1-2. Ni kindu kyahi ekikaswekaya ekyabya okwa kiro kye Pentekote omwa 33 E.K.?

KYABYA Kyasande omo ngyakya e Yerusalemu. Omwaka owa 33 E.K., okwa kiro kye Pentekote. Egurupu y’abigha nga 120 babya ibanahindene omwa kisenge ky’eyighulhu. (Emib. 1:13-15; 2:1) Habya ihamathalhaba biro bike Yesu alibabwire athi babye e Yerusalemu kundi babya ini b’erithunga ekihembo ky’embaghane. (Emib. 1:4, 5) Ni kyahi ekyakwamako?

² “Neryo-neryo omulenge mwalhua elhubulha, eribuhirira ng’erihunga erikalire.” Omulenge musulha omwa nyumba eyosi. Neryo, “ebirimi ng’eby’omuliro” mubyabya oko mithwe y’abigha, n’abosi “mubosulibwa n’omulimu abuyirire.” (Emib. 2:2-4) Omwa nzira eyikaswekaya eyi, Yehova mwuthulira oko ndeko eyo kw’omulimu wiwe abuyirire. (Emib. 1:8) Mubabya b’erimbere erihakabibwa omwa mulimu abuyirire * n’eribya n’amaha w’erisyathabalha na Yesu omo lhubulha.

3. Busana naki ababya okwa Pentekote mubathathika-thika ku babirihakabibwa omo mulimu abuyirire?

³ Ku wabya mughuma w’okwa bigha abo ababya bahindene omwa kisenge ky’eyighulhu ekiro ekyo, siwanga birirwe ekyabya. Ekindu ekiri ng’ekirimi ky’omuliro ikyabya imukyasa okwa muthwe wawu, kandi wamatsuka eribugha omwa mibughe muthina-muthina! (Emib. 2:5-12) Ahathe erithika-thika wanga kakasirye ku wabirihakabibwa omwa mulimu abuyirire.  Aliwe ibbwa abosi abakahakabibawa omwa mulimu abuyirire bakanahakabibawa omwa nzira y’eriswekya eyo kandi okwa buthuku bughumerera? Eyihi. Thukaminya thuthi?

4. Omwa kighonye ky’erimbere abahakabibwa abosi ibakanahakabibawa okwa buthuku bughumerera omwa ngebe yabu? Soborera.

⁴ Thukanaye okwa buthuku obw’eriberamu muhakabibwa. Si bugha indi Abakristayo nga 120 basa babahakabibawa n’omulimu abuyirire okwa Pentekote 33 E.K. Enyuma waho ekiro ikyan’ekyo, abandi nga 3,000 nabo mubathunga omulimu abuyirire. Mubahakabibwa bakabatizibwa. (Emib. 2:37, 38, 41) Aliwe omo myaka eyakwamako, si bugha indi Abakristayo abahakabibwa abosi babya bakahakabibwa bakabatizibwa. Abasamaria mubahakabibwa ihamabirilhaba buthuku balibatizibirwe. (Emib. 8:14-17) Kandi ekithabya kikabya buli kiro, Kornelio n’ab’eka yiwe basa b’abahakabibawa nibya isibali babatizibwa.​—Emib. 10:44-48.

5. Ngoku kiri omu 2 Abanya Korinto 1:21, 22, bikabya bithi omundu akahakabibwa omwa mulimu abuyirire?

⁵ Thulebaye kandi nga bikabya bithi omundu akahakabibwa. Okw’itsuka, abandi kyangana bakalira eriligha ngoku Yehova abiribasombolha. Bangana yibulya, ‘Ni kyahi ekyalekire Nyamuhanga inianyisombolha?’ Abandi bangana ghana eriyowa bathya. Mbulha ni kyahi okw’ebi, omukwenda Paulo akasoborera ekikabya okwa bakahakabibawa: “Omughulhu mwowa omwatsi w’ekwenene. . . . Iye Nyamuhanga mwabahirako ekiminyikalho * kiwe, iniakabaha omulimu abuyirire ogho alhagha. Omulimu abuyirire ni mutsimbo w’ekyo Nyamuhanga abirilhagha abandu biwe.” (Efe. 1:13, 14) Neryo kwesi, Yehova akakolesaya omulimu wiwe abuyirire erikakasya ndeke-ndeke Abakristayo aba ku abiribasombolha. Neryo omwa nzira eyi, omulimu abuyirire akabya “ng’omutsimbo [ekindu kutse omulhaghe]” ekikabakakasaya ngoku omwa buthuku obw’embere bakendi syabya elhubulha kera na kera butsira okwa kihugho.​—Soma 2 Abanya Korinto 1:21, 22.

