Ebibulyo Erilhua Omwa Basomi

Erikwamana n’ebihano bye Biblia ebihambire okwa nzira eyitholere erikoleseryamo omusasi, Abema ba Yehova bakalhangira bathi emithambirire eyiri mw’erikolesya omusasi wawu-wawu?

Omwakanya k’erithwamu erikwamana n’ekyo mundu anzire kutse ekyo abadokita bakabugha, obuli Mukristayo atholere inialengekania buuli okwa ekya Biblia yikabugha. Ni mwatsi owali ahakathi-kathi kiwe na Yehova.

Yehova, oyuwathuha engebe, mwahiraho ekilhaghiro athi omusasi isyalibawa. (Enzuko 9:3, 4) Omwa Emighambo eyo aha Abaisraeli kera, Nyamuhanga mwahiraho ebilhaghiro bikahika okwa mikolesirye y’omusasi kundi akimanira engebe. Mwalhayira athi: “Engebe y’omubiri yiri omwa musasi; naghe nabiribahagho oko kiherero eririha embanulho y’emithima yenyu.” Kandi ibbwa kyangabya kithi omundu am’itha ekisoro busana n’erikirya? Nyamuhanga mwabugha athi: “Asyutha omusasi wayo, n’erikuningiragho omwa lhuthuthu.” a (Abalawi 17:11, 13) Yehova mwasuba omwa kihano eki ngendo nyingyi. (Eryibuka Ebihano 12:16, 24; 15:23) Ekitabu ky’Ekiyudaya ekikahulhawamo Soncino Chumash kikabugha kithi: “Omusasi syatholere akabikwa aliwe atholere iniuthibwa okwa kithaka nuku syalibawe.” Sihabya Omuisraeli n’omughuma oyuwabya atholere eribika n’erikolesya omusasi w’ekindi kihangikwa, ekyo Nyamuhanga aha engebe.

Olhukwamirwa olhw’eritheya Emighambo ya Musa mulhwahwa Masiya akaholha. Nomwabine, amalengekania wa Nyamuhanga awahambire okwa bubuyirire bw’omusasi syali athahinduka. Bakasondolibwa n’omulimu Abuyirire wa Nyamuhanga, abakwenda mubalhaghira Abakristayo bathi ‘baleke omusasi.’ Ekihano ekyo sikyabya kitholere kikathwalhwa ng’omwatsi w’amasatha. Kyabya kikulhu kutsibu ng’erileka obusingiri kutse eriramya esyosanamu. (Emibiri 15:28, 29; 21:25) Omughulhu erighaba omusasi n’erihiribwa kw’omusasi byakanyirira omwa kighana kya 20, Abema ba Yehova mubakiminya ngoku erikolha eki sikirihambangana n’Ekinywe kya Nyamuhanga. b

Hakanayira, omudokita iniabwira omulhwere athi abike omusasi wiwe mayenga malebe athali asemezibwa, neryo ihamabya ekiyithawa ky’omusasi, ibakendi hira okwa mulhwere kw’omusasi wiwe ogho abika. Aliwe eribika n’erihira okwa mundu kw’omusasi kikathwa ebiri omwa kitabu ky’Abalawi n’eky’Eryibuka Ebihano. Omusasi syatholere eribikwa; atholere iniuthibwa oko kithaka—erisuba oku Nyamuhanga, ngoku kyanabya. Ni kwenene, Emighambo ya Musa siyikikolha munabwire. Nomwabine, Abema ba Yehova bakasikaya emisingyi ya Nyamuhanga eyirimu, kandi bakathwamu ‘erileka erirya omusasi.’ Busana n’ekyo, sithuli ghaba, kutse erisangwa thwabika omusasi wethu owatholere ‘iniuthibwa.’ Ekyo sikirihambangana n’ekihano kya Nyamuhanga.

Eyindi mithambirire kutse eripimwa ebirimo erikolesya omusasi wawu-wawu byanganabya nga sibirithwa emisingyi ye Biblia. Ng’eky’erileberyako, Abakristayo bangyi babiriligha erilhusibwa k’omusasi busana n’eripimagho, n’enyuma waho iniuthibwa. Abadokita bangana habulha bathi eyindi mithambirire eyikalire eyirimo erikolesya musasi wawu-wawu yikolesibawe.

