Ebibulyo Erilhua Omwa Basomi

Mbwino Abema ba Yehova bakanaligha obutsweka-butsweka bwosi-bwosi bw’omusasi?

Eky’erisubirya ekiri ahikwa hano kilhuire omwa gazeti ey’Okwomukagha 15, 2000.

Eky’erisubirya kikulhu kiri kithi Abema ba Yehova sibalirigha omusasi. Thw’ikirirye ndeke-ndeke ngoku ekihano kya Nyamuhanga ekihambire okwa musasi sikyathahinduka. Aliwe, munabwire omusasi angana tsutsangwa-tsutsangwa mwa bitsweka bbini bikulhu-bikulhu, kandi anganathasyalhuamo ehindi hitsweka hike-hike ehikahulhawamo obutsweka-butsweka bw’omusasi. Bikahika okw’ithwamu ng’analighe ekyo, erithwamu ly’Omukristayo silitholere likasubulira okwa mighaso n’ebitsibu by’emithambirire mirebe ebyanga lhwiririramo. Eky’atholere eritsomana kutsibu ly’erighondera ebye Biblia yikabugha kandi ngakyanga hamba kithi okwa bughuma bwiwe Nyamuhanga Omuthoki w’Ebyosi.

Ekye Biblia yikabugha okwa musasi kilhangirikire. Erithuwathikya eriminya ekikaleka, thulebaye ebindu birebe ebiri omwa Biblia, omwa ebya kera, n’omwa eby’emithambirire.

Yehova Nyamuhanga mwabwira thatha-kulhu wethu Noa athi atholere iniathwalha omusasi mw’ekindu ky’embaghane. (Enzuko 9:3, 4) Buthuku bulebe enyuma waho, ebihano ebyo Nyamuhanga aha Abaisraeli ibikakanganaya obubuyirire bw’omusasi: “Omundu wahi oyuli w’ekithunga kya Israeli, kutse oko bathasibwe . . . oyukalya omusindoki w’omusasi, ngendisyahinia obusu bwaghe oko mundu oyukalya omusasi.” Omw’igheghena ekihano kya Nyamuhanga, Omuisraeli inianganatsandya abandi; neryo Nyamuhanga mw’ongerako athi: ‘Nasyamughaba oko bandu biwe.’ (Abalawi 17:10) Enyuma waho, okwa muhindano e Yerusalemu, abakwenda n’abakulhu mubaligha bathi thutholere ‘ithwaleka erirya omusasi.’ Erikolha ekyo ni kikulhu ng’eriyihighulha okwa busingiri n’okwa syosanamu.—Emibiri 15:28, 29.

Ekinywe ‘erileka’ kyabya kikamanyisyaki omwa kighana ky’erimbere? Abakristayo isibangalya kutse erinywa omusasi, kandi isibangalya enyama y’ekisoro ekithalhuire mw’omusasi. Kandi ekihano ekyo ikikathanga erirya ebyalya ebyabirihirwa mw’omusasi, ng’amalha aw’abirihirwa mw’omusasi. Erirya omusasi omwa nzira yosi-yosi eyo in’ithwa ekihano kya Nyamuhanga.—1 Samweli 14:32, 33.

Abandu bangyi kera isibalilengekanaya bathi erirya kutse erinywa omusasi ni kibi ngoku thukalhangira omwa ebya omuhandiki mughuma oyukahulhawamo Tertullian abugha (oyuwabyaho omwa kighana kyakabiri n’ekyakasathu E.K.). Akakania okwa mwatsi w’amabehi ow’eribugha indi Abakristayo ibakalya omusasi, Tertullian mw’ahulha ebihanda ebyabya bikaboha endaghane omw’inywa omusasi. Kandi mwabugha athi abandu ibakanywa omusasi w’abal’ithibawa ahakabera emisathu erithambira ebithutsa.”

Okwa Bakristayo emitse eyo (nomwakine indi abandi Abanya Roma ibakathwalhayo ng’enzira y’eriyithambiramu) siyabya yihikire: “Sithulihira omwa byalya byethu mw’omusasi n’omw’angabya w’ebisoro,” Tertullian athya. Abanya Roma ibakakolesaya ebyalya ebirimo omusasi ng’enzira y’erilenga okwa buthaleghulha bw’Abakristayo ab’okwenene. Tertullian ak’ongerako athi: “Neryo leka ngathakubulya, Abakristayo bamabya isibalirya omusasi wosi-wosi w’ebisoro, mbwino iwanalengekania wuthi hane enzumwa eyangaleka ibanywa ow’abandu?”