6. Ni kyahi ekya Mukristayo omuhakabibwa atholere iniakolha erisyabana ekihembo kiwe ky’erighenda elhubulha?

 ⁶ Omukristayo amahakabibwa, mbwino kikamanyisaya kithi ni buthekwa-buthekwa akendi syaghenda elhubulha? Eyihi. Akaminya ku amasombolhwa erisyaghenda elhubulha. Aliwe, atholere in’ibuka erihano lino: ‘Neryo balikyethu, mubye n’omuhwa w’erihangania ndeke eribirikirwa lyenyu, n’eriyisowa lyenyu, kusangwa mwamakwama muthya simwendi syathogha na kera.’ (2 Pet. 1:10) Neryo Omukristayo nomwanga sombolhwa, kutse eribirikirwa erisyaghenda elhubulha, iniakendi thunga olhuhembo lhwiwe inianalyasighalha muthaleghulha.​—Fil. 3:12-14; Ebr. 3:1; Erib. 2:10.

7. Abahakabibwa bakaminya bathi ngoku babiribirikirwa elhubulha?

⁷ Aliwe omundu akaminya athi ku abiribirikirwa elhubulha? Eky’erisubirya kilhangirikire ndeke omwa binywe ebyo Paulo ahandikira abahakabibwa e Roma ababirikirawa “eribya baana,” kutse ababuyirire. Mwababwira athi: ‘Omulimu ogho Nyamuhanga abaha, syalibayira mo bakobe, syalileka mukubaha, nikwa akabayiramo baghalha ba Nyamuhanga, kandi omwa buthoki bw’omulimu thukabirikira thuthi: Thatha [Abba], Thatha! Omulimu wa Nyamuhanga akathulhagho haghuma n’ekirimu kyethu ko thuli baana ba Nyamuhanga.’ (Abar. 1:7; 8:15, 16) Neryo erilhabira omwa mulimu abuyirire, Nyamuhanga akakakasaya ababirihakabibwa ngoku babiribirikirwa elhubulha.​—1 Tes. 2:12.

8. Ebiri omu 1 Yoane 2:20, 27, NW bikakanganaya bithi ngoku Abakristayo abahakabibwa sibaliyithagha obwema bw’abandi ngoku ni bahakabibwa?

⁸ Yehova akaleka omundu iniakakasya ndeke omwa malengekania n’omwa muthima ngoku abirikokibwa elhubulha. (Soma 1 Yoane 2:20, 27, NW.) * Aliwe, Abakristayo abahakabibwa batholere ibakangiriribwa na Yehova ng’abandi abosi omwa kithunga. Aliwe sibaliyithagha obwema erilhua okwa wundi mundu indi bamabya bahakabibwa. Yehova akakolesaya akaghalha kiwe, omulimu wiwe abuyirire, eribakakasya ngoku ni bahakabibwa!

9. Ngoku kiri omu Abanya Efeso 1:18, ni mbinduka yahi eyo mundu akabana akahakabibwa?

⁹ Abangyi b’okwa baghombe ba Nyamuhanga munabwire kyangana bakalira eriyitheghererya ekikabya okwa mundu Nyamuhanga akamuhakabya. Bahikire kundi ibo sibahakabibwa. Nyamuhanga mwahangika abandu ini b’eribya okwa kihugho kera na kera, butsira elhubulha. (Enz. 1:28; Esy. 37:29) Aliwe Yehova abirisombolha abandi erisyabya elhubulha. Neryo akabya akabahakabya, akahindulha amaha n’amalengekania wabu, nuku babye n’amaha w’erisyabya elhubulha.​—Soma Abanya Efeso 1:18.

