Erisaba Ekighanyiro Enzira Ngulhu y’Eriletheramo Obuholho

“ERISABA ekighanyiro liwithe amaaka manene. Likaghunzaho erithendi yitheghererania isihathabya malhwa, likasuba-subanaya obughuma ahakathi-kathi k’amahanga, likaleka esyogavumente isyaminya ebitsibu eby’abandu n’erithasyabya n’engolongana eyuwene n’abandi.” Iya profesa Deborah Tannen omuhandiki mubuya w’ebitabu kandi oyuwasi ndeke eby’emibughe okwa Yunivasite eya Georgetown omwa Washington, D.C kwabya abughire athya

E Biblia yikabugha yithi erisaba ekighanyiro erilhua okwa muthima mughulhu mungyi ni nzira eyuwene ey’erisuba-subaniryamo obughuma obwabiritsanda. Ng’eky’erileberyako, omwa musyo wa Yesu ow’omwana oyuwatsaha, omwana abere akasuba eka n’erisaba ekighanyiro erilhua okwa muthima, thatha wiwe mw’amwangirira ndeke akasuba eka. (Luka 15:17-24) Ni kwenene, omundu syatholere akabya mw’emiyiheko, atholere iniasaba ekighanyiro, n’erianza aghanyirawe. Okwenene kuli kuthi, okwa bandu abayikehirye erilhua okwa muthima, sikiribakalira kutsibu erisaba ekighanyiro.

Erisaba Ekighanyiro Liwithe Amaaka

Abigaili, omukali w’amenge omwa Israeli eyakera, akathuhiriraho eky’erileberyako ekikakanganaya ngoku erisaba ekighanyiro liwithe amaaka, nomwakine indi asaba ekighanyiro busana n’esobya eya mwira wiwe akolha. Iniane omwa mbwarara. Dawudi oyo enyuma waho aby’abere mwami we Israeli, iyo haghuma n’abalhume biwe mubatheya esyombuli sya mwira wa Abigaili ya Nabali. Aliwe, abalhume ba Dawudi babere basaba Nabali y’emiggati n’amaghetse, mwabathibithako isyawithe eky’amabaha kandi amabatsurumira. Omwa kinigha kinene, Dawudi mwasondolha abalhume biwe nga 400 eriyalhwa na Nabali n’ab’ekihanda kiwe. Abigaili abere aminya ekyabere, mwaghenda eriyasanga-sangana na Dawudi. Abere akamulhangira, Abigaili mwawa ahisi embere sya Dawudi. Neryo mwabugha athi: “Mukama waghe, ekibi ekyo kinyibyeko, ingye kinabyeko. Kisi-kisi wuleke omutsana wawu abughire omwa mathwe wawu, kandi nawu wuhulukirire ebinywe by’omutsana wawu.” Neryo Abigaili mwasoborera Dawudi ekyabyaho kandi mwamuha ebyalya n’eby’erinywa ng’ebihembo. Neryo aho, Dawudi mwabugha athi: “Wuhethukire oko nyumba yawu n’obuholho; lhangira, nabirihulikirira omulenge wawu, nabirikulighira.”—1 Samweli 25:2-35.

Omubere wa Abigaili ow’eriyikehya kuthya n’ebinywe ebya akolesaya akasaba ekighanyiro busana n’emibere mibi ya mwira wiwe mubyaleka inialhamya eka yiwe. Dawudi nibya mwamusima busana n’erimukakirya okw’ibya kw’olhubanza lhw’omusasi. Nomwakine indi si Abigaili oyuwakolha Dawudi n’abalhume biwe banabi, mwaligha esobya ey’eka yiwe neryo amahira h’obuholho na Dawudi.