Munabwire, abandu bangyi bakalengekanaya bathi bakabya isibathathwa ebihano bya Nyamuhanga Omuthoki w’Ebyosi abadokita babu bamabya ibabalya babwira bathi bakolesaye omusasi ng’omubatsi. Nomwakine indi ni kwenene ithwe ng’Abema ba Yehova thwanzire ithwabyaho, thukathwamu eriowa ekihano kya Yehova ekihambire okwa musasi. Bikahika okwa mithambirire eya munabwire, thwangaghondera thuthi ekihano kya Nyamuhanga ekihambire okwa musasi?

Erihiribwako omusasi wosi lyabere lyakanyirira enyuma w’Olhuhi Olhwakabiri olhw’Ekihugho kyosi, Abema ba Yehova mubalhangira eki ikikathwa ekihano bya Nyamuhanga—kandi thukin’ikirirye ekyo. Nomwabine, emithambirire yabiribya iyinemuhinduka obuthuku bunemulhaba. Lino sibalihira okwa mundu kw’omusasi owosi aliwe ekitsweka kighuma ky’okwa bitsweka bbini ebikulhu-bikulhu eby’omusasi: (1) red cells; (2) white cells; (3) platelets; (4) plasma (serum), ekitsweka ekiri lhughetse-ghetse. Erikwamana n’emibere y’omulhwere, abadokita bangana muhandikira esyo red cells, white cells, platelets, kutse e plasma. Kundi omusasi anganaghabwa mwa bitsweka-bitsweka, omusasi angana kolesibwa erithambira abalhwere banene. Abema ba Yehova b’ikirirye bathi eriligha omusasi owosi kutse ekitsweka kyosi-kyosi ky’okwa bitsweka byagho ebikulhu-bikulhu n’ithwa ekihano kya Nyamuhanga. Omo kwenene, eryamakirira em’imanire yabu eyiseghemere okwa Biblia eyi kyabiribatheya okwa bitsibu bingyi, imwamuli amalhwere nge hapatayitisi n’esilimu amalhwere aw’anganasira omwa musasi.

Aliwe kundi ebitsweka bbini bikulhu-bikulhu eby’omusasi byangana lhusibwamo ehindi hitsweka-hitsweka, kikaleka ihabuthuku ebibulyo ebihambire okwa butsweka-butsweka obukalhua omwa bitsweka bikulhu-bikulhu by’omusasi. Ehitsweka ehyo hikakolesibawa hithi kandi ni byahi ebya Omukristayo atholere iniatsuka erilengekaniako akathwamu ng’ahikolesaye kutse eyihi?

Omusasi akatha-kathenie. Nibya e Plasma—90 okwa 100 kyayu ni maghetse—yirimo ehindu hingyi muthina-muthina ehikahulhawamo hormones, omunyu w’omwa mubiri, esyo enzyme, n’ehindu hy’ekyirisya, haghuma n’esukali y’omwa mubiri. Kandi e Plasma muli ehindu ehikahimba omubiri nge albumin, ehindu ehikaleka omusasi iniakamatha, n’ehindu ehikarwanisaya amalhwere. Abadokita bangan’iha omwa Plasma mw’ehindu hingyi ehikahimba omubiri n’erihikolesya. Ng’eky’erileberyako, ehindu ehikahimba omubiri ehyo hyangana kolesibwa eriwathikya omundu oyukalhuamu omusasi lhuba-lhuba. Omundu amabya iniangana hambwa obulhwere bulebe, abathambiri ibangana muthobolha omubatsi owakalhusibawa omwa plasma ey’abandu abathe banga hambwa obulhwere obo owakahulhawa mwa gamma globulin owoswire mw’ehindu ehikarwanisaya ehihuka ehikaletha amalhwere w’omwa mubiri. Ehindi hindu hy’omwa plasma hikakolesibawa omwa mithambirire, aliwe ebiri ahighulhu hano bikakanganaya ngoku ekitsweka kikulhu (plasma) ky’omusasi kyangana lhusibwa mw’ehindi hitsweka.

