Busana Naki Iwayihayo Oku Yehova?

“Kusangwa omo kiro kino, ya Nyamuhanga, naghe indi wiwe, kandi ngamukolera, mwathuma omulaika wiwe erihangana hakuhi naghe.”​—EMIBIRI 27:23.

1. Ni biika byahi ebyo abo abakayabatizibawa bakalhabamu, kandi eki kikaleka ihabuthuka bibulyo byahi?

 “BUSANA n’ekihongo kya Yesu Kristo, wabiriyisubamo, erileka ebibi byawu n’eriyihayo oku Yehova erikolha erisonda liwe?” Eki ni kighuma ky’okwa bibulyo bibiri ebikasubiribawa n’abakayabatizibawa omukania w’olhubatizo akayahwamo. Busana naki Abakristayo batholere ibayihayo oku Yehova? Eriyihayo oku Nyamuhanga likathughasira lithi? Busana naki omundu syanga ramya Nyamuhanga omwa nzira ey’akaligha isyathayihayo okw’iyo? Erithoka eriyitheghererya ndeke eby’erisubirya, thutsuke erilebya eriyihayo nga niki.

2. Kikamanyisayaki omundu eriyihayo oku Yehova?

² Kikamanyisayaki omundu eriyihayo oku Nyamuhanga? Thalebya ngoku omukwenda Paulo asoborera obughuma bwiwe na Nyamuhanga. Akakanirya abandu abali omwa bwathu obwabya ibukayabana ebitsibu, mwahulha Yehova mwa “Nyamuhanga, naghe indi wiwe.” (Soma Emibiri 27:22-24.) Abakrisitayo abosi b’okwenene ni ba Yehova. Mbaghane n’ekyo, ekihugho kyosi “kiri omwa buthoki b’omubi oyu.” (1 Yoane 5:19) Abakristayo bakabya ba Yehova bakayihayo okw’iyo omo musabe. Eriyihayo ng’eryo n’iyilhagha ly’omundu ahabwiwe. Neryo ikwakwama eribatizibwa omwa maghetse.

3. Olhubatizo lhwa Yesu mulhwakanganiaki, kandi abamukwamire banga gherererya bathi eky’erileberyako kiwe?

³ Yesu mwathuhiriraho eky’erileberyako akathwamu iyo ng’iyo erikolha erisonda lya Nyamuhanga. Kundi mwabuthirwa omwa kihanda kya Israeli ekyabya kiyihereyo oku Nyamuhanga, abya iniabiriyihayo kera oku Nyamuhanga. Nomwabine, abere akabatizibwa mwakolha ekindu ekilengire ekyabya kikayithaghisibwa omwa Mighambo. Ekinywe kya Nyamuhanga kikanganaya ngoku mwabugha athi: “Ingye yono, namasa. Erikolha erisonda lyawu, iwe Nyamuhanga.” (Ebr. 10:7; Lk. 3:21) Busana n’ekyo olhubatizo lhwa Yesu mulhwakangania ngoku amasa embere sya Nyamuhanga erikolha erisonda lya Thatha wiwe. Abakakwama Yesu bakagherereraya eky’erileberyako kiwe bakayihayo bakabatizibwa. Aliwe, ibo bakabya bakabatizibwa omwa maghetse, bakabya ibamakikangania ngoku babiriyihayo oku Nyamuhanga omwa musabe.

Ngoku Erihayo Likathughasira

4. Obunywani obwabya ahakathi-kathi ka Dawudi na Yonatani bukathweghesayaki okw’iberererya eriyilhagha lyethu?

⁴ Eriyihayo ery’Ekikristayo si mwatsi wa lhutseghe-tseghe. Lirengire kutsibu erikwama kyayilhagha buyira. Neryo ibbwa, eriyihayo oku Nyamuhanga likathughasira lithi? Ng’erithaliringanisya, thulebaye ngoku thukaghasirawa thwamakolha eriyilhagha embere esy’owundi mundu. Eky’erileberyako kighuma ky’eky’obunywani. Erithoka eritsemera olhusunzo olhw’eribya n’omunywani, wutholere iwaligha olhukwamirwa olhw’eribya munywani. Eki mwamuli eriyilhagha—eribya iwuli n’olhukwamirwa olhw’eritsomana munywani wawu. Obughuma b’okw’amanywani awuwene awakanibweko omwa Biblia bw’obwa Dawudi na Yonatani. Nibya mubahika n’okwa kiika eky’erikolha endaghane ey’obunywani. (Soma 1 Samweli 17:57; 18:1, 3.) Nomwakine indi amanywani aw’eriyihayo ng’aya syali banika-banika, amanywani mangyi akaghuma abanywani abosi bamathwamu eriberererya eriyilhagha lyabu ery’abakolha.—Emi. 17:17; 18:24.

