Mbwino Wukayithagha Ekihano kye Biblia Mughulhu Wosi?

IWUKINE mulere, ababuthi bawu bangabya ibabya bakakuha ebilhaghiro bingyi. Wabere wunemukulha, muwaminya ngoku babya bakutsomene erilhua oko muthima. Lino ng’omundu oyukulire, obundi wukinaghendera okwa misingyi mirebe eyo bakukangiriraya, nomwakine indi siwukiri ahisi sy’obuthoki bwabu.

Thatha wethu w’elhubulha, Yehova, akathuha ebihano bingyi ebilhangirikire erilhabira omwa Kinywe kiwe, e Biblia. Ng’eky’erileberyako, akathanga eriramya esyosanamu, obusingiri, oburaghane, n’obwibi. (Eriluayo 20:1-17; Emibiri 15:28, 29) Thukabya thukakulha bunyakirimu ‘omo myatsi yosi,’ thukaminya ngoku Yehova athwanzire erilhua oko muthima kandi ngoku ebihano biwe sibirithukakiraya.—Abanya Efeso 4:15; Isaya 48:17, 18; 54:13.

Aliwe, hane emibere mingyi eyithawithe ekihano ekilhangirikire. Neryo, abandi bakalengekanaya bathi ahathe ekihano kye Biblia ekilhangirikire, bali bwiranda erikolha ebikabatsemesaya. Bakabugha bathi Nyamuhanga kw’ayowa athi kikayithaghisibawa, angabere iniabirikangania ekya nzire omo mulingo w’ekihano ekilhangirikire.

Abawithe amalengekania ng’aya mughulhu mungyi bakathwamu ebithuwene neryo enyuma waho ibayikubyabwomo kutsibu. Bakalemawa erilhangira ngoku e Biblia muli ebihano bya Nyamuhanga kandi ku yikakanganaya emibere akalengekanirayamu okwa kindu. Thukabya thukasoma e Biblia n’eriminya amalengekania wa Yehova oko myatsi, thukathunga obunyamuthima-thima obuthendekirwe ne Biblia kandi ithwawathikibwa erithwamu ebikakanganaya esyonzira siwe. Thukabya thukakolha thuthya, thukatsemesaya omuthima wiwe kandi ithwabana emighisa eyikasa busana n’erithwamu ndeke.—Abanya Efeso 5:1.

Eby’Erileberyako Ebyasibwe eby’Omwa Biblia

Thukabya thukalebya emyatsi ye Biblia eyihambire okwa baghombe ba Nyamuhanga abakera, thukabana emibere eyo baghenderamu okwa malengekania wa Yehova nibya n’omughulhu babya isibawithe ekihano ekilhangirikire eky’erikwama. Thalengekania oko ky’erileberyako kya Yozefu. Omughulhu mukali wa Potifari abya akamulengako ery’ ery’erianza akole nayu obusingiri, sihabya ekihano kya Nyamuhanga ekihandikire ekikathanga obusingiri. Aliwe, nibya isihali ekihano ekilhangirikire, Yozefu abya inianasi ngoku obusingiri ni kibi ekikendi hamba oko bunyamuthima-thima bwiwe kandi ku n’ihalya “oku Nyamuhanga.” (Enzuko 39:9) Erighunzerera, Yozefu mwaminya ngoku obusingiri ni kindu ekithehambangana n’amalengekania wa Nyamuhanga n’erisonda liwe, ngoku kyakanganibawa omo Edeni.—Enzuko 2:24.

Thulebaye ekindi eky’erileberyako. Omwa Emibiri 16:3, thuk’igha ngoku Paulo athali aghenda na Timoteo omo syongendo siwe sy’Ekikristayo, Paulo mwatsuka erilhangira athi Timoteo akabanibawa. Aliwe, omo mulhondo wa 4 thukasoma thuthi enyuma waho Paulo na Timoteo mubalhaba omo miyi bakathulhughania “emyatsi eyo abakwenda n’abakulhu be Yerusalemu basoha.” Ebighuma by’okwa byabasoha lyabya iry’erithwamu bathi Abakristayo sibakiri ahisi sy’omughambo w’eribanibwa! (Emibiri 15:5, 6, 28, 29) Busana naki Paulo mwayowa athi Timoteo atholere iniabanibwa? “Busana n’Abayuda ababya omo bihugho by’eyo, kusangwa abosi babya basi kw’ise [wa Timoteo] ni Mugiriki.” Paulo syabya anzire hakabya erihithana erithatholere kutse erithwikalya abandi. Aby’anzire Abakristayo ibalholha embere ‘erisimwa embere sy’obunyamuthima-thima bw’obuli mundu, embere sya Nyamuhanga.’—2 Abanya Korinto 4:2; 1 Abanya Korinto 9:19-23.