Ngoku e plasma yangana lhuamu ehitsweka muthina-muthina, n’ebindi bitsweka bikulhu-bikulhu by’omusasi (red cells, white cells, platelets) byangana lhusibwa mw’obutsweka-butsweka buke-buke. Ng’eky’erileberyako, White blood cells yangana lhusibwa mw’ehitsweka ng’esyo interferon n’esyo interleukin, ehindu ehikakolesibawa erithambira ekansa n’awandi malhwere ng’aya. Obutsweka-butsweka bw’esyo Platelets bwangana kolesibwa erithambira ebironda. N’eyindi mibatsi eyikalhusibawa omwa bitsweka-bitsweka by’omusasi yinemuhulhukibwa. Emibatsi ng’eyo si by’ebitsweka bbini bikulhu-bikulhu by’omusasi; mughulhu mungyi yikalhusibawa omwa butsweka-butsweka bw’ebyo. Mbwino Abakristayo banatholere ibaligha erithambirwa omw’ikolesya obutsweka-butsweka obu? Sithwanga kubwira eky’erikolha. E Biblia siyiri thubwira bingyi, neryo obuli Mukristayo embere sya Nyamuhanga atholere iniayithwiramu erikwamana n’obunyamuthima-thima bwiwe obukangiriribwe.

Abandi bangana ghana ekyosi-kyosi ekikalhusibawa omwa musasi (nibya n’obutsweka-butsweka bw’omusasi obukawathikaya erirwanisya amalhwere). Ku bakayitheghereraya bathya ekihano kya Nyamuhanga ekya ‘muleke omusasi.’ Bakaha enzumwa eno bathi ekilhaghiro kiwe okwa Baisraeli ikikabugha kithi omusasi amalhusibwa omwa kihangikwa ‘iniakuthibawa okwa kithaka.’ (Eryibuka Ebihano 12:22-24) Eki kikahambangana kithi n’obutsweka-butsweka bw’omusasi? Kundi erikolha e gamma globulin n’eyindi mibatsi, bakasorokaya omusasi neryo ibakolha kugho. Neryo abandi Bakristayo bakaghana emibatsi ng’eyo, ngoku bakanaghana erihirwako omusasi owosi kutse ekighuma ky’okwa bitsweka byagho bbini bikulhu-bikulhu. Erithwamu lyabu erikalhua okwa muthima erikwamana n’obunyamuthima-thima bwabu obukangiriribwe litholere iryasikibwa.

Abandi Bakristayo bakathwamu ebiri mbaghane. Nabu bakaghana erihirwa kw’omusasi owosi imwamuli, red cells, white cells, platelets, kutse plasma. Aliwe bangana lighira dokita eribathambira omw’ikolesya obutsweka-butsweka obulyalhusibawa omwa bitsweka bikulhu-bikulhu by’omusasi. Nibya n’omwa mibere ng’eyo, Abakristayo bangana thwamu ebithasosene. Omukristayo angana ligha erithobolhwa e gamma globulin, aliwe anganaligha kutse iniaghana erithobolhwa omubatsi owalimo akandu akalyalhusibawa omwa red kutse white cells. Neryo kwesi, ni kyahi ekyanga leka abandi Bakristayo ibaghunzerera bathi bangana ligha obutsweka-butsweka bw’omusasi?

Omwatsi “Ebibulyo Erilhua Omwa Basomi” omwa Watchtower ey’Okwomukagha 1, 1990, mwakangania ngoku obutsweka-butsweka bwe plasma bukalhua omwa musasi w’omukule ibwaya omwa musasi owali mbaghane ow’omwana. Kwesi mama akaha omwana wiwe esyo immunoglobulins esikarwanisaya amalhwere. Neryo esya red cells esy’omusasi w’omwana isyo ahabwasyo sikabya syabirikulha okwa lhulengo lhwasyo, ehindu hyagho ehikaheka omuka [oxygen] hikayikolha. Ehindi hy’okw’ihyo hikabya bilirubin, ehikasuba omu mama erilhabira omwa ngundi n’omubiri wa mama iniayilhusya hyamo ng’oburofu. Abandi Bakristayo bangana ghunzerera bathi kundi obutsweka-butsweka bw’omusasi bwangana ghenda omwa wundi mundu erilhabira omwa nzira y’obuhangiranwa eyi, bangana ligha obutsweka-butsweka bw’omusasi obukalhusibawa omwa plasma kutse ebindi bitsweka byagho.

