1. Ni kyahi ekyaleka Paulo iniatsema busana n’Abakristayo abe Korinto?

 ABYA mwaka wa 55 E.K. Omukwenda Paulo abya oko mwalu w’omuyi we Troa, aliwe abya isyanga leka erilengekania okw’Abakristayo abe Korinto. Enyuma omo mwaka oyo, kyabya ikyabirimwitha obulighe eriminya ngoku balikyethu b’eyo mubakakalhukana. Neryo busana n’eribatsomana ng’erya thatha, mwabathumira ebaruha y’eribahengulha. (1 Kor. 1:11; 4:15) Kandi abya iniabiribathumira omukoli mulikyabo ya Tito kandi iniabirihiraho endegheka athi Tito asubule ase amuhe eripoti e Troa. Neryo Paulo abya inianalindirire Tito e Troa, inianzire kutsibu eriminya emibere eyo Abakristayo abo balimu. Neryo mukyaponesya Paulo ya kutsibu Tito akaghana erihika. Paulo angakolireki? Mwaghenda e Makedonia omo bwathu, kandi ekyamutsemesaya, mubeghania eyo. Tito mwabugha athi balikyethu abe Korinto mubaghendera ndeke okwa biri omwa baruha ya Paulo kandi athi babya banzire kutsibu erimulholhako. Paulo abere akowa omwatsi mubuya oyo, ‘mwatsema ndeke.’​—2 Kor. 2:12, 13; 7:5-9.

2. (a) Ni byahi ebyo Paulo ahandikira Abanya Korinto ebihambire okw’ikirirya n’etseme? (b) Ni bibulyo byahi ebya thukendi kaniako?

² Buthuku buke enyuma waho, Paulo mwahandikira Abanya Korinto b’ebaruha eyakabiri. Mwababwira athi: “Sithwanzire erithabalha okw’ikirirya lyenyu. Nikwa thwanzire erikolha haghuma nenyu, n’eribaha obutseme; kusangwa mukahangana ndeke omw’ikirirya lyenyu.” (2 Kor. 1:24) Paulo amanyisayaki akabugha ekyo? Ebinywe ebyo bitholere ibyahamba bithi okwa basyakulhu b’ekithunga munabwire?

3. (a) Paulo amanyisayaki akahandika athi: “Mukahangana ndeke omw’ikirirya lyenyu”? (b) Abasyakulhu bakakwama bathi eky’erileberyako kya Paulo?

³ Paulo mwahulha emibere ibiri mikulhu eyihambire okw’iramya lyethu​—erikirirya n’etseme. Wibuke abere akakania okw’ikirirya, mwahandika athi: “Sithwanzire erithabalha okw’ikirirya lyenyu, . . . kusangwa mukahangana ndeke omw’ikirirya lyenyu.” Omwa binywe ebi, Paulo mwaligha ngoku balikyethu abe Korinto mubamakirira erikirirya lyabu butsira busana nayu kutse owundi mundu wosi-wosi, aliwe busana n’erikirirya lyabu omu Nyamuhanga. Busana n’ekyo, Paulo mwalhangira isihali ekyanga leka akathabalha okw’ikirirya ly’abalikyabo, kandi syabya anzire erikolha ekyo. Abya inianayikethere ngoku ni Bakristayo abathaleghulha ababya banzire erikolha ekihikire. (2 Kor. 2:3) Munabwire, abasyakulhu bakakwama eky’erileberyako kya Paulo omw’ikangania ku bayikethere erikirirya n’ebilhubirirwa by’abalikyabo eby’erikolera Nyamuhanga. (2 Tes. 3:4) Omwakanya k’erihira omo kithunga mw’ebilhaghiro byabu, abasyakulhu bakaghendera okwa misingyi y’Amasako n’obusondoli erilhua okwa kithunga kya Yehova. Kandi kwenene, abasyakulhu abamunabwire sibali thabalha okw’ikirirya ly’abalikyabo.​—1 Pet. 5:2, 3.

