Yehova Nyamuhanga Oyo Thutholere Ithwaminya

MBWINO sihangabya ihane kindu kikulhu ekya wabiriyithalyako omo ngebe? Wamabya iwasi bike oku Nyamuhanga, obo iwabiriyithalya okwa kindu kikulhu ekyo. Busana naki? Kundi, ngoku esyomiliyoni sy’abandu syabiribumbura, eriminya Nyamuhanga owe Biblia kikaletha emighisa mingyi omo ngebe. Emighisa eyi yikalhuaho iyatsukiraho kandi ni ya kera na kera.

Yehova Nyamuhanga, Omwinye e Biblia, anzire ithwamuminya. E Biblia yikathukokaya yithi: “Muyithunde hakuhi na Nyamuhanga, nayu akendi yithunda hakuhi nenyu.” Nyamuhanga anasi ngoku in’ithwe thwanga ghasirwa thwamamuminya. “Ingye indi Mwami Mukulhu Nyamuhanga wawu, oyukakukangiriraya wubane endundi.” Thukaghasirawa thuthi omw’iminya Yehova Nyamuhanga, ow’Endatha Kutsibu?​—Yakobo 4:8; Isaya 48:17.

Eky’erimbere, thukabana obusondoli obwa thwanga ghenderako thukarwanisya ebitsibu bya buli kiro, ithwabya n’amaha awaghumire aw’obuthuku obukasa, kandi ithwabana erithekana. Eryongera okw’ekyo, eriminya ndeke Yehova kikaleka ithwabya n’amalengekania awatholere okwa bibulyo bikulhu ebyo bandu bangyi bawithe lino omwa kihugho kyosi. Ni bibulyo byahi?

Engebe Yawu Yinawithe Ekighendererwa?

Nomwakine indi abandu babirikulha-kulhana kutsibu omwa by’etekinologia, munabwire abandu bakinabulhaya ebibulyo bikulhu-bikulhu ebyo: ‘Engebe yiwithe ekighendererwaki? Ngalholha hayi?’ Omundu amathendi bana eby’erisubirya ebyuwene, engebe yiwe iyikendibya isiyiwithe ekighendererwa. Mbwino abandu bangyi bakanayowa bathya? Erisekulya eryakolhawa e Germany okw’ihwererera ly’emyaka ya 1990 mulyakangania ngoku mughulhu mungyi kutse okwa bundi buthuku abandu bakayowa bathi engebe yikabya nga siyiwithe ekighendererwa. Obundi amalengekania ng’ayo ane eyo wikere.

Omundu amathendibya n’ekighendererwa omwa ngebe iniakendibya isyawithe omusingyi owanga leka iniabya n’ebilhubirirwa. Abangyi bakalengaho eribya n’ekighendererwa omwa ngebe omw’isondekania omubiiri owuwene kutse omw’ikanyirirya eby’obugaga. Aliwe, ibayowa ihakine ekibabulirweko. Erithendibya n’ekighendererwa omwa ngebe nibya kikatabura abandi erihika okw’ibya isibakyanzire n’eribyaho. Ekitabu International Herald Tribune kikabugha kithi, ekiri ng’ekyo ky’ekyahika oko mukali omubuya, oyuwakulira omwa ngebe “y’obugaga, eyiri mwa buli kindu.” Nomwanabya omwa ngebe eyuwene, iniakayowa iniali omo mbwera kandi iniayowa engebe yiwe isiyiwithe kighendererwa. Mwalya ebinini by’obuthulho neryo bamamweya iniabiriholha. Wanganabya iwunasi abandi abayowa ibali omo mbwera abaholha omwa mibere eyithuwene ng’eyi.

