“WUSUBE eka wawu n’oko b’ewenyu, wubwirebo emyatsi minene eyo Mukama abirikukolera, kandi ngoku abirikughanyira,” Yesu Kristo kw’abugha athya. Oko buthuku obo angabya iniabya iniane e Gadara, omwa bitsweka by’eyikwa w’Engetse ye Galilaya akakania n’omulhume oyuwanza eribya mwigha wiwe. Ebya Yesu abugha mubyakangania ngoku abya inianasi omubere mukulhu w’abandu​—eriyisunza ly’eribwira abahughu oko myatsi eya wanzire kandi ey’omughaso.​—Mk. 5:19.

Mughulhu mungyi thukalhangira omubere oyu munabwire, nomwakine indi akanyirire omwa sindi kalikya kwilhaba esindi. Neryo kwesi omundu akabya amabiribya muramya wa Nyamuhanga w’okwenene, Yehova, mughulhu mungyi akanza iniabwira abahughu biwe okw’ikirirya liwe erihyaka. Aliwe atholere iniakolha ekyo kyathi? Angahika athi okwa muthima w’abahughu biwe abali omo yindi dini​—kutse abathawithe dini? E Biblia yikaha erihabulha eryuwene kandi eritholere.

Omo kighana ky’erimbere, Anderea yuwabya w’erimbere eriminyikalya Yesu nga Masiya. Ni bahi abo abwira aho naho kw’abiribana Masiya? “Anderea mwatsuka eriyabana mughalha wabu ya Simoni, mwamubwira athi, Thwabiribana Masiya, (ekinywe eki kithi, Kristo).” Anderea mwaletha Petero eyiri Yesu, aho abya iniamaha Petero y’akaghisa k’eribya mughuma w’okwa bigha ba Yesu.​—Yn. 1:35-42.

Emyaka nga mukagha enyuma waho Petero inian’ikire e Yopa, mwakokibwa erighenda e Kaisaria eribungira ab’eka ya Kornelio, omukulhu omwa mahe. Ni bahi abo Petero asanga ibanahindene omwa nyumba? “Kornelio abya akalindabo, [Petero n’abo alinabo omwa lhughendo] iniabiribirikira ab’ekithunga kiwe n’abira biwe.” Neryo kwesi Kornelio mwaha abahughu biwe b’akaghisa k’erihulikirira Petero akakania n’erileka bathwamu erikwamana n’ebya bowa.​—Emibiri 10:22-33.

Emibere Anderea na Kornelio bathwaliramo abahughu babu yikathweghasayaki?

Anderea na Kornelio mubayira eky’erikolha erikangya abahughu babu ekwenene. Anderea mwabwira Petero y’oku Yesu, na Kornelio mwahiraho emitheghekere nuku abahughu biwe bowe ebya Petero anga bughire. Aliwe Anderea na Kornelio mubathakaka abahughu babu kutse eribohya omwa nzira y’obukodyo nuku babye bigha ba Kristo. Wanamalhangira erisomo omw’eki? Thukayira ndeke thukakolha ekiri ng’ekyo. Thwangana thoka erikania n’abahughu bethu kandi ithwasondekania ehighisa hy’eribawathikya eriminya ekwenene ye Biblia n’eriminya abikirirya balikyethu. Nomwabine, thukabya ithunasikirye obwiranda bwabu bw’erithwamu kandi thukayihighulha okw’ibakaka. Eriminya ngoku thwanga wathikya abahughu bethu, lengekanaya okwa ky’erileberyako kya Jürgen na Petra, abathahenie e Germany.

Petra mwigha e Biblia n’Abema ba Yehova neryo endambi yamahika amabatizibwa. Mwira wiwe ya Jürgen, abya mukulhu omwa mahe. Okw’itsuka, Jürgen mwathatsemera erithwamu lya mukali wiwe eryo. Aliwe endambi muyahika, amaminya ngoku Abema ba Yehova bakathulhughanaya ekwenene eyiri omwa Biblia. Nayu mwayihayo oku Yehova, kandi munabwire ni musyakulhu w’ekithunga. N’ihabulha lyahi eryo iyo lino akaha erihambire okw’ihika okwa muthima w’omuhughu oyuwithe erikirirya eriri mbaghane?