10. Kikamanyisayaki ‘eributhwa kandi’? (Lebaya n’omwatsi ahikwa.)

¹⁰ Abakristayo bakabya bakahakabibwa omo mulimu abuyirire, ‘bakabuthawa kandi,’ kutse “eributhwa oko mulimu.” * Yesu mwakangania ngoku sikithokekene erisoborera oyuthe muhakabibwa nga kikabya kithi omundu ‘akabuthwa kandi’ kutse “eributhwa oko mulimu.”​—Yn. 3:3-8.

11. Soborera embinduka eyikabya omwa bulengekania omundu akahakabibwa.

 ¹¹ Ni mbinduka yahi omwa bulengekania eyikahika okwa Mukristayo akahakabibwa? Yehova athali ahakabya Abakristayo aba, babya ibanawithe amaha w’erisyabya kera na kera okwa kihugho. Ibalindirire kutsibu obuthuku obwa Yehova akendi syaghunzaho obubi bwosi n’erikolha ekihugho mwa paradiso. Ibanawithe amaha w’erisyangirira abahughu babu kutse abanywani babu ababiriholha. Aliwe babere babirihakabibwa, amalengekania wabu mwahinduka. Busana naki? Sibugha indi mubapona amaha w’erisyikalha oko kihugho. Mubathahindulha amalengekania wabu busana n’ebitsibu kutse eriaghalhwa kutsibu. Sibugha ambu mubayowa isibanga thasyatsemera erisy’ikalha okwa kihugho kera na kera. Aliwe, Yehova mwakolesya omulimu wiwe abuyirire erihindulha amalengekania n’amaha wabu ebyo babya banzire kutsibu.

12. Ngoku kiri omu 1 Petero 1:3, 4, Abakristayo abahakabibwa bakayowa bathi busana n’amaha wabu?

¹² Oyuwabirihakabibwa anganayowa nga syatholere olhusunzo lhw’obughuli olhu. Aliwe syali thika-thika nahake Yehova eribya iniabirimusombolha. Omuthima wiwe akusulha mw’etseme n’erisima akaghanirya oko maha wiwe w’erisyabya elhubulha.​—Soma 1 Petero 1:3, 4.

13. Abahakabibwa bakayowa bathi busana n’engebe y’okwa kihugho?

¹³ Neryo, mbwino ekyo kikamanyisaya kithi abahakabibwa banzire eriholha? Omukwenda Paulo akasubiraya ekibulyo ekyo. Mwalinganisya omubiri wabu ng’ehema n’eribugha athi: ‘Kandi omughulhu thukine omwa hema y’eno, thukasimba, ithukanubibawa. Sithwanzire erireka omubiri w’eno, nikwa thwanzire eribana omubiri w’elhubulha, neryo omubiri w’engebe athoke eribya omo mwanya w’omubiri owakaholha.’ (2 Kor. 5:4) Sibugha ambu Abakristayo aba balhuhire engebe y’eno, neryo ambu banzire bahole lhuba. Mbaghane n’ekyo, bakatsemera engebe kandi banzire obuli kiro ibakolera Yehova ibane haghuma n’abanywani babu n’ab’okw’ibo. Aliwe, mbulha ni kyahi ekya bakakolha, banzire amaha wabu mabuyanga aw’obuthuku bw’embere.​—1 Kor. 15:53; 2 Pet. 1:4; 1 Yn. 3:2, 3; Erib. 20:6.