Aliwe, wunewathowa abandu bakabugha bathi esayansi yangana thubwira ebyosi ebihambire okwa ngebe? Olhupapura lhw’amakuru olhwa buli wiki olhwa German Die Woche lhukabugha lhuthi: “Nomwakine indi esayansi yihikire, yitsekire omwa by’obunyakirimu. Engangirirya ey’eribugha indi ebindu byayibuthukira yikalire eriyitheghererya, nibya n’emyatsi eyithekengeka ey’esayansi siyirithuhumulikanaya n’erithuha obuholho.” Ebya banya sayansi babiribumbura byabirikolha kutsibu erisoborera engebe omwa miringo muthina-muthina n’erisoborera emitheghekere ey’obuhangiranwa n’emikolere yayu eyikaleka engebe iyabyaho. Nomwabine, esayansi siyanga thubwira ekighendererwa ky’engebe nga niki n’aho thukalholha. Thwamayikethera esayansi nyisa, isithwendi bana eby’erisubirya okwa bibulyo byethu ebihambire okwa ngebe. Busana n’ekyo, olhupapura olhw’amakuru olhwa Süddeutsche Zeitung mulhwabugha lhuthi, “obusondoli ni kiyithawa kinene kutsibu.”

Omuhangiki musa yutholere erithuha obusondoli ng’obo. Kundi yuwahira abandu b’okwa kihugho, yutholere eriminya ekyaleka iniabahirako. E Biblia yikabugha yithi Yehova mwahangika abandu nuku busulhaye ekihugho n’eritheyakyo. Omwa byosi bakakolha, abandu babya batholere ibakangania emibere yiwe, ng’obulingirirania, amenge, n’olhwanzo. Thwamabiriminya ekyaleka Yehova iniathuhangika, ithukendi minya ekighendererwa ky’engebe nga niki.​—Enzuko 1:26-28.

Wanga Kolhaki?

Neryo ibbwa wamabya isiwuliwathabana eby’erisubirya ebyuwene okwa bibulyo bino: ‘Engebe yiwithe ekighendererwaki? Ngalholha hayi? E Biblia yikahabulha yithi wuminye Yehova ya ndeke. Nibya Yesu mwabugha athi: “Neryo eyi ni ngebe y’erikotha, abandu bakuminye, iwe Nyamuhanga mughuma w’ekwenene, n’eriminya Yesu Kristo, oyo wathuma.” Kandi wukahirawa mw’omuhwa w’eribya n’emibere ya Nyamuhanga, kutsibu-tsibu olhwanzo, n’eribya n’ekilhubirirwa eky’erisyabya ahisi sy’Obwami bwa Nyamuhanga bw’Ekimasiya obukasa. Neryo iwukendibya n’ekighendererwa omwa ngebe, n’amaha mabuyanga aw’obuthuku obukasa. Iwukendi bana eby’erisubirya okwa bibulyo bikulhu-bukulhu ebyabya bikakulyambya.​—Yoane 17:3; Omugambuli 12:13.

Eby’erisubirya okwa bibulyo ebyo ibikendi kuhambako bithi? Hans ni mulhume oyo waminya ekyo. * Kera, erikirirya lya Hans omu Nyamuhanga lyabya irinabulirweko, lyabya isiriwithe ekya likakolha okwa ngebe yiwe. Hans iniakakolesaya ebibatsi ebikathamiraya, ini musingiri, iniakakolha ebithuwene, kandi inianzire erighendya esyopiki-piki. Akabugha athi, “Aliwe engebe yabya iyinabulirweko, isiyirileka ngayowa ndeke.” Abere ahikya myaka 25, Hans mwathwamu eriminya Nyamuhanga omw’iyithendya okwa Biblia. Abere abiriminya Yehova ya ndeke n’eriyitheghererya ekighendererwa ky’engebe, Hans mwahindulha engebe yiwe neryo amabatizibwa ng’omughuma w’okwa Bema ba Yehova. Amabirighunza emyaka ikumi inianemukolha omubiiri w’Obwami ow’omughulhu wosi. Ahathe eribisirira akabugha athi: “Erikolera Yehova y’engebe eyuwene kutsibu. Sihali ekyang’ingana n’ekyo. Eriminya Yehova kyabirileka ingabya n’ekighendererwa omwa ngebe.”