Jürgen akabugha athi: “Sithutholere thukalengaho erikaka abahughu bethu n’eribabwira emyatsi mingyi ey’obunyakirimu. Ekyo ikikendi leka ibathanza erikwama ekwenene. Ni kibuya ithwe eribabwira myatsi mike-mike ey’Amasako. Kandi ni kibuya erileka abahughu bethu baminye balikyethu ab’emyaka yabu kandi abawithe ebyo basosenemo. Erikolha eki kyangaleka ihabya obunywani.”

Omukwenda Petero n’abahughu ba Kornelio mubalhuaho ibaligha omwatsi we Biblia. Abandi omo kighana ky’erimbere abowa okwa kwenene mubayithagha obuthuku erithoka erithwamu.

Abangyi b’okwa bahughu ba Yesu mubakangania erikirirya omw’iyo omughulhu abya akathulira okwa kihugho. Ng’eky’erileberyako, kikalhangirika ngoku omukwenda Yakobo na Yoane babya bahughu ba Yesu kandi ngoku mama wabu, ya Salome, abya mwali wobu mama wiwe. Angabya iniabya mughuma w’okwa “bandi bakali bangyi ababya bakawathikya Yesu n’abigha biwe omo bindu byabu.”​—Lk. 8:1-3.

Aliwe abandi bahughu ba Yesu mubathalhuaho bakamwikirirya. Ng’eky’erileberyako, buthuku bughuma ihamabirilhaba obuthuku obulhabire oko mwaka Yesu alibatizibirwe, endeko y’abandu muyahindana omo nyumba erimuhulikirira. “Omughulhu ab’ekithunga kiwe bowa omwatsi oyu mobayamuhamba kusangwa abandi bathi, abiribya musire.” Buthuku bulebe enyuma waho, baghalha bobu Yesu babere bamubulya okwa ndegheka yiwe y’erighenda, mwathabasubirya. Busana naki? Kundi “baghalha babu nibya mubathamwikirirya.”​—Mk. 3:21; Yn. 7:5.

Thwang’ighaki okwa mibere Yesu athwaliramo abahughu biwe? Mwathahithana omughulhu abandi babugha bathi ni musire. Nibya n’enyuma wa Yesu erikwa n’erilhubuka, mwongera erihira omwa bahughu biwe mw’omuhwa omw’ibuthukira oko mughalha wabu ya Yakobo. Eributhukira oko mughalha wabu eri mulyaleka Yakobo n’abandi baghalha babu ibaligha ngoku kwenene ya Masiya. Busana n’ekyo, mubabya ibane n’abakwenda n’abandi omwa kisenge ky’endatha e Yerusalemu kandi kilhangirikire ngoku mubathunga omulimu abuyirire. Endambi muyahika, Yakobo na Yuda, owundi mughalha wobu Yesu, bamalholha embere erihebwa esyonzunzo mbuyanga.​—Emib. 1:12-14; 2:1-4; 1 Kor. 15:7.

Ngoku byanabya omwa kighana ky’erimbere, munabwire abandi bahughu bethu bakayithagha obuthuku imubalendera omo nzira y’engebe. Eky’erileberyako ni Roswitha, oyuwabya ahambirire edini y’Ekikatuliki mwira wiwe akabatizibwa ng’Omwema wa Yehova. Busana n’eriamakirira erikirirya liwe, okw’itsuka Roswitha mwahakanisya mwira wiwe. Aliwe ahabw’emyaka, erihakanisya liwe mulyakeha kandi mwaminya ngoku Abema ba Yehova bakakangiriraya ekwenene. Omwa 2003 nayu mwabatizibwa. Ni kyahi ekyaleka iniahinduka? Omwakanya k’erihithana okw’ihakanisya lya mukali wiwe, mwira wa Roswitha mwamuha ehighisa hy’erihindulha amalengekania wiwe. N’ihabulha lyahi erya Roswitha akaha? “Ni bibuya bingyi ebikalhwiririra omw’ighumisirizya, erighumisirizya, kandi n’erighumisirizya.”