4. (a) Paulo amanyisayaki akahandika athi: ‘thukakolha haghuma nenyu, n’eribaha obutseme’?(b) Abasyakulhu munabwire bakagherereraya bathi Paulo?

⁴ Kandi Paulo mwabugha athi: ‘Thukakolha haghuma nenyu.’ Omo binywe ebyo, akanaya okw’iyo n’abandi abo aby’akakolha nabu. Busana naki ithwabugha thuthya? Omo baruha iyan’eyo, Paulo mw’ibukya Abanya Korinto okwa babiri b’okw’abo ababya akakolha haghuma nabu akahandika athi: “Yesu . . . Oyo thwabathulira omo kathi-kathi kenyu, ingye, na Silvano, na Timoteo.” (2 Kor. 1:19) N’ekindi, Paulo iniakabya akakolesya ebinywe ‘abo thukakolha haghuma nabu’ omwa syobaruha siwe, abya akamanyisya ababya akasiba nabu, nga Apolo, Akwila, Pirisila, Timoteo, Tito, n’abandi. (Abar. 16:3, 21; 1 Kor. 3:6-9; 2 Kor. 8:23) Neryo, omw’ibugha athi: “Thwanzire erikolha haghuma nenyu, n’eribaha obutseme,” Paulo mwakakasya Abakristayo ngoku iyo n’abandi babya banzire erikolha ngoku banga thoka erikulha-kulhania etseme y’abosi omo kithunga. Munabwire, abasyakulhu Abakristayo ekyo kya bananzire erikolha. Banzire erikolha ekyosi-kyosi eriwathikya balikyabo ‘erikolera Yehova ibanatsemire.’​—Esy. 100:2; Fil. 1:25.

5. Thukendi subirya okwa kibulyo kyahi, kandi thutholere ithwalengekania okuki?

⁵ Lino-lino, egurupu ey’abalikyethu ab’omuhwa abikere omwa myanya muthina-muthina ey’ekihugho mubasabwa erisubirya okwa kibulyo kino, “Ni byahi ebyo musyakulhu w’ekithunga abugha n’erikolha ebyabiryongera etseme yawu?” Thukakania okwa bya balikyethu abo babugha, lebaya nga bihambene bithi n’ebya iwe wanga subirye. Eryongera okw’ekyo, ambi ithwe bosi ithwalengekania ngoku thwanga lengaho eriletha omwa kithunga kyethu mw’etseme.

6, 7. (a) Ni nzira yahi nguma eyo basyakulhu banga gherereryamu Yesu, Paulo, n’abandi baghombe ba Nyamuhanga? (b) Busana naki eryibuka amena w’abalikyethu kikongera etseme yabu?

⁶ Abangyi b’okwa balikyethu bakabugha bathi bakongera eritsema omughulhu abasyakulhu abakakanganaya ku babatsomene. Enzira ngulhu nguma eyo abasyakulhu bakakolera mw’eki ly’erikwama eky’erileberyako kya Dawudi, Elihu, na Yesu iyuwene-wene. (Soma 2 Samweli 9:6; Yobu 33:1; Luka 19:5.) Obuli mughuma w’okwa baghombe ba Yehova aba mwakangania kw’atsomene abandi omw’ibahulha oko lina. Na Paulo mwakangania omughaso w’eryibuka n’erikolesya amena w’abikirirya balikyabo. Mwaghunzerera enguma y’okwa syobaruha siwe omw’iramukya balikyethu abalhabire omu 25 oko lina, imwamuli Persi, mwali wethu Omukristayo oyo Paulo akanayako athi: “Mukeraye omwanze wethu ye Persi.”​—Abar. 16:3-15.

⁷ Abandi basyakulhu b’ekithunga kikabakalira eryibuka amena w’abalikyabo. Aliwe bakabya bakahiraho akaghalha erikolha ekyo, bakabya ng’abakabwira balikyabo bathi, ‘Muli b’omughaso embere syethu.’ (Eri. 33:17) Kutsibu-tsibu, abasyakulhu bakongera etseme y’abalikyabo omughulhu bak’ibuka eribabirikira okwa mena bakasubirya okw’Igha ly’Akaleberyo kutse okwa yindi mihindano.​—Thasyalebaya na Yoane 10:3.