Ni kwenene, ekighendererwa ky’engebe si gho mwatsi musa owakalyambaya abandu bangyi. Emibere eyiri omwa kihugho yikabya yinemwongera eritsanda, kikaleka ihabya owundi mwatsi owakalyambaya abandu bangyi.

Busana Naki Mukikabya?

Omughulhu hakabya ekitsibu ekikalire, mughulhu mungyi oyuhambirweko akayibulhaya: Busana naki mukikabya? Amaaka w’erighumira ekitsibu akasighikira kutsibu okw’ibana eky’erisubirya ekyuwene okwa kibulyo ekyo. Amathendi bana eky’erisubirya ekitholere, eriaghalhwa likongera n’oyuhambirweko iniangana hithana kutsibu. Ng’eky’erileberyako, thalengekania oku Bruni.

Bruni akabugha athi, “Myaka mirebe enyuma, mwali waghe, omwana waghe omumekeke mwaholha. Ing’ikirirye omu Nyamuhanga, neryo munasondya omukara nuku anyihumulikanaye. Mwambwira athi Nyamuhanga abirithwalha Susanne y’elhubulha, eyo lino ni malaika. Munahwa amani kutsibu busana n’omwana waghe eriholha kandi namapona na Nyamuhanga busana n’erimuthwalha.” Bruni mwaghunza emyaka ngayan’eyo iniane omwa bulhumi. “Neryo Omwema wa Yehova mwanyikangania omwa Biblia ngoku sihali enzumwa eyanga leka ingapona Nyamuhanga. Athi Yehova mwathathwalha Susanne y’elhubulha, kandi si malaika. Athi omwana waghe alhwalha busana n’obuthahikana. Athi Susanne anaghotsere omwa lhuholho, analindirire Yehova erimulhubukya. Kandi mun’igha ngoku Nyamuhanga ahangika abandu ini b’erikalha okwa kihugho paradiso, kandi ngoku eki kikisiya ikyabya. Nabere ingaminya ndeke Yehova nga ni mundu oyuli athi, munayithunda okw’iyo, n’obulhumi bwaghe mubwatsukiraho erikeha.”​—Esyonyimbo 37:29; Emibiri 24:15; Abanya Roma 5:12.

Esyomiliyoni sy’abandu bakabana ebitsibu muthina-muthina: ebitsibu ebikawa okwa buli mundu ahabwiwe, olhuhi, enzalha, kutse ekitsinduli. Bruni mwahumulikana akaminya erilhua omwa Biblia ngoku Yehova si w’eritsweba busana n’ebitsibu, ngoku si kyabya kighendererwa kiwe abandu eriaghalhwa, kandi ngoku akisiya iniaghunzaho obubi. Obubi eribya ibukongera ni kaminyikalho akakanganaya ngoku thuli omwa “biro by’enyuma-nyuma” eby’omughulhu mubi ono. Embinduka nene eyo ithwe bosi thulindirire yiri hakuhi.​—2 Timoteo 3:1-5; Matayo 24:7, 8.

Eriminya Nyamuhanga

Hans na Bruni babya bawithe amalengekania awathahikire awahambire oku Nyamuhanga. Babya bamw’ikirirye aliwe isibamwasi ndeke. Babere balengaho eriminya Yehova ya ndeke, akaghalha kabu mukaghanduka. Mubabana eby’erisubirya ebitholere okwa bibulyo bikulhu omwa ngebe. Eki mukyabaha erithekana n’amaha mabuyanga aw’obuthuku obukasa. Esyomiliyoni sy’abaghombe ba Yehova babiriyilhangirira ekyo.

Eriminya Yehova likatsuka omw’iyithendya okwa Biblia, eyikathubwira okw’iyo n’eby’akathuyithaghako. Ekyo ky’ekya bandi bakolha omwa kighana ky’erimbere. Oyusomire ebya kera kandi dokita, ya Luka, akabugha athi ab’omwa kithunga ky’Abayuda e Beroya, e Gurisi, “mubangirira ekinywe kya Nyamuhanga n’omuhwa [erilhua oku Paulo na Sila], ibakasondaya omo Masako obuli kiro erilebya emyatsi eyi nga ni kwenene.”​—Emibiri 17:10, 11.