5. Omukobe iniakaghasirawa athi kera na kera omw’isighalha iniane n’omukama wiwe mubuya?

⁵ Emighambo eyo Nyamuhanga aha Abaisraeli yikakanaya okwa bundi bughuma obo abandu baghasirawamo omw’iberererya eby’abayilhagha. Omukobe iniakabya amayithagha eribya mukoli w’omukama wiwe mubuya kera na kera, iniakakolha endaghane ey’eribya nayu kera na kera. Emighambo yikabugha yithi: “Nikwa omughombe amabugha n’eriminyikalya athi, nyanzire omukama waghe, n’omukali waghe n’abaana baghe; sinyanzire eribya bwiranda, neryo omukama wiwe iniamuletha oku Nyamuhanga, kandi iniamuletha oko lhuyi, kutse okwa nzeghuliro sy’olhuyi; n’omukama wiwe asyathobolha okuthwe kwiwe omo mughera; nayu asyamukolera emighulhu yosi, nakera.”—Eri. 21:5, 6.

6, 7. (a) Eriberererya eriyilhagha likaghasira lithi abandu? (b) Ekyo kikakanganayaki bikahika okwa bughuma bwethu na Yehova?

⁶ Obutheke ni bughuma bw’okwa obukayithagha eriyilhagha erilengireyo. N’iyilhagha ely’eriberererya oko mundu, butsira okwa kihandiko kirebe. Abandu babiri abikere haghuma buyira isibahandikisirye obutheke bwabu sibangabana obutheya bw’okwenene; kuthya n’abaana babu. Aliwe abathahenie ababirilhaghana omwa butheke obukaha ekitsumbi bawithe enzumwa eyiri omwa Masako eyanga leka ibalhangira bathi hamabuthuka ebitsibu, bakabighunzaho omw’olhwanzo.—Mt. 19:5, 6; 1 Kor. 13:7, 8; Ebr. 13:4.

⁷ Omwa buthuku bwe Biblia, abandu ibakaghasirawa omw’ikolha esyondaghano omwa by’esuburu n’emibiiri. (Mt. 20:1, 2, 8) Kwa bine bithya namunabwire. Ng’eky’erileberyako, thukaghasirawa thwamabya n’endaghano eyihandikire, thuthe thwatsuka esuburu kutse eritsuka erikolera omwa kithongole kirebe. Neryo, eriyilhagha lyamabya irik’uwanaya lithya obughuma ng’obunywani, obutheke, n’omubiiri, ibbwa kwesi eriyihayo ahathe eriyikukumirira lyanga kughasira lithi kutsibu bikahika okwa bughuma bwawu na Yehova! Leka thulebaye ngoku abandu ab’omwa buthuku bwakera baghasirawa omw’iyihayo oku Yehova Nyamuhanga kandi ngoku eki kyabya kilengire kutsibu erithayilhagha buyira.

Ngoku Eriyihayo oku Nyamuhanga Lyaghasira Abaisraeli

8. Abaisraeli eriyihayo oku Nyamuhanga mukyamanyisyaki okw’ibo?

⁸ Ekihanda kye Israeli ekyosi mukyabya ikyamabiriyihayo oku Yehova omughulhu kyayilhagha oku Nyamuhanga. Yehova mwabahindania hakuhi n’ekithwe Sinai, neryo mwababwira athi: “Mwamasyowa omulenge waghe kundu, n’eritheya endaghane yaghe, mwasyabya bindu byaghe erilhua omwa bihanda byosi.” Abandu bosi mubasubirya haghuma bathi: “Ebyosi ebyo Mwami Mukulhu abiribugha thukendi kolhabyo.” (Eri. 19:4-8) Abaisraeli eribya kihanda ekiyihereyo oku Nyamuhanga mukithasubulira okw’ikwama kwayilhagha buyira. Mukyamanyisya kithi mubabya bandu ba Yehova, kandi Yehova mwabathwalha ‘ng’ebindu biwe.’

