Ebibulyo Erilhua Omwa Basomi

Omwa 2 Abanya Korinto 6:14, ni bahi abo Paulo akakanayako akakolesya ekinywe “abathikirirye”?

Omwa 2 Abanya Korinto 6:14, thukasoma thuthi: “Simumathikane n’abathikirirye.” Thwamalebya emilhondo eyithimbire okw’isako eryo, kilhangirikire ndeke-ndeke ngoku Paulo akakanaya okwa bandu abathe omwa kithunga ky’Ekikristayo. Eyindi milhondo ye Biblia eyo Paulo akakolesayamo ekinywe “oyuthikirirye” kutse “abathikirirye” yikasighika eriyitheghererya eri.

Ng’eky’erileberyako, Paulo akakunga Abakristayo okw’ithwalha balikyabo omo koti “embere sy’abathikirirye.” (1 Abanya Korinto 6:6) Hano, abathikirirye b’abatsweri ababya bakakolera omwa koti e Korinto. Omo baruha yiwe yakabiri, Paulo akabugha athi Sitani “abiriliba ameso w’obulengekania” bw’abathikirirye. Ameso w’abathikirirye ng’abo ‘abirihirwako ekitambara’ nuku sibalhangira engulhu yuwene. Abathikirirye aba sibathakangania ku banzire erikolera Yehova, kundi ahanyumaho Paulo abya iniabirisoborera athi: “Omughulhu omundu akabindukira Yehova, ekitambara kikalhusibawaho.”—2 Abanya Korinto 3:16, NWT; 4:4.

Abandi abathikirirye bakasangira omwa bubi kutse eriramya esyosanamu. (2 Abanya Korinto 6:15, 16) Aliwe, si bugha indi abosi bakahakanisaya abaghombe ba Yehova. Abandi bakanatsemera ekwenene. Abangyi bali omwa butheke n’Abakristayo kandi batsemire eribya nabu. (1 Abanya Korinto 7:12-14; 10:27; 14:22-25; 1 Petero 3:1, 2) Aliwe Paulo akakolesaya kutsibu ekinywe “abathikirirye” okwa bandu abali ng’abakanibweko ahighulhu, abathe omwa kithunga ky’Ekikristayo, ekirimo “abikiriraya oko Mukama.”—Emibiri 2:41; 5:14; 8:12, 13.

Omusingyi owali omwa 2 Abanya Korinto 6:14 ni busondoli obw’omughaso munene embere sy’Abakristayo abali omwa mibere yosi kandi mughulhu mungyi abirikanibwako ng’ow’akaha Bakristayo abakasondaya ow’eringira nayu omwa butheke b’erihabulha ly’amenge. (Matayo 19:4-6) Omukristayo oyuyihereyo kandi oyubatizibirwe akakanganaya amenge omw’ithendi sondya omwa bathikirirye mw’ow’eringira nayu omwa butheke, kundi eby’esyongeso, ebilhubirirwa, n’esyonyikirirya sy’abathikirirye biri mbaghane okwa by’Abakristayo ab’okwenene.

Kandi ibbwa abak’igha e Biblia n’erihindana omwa kithunga ky’Ekikristayo? Kandi ibbwa abathuliri abathabatizibirwe? Mbwino nabu sibikirirye? Eyihi. Abandu ababiriligha ekwenene y’engulhu yuwene kandi ibanemukulha-kulhana erihika okwanza eribatizibwa sibatholere bakahulhwamo abathikirirye. (Abanya Roma 10:10; 2 Abanya Korinto 4:13) Kornelio athali abatizibwa mwahulhwamo “mundu w’ekisomo, oyo wabya akaramya Nyamuhanga.”—Emibiri 10:2.

Neryo mbwino ikyanabya ky’amenge Omukristayo oyuwabiriyihayo eribya omwa buthethane n’eringira omwa butheke n’omundu oyuwabirilighirwa eribya muthuliri oyuthabatizibirwe, kundi, erihabulha lya Paulo eriri omwa 2 Abanya Korinto 6:14 sirithahamba okw’ekyo? Eyihi, ekyo si ky’amenge. Busana naki? Busana n’erihabulha erilhangirikire eryo Paulo aha erihambire okwa Bakristayo abakwakali. Paulo mwahandika athi: ‘Ali n’obwiranda bw’eriherukira okw’oyo anzire, omulhume amabya ini Mukristo kwenene.’ (1 Abanya Korinto 7:39) Erikwamana n’erihabulha eryo, Abakristayo abayihereyo bakahirawamo omuhwa w’erisondya ow’eringira nayu omwa butheke omwa ‘Bakristayo kwenene.’