14. Ni byahi ebithekanganaya indi omundu abirihakabibwa n’omulimu abuyirire?

¹⁴ Obundi wunemubulha nawu Yehova ng’abirikuhakabya omwa mulimu abuyirire. Byamabya ikwabiribithya, yibulhaye ebibulyo bino: Wukanayowa iwanzire kutsibu erikolha erisonda lya Yehova? Wukanayowa iwunawithe omuhwa omwa mubiiri w’erithulira? Wune mwigha w’omuhwa ow’Ekinywe kya Nyamuhanga oyuwanzire eriyitheghererya emyatsi yiwe ey’omwakathi? (1 Kor. 2:10) Wukanayowa Yehova iniabiritsumulha kutsibu omubiiri wawu w’erithulira? Wukanayowa iwuwithe olhukwamirwa lhw’eriwathikya abandi bunyakirimu? Wanabiriyilhangirira ngoku Yehova akakuwathikaya omo nzira sy’embaghane omo ngebe yawu? Wamasubirya wuthi ee okwa bibulyo ebi ahathe erithika-thika, mbwino obo ikyamakangania kithi wabiribirikirwa erighenda elhubulha? Eyihi, kwa bithe bithya. Busana naki? Kundi abaghombe ba Nyamuhanga abosi ku bakanayowa bathya, mbulha ni bahakabibwa kutse eyihi. Kandi omw’ikolesya omulimu abuyirire, Yehova angana wathikya owosi-wosi okwa baghombe biwe erikolha ebindu ebi, nomubangabya ibawithe mahaki. Erithwalira haghuma, wamabya iwunemubulha nawu nga wabirihakabibwa n’omulimu abuyirire, erithika-thika eryo likakanganaya ngoku siwuli. Ababiribirikirwa  na Yehova sibalibulha nga babirikirwe kutse eyihi! Bakaminya!

15. Thukaminya thuthi ngoku sikirimanyisaya indi abosi abasondolhawa n’omulimu abuyirire bakendi syaghenda elhubulha?

¹⁵ Omwa Biblia mune eby’erileberyako bingyi by’abalhume b’erikirirya abathunga omulimu abuyirire; aliwe sibabya n’amaha w’erisyaghenda elhubulha. Dawudi mwasondolibwa n’omulimu abuyirire. (1 Sam. 16:13) Omulimu abuyirire mwamuwathikya eriyitheghererya emyatsi y’omwakathi eyihambire oku Yehova kandi mwamusondolha erihandika ebitsweka birebe omwa Biblia. (Mk. 12:36) Nomwabine, omukwenda Petero mwabugha athi “Dawudi mwathahethukira elhubulha.” (Emib. 2:34) Yoane Mubatizya ‘musulibwa n’omulimu abuyirire.’ (Lk. 1:13-16) Yesu mwabugha athi sihabya mundu oyulengire Yoane, aliwe kandi mwabugha athi Yoane syendi syabya okwa bakendisyabya omo Bwami bw’elhubulha. (Mt. 11:10, 11) Yehova mwakolesya omulimu abuyirire eriha abalhume aba amaaka w’erikolha ebikaswekaya, aliwe mwathakolesyagho eribasombolha erighenda elhubulha. Mbwino eki kikamanyisaya kithi babya bawithe erikirirya like okw’abo abasombolhawa erithabalha omo lhubulha? Eyihi. Kikakanganaya ngoku Yehova akendi syabalhubukya ibikalha okwa kihugho paradiso.​—Yn. 5:28, 29; Emib. 24:15.

16. Abaghombe ba Nyamuhanga bangyi bawithe mahaki munabwire?

¹⁶ Munabwire, abaghombe ba Nyamuhanga abanene sibawithe amaha w’erisyaghenda elhubulha. Nga Abrahamu, Sara, Dawudi, Yoane Mubatizya, n’abandi balhume n’abakali ab’omwa buthuku bwe Biblia, nabu bakalindirira erisyikalha okwa kihugho omw’isi sy’obuthabali bw’Obwami.​—Ebr. 11:10.

17. Ni bibulyo byahi ebya thukendi syakaniako omo mwatsi owakakwamako?

¹⁷ Kundi munabwire abaghuma b’okwa bahakabibwa bakine haghuma n’abandu ba Nyamuhanga, ihangana buthuka ebibulyo birebe. (Erib. 12:17) Ng’eky’erileberyako, abahakabibwa batholere ibayilhangira bathi? Omwa kithunga kyenyu mwamabanika oyukalya okwa biminyisyo by’Ekihulho ky’Omukama ky’Erigholho-gholho, wutholere iwamulhangira wuthi? Kandi ibbwa omughanzo w’abakabugha bathi babiribya bahakabibwa amabya anemuyongera? Kinatholere ikyakw’itha obuba? Thukendi subirya ebibulyo ebyo omo mwatsi owakakwamako.