Ekindi eky’erileberyako eky’omundu oyuwabya wasi nga ni mughulhu wahi ow’atholere ow’erisabiramo ekighanyiro, y’omukwenda Paulo. Buthuku bughuma, abya atholere iniayilhwirako omw’Ibughiro, ekoti ngulhu y’Abayuda. Anania omuhereri mukulhu, abere abirihithana busana n’ebinywe ebyo Paulo abugha, mwalhaghira athi abimene hakuhi na Paulo bamuswiraye okwa buno. Okwa ndambi eyo, Paulo mwamubwira athi: “Nyamuhanga asyakuswirya, iwe lhuhimbo lhuhakabirye embemba! Iwe wikere aho erinyitswera omo Mighambo, nikwa wukaketha Mighambo wuthi banyiswiraye!” Abandu ababyaho babere bahangirira Paulo bathi amatsuma omuhereri mukulhu, aho n’aho omukwenda mwaligha esobya yiwe omw’ibugha athi: “Balikyethu sindwe nyasi kw’ali muhereri mukulhu oko bahereri bosi. Kusangwa kisakire kithi, Susyebugha ekibi busana n’omuthabali w’abandu benyu.”—Emibiri 23:1-5.

Paulo aby’ahikire akabugha athi oyuwasombolhawa erikania okwa musango syabya atholere akayitsurumisisya. Nomwabine, mwasaba ekighanyiro kundi omwa buthaminya mwakania n’omuhereri mukulhu omwa mibere eyangana lhangirwa ng’erithendi sikya. a Paulo erisaba ekighanyiro mukyaleka ab’omw’Ibughiro ibamuhulikirira. Kundi Paulo abya inianasi erithendi lighirana eryabya ahakathi-kathi k’abali omwa koti, mwababwira athi akathonganisibawa busana n’erikirirya liwe omw’ilhubuka. Neryo busana n’ekyo, muhabya obuhaka bunene, neryo Abafarisayo bamabya okwa lhuhandi lhwa Paulo.—Emibiri 23:6-10.

Eby’erileberyako bibiri ebiri omwa biblia ebi bikathweghesayaki? Omwa mibere eyosi ibiri eyi, ebinywe ebikalhua okwa muthima eby’eriyikubyabomo mubyaleka ihathasyabya erikanirania. Busana n’ekyo, ebinywe eby’erisaba ekighanyiro byangana thuwathikya erihiraho obuholho. Omo kwenene, eriligha ebisobyo byethu n’erisaba ekighanyiro busana n’ekiryatsandibawa lyangana thuha ehighisa hy’erithunga erikanirania erikahimba.

‘Aliwe ka Sihali Ekibi Kyosi-kyosi Ekya Nakolire’

Thwamakiminya ngoku ebya thulyabugha kutse erikolha byabirihithania mundu mulebe, ithwangana yowa thuthi omundu oyo syathakangania obuyitheghererya kutse thuthi akahithana lhuba-lhuba. Aliwe, Yesu Kristo mwahabulha abigha athi: “Neryo wamabya wukaletha olhusunzo lhwawu oko kiherero kya Nyamuhanga, wuk’ibuka ngoku mulikyenyu ali n’olhubanza okw’iwe, wusighanaye olhusunzo lhwawu embere sy’ekiherero, wughende lhuba oku mulikyenyu, musangane nayu, neryo iwasa n’eriretha olhusunzo lhwawu oku Nyamuhanga.”—Matayo 5:23, 24.

Ng’eky’erileberyako, mughalha wethu angana yowa athi wabirimusoberya. Omwa mibere ng’eyo, Yesu akabugha athi wutholere iwaghenda eyali “musangane nayu [erihiraho obuholho],” mbulha wukayowa nga wunawithe ekibi ekya wamukolere kutse eyihi. Erikwamana n’amasako w’Ekigiriki, ekinywe ekya Yesu akolesaya hano ‘kikamanyisaya erisubanamo enyuma w’erithendi lighirana.’ (Vine’s Expository Dictionary of Old and New Testament Words) Ni kwenene, hamabya erithendi yitheghererania ahakathi-kathi k’abandu babiri, abosi babiri ni b’eritsweba, kundi abosi sibahikene kandi bangana sobya. Mughulhu mungyi eki kikayithagha abosi babiri eriligha ebisobyo byabu.