Paulo na Timoteo ibawithe amalengekania awali ng’ayo. Soma emyatsi ng’eyo omwa Abanya Roma 14:15, 20, 21 na 1 Abanya Korinto 8:9-13; 10:23-33, wanalhangira ngoku Paulo aby’atsomene obunyakirimu bw’abandi, kwilhabirirya abangathwikalibwa oko kindu nibya n’ekinahikire. Kandi Paulo mwakania oku Timoteo athi: “Singwithe owundi oyuwithe omuthima ng’owaghe, kutse oyubahirire kw’omuthima wiwe. Kusangwa abosi bakakwama emyatsi yabo butsira emyatsi ya Yesu Kristo. Nikwa munasi ngoku Timoteo abirithoka, kandi ng’omwana kw’akakolera ise, abirikolha haghuma naghe omo mubiiri w’erighendya-ghendya engulhu yuwene.” (Abanya Filipi 2:20-22) Abalhume babiri aba ka bakathuhiriraho eky’erileberyako ekyuwene munabwire! Omwakanya k’erighendera okwa malengekania kutse ebyo banzire omughulhu hathe ekihano kya Nyamuhanga kirebe, mubagherererya olhwanzo lhwa Yehova na mughalha wiwe omw’ilebya erithwamu lyabu nga likendi hamba lithi okwa bunyakirimu bw’abandi.

Thalengekania oku Yesu Kristo, eky’erileberyako kyethu kikulhu. Omw’ikangirirya liwe ly’okwa kithwe, mwasoborera ndeke-ndeke athi oyukaghendera okwa bihano bya Nyamuhanga iniakendi bighondera nibya kwilhaba ngoku ekihano kikabugha kutse kikathanga. (Matayo 5:21, 22, 27, 28) Yesu, Paulo, Timoteo, na Yozefu mubathabya n’amalengekania w’eribugha indi ahathe ekihano kirebe ekya Nyamuhanga, omundu angana kolha ngoku anzire. Omw’ighendera okwa malengekania wa Nyamuhanga, abalhume aba mubaghondera ebya Yesu aminyikalhaya ng’ebihano bikulhu-bikulhu bibiri—erianza Nyamuhana n’erianza mulikyethu.—Matayo 22:36-40.

Kandi Ibbwa Abakristayo Munabwire?

Kilhangirikire ndeke ngoku sithutholere thukalhangira e Biblia ngoku omundu angalhangira ekitabu ekiri mw’ebilhaghiro—erilengekania thuthi obuli ekya thutholere erikolha kikendibya ikinakanganibwemo ndeke-ndeke. Thukatsemesaya kutsibu omuthima wa Yehova thukathwamu erikolha ebikakanganaya amalengekania wiwe, nibya nomuhangabya isihali kihano kirebe ekya thutholere ithwaghenderako. Ni bugha ambu, omwakanya k’eribera eribwirwa ebya Nyamuhanga anzire ithwakolha, ‘thwangan’igha ekya Yehova anzire ithwakolha.’ (Abanya Efeso 5:17; Abanya Roma 12:2) Busana naki eki kikatsemesaya Yehova? Kundi kikakanganaya ngoku sithuli kwama-kwamanaya kutsibu ebyo thwanzire n’obughabe bwethu bikahika okw’imutsemesya. Kandi kikakanganaya ngoku thukasima olhwanzo lhwiwe erihika okw’ibya ithwanzire erimugherererya, erilighira olhwanzo ng’olho eribya ilhw’olhukaleka ithwakolha ebyo thukakolha. (Emisyo 23:15; 27:11) Eryongera okw’ekyo, emikolere eyiseghemere okwa biri omo Masako yikaleka ithwabya n’amaghalha awuwene bunyakirimu kandi mughulhu mungyi aw’ekinyamubiri.

Thulebaye ngoku omusingyi oyu angakolesibwa okwa myatsi y’eriyithwiramo.

Erisombolha eby’Eriyitsemesyamo

Thalengekania oko mulhwana oyuwanzire erighulha e CD eyiriko muziki w’omundu mulebe. Ebyo abiriowa kuyo bikatsemesaya, aliwe iniayilhalikirira kundi okwa kava yayu kw’enyuma kuli ebikakanganaya ngoku omuziki oyo alimo eby’obusingiri. Neryo kandi iniaminya ngoku ebinene omo muziki oyo birimo abandu abakahithana kandi abatsurumire. Iyo ng’oyuwanzire Yehova, omulhwana oyu atsomene amalengekania Wiwe n’eriyowa liwe oko mwatsi oyu. Iniakend’igha athi erisonda lya Nyamuhanga okw’eki?

