THATHERA AKASASANI: Wune omw’ibikiro ly’ebyakera omuswire ebindu ebik’ibukaya abandu ebyakera. Ebingyi bithobongokire, bitotongokire, n’eritsutsangika. Okwa bindi sikukiri ebindi bitsweka. Aliwe okwa bindu ebi, ekighuma kikinalhughirirene. Wangana bulya oyukakusondolha wuthi: “Eki mbwino ni kihyaka okwa bindi?” Iniasubirya athi: “Eyihi, ni kikulhu okwa bingyi, kandi sikiri kyathahimbwa buhyaka.” Iwabulya wuthi: “Mbwino mumwakitheya mbaghane okwa bindi?” Oyukakusondolha iniabugha athi: “Eyihi, kandi ibbwa eki ky’ekyabiribya omwa muyagha munene n’eriwirwa embulha nene. N’abandu babi babirilengesya erikitsandya.” Iwangana sweka n’eriyibulya, ‘Ibbwa kikolirwe omuki?’

Ne Biblia yiri ng’ekindu ekyo. Ni kitabu kya kera—ekikulhu okwa bingyi. Ni kwenene, hane n’ebindi bitabu ebyakera. Aliwe ng’ebindu ebik’ibukaya ebyakera ebitsutsangikire, ebitabu bingyi ebyakera byabiritsanda kutsibu obuthuku bune mulhaba. Ng’eky’erileberyako, ebya bikabugha okwa by’esayansi, sibirihambana n’eby’esayansi eya munabwire. Obusondoli bw’emithambirire obuli omwa bitabu ebi bukabya nga ni bwa kabi kutsibu omwakanya k’eriwathikya. Kandi ebitabu bingyi ebyakera byabiribya butahu-butahu; ehindi hipapura hyabirithalha kutse eritsanda.

Aliwe e Biblia iyo, yiri mbaghane. Yatsuka erihandikwa kera ebighonye ebilhabire omu 35, aliwe e Biblia yikinalhughirirene. Kandi nomwakine indi yabirithahirirwa habw’emyaka mingyi—erihisibwa, erihigha-highanibwa, n’erilhangirwa ng’eyithawithe mughaso—ebya Biblia yikabugha sibithahinduka. Mbaghane n’ebindi bitabu eribya isibirihambangana n’emyatsi mihyaka eyiri okwa buthuku, e Biblia iyo yikabugha bingyi ebikakanganaya ebikendi syabya embere.—Lebaya akasanduko “Yabirihwa Okwa Buthuku Kutse Yiri Embere n’Okwa Buthuku?”

Iwangana yibulya, ‘Ebya Biblia yikakangiriraya binathuwithire mughaso munabwire?’ Erisubirya ekyo, yibulhaye: ‘Ni bitsibu byahi ebikalire ebya bandu bawithe munabwire? Ni byahi ebikubahaya kutsibu?’ Obundi wukalengekanaya okwa syonyuhi, eritsanda ly’ebithuthimbireko, obutsindi, kutse obulibathangania. Thulebaye ebya Biblia yikakangiriraya. Wukakolha ekyo, yibulhaye, ‘Abandu bamaghendera okwa misingyi eyi, ekihugho ikinemwendyuwana?’

ERYANZA OBUHOLHO

“Obutseme buli okwa bakahiraho obuholho; kusangwa Nyamuhanga asyahulhabo mw’abaana biwe.” (Matayo 5:9) “Kyamathokekana, oko lhuhandi lhwenyu, mubye n’obuholho oko bandu bosi.”—Abanya Roma 12:18.

OLHUKERI, ERIGHANYIRA

“Obutseme buli okwa bakaghanyira abandi, kusangwa Nyamuhanga asyaghanyirabo.” (Matayo 5:7) “Neryo mughanyirane, mubuyirane omughulhu omundu awithe omwatsi oko wundi. Ngoku Omukama ababuyira, nenyu ko mwanga buyira abandi bo muthya.”—Abanya Kolosai 3:13.

ABANDU B’ESYORANGYI MUTHINA-MUTHINA ERIBYA BUGHUMA

Nyamuhanga “omwa mundu mughuma mwahangika ebihanda byosi by’abandu er’ikalha omwa kihugho kyosi.” (Emibiri 17:26) “Nyamuhanga syawithe ebithagha, nikwa omwa buli kihanda omundu oyukubaha Nyamuhanga, n’erikolha ebithunganene akalighawa nayu.”—Emibiri 10:34, 35.

ERITHEYA EKIHUGHO

“Omwami Mukulhu Nyamuhanga mwimya omundu oyo, mwamuhira omw’irima ly’Edeni alimeryo, atheghayeryo.” (Enzuko 2:15) Nyamuhanga ‘asyathoghothya abandu abakatsandaya ekihugho.’—Eribisulirwa 11:18.