Enzumwa yeno, sikiriyithaghisaya eriminya nga nindi oyuhikire kutse nga nindi oyuli omwa sobya, aliwe nga nindi oyukendibya w’erimbere eriyira eky’akakolha erihiraho obuholho. Omukwenda Paulo abere akaminya ngoku Abakristayo abe Korinto babya bakathwalha abaghombe ba Nyamuhanga balikyabo omwa koti sy’ekihugho busana n’erithendi lighirana omwa myatsi ng’eya esyosente, mwabakunga athi: “Si mwanga yisogha erikolhwa nabi kwehi? Kandi simwanga yisogha erihungwa [eribwa] kwehi?” (1 Abanya Korinto 6:7) Nomwakine indi Paulo mwabugha eki nuku Abakristayo si babye bakathwalha balikyabo omwa syokoti sy’ekihugho, omusingyi owali omwa binywe ebi alhangirikire: Eribya buholho n’abikirirya balikyethu kilengire kutsibu eriminya nga nindi oyuhikire kutse nga nindi oyuli omwa sobya. Eribya ithun’ibukire omusingyi oyu kikaleka ikyathwolhobera erisaba omundu oyukayowa athi thwabirimusoberya y’ekighanyiro.

Kikayithaghisaya Eribya bw’Okwenene

Aliwe abandi bakakolesaya kutsibu ebinywe ebitholere erikolesibwa omw’isaba ekighanyiro. Ng’eky’erileberyako, omwa Japan, ekinywe sumimasen, ekikakolesibawa omw’isaba ekighanyiro, kikabughawa emirundi mingyi kutsibu. Nibya kyangana kolesibwa erikangania erisima, aliwe iwabya iwukakanganaya ngoku wamayowa nabi erithendi kolha ekyosi-kyosi busana n’ekya bamakukolera. Kundi kikakolesibawa omwa mibere muthina-muthina, abandi bangana yowa bathi ekinywe eki kikakolesibawa kutsibu neryo ibangana bulha abakakikolesaya kwenene nga bakamanyisaya ekyo bakabugha. Emiringo muthina-muthina ey’erisaba ekighanyiro nayu yanganabya iyikakolesibawa kutsibu omwa yindi mibughe.

Omwa mubughe wosi-wosi, ni kikulhu eribya w’okwenene wukasaba ekighanyiro. Ebinywe n’omulenge bitholere ibyakangania ku wabiriyikubya bwomo erilhua okwa muthima. Omw’Ikangirirya ly’Okwa Kithwe, Yesu Kristo mwakangirirya abigha athi: ‘Nikwa eribugha lyenyu libye, egha, egha, kutse eyihi, eyihi! Ebirengire ebi ni by’omubi.’ (Matayo 5:37) Wamasaba ekighanyiro, ambi iwabya iwukakimanyisaya! Ng’eky’erileberyako: Omulhume oyuwabya omwa layini okwa kibugha ky’esyondegge mwasaba ekighanyiro ekikapa kiwe kikasukuma omukali oyuwabya ahererenie nayu omwa layini. Habere habirilhaba dakika nge, ibanemulholha embere omwa layini, ekikapa ekyo mukyathasyathulha okwa mukali. Kandi omulhume oyo mwasaba ekighanyiro. Ekindu ikyan’ekyo kyabere kikathasyabya owundi murundi, omundu oyo omukali oyu abya nayu mwabwira omulhume oyo athi amabya inialhue akamanyisya ekyalyabugha, atholere inialhangira athi ekikapa kiwe sikirithasyathulha okwa mukali oyo. Omo kwenene, omundu amasaba ekighanyiro erilhua okwa muthina, atholere inialengaho erilhangira athi syali subira ekisobyo ekyo.

Thwamabya ithukakimayisaya, ithwe erisaba ekighanyiro imukendibya imwamuli n’eriligha ekisobyo ekyosi-kyosi ekya thwabirikolha, erisaba ekighanyiro, n’erilengaho ngoku thwanga thoka eryuwania ekiryatsandibawa. N’okwa lhundi lhuhandi, oyulyasoberibawa atholere iniabya inianayitheghekire erighanyira oyulyamusoberaya. (Matayo 18:21, 22; Mariko 11:25; Abanya Efeso 4:32; Abanya Kolosai 3:13) Kundi abosi babiri sibahikene, ikyanganaghana eribya kyolho erihiraho obuholho. Nomwabine, ebinywe eby’erisaba ekighanyiro ni bikulhu kutsibu mukanza erihiraho obuholho.