Omwa baruha yiwe oko Banya Galatia, omukwenda Paulo mwathondogholha emikolere y’omubiri n’emikolere y’omulimu wa Nyamuhanga. Obundi wunasi ebiri omwa mikolere y’omulimu wa Nyamuhanga: olhwanzo, obutseme, obuholho, eriyibombeka [erighumisirizya], obwenge [olhukeri], obubuya, erithendi leghulha [erikirirya], omuthima mwolho, n’eriyitheya [eriyikakirya]. Aliwe emikolere y’omubiri y’eyahi? Paulo akahandika athi: “Neryo erikolha ly’omubiri liminyikere ndeke, ly’eri: erisingira, obukine, amaraghane, erisaba esyosanamu, erilhaghulha, obuyighu, erilhwa, obuha, erihithana, erineghena, erikangirirya ly’amabehi, eritsura, erikunda, erithamira, n’emyatsi yosi eyiri ng’eyi. Ngababwira ndeke kandi nyithi, abakakolha ebiri ng’ebi sibendi syabana omwanya omo Bwami bwa Nyamuhanga.”—Abanya Galatia 5:19-23.

Lhangira ebinywe by’erighunzerera bino—‘n’emyatsi yosi eyiri ng’eyi.’ Paulo mwathathondogholha obuli kindu ekihambire okwa mikolere y’omubiri. Omundu isyabugha athi, ‘Erikwamana n’Amasako ngalighirawa erisangira omwa kindu kyosi-kyosi ekithe omo mikolere y’omubiri eyo Paulo athondogholha eyi.’ Omwakanya k’ekyo, abakasoma emyatsi eyi ibakendi yithagha erikolesya amaaka wabu w’obulengekania erithoka eriminya ebyangabya isibiri oko lisit eyi aliwe ebiri ‘ng’emyatsi eyiri ng’eyi.’ Abathe yisubamo abakasangira omwa mikolere eyithe omwa lisit eyi aliwe eyiri “ng’emyatsi eyi” sibendi syabana emighisa y’Obwami bwa Nyamuhanga.

Neryo kwesi, thutholere ithw’igha, kutse eriminya, ebithetsemesaya Yehova. Mbwino ekyo kikalire? Thubughe thuthi dokita wawu iniakubwira athi wubye wukalya ebighuma n’esyonyinyi aliwe athi wuleke eribya wukalya amandazi, e ayiskrimu, n’ebindi ng’ebyo. Mbwino ikinemwendi kukalira eriminya ekeki nga yiri omwa byahi okw’ebi? Neryo ibbwanu thasyalebaya okwa mikolere y’omulimu wa Nyamuhanga n’emikolere y’omubiri. Omuziki owakanibweko ahighulhu oyu ali omo lisit yahi? Ahathe erithika-thika syali kanganaya emibere ng’olhwanzo, obubuya, eriyikakirya, kutse eyindi mibere eyihambene n’emikolere y’omulimu wa Nyamuhanga. Omundu isyendi yithagha ekihano ekilhangirikire eriminya ngoku omulingo w’omuziki oyu syahambene n’amalengekania wa Nyamuhanga. Omusingyi iwan’oyo anganakolesibwa okw’isoma emyatsi, erilebya esyofilimu, esyondegheka esye tivi, emisathu y’okwa kombyuta, Emithahulha, n’ebindi n’ebindi.

Emisosere y’Eyihya Eyikalighawa

Kandi e Biblia yikaha emisingyi eyihambire okwa mwatsi w’emyambalire n’emiyipambire. Emisingyi eyi yikaleka obuli Mukristayo iniasondolhwa omw’ilhangira athi akabya n’emisosere eyuwene kandi eyikatsemesaya. Hano kandi, oyuwanzire Yehova akalhangira eki ini kaghisa k’erikolha ebikendi tsemesya Thatha wiwe w’elhubulha butsira nga kaghisa k’erikolha ebikamutsemesaya iyo ng’iyo. Ngoku thwabirilhangira, Yehova eribya isyathathondogholha ebihano birebe oko buli mwatsi sikirimanyisaya kithi syatsomene ebyo abandu biwe bakakolha. Obuli mwanya awithe emyambalire n’emiyipambire yagho, nibya n’omwa mwanya mughumerere, bikanabera erihinduka. Aliwe, Nyamuhanga akathuha emisingyi eyitholere erisondolha abandu biwe oko ndambi yosi-yosi n’omwa myanya yosi.