Monika abatizibawa omwa 1974, n’abaghalha biwe babiri mubabya Bema ba Yehova enyuma w’emyaka ng’ikumi. Nomwakine indi mwira wiwe ya Hans, mwathahakanisya erikirirya lyabu, asalha abatizibwa omwa 2006. Busana n’efamile eyi eriyilhangirira eki, ni habulha lyahi eryo yikaha? “Makirira buthaleghulha Yehova, kandi isiwaleghulha busana n’ebibulyo ebihambire okw’ikirirya.” Nomwabine, kyabya kikulhu ibo eribya ibanemubwira Hans ku bamwanzire. Kandi mubathahwa amaha indi ekiro kikendi syahika nayu inialigha enyikirirya yabu.

Buthuku bughuma Yesu mwakania oko mwatsi w’ekwenene ng’amaghetse awakaha engebe y’erikotha. (Yn. 4:13, 14) Thwanzire abahughu bethu ibabana erihumulikana omw’inywa okwa maghetse awahuhirire, awuwene aw’ekwenene. Ahathe erithika-thika, sithwanzire bakaseserwa busana n’erikakwa erinywa maghetse mangyi. Mbulha bamahumulikana kutse bamaseserwa kyangana sighikira okwa mibere thukabasoboreramo erikirirya lyethu. E Biblia yikabugha yithi “omuthima w’abathunganene akalengekanaya embere w’erisubirya” kandi yithi “omuthima w’ow’amenge akakangiriraya obuno buwene, n’erithomeka erigha ly’eminywe yiwe.” Thwanga ghendera thuthi okw’ihabulha eri?​—Emi. 15:28; 16:23.

Omukali angananza erisoborera mwira wiwe okw’ikirirya liwe. Amatsuka ‘erilengekania embere w’erisubirya,’ iniakendi sombolha ndeke eby’eribugha kandi isyendi bugha omw’iharabana. Isyendi yithwalha ng’athunganene kutse ng’alengire mwira wiwe. Eby’akabugha ebyuwene ibyangana humulikania kandi ibyalethaho obuholho. Ni mughulhu wahi mwira wiwe akabya inianathekene kandi ikyolhoba erimuhikira? Akatsemera erikania kutse erisoma myatsi yahi? Akanatsemera eby’esayansi, eby’ekipolitiki, kutse eby’amasatha? Angamuhiramo athi omuhwa w’erianza eriminya ebiri omwa Biblia kandi inianasikirye eriyowa n’amalengekania wiwe? Erilengekania okw’ebyo kikendi muwathikya eribugha n’erikolesya amenge.

Erihika okwa mithima y’abahughu bethu abathe babya Bema ba Yehova sikwama kya basoborera ebya thwikirirye omwa bungyi. Ebya thukabugha bitholere ibyasighikwa n’emibere yethu.

Jürgen oyothulyakanayako akabugha athi, “Lholha embere erighendera okwa misingyi ye Biblia buli kiro. Eyo y’enzira eyuwene kutsibu eyanga wathikya omuhughu erilhangira ekwenene, nomwakine indi angana ghana eribugha.” Hans, mwabatizibwa myaka nga 30 mukali wiwe alibatizibirwe. Ni kikulhu eribya n’emibere eyuwene ey’Ekikristayo, nuku omuhughu alhangire ebibuya ebikalhua omw’iminya ekwenene omo ngebe yethu.” Abahughu bethu batholere ibalhangira ngoku erikirirya lyethu likaleka ithwabya mbaghane okwa bandi omo nzira eyuwene, butsira eyithatholere.