ERIPONA OMURURU N’OBUTSWATSWA

“Muyitheghaye okw’irumwa lyosi, kusangwa engebe y’omundu si busana n’obungyi bw’ebindu biwe.” (Luka 12:15) “Simuleke obusingiri, kutse ebithisirire byosi, kutse obururu, bikahulhwa omwa kathi-kathi kenyu.”—Abanya Efeso 5:3.

ERIBYA MW’OKWENENE, ERIKOLHA KUTSIBU

“Thwanzire erikolha ebibuya omo myatsi yosi.” (Abaebrania 13:18) “Omwibi syibe kandi, nikwa akole omubiiri owene omwa byalha biwe.”—Abanya Efeso 4:28.

OMUGHASO W’ERIWATHIKYA ABALI OMWA BUYITHAWA

“Muhamiraye ab’omuthima owasikerere, muwathikaye abandu bosi, mubye n’omuthima w’eriyibombeka busana n’abandu bosi.” (1 Abanya Tesalonika 5:14) “Eriwathikya esyongubi n’abakwakali omwa bulighe bwabu.”—Yakobo 1:27.

E Biblia siyiri kwama kya thondogholha emisingyi eyi. Yikathukangiriraya erisikya emisingyi ng’eyi n’erikolesyayo omwa ngebe yethu. Abandu bamaghendera okwa misingyi eyi, mbwino omwa kihugho isimwendibya bitsibu bike? Kwesi, emisingyi ye Biblia yitholere kutsibu kandi siyiriyathahwa okwa buthuku! Aliwe ibbwa ebya Biblia yikakangiriraya byanga kuwathikya bithi lino?

Oyuwithe amenge kwilhaba abandu bosi mwabugha athi: “Amenge wa Nyamuhanga akaminyikalha omwa mibiiri yagho.” (Matayo 11:19) Iwanaghana ekyo? Amenge akalhangirika wukakolesyagho. Neryo iwangana yibulya, ‘E Biblia yamabya iyiri mw’amenge awuwene, mbwino siyanga hindulha engebe yaghe? Yanga nyiwathikya yithi omwa bitsibu byaghe lino?’ Thulebaye eky’erileberyako.

Delphine, * aby’awithe bingyi by’erikolha, kandi ebikamughasira. Aliwe, kitsumbukirania, mwabana ebitsibu ebikwamangene. Mwali wiwe mwaholha iniakine mulengwa. Obutheke bwiwe mubwasambukalha. Amabana ebitsibu by’esyosente. Akabugha athi: “Iningabulha nga ngakine mundu—isinga kiwithe mwana, omulhume, n’ah’er’ikalha. Munayowa inabiribya bbule—isingwithe lina lyayilhuka, isingawithe kaghalha, isinga kiwithe n’amaha.”

Aho, Delphine mwabya ayilhangirire okwenene kw’ebinywe bino “Emyaka yethu ni makumi alinda; kutse thwamabya n’amaaka iyabya makumi munani; nikwa yikathulethera amaghaniryo n’obulighe; neryo engebe yikahwa, ithwaghenda.”—Esyonyimbo 90:10.

Delphine mwasondya obuwathikya bwe Biblia omwa buthuku obukalire obo. Muyamuwathikya kutsibu.  Ngoku emyatsi isathu eyikakwamako yikendi kangania, abandi bangyi babiribana obuwathikya omwa Biblia bakaghendera okw’ihabulha lyayo erihambire okwa bitsibu. Babirilhangira e Biblia iyiri ng’ekindu ekik’ibukaya ebyakera ekikanibweko okw’itsuka. Ni ya mbaghane okwa bitabu bingyi ebikakulha n’erihwa okwa buthuku. Mbwino eki ni busana n’eribya e Biblia iyikolirwe omwa kindu ekiri mbaghane? Siyangabya kwenene iyiri mw’amenge wa Nyamuhanga—butsira aw’abandu?—1 Abanya Tesalonika 2:13.

Obundi nawu wabirilhangira ngoku engebe ni nguhi kandi yoswire mw’ebitsibu. Ebitsibu byamakufundikirya, ni hayi aha wukasonderaya erihumulikana, obuwathikya, n’erihabulha eritholere?

Thulebaye esyonzira isathu esye Biblia yanga thuwathikiryamu. Yangana kukangirirya ngoku wanga

1. yihighulha okwa bitsibu aho kithokekene.

2. ghunzaho ebitsibu bikakwasira.

3. ghumira ndeke emibere eya wuthe wanga hindulha.

Emyatsi eyikakwamako yikendi kania okwa syonzira isathu esi.