethu, mwahinokalha busana n’ebibi byethu.”​—Isaya 53:3, 5.

• Angalhubukire n’erihebwa olhukengerwa. “Siwendi syasigha ekirimu kyaghe omo Kulimu, kandi siwendi syaleka omubuyirire wawu akalholha okw’ihonda. . . . Hakuhi nawu hali obutseme bwa kera na kera.”​—Esyonyimbo 16:10, 11.

Omwa bandu bosi abamathabyaho ni mundu mughuma musa oyuwalhabire omw’ebi, nayu ini Yesu Kristo. Nibya, omumalaika abya iniabiribwira Maria, mama wa Yesu athi: “Nyamuhanga asyamuha ekithumbi ky’obwami kya thatha-kulhu wiwe Dawudi. . . . N’Obwami bwiwe sibwendi syahwa.”​—Luka 1:31-33.

Yesu mwathabya muthabali oko kihugho. Aliwe, akendi syathabalha abandu iniane elhubulha ng’Omwami w’Obwami bwa Nyamuhanga. Ni kyahi ekikaleka iniabya Muthabali oyutholere? Thalebya ebya Yesu akolha iniane okwa kihugho.

•   Yesu mwatsomana abandu. Yesu mwawathikya abalhume n’abakali, abalere n’abakulhu, mbulha balhuire hayi kutse bawithe kitsumbiki. (Matayo 9:36; Mariko 10:16) Omuhagha abere akamulemba-lemba athi: “Wamabya wunanzire, wangathoka erinyilhamya,” Yesu mwamukwira obulighe neryo amamulhamya.​— Mariko 1:40-42.

• Yesu mwathukangirirya ngoku thwanga tsemesya Nyamuhanga. Mwabugha athi: “Simwangathoka erikolera Nyamuhanga n’ebindu.” Kandi mwabugha athi thutholere ithwakolha abandi ngoku thwanganza ibathukolera. Eryongera okw’ekyo, mwakangania ngoku ebya thukakolha, amalengekania, n’eriyowa lyethu bikahamba oku Nyamuhanga. Neryo eritsemesya Nyamuhanga, thutholere ithwatheya ebiri omwa mithima yethu. (Matayo 5:28; 6:24; 7:12) Yesu mwakangania ngoku ithwe eritsema ndeke, thutholere ithw’igha ebya Nyamuhanga anzire ithwakolha kandi ithwabikolha.​—Luka 11:28.

• Yesu mwakangirirya ekya kikamanyisaya erianza abandi. Ebinywe bya Yesu n’emibiiri yiwe byabya biwithe amaaka kandi mubyahamba okwa mithima y’abahulikiriri biwe. “Esyondeko mubasweka busana n’erikangirirya liwe. Kusangwa abya akakangiriryabo ng’oyuwithe ehamuli.” (Matayo 7:28, 29) Mwabakangirirya athi: “Mwanze esyonzighu syenyu.” Nibya mwasabira n’abaghuma b’okwa bamw’itha athi: “Thatha wubuyirebo kusangwa sibasi ekyo bakakolha!”​—Matayo 5:44; Luka 23:34.

Yesu yutholere ndeke-ndeke eribya muthabali w’ekihugho. Akawathikaya kandi ni w’olhukeri. Aliwe erithabalha liwe likatsuka mughulhu wahi?