Ng’eky’erileberyako, 1 Timoteo 2:9, 10 hakabugha hathi: “Kandi nyanzire abakali nabo bambale esyongyimba esitholerebo, n’eriyitheya omo mwatsi w’eriyisugha. Kandi eriyisugha lyabo siribye erilhuka esyonzwiri esyo muhanda, kutse eriyisugha ery’esyamaghetse, kutse ery’esyolulu, kutse esyongyimba sy’obughuli bunene. Nikwa babye n’emikolere mibuya, eyitholere abakali abakayahulha mo bandu abakakenga Nyamuhanga.” Neryo kwesi, abakali Abakristayo kuthya n’abalhume batholere ibalengekania okwa misosere eyo abandu b’omwa bulhambu bwabu banzire “abakakenga Nyamuhanga” ibabya nayo. Kwilhabirirya ni kikulhu Omukristayo erilengekania emisosere yiwe nga yikendi leka abandu ibabya n’amalengekaniaki oko mwatsi we Biblia agho akathulha. (2 Abanya Korinto 6:3) Omukristayo oyuli ky’erileberyako kibuya isyendi yitsomana iyuwene bikahika okwa ebyo anzire kutse okwa bughabe bwiwe, aliwe omwakanya k’ekyo iniakendi lhangira athi syali lengemeraya abandi kutse eribathwikalya.—Matayo 18:6; Abanya Filipi 1:10.

Omukristayo amalhangira athi emyambalire n’emiyipambire mirebe yikatabura kutse yikathwikalhaya abandi, angana gherererya omukwenda Paulo omw’ihira obunyakirimu bw’abandi bw’embere oko ebyo anzire. Paulo mwabugha athi: “Munyigherereraye ngoku naghe ngagherereraya Kristo.” (1 Abanya Korinto 11:1) Kandi Paulo abere akakania oku Yesu mwahandika athi: “Kristo mwathayitsemesya.” Enzumwa eyo Paulo anzire Abakristayo abosi ibaghenderako yilhangirikire: “Nikwa ithwe thuli n’amaaka, litholere ithwawathikya obwolho bw’abandu abathe n’amaaka, butsira eriyitsemesya. Obuli mundu kw’ithwe atsemesaye mulikyabo, busana n’erimuwathikya n’erimuhangania ndeke.”—Abanya Roma 15:1-3.

Eryuwania Amaaka Wethu w’Obulengekania

Thwang’uwania thuthi amaaka wethu w’obulengekania nuku thuminye eritsemesya Yehova nibya n’omughulhu syathaha ekihano ekilhangirikire oko mwatsi? Thwamasoma Ekinywe kiwe buli kiro, erik’igha mughulhu wosi, n’erighanirya okwa bya thukasoma, ithukendi kulha-kulhania amaaka wethu w’obulengekania. Ekyo kikaghenda lyolho-lyolho. Ngoku erikulha ly’omwana likabya, erikulha bunyakirimu likaghenda lyolho-lyolho kandi siririlhuaho likalhangirika. Neryo erighumisirizya likayithaghisibawa, kandi sithutholere thukayiponera thwamathendi lhangira engulha-kulhana aho n’aho. Okwa lhundi lhuhandi, erithabya ihamabirilhaba buthuku bunene sikyo kyang’uwania amaaka wethu w’obulengekania. Obuthuku ng’obo butholere ibwakolesibwa erigha Ekinywe kya Nyamuhanga mughulhu wosi ngoku kikanganibwe ahighulhu, kandi thutholere ithwaghendera oko Kinywe ekyo ngoku thwanga thoka.—Abaebrania 5:14.

Kyangana buwa indi ebihano bya Nyamuhanga bikaleka ithwaminya nga thune bowa, emisingyi yiwe yikaleka ithwaminya olhulengo lhw’obunyakirimu bwethu n’eriyisunza lyethu ly’erianza erimutsemesya. Thukendibya thunemukulha bunyakirimu, kwa thunemwendiongera thuthya erigherererya Yehova na Mughalha wiwe. Ithukendianza kutsibu eriseghemerya ebya thukathwamu okwa malengekania agho Nyamuhanga awithe oko myatsi ngoku kiri omo Masako. Thukendibya thunemutsemesya Thatha wethu w’elhubulha omo byosi thukakolha, n’etseme yethu kwa yinemwendyongera yithya.

[Ebisasani]

Obuli mwanya awithe emyambalire n’emiyipambire yagho, aliwe emisingyi ye Biblia yitholere iyathusondolha