9. Abaisraeli mubaghasirwa bathi omw’iyihayo oku Nyamuhanga?

⁹ Abaisraeli mubaghasirwa habw’eribya bandu ba Yehova. Abya muthaleghulha okw’ibo kandi iniabatsomene ngoku omubuthi w’olhwanzo akatsomana omwana. Nyamuhanga mwabwira Abaisraeli athi: “Ko omukali angana thoka eribirirwa omwana wiwe oyukonga, isyali ghanyira omughalha w’enda yiwe kwehi? Aba bangan’ibirirwa, nikwa ingye sindyendi syakwibirirwa.” (Isa. 49:15) Yehova mwabaha Emighambo busana n’eribasondolha, abaminyereri busana n’eribaghumya, n’abamalaika busana n’eribatheya. Omuhandiki w’esyonyimbo mwahandika athi: “Akaha Yakobo ekinywe kiwe, akaha Israeli ebihano biwe n’emighambo yiwe. Syalithakolera ebindi bihanda athya.” (Esy. 147:19, 20; Soma Esyonyimbo 34:7, 19; 48:14.) Ngoku Yehova anatsomana ekihanda ekyabya kiwe omwa buthuku bwakera, kwane mwenditsomana athya abandu abakayihayo okw’iyo munabwire.

Ekikaleka Ithwabya Ithutholere Ithwayihayo Oku Nyamuhanga

10, 11. Mbwino thunabuthirwe omw’ihiika lya Nyamuhanga ery’omwa buhangwa bwosi? Soborera.

¹⁰ Abandi bakabya bakalengekania okw’iyihayo ly’Ekikristayo n’eribatizibwa, ibangana yibulya, ‘Busana naki sinanga ramya Nyamuhanga isingayihereyo okw’iyo?’ Eky’erisubirya kikalhangirika ndeke-ndeke thukalengekania okwa mimanire eyathuwithe embere sya Nyamuhanga. Wibuke ngoku, busana n’ekibi kya Adamu, ithwe abosi muthwabuthirwa eyihya w’erihiika lya Nyamuhanga. (Abar. 3:23; 5:12) Eriyihayo oku Nyamuhanga ni kindu kikulhu ekikayithaghisibawa eritholera eriliwa omw’ihiika liwe ery’omwa buhangwa bwosi. Thuminye ekikaleka ikyabya kithya.

¹¹ Sihali n’omughuma w’okw’ithwe oyuwanga thoka erisighalya engebe eyihikene erilhua oku thatha wiwe ngoku Nyamuhanga aby’anzire ikyabya. (1 Tim. 6:19) Muthuthabuthwa ithune baghalha ba Nyamuhanga kundi omughulhu abandu babiri ab’erimbere bahalhaya, abandu bosi mubaghabulhwa oku Muhangiki kandi Thatha wabu ow’olhwanzo. (Thasyalebaya na Eryibuka Ebihano 32:5.) Eritsuka okwa buthuku obo n’erilholya embere, abandu babiribya isibali omw’ihiika lya Yehova ery’omwa buhangwa bwosi, bali haali oku Nyamuhanga.

12. (a) Abandu abathahikene bangabya bathi ab’omw’ihiika lya Nyamuhanga? (b) Ni biika byahi ebya thutholere ithwatsuka erikolha thuthe thwabatizibwa?

¹² Nomwabine, obuli mundu ahabwiwe iniangana saba athi Nyamuhanga amulighe omw’ihiika ery’abaghombe biwe abo akaligha. a Ekyo kyanga thokekana kithi okwa bakolha-nabi ng’ithwe? Omukwenda Paulo mwahandika athi: “Nikwa thwabya nzighu sya Nyamuhanga, neryo mwathusangania omwa lhuholho lhwa Mughalha wiwe.” (Abar. 5:10) Thukabya thukabatizibwa thukabya ithukasaba Nyamuhanga thuthi athuhe obunyamuthima-thima obuwene nuku thuthoke erisimwa nayu. (1 Pet. 3:21) Aliwe thuthe thwabatizibwa, hane ebiika ebya thutholere thwakolha. Thutholere ithwaminya Nyamuhanga, erigha erimuyikethera, eriyisubamu, n’erihindulha emibere yethu. (Yn 17:3; Emib 3:19; Ebr. 11:6) Aliwe hane n’ekindi ekitholere erikolhwa thuthe thwalighirwa eringira omw’ihiika lya Nyamuhanga. Nakyo ky’ekyahi?