Omukwenda Petero mwaha erihabulha eryuwene okwa bakali bathahibwa abo abira babu sibikirirye: “Lithya nenyu inywe bakali, mwowe abiba benyu, neryo abathiowa ekinywe kya Nyamuhanga bathoke erisingwa n’erikirirya busana n’emighendere y’abakali babu, isibetha bwirwa ekinywe n’ekighuma. Kusangwa bakalebaya emighendere yenyu mibuya eyikakenga. Nikwa obubuya bwenyu bubye bw’omuthima owali omwisi w’omundu. Bubye obubuya bw’ekirimu ekihehere n’eky’obukuthu, ekithe tsanda. Obubuya obwo ni bughuli bunene embere sya Nyamuhanga.”​—1 Pet. 3:1-4.

Petero mwahandika athi omulhume iniangana ligha ekwenene busana n’emibere mibuya ya mukali wiwe. Erihabulha eriseghemere okwa Masako eryo line omwa bulengekania, mwali wethu oyukahulhawamo Christa abiribya inianemulengaho erihika okwa muthima wa mwira wiwe omw’ibya n’emibere mibuya eritsuka aho akathabatizibirwa omwa 1972. Nomwakine indi mwira wiwe mwan’igha n’Abema ba Yehova, syali akolha ekwenene mwa yiwe. Mwira wiwe anahindene okwa mihindano y’Ekikristayo kandi akakolongana ndeke n’abali omwa kithunga. Nabu bakasikaya obughabe bwiwe bw’eriyithwiramu. Christa akalengaho athi erihika okwa muthima wiwe?

“Nabirithwamu eriamakirira enzira eyo Yehova anzire ingalhabamo. Kandi ngalengaho erisinga mwira waghe ‘isyatha bwirwa ekinywe’ erilhabira omwa mibere yaghe emibuya. Namalhangira indi emisingyi ye Biblia siyendi thwibwa, ngalengaho erikolha ngoku nanga thoka erighendera okwa by’anzire. Kandi n’ekindi, ngasikaya obughabe bwiwe bw’eriyithwiramu kandi ingaleka emyatsi omo byalha bya Yehova.”

Ebya Christa akolha bikakanganaya omughaso w’eribya oyukaghenda-ghendanaya n’emibere eyiriho. Akalholha embere n’endegheka yiwe ey’obunyakirimu, imwamuli erihindana mughulhu wosi n’erisangira ndeke omw’ithulira. Nomwabine, akakanganaya obuyitheghererya, inianasi ngoku mwira wiwe awithe obughabe bw’erimusaba olhwanzo, endambi, n’eritsomana. Eribya oyukaghenda-ghendanaya n’emibere eyiriho kandi ow’obuyitheghererya kikayithaghisibawa okwa wosi-wosi w’okw’ithwe oyukakolongana n’abahughu abathikirirye. “Hali ekirimo busana n’obuli kindu,” e Biblia yithya. Eki mwamuli endambi ey’erighunza n’abahughu, kwilhabirirya abanze abathikirirye. Erisiba haghuma kikakulha-kulhanaya erikanirania. Ebyalholirweko bikakanganaya ngoku erikanirania eryuwene likakehaya eky’eriyowa ibali omwa mbwera, eriyowa ibabirisighanibwa, kutse obuha.​—Omu. 3:1.

Holger oyo thatha wiwe abatizibawa enyuma w’emyaka 20 abandi bahughu babu balibatizibirwe, akabugha athi, “Ni kikulhu erikangania ku thwanzire omuhughu wethu n’erimusabira.” Christa akongerako athi ‘syendi syahwa amaha ngoku mwira wiwe akendi syasighika Yehova n’eriligha ekwenene.’ Amalengekania agho thuwithe okwa bahughu bethu abathikirirye mughulhu wosi atholere iniabya iniatholere kandi awali mw’amaha.

Ekilhubirirwa kyethu ly’erilhangira thuthi obughuma bwethu bukabya ibuneho, eriha abahughu bethu b’akaghisa k’eriminya ekwenene, n’erihika okwa mithima yabu thukababwira omwatsi we Biblia. Kandi omwa byosi thukakolha, thutholere ithwakolha ekyo “omo bwolho-bwolho, n’erikenga.”​—1 Pet. 3:15, 16.