1. Ni kyahi ekya Yehova abugha athi kikendisyabya omwa biro byethu?

YEHOVA mwabugha athi okwa buthuku bwethu buno: “Abandu ikumi erilhua omwa bihanda by’emibughe yosi basyahamba oko musike w’olhukimba lhw’Omuyuda, bathi: ‘Thwanzire erighenda nenyu, kundi thwabiryowa ngoku Nyamuhanga ali haghuma nenyu.’” (Zek. 8:23, NW) Hano “Omuyuda” akimanira abo Nyamuhanga abirihakabya omwa mulimu abuyirire. Bakahulhawamo “Israeli ya Nyamuhanga.” (Gal. 6:16) “Abandu ikumi” bakimanira abo abawithe amaha w’erisyabya kera na kera okwa kihugho. Banasi ngoku Nyamuhanga abirisombolha egurupu y’abahakabibwa kandi bakayowa ini kitsumbi erimuramya haghuma nabo.

2. “Abandu ikumi” bakaghenda bathi haghuma n’abahakabibwa?

² Nomwakine indi munabwire sikithokekene eriminya erina ly’obuli muhakabibwa, * abawithe amaha w’erisyabya okwa kihugho bangana “ghenda haghuma” n’abahakabibwa. Bathi? E Biblia yikabugha yithi “abandu ikumi” bakendi “syahamba oko musike w’olhukimba lhw’Omuyuda, n’eribugha bathi: ‘Thwanzire erighenda nenyu, kundi thwabiryowa ngoku Nyamuhanga ali haghuma nenyu.’” Omulhondo oyu akahulha Omuyuda mughuma. Aliwe ebinywe “nenyu” na “haghuma nenyu” bikamanyisaya abandu abalhabire oku mundu mughuma.  Eki kikamanyisaya kithi Omuyuda oyu si mundu mughuma aliwe akimanira egurupu yosi y’abahakabibwa. Abathe bahakabibwa n’abahakabibwa bakakolera Yehova ya haghuma. Nomwabine, sibali thwalha abahakabibwa ng’abasondoli babu, banasi ngoku Yesu ya musondoli wabu.​—Mt. 23:10.

3. Ni bibulyo byahi ebya thukendi kaniako omwa mwatsi ono?

³ Neryo ibbwa kundi munabwire Abakristayo abahakabibwa bakine haghuma na bandu ba Nyamuhanga, abandi bangana yibulya bathi: (1) Abahakabibwa batholere ibayithungako malengekaniaki? (2) Abakalya okwa biminyisyo okw’Ibuka olhuholho lhwa Yesu batholere ibalhangirwa bathi? (3) Thunatholere ithwakwa obuba omughanzo w’abakalya amayongera? Omwatsi ono akendi subirya ebibulyo ebyo.

4. N’ikunga lyahi eriri omu 1 Abanya Korinto 11:27-29 eryo abahakabibwa batholere ibaghaniryako ndeke, kandi busana naki?

⁴ Abahakabibwa batholere ibaghanirya ndeke okw’ikunga eriri omu 1 Abanya Korinto 11:27-29. (Soma.) Omuhakabibwa angalya athi okwa biminyisyo isyatholere? Angana  kolha ekyo omw’irya n’erinywa okwa biminyisyo aliwe inianasi ngoku syalighendera okwa bihano bya Yehova ebithunganene. (Ebr. 6:4-6; 10:26-29) Abahakabibwa batholere ibalholha embere buthaleghulha erithoka erisyabana “olhuhembo lhw’eribirikirwa endatha na Nyamuhanga erimathana na Kristo Yesu.”​—Fil. 3:13-16.

5. Abahakabibwa batholere ibabya n’amalengekaniaki?

⁵ Omulimu abuyirire wa Yehova akawathikaya abaghombe biwe eriyikehya, butsira eribya mw’emiyiheko. (Efe. 4:1-3; Kol. 3:10, 12) Abahakabibwa sibali yowa nga balengire abandi. Banasi ngoku Yehova syali baha omulimu abuyirire munene kwilhaba ogho akaha abandi. Sibali yowa nga basi ndeke ekwenene ye Biblia kwilhaba abandi. Kandi sibanga bwira owundi bathi nayu abirihakabibwa neryo bathi atsuke eribya akalya okwa biminyisyo. Omwakanya ky’ekyo, omw’iyikehya bakaminya ngoku Yehova musa yukasombolha abandu erighenda elhubulha.