Ebinywe “Mukristo kwenene” n’ebisosirebyo bino “wa Kristo” bikamanyisayaki? Paulo akakanaya okwa bandu ababya omu “Kristo” kutse “omw’isi w’Omukama” abakanibweko omwa Abanya Roma 16:8-10 n’Abanya Kolosai 4:7. Wamasoma emilhondo eyo, iwukendi lhangira ngoku abandu ng’abo ni bandu ‘abakakolha haghuma nethu,’ ‘abakasimawa,’ ‘balikyethu banzwa,’ kandi ‘baghombe bathaleghulha.’

Omundu akabya ‘mughombe w’Omukama’ mughulhu wahi? Omughulhu akakolha ahathe erikakwa ebya omughombe akakolha kandi iniayighana. Yesu mwasoborera athi: “Omundu amanza erinyikwama, ayighane, aheke [muthi wiwe w’obwaghali, NWT], anyikwame.” (Matayo 16:24) Omundu akatsuka erikwama Kristo n’erighondera ndeke erisonda lya Nyamuhanga omughulhu akayihayo oku Nyamuhanga. Neryo enyuma waho, iniabatizibwa neryo iniabya mughombe oyusombwerwe oyuwithe emimanire eyuwene embere sya Yehova Nyamuhanga. a Neryo kwesi, eringira omo butheke ‘n’Omukristo kwenene’ kikamanyisaya eringiramo n’omundu oyuwabirikangania ku ni mwikirirya kundu, oyuyihereyo ‘ng’omughombe wa Nyamuhanga n’Omukama Yesu Kristo.’—Yakobo 1:1.

Omundu oyunemw’igha e Biblia n’Abema ba Yehova kandi oyunemukulha-kulhana ndeke bunyakirimu atholere iniasimwa. Aliwe, syali ayihayo oku Yehova n’eribya omo ngebe y’erikolha n’eriyithalya oko bindi. Akinakolha esyombinduka esikayithaghisibawa. Atholere iniaghunzerera erikolha esyombinduka nene-nene esikayithaghisibawa eribya Mukristayo oyuyihereyo kandi oyubatizibirwe athali alengekania okwa yindi mbinduka nene omo ngebe, ng’eringira omwa butheke.

Mbwino nina ky’amenge Omukristayo eribya omwa buthethane n’omundu oyukabya ng’anemukulha-kulhana ndeke omw’igha liwe lye Biblia—obundi kundi anzire erimulinda erihika okw’ibatizibwa imw’ingira nayu omwa butheke? Eyihi. Ebilhubirirwa by’omwigha eby’erianza eriyihayo ibikendi hambwako amaminya ngoku Omukristayo oyuyihereyo anzire eringira nayu omwa butheke aliwe ngoku ekyo isikyendibya athali abatizibwa.

Mughulhu mungyi, omundu oyo akabya muthuliri oyuthabatizibirwe habw’akathuku kake, neryo inialhuaho iniabatizibwa. Neryo kwesi erihabulha eriri ahighulhu ery’eringira omwa butheke ‘n’Omukristo kwenene’ ly’eritholere. Kandi ibbwa, omundu amabya iniabirihika omwa myaka y’eringira omwa butheke, imwakulira omw’eka y’Ekikristayo, abirikangania omuhwa omwa kithunga habw’emyaka mingyi, kandi ini muthuliri oyuthabatizibirwe? Kyamabya ikwa kiri kithya, ni byahi ebyabirimukakirya okw’iyihayo oku Yehova? Busana naki akalindiriraya? Mbwino awithe erithika-thika? Nomwakine indi syali omwa bathikirirye, syangakanibwako ng’oyuli “Mukristo kwenene.”

Erihabulha lya Paulo erihambire okwa butheke likathughasira. (Isaya 48:17) Omulhume n’omukali bamabya ibabiriyihayo oyu Yehova, eriyihayo lyabu omwa butheke bwabu irikendibya oko musingyi owaghumire ow’obunyakirimu. Eby’esyongeso n’ebilhubirirwa ebyo bawithe ni bighumerere. Eki kikongera etseme yabu omwa butheke. Eryongera okw’ekyo, omundu eringira omwa butheke ‘n’Omukristo kwenene,’ akabya iniamakangania obuthaleghulha oku Yehova, kandi ekyo kikakolhaya oko mighisa mingyi eya kera na kera, kundi ‘Yehova syali leghulha oko bandu abatheleghulha.’—Esyonyimbo 18:25.

[Omwatsi ahikwa]

[Ekisasani]

‘Yehova syali leghulha oko bandu abatheleghulha’