13. Busana naki kihikire omundu erikolha eriyilhagha ery’eriyihayo oku Nyamuhanga nuku athoke eribya mughuma w’okw’abali omw’ihiika ly’abaramya abakaligha?

¹³ Omundu oyuli haali oku Nyamuhanga akabya athali abya mughuma w’okwa bali omw’ihiika ery’abaghombe biwe abo akaligha omw’ihiika liwe, atholere iniatsuka eriyilhagha embere sya Yehova. Erithoka eriminya ekikaleka, thalengekania oku thatha oyusikibwe oyukanza eriwathikya omulengwa engubi kandi anzire erimuyira mwa mughuma w’okwa bali omw’eka yiwe. Thatha oyo asibwe ng’omulhume mubuya. Aliwe, athali alighira omulengwa oyo eribya mughalha wiwe, omulhume oyu akanza omulhwana oyu atsuke eriyilhagha. Neryo omulhume akabugha athi, “Ngathe nga kuligha nga mughalha waghe, nganza eriminya nga wune mwendi syanyanza n’erinyisikya nga thatha wawu.” Erithoka eriliwa eribya mwana w’omw’eka eyo, omulengwa oyo atholere iniayilhagha embere sy’omulhume oyo. Mbwino ekyo sikya menge? Kuthya, Yehova akaligha omw’ihiika liwe abo basa abanayitheghekire eriyilhagha ery’eriyihayo okw’iyo. E Biblia yikabugha yithi: “Muyihe okw’iyo: obuhere obuliho, abayihereyo kandi abatholere eriliwa nayu.”—Abar. 12:1, The New English Bible.

Eriyihayo ni Kangania Olhwanzo n’Erikirirya

14. Ni mwanziraki eriyihayo oku Nyamuhanga ni lhwanzo?

¹⁴ Eriyilhagha ery’eriyihayo oku Nyamuhanga ni kangania olhwanzo olhukalhua okwa muthima olhwa thuwithire Yehova. Omwa nzira ndebe lisosene n’eriyilhagha wukingira omwa butheke. Omughole w’obulhume Omukristayo akakanganaya olhwanzo lhwiwe omw’iyilhagha ngoku akendibya muthaleghulha oku mukali wiwe, haliki sihaliki. Si kwama kyayilhagha erikolha ekindu kirebe, aliwe ni yilhagha oko mundu. Omughole w’obulhume Omukristayo akakiminya ngoku amathendi kolha eriyilhagha eryo, isikyanga thokekana eribya n’omukali wiwe oyo. Kuthya, sithwangabana emighisa ey’eribya baghuma b’okw’ihiika lya Yehova thwamathendi kolha eriyilhagha ly’eriyihayo. Busana n’ekyo thukayihayo oku Nyamuhanga, kundi nomwakine indi sithuhikene, thwanzire ithwabya biwe kandi thwabirithwamu eribya bathaleghulha okw’iyo, haliki sihaliki.—Mt. 22:37.

15. Eriyihayo oku Nyamuhanga ni kindu ekikanganaya kithi erikirirya?

¹⁵ Thukabya thukayihayo oku Nyamuhanga, thukakolha ekindu ekikakanganaya erikirirya. Busana naki? Erikirirya lyethu omu Yehova likaleka ithwayikethera ngoku eriyithunda hakuhi na Nyamuhanga likathughasira. (Esy. 73:28) Thunakyasi ngoku sikyendibya kyolho mughulhu wosi erilendera na Nyamuhanga thun’ikere “omo kathi-kathi k’ekihugho kihengemire, n’eky’omwagha,” aliwe thunayikethere omulhaghe wa Nyamuhanga ow’erithuwathikya thukalengaho. (Fil. 2:15; 4:13) Thunakyasi ngoku sithuhikene, aliwe thunakakasirye ngoku Yehova akendi thukangania olhukeri nibya n’omughulhu thwanga kolha ebisobyo. (Soma Esyonyimbo 103:13, 14; Abanya Roma 7:21-25.) Thuwithe erikirirya ngoku Yehova akendi thuhemba busana n’erithwamu lyethu ery’eribya ithune bathaleghulha.—Yobu 27:5.