Abakristayo ab’omwa kighana ky’erimbere nabu ibakahindana haghuma omwa bithunga. (Emibiri 2:41, 42, 46; 1 Abanya Korinto 1:1, 2; Abanya Galatia 1:1, 2; 2 Abanya Tesalonika 1:1) Ku bine bithya na munabwire. Abali omwa bithunga by’Abema ba Yehova bakahindana haghuma okwa mihindano, kutsibu-tsibu eyikolirwe busana n’eribawathikya eriyithunda hakuhi na Yehova n’erimukolera ibanatsemire. Wangana ghasirwa omw’ihindana haghuma n’Abema abali ewenyu. Kundi lyolho-lyolho abandu bakagherereraya Nyamuhanga oyo bakaramaya, Abema ba Yehova okwa lhulengo lhulebe bakakanganaya emibere eyo Yehova iyuwene-wene awithe. Neryo erihindana haghuma n’Abema kikaleka ithwaminya Yehova ya ndeke.​—Abaebrania 10:24, 25.

Mbwino eriminya Nyamuhanga kyamabya ikikayithagha akaghalha kanene? Ahathe erithika-thika akaghalha kakayithaghisibawa. Aliwe ibbwa, mbwino kwa bithe bithya n’okwa bindu bingyi omwa ngebe ebyo wanganza erithunga? Thalengekania okwa kaghalha ako omuthibithi akahiraho akayibegheresya. Ng’eky’erileberyako, omuthibithi nyakabara ya Jean-Claude Killy owe France akabugha bino okwa bikayithaghisibawa eribya muthibithi oyuwasi ndeke omwa kihugho kyosi: “Wutholere iwatsuka myaka 10 enyuma n’erithegheka ahabw’emyaka n’emyaka kandi n’eribera erikilengekaniako obuli kiro . . . Omundu atholere iniabya akakolha eki obuli kiro.” Endambi yosi eyi n’akaghalha kosi ako habw’erithanza erisangira omwa malingwatha awangana syaghunza dakika ng’ikumi buyira! Neryo ibbwa thalengekania nga kyangabya ky’omughaso mungahi eriminya Yehova.

Obughuma Obukayongera

Nindi oyuthanzire akabana ekindu ky’omughaso omo ngebe? Sihali. Neryo wamayowa engebe yawu isiyiwithe ekighendererwa eky’okwenene, kutse wamabya iwanzire eriminya ekikaleka ihabya ebitsibu, ithwamu eriminya Yehova, Nyamuhanga owe Biblia. Erimwighako kyangana hindulha ndeke engebe yawu, kandi kera na kera.

Thunemwendi syaleka erigha oku Yehova? Ababirighunza myaka mingyi ibanemumukolera bakinasweka busana n’ebya babirimwighako n’ebya bakinalholha embere erimwighako. Erigha emyatsi ng’eyo yikaleka ithwatsema kandi yikaleka ithwayithunda hakuhi nayu. Ambi ithwabugha ebya mukwenda Paulo ahandika bino: “Kwenene obukulhu bwa Nyamuhanga ni bunene! Kwenene Nyamuhanga awithe amenge wosi n’eriminya lyosi! Sihali mundu wangaminya erisoha liwe! Sihali mundu wangaminyerera esyonzira siwe!”​—Abanya Roma 11:33, 34.

[Omwatsi ahikwa]

[Eblabbu]

Abandu bakinabulhaya ebibulyo bikulhu-bikulhu ebyo: ‘Ekighendererwa ky’engebe niki? Ngalholha hayi?’

[Eblabbu]

“Nabere ingaminya ndeke Yehova nga ni mundu oyuli athi, munayithunda okw’iyo, n’obulhumi bwaghe mubatsukiraho erikeha”

[Eblabbu]

“Erikolera Yehova y’engebe eyuwene kutsibu. Sihali ekyang’ingana n’ekyo. Eriminya Yehova kyabirileka ingabya n’ekighendererwa omwa ngebe”