8. Ni nzira yahi nguma eyo Paulo akwamiramo eky’erileberyako ekyo Yehova na Yesu bahiraho?

⁸ Paulo kandi mwakangania kw’atsomene abandi omw’ibasima erilhua okwa muthima, nakyo ini yindi nzira ey’eryongera etseme y’abikirirya balikyabo. Busana n’ekyo, omwa baruha iyan’eyo omo akanganaya eriyisunza liwe ly’erikolera balikyabo busana n’eribaha etseme, Paulo mwahandika athi: “Ngayihalhamba kutsibu busana nenyu.” (2 Kor. 7:4) Ebinywe by’erisima ebi bitholere eribya imubyahumulikania balikyethu abe Korinto. Paulo mwabwira ebindi bithunga ebinywe ebiri ng’ebyo. (Abar. 1:8; Fil. 1:3-5; 1 Tes. 1:8) Erithwalira haghuma, abere abiryahulha Persi omo baruha yiwe oko kithunga kye Roma, Paulo mw’ongerako athi: ‘Abirikolha kutsibu omo mubiiri w’Omukama.’ (Abar. 16:12) Ebinywe ebi ka bitholere eribya imubyahimba mwali wethu omuthaleghulha oyo! Omw’isima abandi, Paulo mwakwama eky’erileberyako ekyo Yehova na Yesu bahiraho.​—Soma Mariko 1:9-11; Yoane 1:47; Erib. 2:2, 13, 19.

9. Busana naki erisima n’erisimwa kikongera tseme omo kithunga?

⁹ N’abasyakulhu nabu munabwire bakalhangira omughaso w’erikangania erisima eryo bawithire balikyabo. (Emi. 3:27; 15:23) Omusyakulhu akabya akakolha ekyo, akabya ng’oyukabwira balikyabo athi: ‘Mungalhangira ekyo wulyakolha. Ngakusima busana n’ekyo.’ Kandi ahathe erithika-thika, abikirirya balikyethu bakayithagha eriowa ebinywe ebikahumulikanaya eby’abasyakulhu. Mwali wethu oyuli omo myaka eya 50 mw’imanira abandi omughulhu abugha athi: “Okwa mubiiri sindibera erisimwa. Siyiri lhwanzo kandi yiri amalingwatha. Neryo omusyakulhu w’ekithunga akabya akanyisima busana n’ekyanabirikolera ekithunga, kikanyihumulikanaya, ikyanyihimba! Kikaleka ingayowa Thatha waghe w’elhubulha inianyanzire.” Mughalha wethu oyukalembera abaana biwe babiri b’eyuwene nayu mwayowa athya. Lino-lino omusyakulhu w’ekithunga mwamusimire erilhua oko muthima. Ekyo mukyahamba kithi oku mughalha wethu? Akabugha athi: “Eby’omusyakulhu abugha mubyanyiha amani kutsibu!” Neryo kwesi, omusyakulhu w’ekithunga erisima abikirirya balikyethu erilhua okwa muthima, kikabahimba kandi ikyongera etseme yabu. Ekyo ikikendi leka ibongera erilholha embere erilendera omo nzira y’engebe kandi “isibendilhuha.”​—Isa. 40:31.

10, 11. (a) Abasyakulhu banga kwama bathi eky’erileberyako ekya Nehemia ahiraho? (b) Ni kyahi ekikendi wathikya omusyakulhu eriha ekihembo eky’obunyakirimu akabungira balikyethu?