Eriyihayo oku Nyamuhanga Likakolhaya Okwa Tseme

16, 17. Busana naki eriyihayo oku Nyamuhanga likaletha etseme?

¹⁶ Eriyihayo oku Yehova mukalhwiririra etseme kundi muli eriyihayo. Yesu mwabugha ekwenene y’omusingyi omughulhu abugha athi: “Erihithya likaletha obutseme kwilhaba erihebwa.” (Emibiri 20:35) Yesu mwayibanira etseme nene eyikasa busana n’erihithya omwa mubiiri wiwe w’erithulira hano okwa kihugho. Nibya n’okwa bundi buthuku, iniakanabulha n’endambi y’erilhuhuka, erirya, n’ey’erihumulikanibwa nuku athoke eriwathikya abandi eribana enzira eyikakolhaya okwa ngebe. (Yn. 4:34) Yesu mwabana etseme omw’ikolha ebindu ebyabya bikatsemesya omuthima wa Thatha wiwe. Yesu mwabugha athi: “Ngakolha ebiro byosi emyatsi eyikamutsemesaya.”—Yn. 8:29; Emi. 27:11.

¹⁷ Busana n’ekyo, Yesu mwakangya abakamukwama b’enzira ey’eribaniramo engebe eyikatsemesaya akabugha athi: “Omundu amanza erinyikwama, ayighane, aheke omuthi wiwe w’obwaghali, anyikwame.” (Mt. 16:24, NWT) Erikolha ekyo kikathuthunda hakuhi na Yehova. Mbwino hane owundi mundu wosi-wosi oyuwanga thutsomana ndeke kwilhaba Yehova?

18. Busana naki etseme eya thukabana busana n’eriyihayo oku Yehova yilengire kutsibu ey’eriyihayo okwa kindu kyosi-kyosi kutse omundu wosi-wosi?

¹⁸ Eriyihayo oku Yehova n’erikolha erikwamana n’eriyihayo lyethu omw’ikolha erisonda liwe kikathulethera etseme nene kwilhaba eriyihayo okwa kindu kyosi-kyosi kutse omundu wosi-wosi. Ng’eky’erileberyako, abandu bangyi bakahweraya engebe yabu omw’isondekania ebindu by’ekinyamubiri ibathabana obutseme bw’okwenene n’eritsemera eby’abawithe. Aliwe abakayihayo oku Yehova bakabana etseme eya kera na kera. (Mt. 6:24) Olhusunzo olhw’eribya ‘ibakakolha’ na Nyamuhanga lhukaleka ibabana etseme, aliwe sibali yihayo okw’ithakolha omubiiri buyira aliwe oku Nyamuhanga wethu oyukatsemera ebya thukakolha. (1 Kor. 3:9) Sihali owundi mundu wosi-wosi oyuwanga basima kutsibu busana n’omuthima wabu ow’eriyihayo. Akendi syasubya abaghombe biwe abathaleghulha mwa minyethu nuku baghasirawe omw’itsomana liwe kera na kera.—Yobu 33:25; Soma Abaebrania 6:10.

19. Ni lhusunzo lhwahi olhwa abakayihayo oku Yehova bakabana?

¹⁹ Eriyihayo oku Yehova likaleka iwabya n’obughuma bw’ahakuhi nayu. E Biblia yikabugha yithi: “Muyithunde hakuhi na Nyamuhanga, nayo akendiyithunda hakuhi nenyu.” (Yak. 4:8; Esy. 25:14) Omo mwatsi owakakwamako, thukendi syakania okwa kikaleka ithwayikethera eky’erithwamu eribya ba Yehova.

[Omwatsi ahikwa]

Wanga Subirya Wuthiki?

• Eriyihayo oku Nyamuhanga likamanyisayaki?

• Eriyihayo oku Nyamuhanga likathughasira lithi?

• Busana naki Abakrisitayo batholere ibayihayo oku Yehova?

[Ebibulyo]

[Ekisasani]

Erikolha erikwamana n’eriyihayo lyethu likakolhaya okwa tseme eya kera na kera