6. Ngoku kiri omu 1 Abanya Korinto 4:7, 8, Abakristayo abahakabibwa batholere ibabya na mibereki?

⁶ Nomwakine indi abahakabibwa bakayowa ini lhusunzo eribirikirwa elhubulha, sibali lengekanaya bathi abandi batholere ibabaha ekitsumbi ky’embaghane. (Fil. 2:2, 3) Kandi banasi ngoku Yehova abere akabahakabya, mwathabwira abandu bosi. Neryo isikyaswekaya omuhakabibwa abandi bamathendi ligha aho naho bathi abirihakabibwa. Anasi ngoku e Biblia yikathubwira yithi isithwaligha lhuba-lhuba owosi-wosi oyukabugha athi Nyamuhanga abirimuha olhukwamirwa lhw’embaghane. (Erib. 2:2) Omuhakabibwa syalianza abandi bakamulhangira mwa w’ambaghane, neryo syanganza n’eriyikaniako ku ni muhakabibwa. Kandi sibalianza eribya ng’abakayipipa embere sy’abandi.​—Soma 1 Abanya Korinto 4:7, 8.

7. Abahakabibwa batholere ibayitheya okw’ikolhaki, kandi busana naki?

⁷ Abakristayo abahakabibwa sibatholere bakalengekania bathi batholere ibabya bakabya n’abandi abakabugha bathi ni bahakabibwa, eribya nga bamayikolha mwa kithongole. Sibali sondekanaya abandi bahakabibwa, erianza erikania okwa by’obuhakabibwa kutse bathi batholere ibabya bak’ighira e Biblia ya haghuma. (Gal. 1:15-17) Abahakabibwa bamakolha ebyo, ekithunga isikyendibya omwa bughuma. Ibakendibya ibamahakanisya obusondoli bw’omulimu abuyirire owakawathikaya abandu ba Nyamuhanga eribya omwa buholho n’obughuma.​—Abar. 16:17, 18.

8. Busana naki wutholere iwayitheya okwa mibere wukathwalira mw’abakalya okwa biminyisyo by’okw’Ibuka? (Lebaya n’omwatsi ahikwa.)

⁸ Thutholere ithwalhangira thuthi balikyethu abahakabibwa? Sikihikire eriyighomba omundu ya kutsibu, nomwangabya ini muhakabibwa. (Mt. 23:8-12) E Biblia yikabya yikakania okwa basyakulhu, yikathuhira mw’omuhwa ‘w’erigherererya erikirirya lyabu,’ aliwe siyiri bugha yithi thutholere ithwakolha omundu wosi-wosi mwa musondoli wethu. (Ebr. 13:7) Ni kwenene e Biblia yikabugha yithi hane abatholere “erihembwa kabiri.” Aliwe eki kiri kithya kundi “bakasondolha ndeke,” kandi “ibakolha kutsibu omubiiri w’erithulha engulhu n’erikangirirya,” butsira indi ni bahakabibwa. (1 Tim. 5:17) Thwamapipa abahakabibwa, ithwangana leka ibabulha obuholho. * Kandi ibbwa eky’akabi, ithwangana leka ikyabakalira eriyikehya. (Abar. 12:3) Sihali okw’ithwe oyuwanganza erikolha esobya yosi-yosi eyikalire ng’erithwikalya baghalha b’obu Kristo abahakabibwa!​—Lk. 17:2.

9. Thwanga kangania thuthi ku thusikirye Abakristayo abahakabibwa?

⁹ Thwanga kangania thuthi ku thusikirye abo Yehova akasombolha eribya bahakabibwa? Sithutholere thukababulya nga mubahakabibwa bathi. Ebi ni byabu, sibithuhambireko. (1 Tes. 4:11; 2 Tes. 3:11) Kandi isithwalengekanaya thuthi abo bali nabu omwa butheke, ababuthi babu, kutse abandi ab’okw’ibo nabu ni bahakabibwa. Omundu syali sighalhaya amaha w’erighenda elhubulha. Nyamuhanga yukamuhagho. (1 Tes. 2:12) Kandi thutholere ithwayitheya okw’ibulya ebibulyo ebyanga ponesya abandi. Ng’eky’erileberyako, sithwanga bulya omukali w’omuhakabibwa ng’akayowa athi eriminya ngoku syendi syabya na mwira wiwe okwa kihugho kera na kera. Nomwabine, thunasi ndeke-ndeke ngoku omwa kihugho kihya-kihya, Yehova akendi syughuthya obwagha bw’obuli mundu.​—Esy. 145:16.

10. Thukayitheghaya thuthi thwamayihighulha okw’iyighomba abandi?

¹⁰ Thwamathendi lhangira abahakabibwa nga bathulengire, ikikendi thutheya. Kithi? E Biblia yikabugha yithi abandi bahakabibwa bangana leghulha. (Mt. 25:10-12; 2 Pet. 2:20, 21) Aliwe thwamayitheya okw’ipipa kutse eriyighomba abandi, isithwendibya ng’abakakwama abandi bandu, nomubangabya bahakabibwa kutse abasibwe kutsibu kutse ababirikolera Yehova habw’obuthuku buuli. (Yuda 16) Neryo, bamaleghulha kutse bakasighania ekithunga, erikirirya lyethu omu Yehova isiry’endisebebera kutse erileka erimukolera.