Omughulhu Sikiriyithaghisibawa Erisaba Ekighanyiro

Nomwakine indi ebinywe ebikakanganaya eriyikubyabwomo n’eby’obulighe byangana leka ihabya erithekana n’erilethaho obuholho, omundu w’amenge akayihighulha okw’ikolesya ebinywe ng’ebyo omughulhu sikiriyithaghisibawa erikolha ekyo. Ng’eky’erileberyako, thubughe thuthi omwatsi ahambire okwibya bathaleghulha oku Nyamuhanga. Omughulhu Yesu Kristo abya hano okwa kihugho, “neryo mwayikehya, mwabya akowa, erihika okwa lhuholho [okwa muthi w’amaghali, NWT].” (Abanya Filipi 2:8) Aliwe, mwathasaba ekighanyiro busana n’eby’ikirirye erithoka erikehya eriaghalhwa liwe. Kandi Yesu mwathasaba ekighanyiro omuhereri mukulhu akamubwira athi: “Ngakusema busana na Nyamuhanga oyuliho, wuthubwire wamabya wuli Kristo, Mughalha wa Nyamuhanga!” Omwakanya k’erikwama kyasaba ekighanyiro habw’erithasagha, buthubaha Yesu mwasubirya athi: “Iwe wamabughakyo, nikwa ngababwira nyithi, enyuma w’aho mwasyalhangira Mughalha w’Omundu inianikere okwa byalha by’amali by’Omuthoki w’Ebyosi, iniakasa okwa bithu by’ekyanya.” (Matayo 26:63, 64) Yesu mwathalengekania okwa ky’erithwa obuthaleghulha bwiwe oku Thatha wiwe, Yehova Nyamuhanga habw’erithanza eribya buholho n’omuhereri mukulhu.

Abakristayo bakakanganaya abandu ab’obuthoki b’erisikya n’ekitsumbi. Nomwabine bithya, sihali ekyanga leka ibabasaba ekighanyiro bikahika okw’owa Nyamuhanga n’erianza balikyabo.—Matayo 28:19, 20; Abanya Roma 13:5-7.

Sihali Ekyanga Lemesya Erihiraho Obuholho

Munabwire, thukakolha ebisobyo kundi muthwasighalya obuthahikana n’ekibi erilhua oku thatha-kulhu wethu Adamu. (Abanya Roma 5:12; 1 Yoane 1:10) Adamu mwingira omwa mibere y’ekibi busana n’eriyisamambulha okwa Muhangiki. Aliwe, erimbere, Adamu na Eva babya bahikene kandi isibawithe kibi, kandi Nyamuhanga abirilhaghanisya erithasyasubya abandu okwa mibere y’erihikana. Akendi syaghunzaho ekibi n’ebyosi ebikalhwiririramu.—1 Abanya Korinto 15:56, 57.

Thalengekania ekyo nga kikendi syamanyisyaki! Abere akahabulha okwa mibere thwanga koleseryamu olhulimi, Yakobo, mughalha wobu Yesu, mwabugha athi: “Omundu oyuthethalha omwa binywe ni mundu wuhikene, iniathoka eriyibombeka omwa myatsi yosi y’omubiri wiwe wosi.” (Yakobo 3:2) Omundu oyuhikene angana theya olhulimi lhwiwe nuku syasabe ekighanyiro busana n’erilhukolesya nabi. ‘Angana thoka eriyibombeka omwa myatsi yosi y’omubiri wiwe wosi.’ Ka kikendi syatsemesya kutsibu omughulhu thukendi syahikana! Neryo, sihendisyabya ebikalemesaya erihiraho obuholho ahakathi-kathi k’abandu. Aliwe, thunalindirire obuthuku obo, erisaba ekighanyiro ekikalhua okwa muthima busana n’ebisobyo kandi n’omughulhu litholere likendi thuwathikya kutsibu omw’ihiraho obuholho.

[Omwatsi ahikwa]

[Ekisasani]

Eky’erileberyako kya Paulo kyangathweghesyaki?

[Ekisasani]

Abandu bosi bakendi syabya babirihikana, sihendi syabya ebikalemesaya erihiraho obuholho