¹⁰ Kutsibu-tsibu ni nzira yahi ngulhu eyo abasyakulhu b’ekithunga bakakanganirayamu ku batsomene balikyabo n’eryongera etseme omo kithunga? Omw’ilengaho erihika okwa bakayithagha erihiribwa mw’omuhwa. (Soma Emibiri 20:28.) Abasyakulhu bakabya bakakolha ekyo, bakagherereraya abalisya ab’obunyakirimu abakera. Ng’eky’erileberyako, thalhangira ekya omulebererya muthaleghulha ya Nehemia akolha akalhangira ngoku abaghuma b’okwa balikyabo Abayuda babya ibabiritseka bunyakirimu. Omwatsi akabugha athi mwalhuaho iniahangana n’eribahimba. (Neh. 4:14) Munabwire, abasyakulhu banzire erikolha ekyo. ‘Bakahangana’​—ibahiraho akaghalha—​eriwathikya abikirirya balikyabo erighuma omw’ikirirya. Erithoka erikolha ekyo, bakabungira balikyabo emibere yamabalighira. Omughulhu bakabungira balikyabo, bakanza “eribaha emyatsi y’omulimu.” (Abar. 1:11) Ni kyahi ekikendi wathikya abasyakulhu erikolha ekyo?

¹¹ Athali abungira mulikyethu, omusyakulhu atholere iniatsuka erihiraho obuthuku bw’erilengekania oko mulikyethu oyo. Mulikyethu oyo awithe bitsibuki? Ni byahi ebyanga muhimba? N’isako lyahi kutse ni ky’erileberyako kyahi eky’omwa Biblia ekihambene n’emibere eyo alimu? Eritsuka erilengekania eryo irikendi leka omusyakulhu iniakanirania na mulikyethu oyo ebikahimba. Omusyakulhu akabya akabungira balikyabo akaleka babughe ebiri okwa muthima inianabahulikirire ndeke. (Yak. 1:19) Mwali wethu mughuma mwabugha athi: “Kikahumulikanaya omughulhu omusyakulhu akakuhulikirira ndeke.”​—Lk. 8:18.

12. Ni bahi omo kithunga abakayithagha erihimbwa, kandi busana naki?

¹² Ni bahi abakendi ghasirwa omughulhu abasyakulhu bakabungira balikyethu? Paulo mwabwira abasyakulhu balikyabo athi ‘batheghaye ekihyo kyosi.’ Kwesi, abosi omwa kithunga batholere ibahimbwa, imwamuli abathuliri n’abatemburi ababirikolha buthaleghulha omubiiri w’erithulira habw’emyaka mingyi. Busana naki bakayithagha obuwathikya bw’abalisya ab’obunyakirimu? Kundi okwa bundi buthuku, balikyethu abaghumire bunyakirimu abo, nabu bakahwa amani busana n’ebitsibu by’ekihugho kibi kino. Erikangania ekikaleka n’omughombe muthaleghulha wa Nyamuhanga okwa bundi buthuku iniayithagha obuwathikya bw’abandi, thulebaye ekyabya omo ngebe y’Omwami Dawudi.

13. (a) Isibibenobi mwakolesya mibere yahi eyo Dawudi abyamo? (b) Abisayi mwathoka athi erilhamya Dawudi?

¹³ Buthuku buke omulhwana Dawudi alihakabirwe ng’omwami, mw’imanira Goliata, omughuma w’okwa Barefaimu, ekihanda ky’abandu abanene-bane, ab’amani. Dawudi omuthubaha mwitha ekilhume ky’amani. (1 Sam. 17:4, 48-51; 1 Emy. 20:5, 8) Myaka mirebe enyuma waho, akalhwa n’Abafilisitini, Dawudi kandi mw’imanira ekindi kilhume ky’amani. Erina liwe in’iyo Isibibenobi, nayu omughuma okwa Barefaimu. (2 Sam. 21:16) Lero okwa ndambi eno, ekilhume ekyo kyabalha eritha Dawudi. Busana naki? Isi bugha indi Dawudi abya isyakiwithe obuthubaha aliwe kundi abya isyakiwithe kaghalha. E Biblia yikabugha yithi: “Dawudi mwalhuha.” Isibibenobi abera akanalhangira Dawudi isyakiwithe akaghalha, “mwasonda eritha Dawudi.” Aliwe ekilhume ky’amani kyabere kithe kyaghusa oku Dawudi kw’omuyali, “Abisayi mughalha wa Zeruya mwamuwathikya, mwaswirya Omufilisitini, mwamwitha.” (2 Sam. 21:15-17) Ka mwabalira okwa kasali! Dawudi atholere eribya imwasima kundi Abisayi abya inianamutsomene kandi mwamwanguhira omughulhu engebe yiwe yabya omo kabi! Omwatsi oyu anga thweghesyaki?