11. Ni kyahi ekinemubya okwa mughanzo w’abakalya okwa biminyisyo?

¹¹ Habw’emyaka mingyi, omughanzo w’abakalya okwa muggati n’erinywa okwa vini abya akasuba ahisi. Lero lino omughanzo wabu akayongera obuli mwaka. Eki kinatholere ikyathw’itha buba? Eyihi. Thuthaghanirya okwa nzumwa hino.

12. Busana naki sithutholere thukayilhalikirira busana n’omughanzo w’abakalya okwa biminyisyo okw’Ibuka?

¹² “Yehova anasi abandu biwe.” (2 Tim. 2:19) Mbaghane na Yehova, baghalha bethu abakabara abakalya ibo sibanga minya oyulyalya omwa kwenene. Neryo omughanzo w’abakalya mukabya imune abakalengekanaya bathi  mbwino ni bahakabibwa. Ng’eky’erileberyako, abandi ababya bakalya endambi muyahika bamaleka. Abandi bakanabya ibanalhwere omwa bwongo, neryo ikyaleka ibalengekania bathi mbwino bakendi syathabalha na Kristo elhubulha. Omo kwenene, sithwasi omughanzo w’enyine-nyine ow’abahakabibwa owasighere okwa kihugho.

13. E Biblia yikanahulha omughanzo w’abahakabibwa abakendi syabya ibakine okwa kihugho obulighe bunene bukatsuka?

¹³ Abahakabibwa bakendisyabya ibane omwa bitsweka bingyi by’ekihugho Yesu akasyabathwalha elhubulha. (Mt. 24:31) E Biblia yikanabugha yithi omwa biro by’enduli, hakendi syabya ihane abahakabibwa bake okwa kihugho. (Erib. 12:17) Aliwe siyiri bugha nga ni bangahi abakendi syabya ibakine okwa kihugho obulighe bunene bukatsuka.

14. Ngoku kiri omu Abanya Roma 9:11, 16, ni kyahi ekya thutholere ithwaminya okw’isombolha bahakabibwa?

¹⁴ Yehova iyo yukathwamu obuthuku bw’erisombolha abahakabibwa. (Abar. 8:28-30) Yehova atsuka erisombolha abahakabibwa Yesu abirilhubuka. Abakristayo b’omwa kighonye ky’erimbere bakabya abosi nga babya bahakabibwa. Ebighonye ebyakwamako, abangyi ababya bakabugha bathi ni Bakristayo babya isibakwamire Kristo omo kwenene. Nomwabine, omwa myaka eyo, Yehova mwahakabya abake ababya Bakristayo b’ekwenene. Babya ng’engano eya Yesu abugha athi yikendi syakulira haghuma n’ebithi. (Mt. 13:24-30) N’omwa biro by’enyuma-nyuma bino, Yehova akinasombolha ab’okwa 144,000. * Neryo  Nyamuhanga amathwamu erisombolha abandi b’okw’aba ebiro by’enyuma-nyuma bikayahwayo, sithutholere thukathika-thikira amenge wiwe. (Soma Abanya Roma 9:11, 16.) * Thutholere ithwayitheya okw’ibya ng’abahingyi abayineghenaya abo Yesu akanayako omwa musyo wiwe. Mubayineghenia okwa mibere omukama akolera abatsuka erikolha okwa saha y’erighunzerera.​—Mt. 20:8-15.

15. Abahakabibwa abosi nina b’okwa “mughombe oyuthereghulha n’ow’amenge,” oyuli omu Matayo 24:45-47? Soborera.

¹⁵ Si bugha ambu abosi abawithe amaha w’erisyaghenda elhubulha ni b’okwa “mughombe oyuthereghulha n’ow’amenge.” (Soma Matayo 24:45-47.) Ngoku kyanabya omwa kighonye ky’erimbere, munabwire Yehova na Yesu banemulisya, kutse erikangirirya abangyi omw’ikolesya baghalha bethu bake. Abahakabibwa bake basa omwa kighonye ky’erimbere babakolesibawa erihandika Amasako w’Ekigiriki. Munabwire, abahakabibwa bake babawithe olhukwamirwa lhw’eriha abandu ba Nyamuhanga ebyalya by’obunyakirimu okwa “mughulhu ow’atholere.”

16. Omo mwatsi ono wam’ighaki?

¹⁶ Ni byahi ebya thwam’igha omwa mwatsi ono? Yehova abirithwamu eriha abandu bangyi engebe y’erikotha okwa kihugho n’abake abakendi syathabalha na Yesu engebe omwa lhubulha. Yehova akahemba abaghombe biwe abosi​—“Omuyuda” kuthya ‘n’abandu ikumi’​—kandi akabugha athi abosi baghendere okwa bihano bighumerera n’erisighalha bathaleghulha. Abosi batholere ibayikehya. Abosi batholere ibamukolera haghuma kandi ibabya bughuma. Kandi abosi batholere ibakulha-kulhania obuholho omwa kithunga. Enduli yinemuseghera hakuhi, ithwe bosi ‘ng’ekihangulho kighuma’ thuthwemu erikolera haghuma n’erighendera okwa busondoli bwa Kristo.​—Yn. 10:16.