Rosie akabugha athi, “Iningabera erihangya-hangya kutsibu okwa bindu birebe neryo ingathera akasasani ibyabya ibikalire kutsibu kwilhaba ngoku biri.” Ni milhondo yahi eya muwathikaya? Omughuma w’okwa milhondo eyo ni Matayo 6:34: “Neryo simuyilhuhaye n’amaghaniryo busana n’omwa ngyakya; kusangwa engyakya yasyabya n’amaghaniryo wayu. Obuli kiro kiwithe obulighe bungaho.” Lino Rosie akabugha athi ebinywe bya Yesu ebyo mubyamuwathikya erileka erihangya-hangya busana n’ebyangabya engyakya. Ak’ongerako athi, “Nabya inganawithe ebitsibu, neryo isingatholere ngathasy’ongerako amaghaniryo w’ebithe byabya obundi ebithendi syabya nibya.”

Yasmine nayu mwayowa amaghaniryo wiwe iniabirimulengethukako. “Ebiro binene omwa wiki iningabya ingabirilira, kandi ebindi biro ihakanayira ingathaghotsera. Munayowa amalengekania awathatholere aya iniakanyirya inganemughenda.” N’isako lyahi erya muwathikaya? Akabugha athi 1 Petero 5:7: “Muhire erihangya-hangya lyenyu lyosi oko Nyamuhanga, kusangwa akabatheghaya.” Yasmine akabugha athi: “Obuthuku bwabere bunemulhaba, iningabera erisaba Yehova, kandi mwasubirya emisabe yaghe. Munayowa nganamalhua kw’ekithu. Amalengekania awathatholere akabya inianemwasa, aliwe lino nabiriminya ngoku nangarwanisyagho.”

Omukali oyukine mulere iya Isabella akabugha athi: “Ngayowa eriyilhagha-lhagha ni mutse owakasighalira kundi na thatha waghe kwane athya. Ngaleka erikolha ebindu by’omughaso kandi nibya isihali n’ekyangakolha—busana n’erith’ikalha buyira kutse erilebya e TV. Ni mutse mubi kundi ak’ongera ebitunturo n’erileka omundu iniathakolha omubiiri wiwe wa ndeke.” Omusingyi owamuwathikaya w’ow’akanganibwe omu 2 Timoteo 2:15, ahakabugha hathi: “Wuyire omuhwa erisimwa embere sya Nyamuhanga ng’omukoli w’omubiiri oyuthe hemuka busana n’omubiiri wiwe.” Isabella athi, “Mundanza omubiiri waghe akahemulha Yehova busana n’eribya inga yilhagha-lhagha.” Lino Isabella anemukolha ndeke.

Na Kelsey akabugha athi: “Iningabya inganawithe omubiiri w’erikolha aliriryo inganza erikolhagho okwa ndambi y’erighunzerera. Iningalira, ingabulha othulho, kandi ingabya omwa maghaniryo. Emyatsi muyanyikalira.” Kelsey mwabana obuwathikya omwa Emisyo 13:16: “Omugherekania akakolha n’eriminya; nikwa omukiru akakangaya obukiru bwiwe.” Akasoborera eky’igha busana n’erighanirya okw’isako eri, athi: “Ni ky’amenge erithwamu ndeke n’erisangwa wathegheka. Lino ngwithe akatabu k’erihandikamu akakabya ikanathekire okwa meza yaghe, kandi eki kikanyiwathikaya eribya n’endegheka eyuwene, butsira erikolha ekindu okwa ndambi y’erighunzerera.”

Kirsten akabugha athi “Mwira waghe mwanyisigha, amanyisighira n’abaana bbani. Ni musingyi wahi we Biblia owamuwathikaya? Emisyo 17:17 hakabugha hathi: “Omwira akanza emighulhu yosi; n’omughalha wabu akabuthawa busana n’obulighe.” Kirsten mwasondya obuwathikya okwa bandi abakakolera Yehova. Mwaghasirwa athi? “Banywani baghe mubangwathikya omwa nzira nyingyi! Abandi ibakanyilethera ebyalya n’ebimole. Ngendo isathu abandu mubanyiwathikya n’abaana baghe thukahumira omwa yindi nyumba. Owundi mwanyiwathikya eribana omubiiri. Banywani baghe isibali nyirekeranaya.”

Delphine, oyo thulyakanayako, nayu abya n’ekitsibu ky’embwera. Abere abiribana ebitsibu ebikwamangene ak’ibuka bino: “Munalhangira abandi ibanemutsemera engebe haghuma n’abanze babu aliwe ingye namabya ingali ingyuwene. Ini ngayowa ingali omwa mbwera nene.” Erisako lighuma eryamuwathikaya ly’erya Esyonyimbo 68:6: ‘Akaha abakakwa embwera b’enyumba y’er’ikalhamu.’ Akabugha athi: “Munaminya ngoku omulhondo syalimanyisaya enyumba hene-hene. Aliwe, munalhangira Nyamuhanga iniakathuha enyumba y’obunyakirimu, omwanya w’obutheya bw’okwenene aha thukabana n’erikolongana n’abandi abanzire Yehova. Aliwe munaminya ngoku sinangathoka eriyithunda hakuhi n’abandi ngathe ngatsuka eriyithunda hakuhi na Yehova. Neryo Esyonyimbo 37:4 muhanyiwathikya okw’ekyo: ‘Wutsemere Omwami Mukulhu nayu akendi syakuha ebyo muthima wawu anzire.’”

Akaghunzerera athi: “Munayitheghererya ngoku ngatholere ingamakirira Yehova. Sihali oyumulengire omwa bubuya. Neryo munahandika ebyo nangatsemera erikolha n’abandi, nuku nangabana abanywani abanzire Yehova. Mun’igha erisondekania omwa bandi mw’ebibuya n’erikolongana nabu inganasamalire ebibuya ebyo bisa.”

Ni kwenene, abanywani bethu abakakolera Nyamuhanga sibahikene. Abema ba Yehova nabu banawithe ebitsibu ng’abandi. Aliwe erikangiriribwa e Biblia likabahira mw’omuhwa w’eriwathikya abandi kyamathokekana. Ni ky’amenge eribya n’abanywani ng’abo. Aliwe, emisingyi ye Biblia yangana wathikya okwa bitsibu ebithe byangahwaho munabwire, ng’amalhwere awathelhama n’obulighe bw’eriholerwa?