Ng’eky’erileberyako, omughulhu hali erisemezya lirebe, owundi musasi iniangana kithibwa omwa bitsupa erilhua omwa mubiri omwa mithambirire eyikahulhawamu hemodilution. Omusasi owakasighalha omwa mulhwere bakakolhagho mwa lhughetse-ghetse. Enyuma waho, omusasi wiwe owalyakithibawa akamusubibawamo, neryo ikyaleka iniathaherya musasi munene. Kuthya, omusasi owakalhua omwa kironda angana kumwa-kumwa, n’ery’eribwa nuku esyo red cells sisubibawe omwa mulhwere; eki kikahulhawamo cell salvage. Omwa mithambirire ey’embaghane, ahabw’akathambi kake, omusasi angana kithibwa omwa kyuma ekikakolha ng’ekitsweka ky’okw’omubiri w’omundu (ng’eky’erileberyako, ng’omuthima, ebihaha, kutse esyombiko). Enyuma waho omusasi owalhue omwa kyuma akasubibawa omwa mulhwere. Omwa yindi mithambirire, omusasi akakithibawa omwa kyuma ekikaghabulhagho nuku ebitsweka byagho ebitsandire bithoke erilhusibwamo. Kutse ekighendererwa ikyanganabya iry’er’iha omwa musasi mw’ebitsweka birebe neryo ibyakolesibwa omwa kitsweka ky’omubiri. N’omwa yindi mithambirire omusasi akalhusibawa okwa mundu n’erihiramo omubatsi n’enyuma waho iniasubibwa omwa mulhwere.

Ebingyi ebihambire okwa mithambirire eyi sibisosone, kandi ahathe erithika-thika emithambirire n’emibere y’eripimiramo mihya-mihya bikendi bumburwa. Si lhukwamirwa lhwethu erilebya obuli mithambirire imuthwathwamo. Omukristayo atholere iniayithwiramu omusasi wiwe ng’akendi kolesibwa athi akasemezibwa, eripimwa, kutse akathambirwa erya lino-lino. Ihakine obuthuku, atholere iniabulya omuthambiri omusasi wiwe ng’akendi kolesibwa athi bakamukolhako. Neryo atholere iniathwamu erikwamana n’obunyamuthima-thima bwiwe.

Abakristayo batholere ibabya iban’ibukire eriyihayo lyabu oku Nyamuhanga n’olhukwamirwa olhwa bawithe ‘olhw’erimwanza n’omuthima wabu wosi, n’ekirimu kyabu kyosi, n’amaaka wabu wosi, n’obulengekania bwabu bwosi.’ (Luka 10:27) Erithendibya ng’abandu bangyi omwa kihugho, Abema ba Yehova bakalhangira obughuma bwabu obuwene na Nyamuhanga mw’obw’obughuli. Oyuthuhere engebe anzire abandu abosi ibayikethera omusasi wa Yesu owuthika. E Biblia yikabugha yithi: “Kusangwa thwabirithongolibwa omwa musasi wa Kristo, kandi abirithubuyira amalholho wethu.”—Abanya Efeso 1:7.

[Omwatsi ahikwa]

[Akasanduko/​Ebisasani]

EBYA WANGA YIBULYA

Owundi musasi waghe bamabya ibakendi kithyagho neryo ibabya ibakendi nyisubya ghomo ihamabirilhaba akathuku, mbwino obunyamuthima-thima bwaghe ibunemwendi nyilighira erilhangira omusasi oyu ng’ekitsweka ky’okwa mubiri waghe, neryo ikyabya isikiriyithaghisaya indi uthibawe “oko kithaka”?

Mbwino obunyamuthima-thima bwaghe ibunemwendi nyilyambya namakolesya emithambirire eyirimo erinyihako omusasi waghe, ibakolha kugho, n’enyuma waho ibanyisubya ghomo?