Mbwino eribya Abakristayo isibalithwamu ebisosene okwa butsweka-butsweka bw’omusasi, kikamanyisaya kithi erithwamu eri sirikulhu? Eyihi. Ni likulhu. Nomwabine enzumwa yilhangirikire. Omwatsi owali ahighulhu akakanganaya ngoku Abema ba Yehova bakaghana omusasi owosi n’ebitsweka byagho bikulhu-bikulhu bbini. E Biblia yikabwira Abakristayo yithi ‘baleke ebyalya ebitsandire kusangwa bikaherawa oko syosanamu; kandi baleke erirya omusasi; erirya enyama eyabiriniwa; kandi baleke erisingira.’ (Emibiri 15:29) Mbaghane n’ekyo, bikahika okwa butsweka-butsweka bw’omusasi bw’ekitsweka kyosi-kyosi ky’ebitsweka bikulhu-bikulhu by’omusasi, obuli Mukristayo, enyuma w’erighanirya ndeke okwa mwatsi oyu n’erisaba, atholere iniayithwiramu erikwamana n’obunyamuthima-thima bwiwe.

Abandu bangyi munabwire ibakendi ligha emithambirire yosi-yosi eyikabya nga yangana bawathikya, nomuyangabya iyinganaletha ebitsibu birebe omwa maghalha wabu ebinasibwe, ng’erithambirwa omw’ikolesya omusasi. Aliwe Omukristayo w’okwenene syalilengekanaya okwa ngebe yiwe nyisa. Abema ba Yehova bakasima emithambirire eyuwene kandi banzireyo, kandi bakatsuka erilengekania ndeke okwa bitsibu kutse emighaso eyanga lhwiririra omwa mithambirire mirebe bathe bathwamu. Aliwe, bikabya bikahika okwa mibatsi eyilhuire omwa musasi, bakalebaya ndeke ebya Nyamuhanga akabugha n’obughuma bwabu obwa bawithe n’Oyubahere Engebe.—Esyonyimbo 36:9.

Ka ni mughisa okwa Mukristayo eribya n’eriyikethera ng’erya omuhandiki w’esyonyimbo oyuwahandika athi: “Omwami Mukulhu Nyamuhanga ni muhanganiri waghe, n’omwami w’olhukengerwa, Omwami Mukulhu akathutsumulha n’obubuya n’erisikya. Sialikagha ekindu n’ekighuma kibuya oko bakakolha ebithunganene. Iwe Mwami Mukulhu . . . , abakayikethera we ni b’obutseme!”—Esyonyimbo 84:11, 12.

[Akasanduko]

EBIBULYO EBYA WANGABULYA ABATHAMBIRI

Erisemezibwa lyawu kutse emithambirire byamabya ibyanganabyamo erikolesya ebikalhua omwa musasi, bulhaya bino:

Mbwino abosi abakendi nyithambira banasi ngoku, ingye ng’Omwema wa Yehova, sindiligha erihirwa kw’omusasi (omusasi owosi, e red cells, white cells, platelets, kutse e blood plasma) nomunangabya omwa mibere eyiri yithi?

Omubatsi wosi-wosi ogho banga kuhandikira amabya iniakolirwe erilhua omwa blood plasma, red kutse white cells, kutse platelets, bulhaya:

Mbwino omubatsi alhuire omwa kighuma ky’okwa bitsweka bbini bikulhu-bikulhu by’omusasi? Kyamabya ikwa kiri kithya, wangana nyisoborera ng’akolirwe athi?

Omubatsi ow’alhuire omwa musasi oyu ngendi kolesya mungahi, kandi omwa nziraki?

Obunyamuthima-thima bwaghe bwamanyilighira erikolesya omubatsi owalhuire omwa obutsweka-butsweka obu, ni bitsibu byahi ebyanga lhwiririramo?

Obunyamuthima-thima bwaghe bwamaghana eky’erikolesya obutsweka-butsweka obu, ni wundi mubatsi wahi owanga kolesibwa?

Ngendibya ngabirilengekania ndeke okwa mwatsi oyu, ni buthuku bwahi obo nanga kubwiriramu erithwamu lyaghe?