ABANDI BATHI EYIHI. Omudokita mughuma mwalinganisya erikolesya obusondoli bwe Biblia ng’erikolesya ekitabu ky’ekemestre eky’emyaka eya 1920 wukasomesya. Oyuthasikirye e Biblia iniangana kubulya nga wangana kolesya akatabu k’emikoleserye ey’ekombyuta eyakera erikusondolha erikolesya ekombyuta eyiri okwa buthuku. Ni bugha ambu, abandi bakalhangira e Biblia ng’ekitabu ekyabirihwa okwa buthuku kera-kera.

Ni kyahi ekyanga leka omundu iniakolesya obusondoli bwa kera-kera omwa kihugho kya munabwire ekikulha-kulene omwa by’etekinologia? Kundi ibbwa nibya okwa Intaneti ku kabya ikune mubanika obusondoli obuhyaka obuli okwa buthuku. Okwa TV kukabya ikune mubanika amenge erilhua okwa basomire emibere y’abandu, emibere y’engebe, n’abahandiki b’ebitabu. N’esyoduka sy’ebitabu sikabana esyobbiliyoni n’esyobbiliyoni sy’esyodola omw’ighulya ebitabu bingyi ebiri mw’obuwathikya.

Busana n’omwatsi mungaha n’oyu owali okwa buthuku owakasa obuli kathambi, iwanasondya obusondoli omwa Biblia—ekitabu ekyahwa erihandikwa myaka 2,000 enyuma? Mbwino abathasikirye e Biblia isibendibya ibahikire bakabugha bathi erilinganisya erikolesya ekitabu ekya kera ng’ekyo kiri ng’erikolesya ekitabu ky’ekemestre kutse akatabu k’emikoleserye y’ekombyuta ebyabirihwa okwa buthuku? Aliwe ibbwa, erilinganisya ng’eryo liwire. Esayansi n’etekinologia bikahinduka-hinduka lhuba-lhuba, aliwe obuhangwa bw’abandu bune bwathahinduka? Abandu bakinasondaya ekighendererwa ky’engebe, etseme n’obuholho, engolongana eyuwene omwa maka, n’eribya n’abanywani.

Nomwakine indi e Biblia ni ya kera, yikakanaya okwa biyithawa ebyo n’ebindi. Kandi yikabugha yithi Omuhangiki wethu yuwatheghekanayayo. Yikathusondolha omwa ngebe yethu yosi n’erithuthokesya erimanira ekitsibu kyosi-kyosi. (2 Timoteo 3:16, 17) Kandi ibbwa, yikathubwira yithi yiri mw’amahano awathehwa okwa buthuku—erihabulha erithe lyangahwa okwa buthuku! E Biblia iyiyene-yene yikabugha yithi: “Ekinywe kya Nyamuhanga kiriho.”—Abaebrania 4:12.

Mbwino ebya Biblia yikabugha nina kwenene? Mbwino yabirihwa okwa buthuku, kutse ky’ekitabu ekiri mw’amahano awakine w’omughaso kandi awakakolha—eribya iky’ekitabu ekiriho? Ekighendererwa ky’Akaleberyo kano, ak’erimbere omwa hy’embaghane ehikendi hulhukibwa, ly’erikuwathikya eribana eby’erisubirya okwa bibulyo ebi.