14. (a) Thwanga kinda thuthi ebitsibu ebiri nga Goliata? (b) Abasyakulhu banga wathikya bathi abandi erithasyabana akaghalha n’etseme? Iha eky’erileberyako.

¹⁴ Omo kihugho kyosi, ithwe ng’Abema ba Yehova thunemukolha omubiiri w’erithulira nomwakine indi Sitani n’abandu biwe banemuhira omo nzira yethu mw’ebikathulemesaya. Abandi omw’ithwe thwabiribana ebitsibu binene-binene, aliwe busana n’eriyikethera linene omu Yehova, thwabirimanira “Abagoliata” n’eribakinda. Aliwe okwa bundi buthuku, eribera erirwanisya ebitsibu eby’olhughumerere eby’ekihugho kino likathulhuhaya kandi ikyathughunza amani. Omwa mibere y’erilhuha eyo, kyolhobire ebitsibu ebyo erithukinda nomwakine indi ithwangana thokire erisingura. Okwa buthuku obo, obuwathikya obwa basyakulhu bakathuhera okwa buthuku, bwangana leka ithwathasyabana etseme n’akaghalha, ngoku abangyi babiriyilhangirira ekyo. Omutemburi oyuli omo myaka eye 60 mwabugha athi: “Kera, muhanayira amaghalha amaghana, neryo omubiiri w’erithulira amanyilhuhya. Omusyakulhu w’ekithunga mwalhangira ku nabirihwa amani neryo mwanyihikako. Muthwakania ebikahimba ebiseghemere okwa Biblia. Munaghendera okwa menge agho amba, kandi munaghasirwa.” Mwali wethu akongerako athi: “Omusyakulhu oyo mwanyikangania olhwanzo omughulhu nabya ngahwere amani kandi mwangwathikya!” Ni kwenene, kikahumulikanaya eriminya ngoku abasyakulhu abakathutsomana kandi abali nga Abisayi, bakabya ibanayitheghekire ‘erithuwathikya.’

15, 16. (a) Busana naki abikirirya balikyethu babya banzire Paulo? (b) Busana naki thukanza abasyakulhu b’ekithunga abatsomene?

¹⁵ Eribya mulisya ni mubiiri owakalire. Okwa bundi buthuku, abasyakulhu bakakuba othulho bakasaba busana n’ekihangulho kya Nyamuhanga kutse bakawathikya bunyakirimu omwikirirya mulikyabu. (2 Kor. 11:27, 28) Nomwabine bithya, abasyakulhu bakakolha ndeke omubiiri oyu kandi ibanatsemire, ngoku Paulo akolha. Mwahandikira Abakristayo athi: “Ngendi hithya n’obutseme n’eriyinubya busana n’eribawathikya.” (2 Kor. 12:15) Ni kwenene, busana n’erianza balikyabo, Paulo mwakolesya akaghalha kiwe kosi eribaghumya. (Soma 2 Abanya Korinto 2:4; Fil. 2:17; 1 Tes. 2:8) Kwesi ky’ekyaleka balikyethu ibanza Paulo ya kutsibu!​—Emib. 20:31-38.

¹⁶ Nethu ng’abaghombe ba Nyamuhanga munabwire thwanzire abasyakulhu bethu abatsomene kandi thukasima Yehova omwa misabe yethu busana n’erithuhabo. Bakongera etseme yethu omw’ithutsomana. Thukaghasirawa bakathubungira. Kandi ibbwa thukatsema kundi bakabya ibanayitheghekire erithuwathikya omughulhu thuhwere amani busana n’ebitsibu by’ekihugho kino. Kwesi kwenene, abasyakulhu Abakristayo abatsomene ng’aba ‘bakakolha haghuma nethu busana n’erithuha obutseme.’