THATHERA akasasani iwune mughenda omw’igholho-gholho omwa nzira kandi iyine omwirimya. Nomwakine indi eryuba liryalenga kera, siwuli yowa ng’oyuwabiribulha aho ali, kundi wune n’etoki eyikaka ndeke. Wamakolerya ahisi, wukalhangira ebiri embere syawu. Kandi wamakolerya embere, ekyakakalha kyayu kikaleka iwalhangira ebiri haali kutsibu.

Omwa nzira ndebe, e Biblia yiri ng’ekyakakalha ky’etoki ekyo. Ngoku thunalyalhangira omwa myatsi eyihwere, Ekinywe kya Nyamuhanga kyangana thuwathikya erirwanisya ebiri embere syethu—ebitsibu ebya thukabana buli kiro omwa kihugho ekitsandire kino. Aliwe e Biblia siyiri subulira aho. Yikathuha ekyakakalha ekikaleka ithwalhangira eby’omwa buthuku obukasa, iyaleka ithwalhangira n’erikwama enzira eyikakolhaya okwa tseme eya kera na kera n’eribya ndeke. (Esyonyimbo 119:105) Yithi?

Thulebaye esyonzira ibiri esya Biblia yikathuhera mw’amaha busana n’obuthuku bw’embere: 1 Yikathuwathikaya eribana ekighendererwa omwa ngebe, kandi 2 yikathukangiriraya ngoku thwanga himba obunywani obwa kera na kera n’Omuhangiki wethu.

E Biblia yikaha amenge ngoku thwanga rwanisya ebitsibu byethu, kandi yirengire kutsibu ebindi bitabu ebya bandu bakasonderaya mw’amenge. Omwakanya k’erithuhira mw’omuhwa w’erilengekania okwa bitsibu byethu bisa, e Biblia yikathukangiriraya eriyilhangira ithuli b’okwa kindu kikulhu kutsibu. Aho, engebe yethu imuyikendibya n’ekighendererwa.

Thalengekania okwa musingyi we Biblia ono: “Erihithya likaletha obutseme kwilhaba erihebwa.” (Emibiri 20:35) Wangan’ibuka ekiro wawathikaya oyuwithe obuyithawa bw’ekinyamubiri? Obundi omughulhu wayihayo erihulikirira munywani wawu akakubwira eriyowa liwe. Mbwino muwuthayowa ndeke wukawathikya omundu?

Thukatsema kutsibu thwamahithya isithulilengekanaya thuthi nabu bakendi thuha. Omuhandiki mughuma mwahandika athi: “Sikithokekene erihithya kandi iwe isiwendihebwa bingyi okwa bya wulyahithaya —mbwino iwunalyahithaya isiwulengekenie nawu erihebwa.” Aliwe thwamawathikya abandi—kutsibu-tsibu abathe bangathoka nethu erithuhemba—thukabana olhuhembo. Thukabya b’okwa kindu kikulhu kutsibu. Thukabya ithukakolha n’Omuhangiki iyuwene-wene, oyukalhangira ebya thukakolha omwa lhukeri nga thukamubwekabyo. (Emisyo 19:17) Akatsemera kutsibu ebya thukakolera abakayithagha obuwathikya, kandi akayilhagha erisyathuhemba omw’ithuhererya ekindu ky’obughuli, engebe y’erikotha okwa kihugho paradiso—amaha mabuyanga ow’obuthuku bw’embere!—Esyonyimbo 37:29; Luka 14:12-14. *

Ekikulhu kutsibu, e Biblia yikathukangiriraya ngoku thwangana bana ekighendererwa omwa ngebe omw’iramya Nyamuhanga, Yehova. Ekinywe kiwe kikathuhira mw’omuhwa w’erimupipa, erimuha olhukengerwa, n’erimwowa. (Omugambuli 12:13; Eribisulirwa 4:11) Thwamakolha ekyo, thukabya ithwamaberererya ekindu ky’erilengekaniako kutsibu: Thukabya ithwamakolha ekikahamba ndeke okwa Muhangiki wethu. Akathubwira athi: “Wubye w’amenge, n’eritsemesya omuthima waghe.” (Emisyo 27:11) Thalengekania—thwamathwamu ndeke omw’ikolesya emisingyi eyiri omwa Biblia, thukatsemesaya omuthima wa Thatha wethu w’elhubulha. Busana naki? Kundi athutsomene kandi anzire ithwaghasirwa omw’ighendera okwa busondoli bwiwe. (Isaya 48:17, 18) Mbwino kwenene, hane ekighendererwa ekilengire eriramya Omuthabali w’obuhangwa bwosi n’erikolha ebikatsemesaya omuthima wiwe?

E Biblia kandi yikathukangiriraya erikolha obunywani n’Omuhangiki wethu. Amasako athi: “Muyithunde hakuhi na Nyamuhanga, nayu akendi yithunda hakuhi nenyu.” (Yakobo 4:8) Hangana yira ithwathika-thika nga kinathokekene eribya banywani b’Omuhangiki omuthoki w’ebyosi. Aliwe e Biblia yikathukakasaya ngoku ‘thwamasondya-sondya Nyamuhanga,’ ithukendi ‘mubana’ kundi “syali hali okw’ithwe oko buli mundu.” (Emibiri 17:27) Erihabulha lye Biblia okw’ibya munywani wa Nyamuhanga lyuwene busana n’obuthuku bwethu bw’embere. Omwa nziraki?

Thalengekania oku kino: Nomuthwangalengaho bungahi, sihali n’omughuma okw’ithwe oyuwanga thoka erikinda enzighu y’amaaka—olhuholho. (1 Abanya Korinto 15:26) Aliwe, Nyamuhanga iyo ni waho wa kera na kera. Syendi syaholha, kandi anzire n’abanywani biwe ibabyaho kera na kera. Omw’ikolesya ebinywe ebyolhobire bino kandi ebyuwene, e Biblia yikabugha ebya Yehova akasunzira abakamusondekanaya: “Emithima yabo yikothe.”—Esyonyimbo 22:26.

Wanga thunga wuthi obunywani na Nyamuhanga obwa kera na kera ng’obu? Lholha embere erimw’ighako omwa Kinywe kiwe, e Biblia. (Yoane 17:3; 2 Timoteo 3:16) Musabe akuwathikaye eriyitheghererya Amasako. E Biblia yikathukakasaya yithi ‘thwamabulya Nyamuhanga’ y’amenge, iniakendi thuhagho. * (Yakobo 1:5) Erighunzerera, lengaho erikolesya ebya wuk’igha, erilighira Ekinywe kya Nyamuhanga eribya ‘tala y’erikusondolha’ kandi “kyakakalha busana n’enzira” yawu—lino n’erihika kera na kera.—Esyonyimbo 119:105.